“Nayätwa thakisa, cheqasa, jakañasa”

1, 2. 1) ¿Kunatsa jiwasajj Diosar jakʼachasiñ jan puedksna? 2) ¿Kunjamsa Jesusajj Diosar uñtʼañatak yanaptʼistu?

INAS mä familiaramaru jan ukajj mä munat amigomar visittʼir sarasajj utapar jan puriñ puedirïkstati. Ukhaman uñjasisajj ¿kunsa jumajj lurirïta? ¿Janit yaqhanakarojj jisktʼasirïkta? Ukampis jumatï mä suma jaqemp jikisisma, jupajj thak uñachtʼayañat sipansa “antisas nayamp chik sarañäni” siristam ukhajja, ¿kunjamakis jikjjatasisma? Cheqas chuymas chuymaw jikjjatasisma.

² Jesusajj uka pachparakwa jaqenak laykojj lurawayi, janitï ukham lurkaspäna ukhajj janiw Jehová Diosarojj kunjamats jakʼachasiñ puedksnänti. Niyakejjay juchararästanjja, taqeniw ‘Diosat jutki uka jakañat’ wali jayanktanjja (Efesios 4:17, 18). Ukatwa Diosar jakʼachasiñasatakisa Diosar sum uñtʼañasatakis maynin yanaptʼap muntanjja. Ukampis qalltan parlaniwayktan uka jaqjamajj Jesusaw taqenir yanaptʼistu. Kunjamtï capítulo 1 ukan yatjjataniwayktanjja, jupajj “jutam, nayar arkita” sasaw invittʼarakistu (Marcos 10:21). Ukhamarus jupar arkañasatakejj walja razonanakwa churistu. Mä kutejja jupajj akham sänwa: “Nayätwa thakisa, cheqasa, jakañasa. Naya taypikiw Awkin ukar puriñajj utji” sasa (Juan 14:6). Kunjamsa Jesús toqejj Jehová Diosar jakʼachassna uka toqetwa jichhajj yatjjataskañäni, ukjjarusti kunjamsa Jesusajj ‘thakïtapsa, cheqätapsa, jakañätapsa’ uñachtʼayi uka toqetwa yatjjataskarakiñäni.

 3. ¿Kunatsa Jesús taypikejj Diosar jakʼachassna?

³ Jehová Diosajj wali wakiskir mä luräwi Jesusar churawayi, ukatwa jupa taypikejj Diosar jakʼachassna.a Amtanakap phoqañatakejja, Diosajj Yoqaparuw ajlliwayi (2 Corintios 1:20; Colosenses 1:18-20). Jesusajj kuna wakiskir luräwsa katoqawayi uk sum amuyañatakejja, kunas Edén jardinan pasäna ukwa amtañasa. Ukanjja Adanampi Evampejj Supayamp mayachasisaw Jehová Dios contra saytʼapjjäna (Génesis 2:16, 17; 3:1-6).

 4. 1) ¿Kuna wakiskir jisktʼas Edén jardinan utjäna? 2) Uka jisktʼar qhanañchañatakejj ¿kunsa Jehová Diosajj luräna?

⁴ Edén jardinan Diosar kutkatasipjjatapat aka wakiskir jisktʼaw utjäna: ¿Jehová Diosajj cheqpachapunit taqe kuns cheqaparjam luri, ukat munasiñampit apnaqaraki? Uka jisktʼar qhanañchañatakejja, perfecto Yoqaparuw Jehová Diosajj aka oraqer khitanïna. Kuntï Yoqapajj lurañapäkäna ukajj wali importantepunïnwa, jupajj vidap churasaw Awkipan sutip qʼomachañapäna, vidapampiw jaqenakarojj juchampit jiwañampit kutsuyañaparakïna. Ukhamarus jiwañkamajj janipuniw jupajj Awkipat jitheqtañapäkänti, ukhamatakwa kuna jan walinakatï Supayan kutkatasitapat utjkäna taqe ukanakajj askichasispäna (Hebreos 2:14, 15; 1 Juan 3:8). Jehová Diosajj millón millón perfecto angelanakanïnwa (Daniel 7:9, 10). Ukampis jupanak taypit ajlliñat sipansa, munat ‘sapa Yoqaparuw’ wakiskir luräwimp phoqañapatak ajllïna, jupajj Jesucristo sasin uñtʼatänwa (Juan 3:16).

5, 6. ¿Kunjamsa Jehová Diosajj Yoqapar confiyatap uñachtʼayäna, ukat kunatsa Yoqapar wal confiyäna?

⁵ Jehová Diosan ukham ajllitapat janiw payachasktanti, kuna laykutejj taqe chuymaw jupajj sapa Yoqapar confiyäna. Jesusan aka oraqer jutañapatak walja maranak faltkipanjja, ‘Yoqajajj jan walinakan uñjaskasas janipuniw nayat jitheqtkaniti’ sasaw Jehová Diosajj arsüna (Isaías 53:3-7, 10-12; Hechos 8:32-35). Kunatsa Diosajj uka profecía arspachäna uka toqet amuytʼañäni. Yoqapajj mayni wawanakapjam jupa pachpa amtir luratarakïnwa, ukampis Jehová Diosajj walpun jupar confiyäna, ukatwa ‘nayat janipuniw jupajj jitheqtkaniti’ sasin säna. Kuna laykutejj sumwa Yoqapar uñtʼäna, qhawqsa Jupar kusisiyañ munäna uks yatirakïnwa (Juan 8:29; 14:31). Ukhamarusa, Jesusampi Jehová Diosampejj purapatwa wal munasipjje (Juan 3:35). Ukham munasipjjatapatwa jupanakajj wali mayachtʼatäpjje, taqe chuymarakiw wal confiyasipjje (Colosenses 3:14).

⁶ Kunjamtï yatjjatktanjja, Jesusajj wali wakiskir luräwi katoqawayi. Awkipajj taqe chuymaw jupar confiyi, ukatjja jupanakajj purapatwa wal munasipjjaraki. Ukatwa ‘Jesús toqekiw Diosampejj sum apassna’ sasin sistanjja. Ukampis yaqha toqenwa Jesusajj Awkipar jakʼachasiñasatak yanaptʼistu, jichhajj uka toqet yatjjatañäni.

7, 8. ¿Kunatsa Jesusajj ‘Yoqa sapakiw Awkir sum uñtʼi’ sasin säna?

⁷ Jehová Diosar jakʼachasiñasatakejj mä qhawqha mayitanakwa phoqañasa (Salmo 15:1-5). Jehová Diosamp katoqatäñatakejj kuna mayitanaksa phoqañasa ukjja, Jesusakiw sum uñtʼi. Jupajj akham sänwa: “Awkijaw nayarojj taqe kuns churitu. Janiw khitis Yoqarojj sum uñtʼkiti, jan ukasti Awki sapakiw juparojj sum uñtʼi. Janirakiw khitis Awkirojj sum uñtʼkiti, jan ukasti Yoqa sapakiw sum uñtʼi. Khitinakarutï Yoqajj Awkit qhanañchañ munki ukanakaw uñtʼapjjaraki” sasa (Mateo 11:27). Jesusajj ‘Yoqa sapakiw Awkir sum uñtʼi’ sasin arsusajja, kunatï cheqäki ukwa jupajj parlaskäna. Kunatsa ukham sispachäna uk jichhajj yatjjatañäni.

⁸ Niyakejjay Jesusajj Jehová Diosan ‘taqpach luratanakapat nayrïrïchejja’, jupampi Diosampejj wali sumpunwa apasipjje (Colosenses 1:15). Jesusajj luratäkäna ukhat yaqha angelanakajj utjkäna ukhakamajja, walja tiempow pasäna. Uka tiemponjja, Awkimpi Yoqampejj wali sumaw apasipjjäna (Juan 1:3; Colosenses 1:16, 17). Yoqajj Awkipamp walja tiempo jakasajja Awkipjamarakiw amuyjjäna, Awkipan voluntadapsa, leyinakapsa, kunjamsa mä kuns luri ukanaks yateqarakïnwa. Cheqansa, Jesusajj sumpunwa Jehová Diosarojj uñtʼi, ukatwa aka oraqenkkäna ukhajj Awkipat wali sum qhanañchäna. Janiw khiti jaqes jupjamajj ukham qhanañchkaspänti.

9, 10. 1) Awkipajj kunjamasa ukjja, ¿kunjam toqenakatsa Jesusajj uñachtʼayäna? 2) Diosamp katoqatäñatakejj ¿kunanaksa lurañasa?

⁹ Kunsa Jehová Diosajj amuyi, kunjamsa jikjjatasi, kunsa servirinakapat suyi ukanakjja, Jesusajj yatichatanakapampiw sum qhanañchäna.b Kunjamsa mayninakajj Awkipar sum uñtʼapjjaspa uka toqet parlkasajja, Jesusajj akham sarakïnwa: “Khititejj nayar uñjkitu ukajj Awkirojj uñjarakiwa” sasa (Juan 14:9). Jesusajj arsutapansa luratapansa Awkipat yateqasitapwa sum uñachtʼayäna. Kunjamtï Biblian qellqatäkejja, jupajj wali yatiñampi chuymar purtʼkirwa yatichäna, khuyapayasiñapatwa jaqenakar qolläna, ukatjja tʼaqesir jaqenakat sinttʼasisajj jachaqtʼasirakïnwa. Ukhamasti, kunanaktï Jesusajj lurkäna ukanakajj kunsa Jehová Diosajj lurarakispäna ukwa uñachtʼayistu (Mateo 7:28, 29; Marcos 1:40-42; Juan 11:32-36). Awkin amtapajj kunanakasa kunjam chuymanisa ukanakjja, Jesusajj arsutapampi luratanakapampiw sum uñachtʼayäna (Juan 5:19; 8:28; 12:49, 50). Jiwasatï Jehová Diosamp katoqatäñ munstan ukhajj Jesusan yatichäwinakaparuw istʼañasa, jupat yateqasiñatakis chʼamachasiñasarakiwa (Juan 14:23).

¹⁰ Jesusajj Awkipar sum uñtʼi, Awkipjamarakiw taqe kuns luri. Ukatwa Jehová Diosajj jiwasar yanaptʼañapatakejj jupar ajlliwayi, ukhamat Jesús toqe Jupar jakʼachasiñasataki. Ukhamajj kunjamsa Diosar jakʼachassna uk sum amuytanjja. Ukampis Jesusajj “nayätwa thakisa, cheqasa, jakañasa. Naya taypikiw Awkin ukar puriñajj utji” sasaw sarakïna. ¿Kamsañsa uka arunakampejj munpachäna? Jichhajj uka toqet yatjjatarakiñäni (Juan 14:6).

11. 1) ¿Kunatsa Jesús toqekejj Diosar jakʼachassna? 2) ¿Kunas Juan 14:6 texton Jesusat qhanañchasi? (Nota uñjjattʼäta).

¹¹ Jesús toqekiw Diosar jakʼachassna. Ukham sasajj kamsañsa munasktan uka toqet jukʼamp yatjjatañäni. Jehová Diosamp katoqatäñatakisa jupar jakʼachasiñasatakis Jesusakiw ‘mä thakir’ uñtatajj yanaptʼistaspa. ¿Kunatsa ukham sistanjja? Jesusajj jiwañkamaw Jehová Diosarojj jan jitheqtas servïna, ukhamatwa juchampit jiwañampit wiñayatak kutsuyawayistu (Mateo 20:28). Jupatï jiwas layku jan jiwkaspäna ukhajja, janipuniw Diosarojj jakʼachasiñ puedksnänti. Juchajj mä perqar uñtataw Diosar jakʼachasiñat jarkʼistäna, kuna laykutejj Jehová Diosajj santo Diosawa, janipuniw jupajj jucha lurañarojj askit uñjkiti (Isaías 6:3; 59:2). Ukampis Jesusan jiwas layku jiwatapatwa juchanakasajj qʼomachatäjje, janirakiw perqar uñtatajj Jehová Diosar jakʼachasiñat jarkʼjjestuti (Hebreos 10:12; 1 Juan 1:7). Kuntï Diosajj Jesús tayp lurawayki ukarutï confiyañäni ukhajja, Jehová Diosampejj katoqatäñäniwa. Cheqansa, ukhamatakwa ‘Diosampejj sumar manttanjja’ (Romanos 5:6-11).c

12. ¿Kuna toqenakansa Jesusajj mä ‘thakir’ uñtatajja?

¹² Diosar orasktan ukhaw Jesusajj ‘thakir’ uñtatarakejja. Cheqansa, Jesusan sutipjjar taqe chuyma orasktan ukhakiw Jehová Diosajj istʼistaspa (1 Juan 5:13, 14). Jesús pachpaw akham säna: “Jumanakatejj alajjpachankir Awkir kuns mayipjjäta ukhajja, jupajj nayan sutij-jjaruw churapjjätam. [...] Mayipjjam, katoqapjjätawa, ukhamatwa jumanakajj wali kusisitäpjjäta” sasa (Juan 16:23, 24). Ukatwa Jehová Diosarojj Jesusan sutipjjar orasiñasa, ukatjja Diosarojj “nanakan Awkija” sasaw sañasaraki (Mateo 6:9). Maysa toqet Jesusaw suma ejemplosajja, ukhamatwa jupajj jiwasatak ‘thakir’ uñtatarakejja. Kunjamtï yatjjatawayktanjja, Awkipajj kunjamänsa uk Jesusakiw sum uñachtʼayawayi. Ukhamajj Jehová Diosar kusisiyañatakisa jupar jakʼachasiñatakis Jesusat yateqasiñatakiw chʼamachasiñasa, wali amuyumpiw kayup arkañasaraki (1 Pedro 2:21).

13, 14. 1) Kunatï cheqäki uk parlatap ¿kunjamsa Jesusajj uñachtʼayäna? 2) ¿Kunanak lurasas Jesusajj ‘cheqätap’ uñachtʼayäna, ukat kunatsa ukham lurañapäna?

¹³ Jesusajj Diosan Arupat kunatï cheqäki ukpunwa parlirïna (Juan 8:40, 45, 46). Janirakiw lakapan kuna engaños utjkänti (1 Pedro 2:22). Enemigonakapasa, “Diosan thakipatjja cheqaparuw yatichtajja” sasaw jupar sapjjäna (Marcos 12:13, 14). Ukampis “nayätwa [...] cheqasa” sasajja, Jesusajj janiw kunanaktï arskäna, predickäna, yatichkäna ukanakatak parlkänti. Jan ukasti jukʼampinakatwa jupajj parlaskäna.

¹⁴ Jesusan aka oraqer jutañapatak walja maranak faltkipanjja, Jehová Diosan amuytʼayatajj walja profecianakwa Biblia qellqerinakajj Mesiasat qellqapjjäna. Uka profecianakajja kunjamsa Jesusajj aka oraqen jakañapäna, kunjamsa Diosan arunakap yatiyañapäna, kunjam jiwayatas uñjasiñapäna taqe ukanakwa qhanstayäna. Ukat Moisesan Leyipajja, kuna profecianakas Mesiasjjar phoqasiñapäna ukwa qhanstayarakïna (Hebreos 10:1). Jesusajj jiwañkamaw Diosat jan jitheqtañapäkänti, kunanakatï profecianakan qellqatäkäna ukanaks phoqañaparakïnwa. Ukhamatakwa Jehová Diosajj jachʼañchatäspäna, mä arunjja jupa sapak cheqa profecianak arsurïtapaw uñachtʼayasispäna. Cheqansa, ¡Jesusajj wali jachʼa responsabilidadanïnwa! Ukatwa jupajj arsutapampisa, luratapampisa, sarnaqatapampis profecianakan cheqätap uñachtʼayäna (2 Corintios 1:20). Ukhamajj cheqpachapuniw Jesusajj ‘cheqänjja’. Jehová Diosajj kuna profecianaktï arskäna ukanakajja, kunanaktï Jesusajj aka oraqen lurkäna ukanakjjaruw sum phoqasïna (Juan 1:17; Colosenses 2:16, 17).

15. 1) ¿Kunjamsa Diosan Yoqapar confiyatas uñachtʼaysna? 2) ¿Kunsa Diosan Yoqapar confiyatas laykojj katoqañäni?

¹⁵ Jesusarojj ‘jakañ vida’ sasaw uñtʼasiraki, kuna laykutejj jupa toqekiw jiwasajj ‘cheqpach jakañ’ katoqsna (1 Timoteo 6:19). Bibliajj akham siwa: “Yoqar confiyki ukajja, wiñay jakañ katoqani. Yoqar jan istʼki ukajja, janiw wiñay jakañ uñjkaniti, jan ukasti Diosan colerasiñapaw jupjjankani” sasa (Juan 3:36). ¿Kunjamsa Diosan Yoqapar confiyatas uñachtʼaysna? Nayraqatajja, jupa toqekiw wiñay jakañ katoqsna sasaw creyiñasa, ukatjja luratanakasampiw Jesusar confiyatas uñachtʼayañasa. Jupat yatjjataskakiñatakisa, kuntï yateqktan ukarjam sarnaqañatakisa, kayup arkañatakis chʼamachasiñasarakiwa (Santiago 2:26). Ukhamajj jiwasatï Diosan Yoqapar confiyañäni ukhajja, wiñay jakañwa katoqañäni. “Jiskʼa tama” taypinkir ajllit cristianonakajja, taqeniw alajjpachan jan jiwir cuerpo katoqapjjani. ‘Walja jaqenaka’ jan ukajj ‘yaqha ovejanaka’ sasin uñtʼatäpki uka taypinkir cristianonakajja, paraisoptayat aka oraqen perfecto jaqenakaruw tukupjjani (Lucas 12:32; 23:43; Apocalipsis 7:9-17; Juan 10:16).

16, 17. 1) ¿Kunjamatsa Jesusajj jiwatanakatakejj ‘jakañar’ uñtasitarakejja? 2) ¿Kunatsa Jesusan kayup arkañatak chʼamachasiñasa?

¹⁶ ¿Jiwatäjjapjje ukanakajj wiñay jakañ katoqapjjarakpachäniti? Jïsa. Jesusajj jupanakatakejj ‘jakañarakiwa’. Lázaro amigopar janïr jaktaykasajja, Jesusajj Lazaron Marta kullakaparojj akham sänwa: “Jiwatat jaktañasa jakañasa nayätwa. Khititejj nayar confiyki ukajja, jiwkani ukhas jaktaniniwa” sasa (Juan 11:25). Jehová Diosajj Yoqaparuw ‘jiwañampin Sepulturampin llavenakap’ churawayi, ukatwa Jesusajj jiwatanakar jaktayañatakejj chʼamanejja (Apocalipsis 1:17, 18). Jutïrinjja, Jesusajj uka llavempiw “Sepulturan” punkunakap jistʼarani, ukatjja ukankapki ukanakarojj jiwañatwa jaktayani (Juan 5:28, 29).

¹⁷ “Nayätwa thakisa, cheqasa, jakañasa”. Uka arunakampejj kunarus aka oraqer jutäna ukwa Jesusajj qhanstayäna, ukatwa uka arunakajj jiwasatak wali importantejja. Uka qhepatjja, “naya taypikiw Awkin ukar puriñajj utji” sasaw jupajj sarakïna (Juan 14:6). Jesusan uka arunakapajj cheqäskapuniwa, ukatwa jupan kayup arkañatakejj chʼamachasiñasa, kuna laykutejj Jesusakiw “Awkin ukar” puriñatakejj thak sum uñachtʼayistaspa, jupakiw jan chhaqañatakis yanaptʼarakistaspa.

18. ¿Kunjamsa Jesusar cheqpachapun arkatas uñachtʼaysna?

¹⁸ Kunjamtï yatjjatawayktanjja, Jesusajj wali wakiskir luräwi katoqawayi, jupa sapakiw Awkirojj sum uñtʼaraki. Ukatwa jupar arkañatakejj walja suma razonanakajj utjistu. Ukampis kunjamtï nayrïr capitulon yatjjataniwayktanjja, Jesusar cheqpachapun arkatas luratanakasampiw uñachtʼayañasa, janiw aru mayakejj arsuñasäkiti ni pata chuymakis jupar arkañasäkiti. Cheqansa, Jesusan kayup arkañatakejj yatichataparjamaw sarnaqañasa, jupat yateqasisas ukarjamaw jakañasaraki (Juan 13:15). Aka librow ukatakejj wali sum yanaptʼistani.

19, 20. ¿Kunjamsa aka librojj Jesusar arkañatak yanaptʼistu?

¹⁹ Jutïr capitulonakanjja, kunjamsa Jesusajj sarnaqäna ukat kunjamsa Diosan arunakap yatiyäna uka toqenakatwa yatjjataskañäni. Aka librojj kimsa seccionanakar jaljatawa. Nayrïr seccionanjja, Jesusajj kunjam jaqënsa ukat kunjamsa sarnaqerïna ukanakatwa yatjjataskañäni. Payïr seccionansti, kunjam chuymampis Diosan arunakap yatiyirïna ukat qhawqsa chʼamachasirïna uka toqetwa yatjjataskarakiñäni. Ukat kimsïr seccionanjja, kunjamanakatsa munasiñ uñachtʼayäna ukanakatwa yateqarakiñäni. Ukhamarus capítulo 3 ukhat qalltasajja, “¿Kunjamsa Jesusar arksna?” sat recuadrow sapa capitulon utji. Uka recuadronakanjja, Bibliat apstʼat textonakampi lupʼiñatak jisktʼanakampiw utji, ukanakaw kunjamsa parlatasansa luratasansa Jesusat yateqasitas uñachtʼaysna uk amuyañatak yanaptʼistani.

²⁰ Jucharar jaqenakäkstansa, Jehová Diosajj kuntï lurawayki ukaw jupar jakʼachasiñasatakejj yanaptʼawayistu, janirakiw jupats jayankktanti. Jehová Diosajj jaqenakar munasitapatwa Yoqapar khitaniwayi, ukhamat kunjamsa Jupamp sum apassna uk jiwasar yatichañapataki (1 Juan 4:9, 10). Ukhamajj qhawqsa Jehová Diosajj munasistu uk yatisajja, ¡Jesusajj “nayar arkita” sasin siskäna uka invitación taqe chuyma katoqasipjjañäni! (Juan 1:43).