Salmos

115 Jan nanakarojja, Jehová Dios Tata, jan nanakarojja,*

antisas sutimaruy jachʼañcham,+

munasirïtama* jan apanukusirïtam layku.+

 2 ¿Kunatarak markanakajj

“kawkinkarak jupanakan Diosapasti”+ sasin sapjjañapäspasti?

 3 Jiwasan Diosasajj alajjpachanakankiwa,

taqe kuntï jupajj munki ukanakwa jupajj luri.

 4 Markanakan idolonakapajj qollqeta qorita luratäpjjewa,

jaqenakan amparapampi luratäpjjewa.+

 5 Uka idolonakajj lakanïpjjewa, ukampis janiw parlapkiti;+

nayranïpjjewa, ukampis janiw uñjapkiti;

 6 jiñchunïpjjewa, ukampis janiw istʼapkiti;

nasanïpjjewa, ukampis janiw muktʼapkiti;

 7 amparanïpjjewa, ukampis janiw llamktʼapkiti;

kayunïpjjewa, ukampis janiw sarnaqapkiti;+

uka idolonakan mallqʼanakapatjja janiw kunas istʼaskiti.+

 8 Uka idolonak lurir jaqenakajja uka idolonakjamaw tukupjjani,+

uka idolonakar confiyir taqe jaqenakas uka idolonakjamaw tukupjjarakini.+

 9 Israel marka, Jehová Diosar confiyam,+

jupaw juman yanapirimasa escudomasa.+

10 Aarón chachat jutir wawanaka,+ Jehová Diosar confiyapjjam,

jupaw jumanakan yanapirimasa escudomasa.

11 Jehová Diosar ajjsaririnaka, Jehová Diosar confiyapjjam,+

jupaw jumanakan yanapirimasa escudomasa.+

Jupaw Israel chachat jutir wawanakarojj bendisini,+

jupaw Aarón chachat jutir wawanakarojj bendisini.

13 Jehová Diosasti jupar ajjsarapki ukanakarojj bendisiniwa,

jiskʼanakarus jachʼanakarus bendisiniwa.

14 Jehová Diosaw jumanakarojj waljaptayapjjätam,

jumanakarusa wawanakamarusa.+

15 Jehová Diosajj jumanakar bendispan,+

alajjpacha, oraqe Lurirejj+ jumanakar bendispan.

16 Alajjpachanakajj Jehová Diosankiwa,+

ukampis oraqjja jaqenakaruw jupajj churi.+

17 Jiwatanakajj janiw Jah Diosarojj jachʼañchapkiti,+

sepulturankapki ukanakajj janirakiw uk lurapkaspati.+

18 Ukampis jiwasanakajj Jah Diosaruw jachʼañchañäni,

jichhat uksarusa wiñayatakisa.