Bibliankir libron jakhupa 61: 2 Pedro

Qillqiri: Pedro

Kaukins qillqasïna: Babilonia (?)

Kuna marans tukuyasïna: 64 jakʼana

KUNAPACHATÏ Pedrox payïr cartap qillqkatäyna ukhaxa jupax jiwañapxa yatisxarakïnwa. Diosan Arunakap sum uñtʼañ tuqitwa cristiano masinakaparux taqi chuym amtayäna, ukhamat Diosan arunkap apasipkakiñapataki. Payïr Pedro qillqataxa, qillqiripan sutiparak api, ukhamax Apóstol Pedrox janiw qillqkiti sas payachasiñatakixa, ¿kunas utjpachati? Khitin qillqatas aka cartax uk yatiñatakixa pachpa qillqatarakiw sum qhanañchi. Qillqiripax jupatxa akham siwa, “naya Simón Pedroxa, Jesucriston serviripätwa apostoluparakïtwa” sasa (2 Ped. 1:1). Ukat ak sarakïna, “payïri cartwa qillqanipxsma” sasa (3:1). Eliasampir, Moisesampiru, Jesusamp parlasipkirwa Pedrox Santiagompi ukat Juanamp uñjapxäna ukatwa chuymar purtʼkiri uk uñjirjamax qillqtʼarakitayna (1:16-21). Kunjamtï nayax jiwañaxäkäna uksa Jesusax yatxarakïnwa sasaw Pedrox sänxa (2 Ped. 1:14; Juan 21:18, 19).

² Ukampis Bibliat yaqhip yatxatirinakaxa, payïr Pedron qillqatapatxa janiw nayrïr Pedron qillqatapjamäkiti sasaw sapxi, Pedrox janis Payïr Pedron qillqiripäkaspän ukham amuyapxi. Ukampis ukax janiw kunäkisa, paypach cartan kunanakas qillqasïna, ukat kuna amtampis sapa maynis qillqasïna ukanakaxa janiw kipkakänti. Ukampis Pedrox sänwa: “Silvanox nayatakix mä suma aski jilatat uñtʼatawa, juparurakiw” aka nayrïr cartxa qillqayta sasa, ukat inas Silvanorox sarakchïna, kunatï qillqatanakaxar askichañäkchi ukxa askichtʼaskakïtaw sasa, ukhamax ukanakaw mayjtʼayaspänxa uka pä qillqatanakarux jan kipkakïpxañapatakixa, ukampirus Silvanox janjamakiw payïr Pedrox qillqaskäna ukhax ukankänti yanaptʼañatakixa (1 Ped. 5:12). “Iglesia tuqit Padres satäpkis ukanakanxa, janiw suma uñtʼatäkiti” siski uka arsutanakar atinisisakiw yaqhipanakax aka cartax janiw Diosan amuytʼayatäkiti sas parlapxi. Ukampis “Griego Arut Qullan Qillqatanakan Diosan arunakapjam wali uñtʼatanaka” siski ukanwa jikxatasiraki, ukat Tercer Concilio de Cartago qillqatäki, ukat nayra qillqatanakasti payïr Pedrorux Diosan Arupjampunwa uñjapxirïna.a

³ ¿Payïr Pedrox kunapachas qillqasïna? Inas 64 mara jakʼanakan qillqaschïna, Babilonia markatpacha jan ukax uka jakʼanakana, ukampis janiw jaya pachax saraqkataynati nayrïri carta qillqatapatxa, ukampis kawkha chiqatpuns qillqasïna ukax janiw qhanäkiti. Payïr cartap qillqañkamaxa Pablon cartanakapax wali uñtʼatänwa tamanakanxa, ukhamax wali uñtʼatäpachänwa Pedrotakisa, jupax Diosan Arupäkaspas ukham uñtʼarakirïna “Qullan Qillqatanakamp” chika. “Aka cartsti, khitinakatix nanakjamaraki mä suma iyawsañ jikxatapktas ukanakaruw qillqanipxsma” sasaw payïr cartapxa apayäna, ukat ukamp chikxa nayrïr cartapx khitinakarutï qillqkäna ukanakarusa ukat khitinakarutï Pedrox Diosan arunakap yatiykäna ukanakarus qillqarakïnwa (2 Ped. 3:15, 16; 1:1; 3:1; 1 Ped. 1:1).

KUNATSA WALI ASKIXA

⁸ ¡Diosan arunakap sum yatiñax wali askipuniwa! Pedrox Hebreo Arut Qullan Qillqatanakat suma yatxatatänwa ukwa qillqatanakapanxa qhanañchtʼi. Qullan ajayun amuytʼayatapunïskiw sasaw akham säna: “Profetanakasti janipuniw kunsa munañanakapatxa parlapkänti, jan ukasti jupanakax Diosar katuyata jaqinakäpxanwa, Dios tuqitarakwa parlapxänxa, Qullan Ajayun amuytʼayata”. Ukhamarakiw Pablon yatiñkankañapax Diosan ‘churatänxa’ sarakïwa (1:21; 3:15). Taqpach Qullan Qillqatanakat ukham amuytʼañasa, Diosan Arunakapat sum yatxataskakiñasa jiwasanakatakix wali askiwa. Yaqhip jaqinakax akham sapxänwa siw Pedroxa: “Taqi kunas pachpakiskarakisä, aka uraqis utjkis ukkhatpacha” sasa, ukhamax janipun kunäkipans luratanakaxampix walikïsktwa sasax uka jaqinakjamax sañäniti (3:4). Janirakiw kʼari yatichirinakan sipitanakaparus jaltʼkañäniti kunjamtï Pedron qillqatapan payïr jaljapanxa qhanañchkix ukhama. Ukatpï Pedron iwxtʼanakapsa Diosat amuytʼayat maynïr qillqirinakan iwxtʼanakapsa amtaskakiñasaxa. Ukanakax jan jithiqtas ‘uka chiqa arunakan suma saytʼatakïskañatakisa’ yanaptʼistaniwa, ukat “qhispiyiri Tatit Jesucristosar uñtʼapxam, munasiñapanraki jiltapxam” jan qhiparasa altʼat chuymampi (1:12; 3:18).

⁹ ‘Diosaru ukhamarak Jesucristo Tatitusar uñtʼaskakiñax’ wal yanaptʼistu, 2 Pedron 1:5-7 qillqatapanwa kunjam suma jaqipkitï cristianonakax uka tuqit Pedrox mayat mayat khanañchtʼi. Ukatxa 8 tʼaqapanxa saskakiwa: “Jumanakantix taqi akanakax utjanixa, ukatsti ukxa sum jilayapxarakïta ukkhaxa, jumanakan jakañamax janiw inamayatakïkaniti, janirakiw inamayataki Tatiturus uñtʼapkarakïtati” sasa. ¡Aka jan wali urunakan Diosan Arunakap jankʼaki yatiyaskakiñatakixa uka arunakax walpun chʼamañchistu! (1:2.)

¹⁰ ¡Jehová Diosaw ‘arsüwinakapsa churistuxa, uka arsüwinakapasti wali jachʼanakawa’ jan payachasis apaskakiñatakixa, wali askirakiwa chʼamachtʼasiskakiñasatakisa! Ukatpï Pedrox Diosan Apnaqäwip munasipkakiñapatakix alaxpachar Jesucristump chiqa saririnakaruxa aka arunakampi amtayänxa: “Diosax jumanakar jawsapktam, ukhamarak ajllipktam ukanxa sum saytʼapxañamaxa; jumanakatix taqi akanaka lurapxäta ukkhaxa janipuniw aynachtʼapkätati. Ukhamatwa jumanakarux churasirakini jiwasan qhispiyiri Jesucriston wiñay markapar qhispita mantapxañamaxa” sasa. Pedrox Jesucriston jachʼanchat apnaqäwipatarakwa parli, Eliasampir, Moisesampiru Jesusamp parlasipkäna ukhaw jupax ukxa uñjarakïna, ukat Pedrox saskakïnwa: “Jukʼamp thurtʼata profecía aruwa utjarakistu” sasa. Ukax chiqapunïskiwa, Jehová Diosan Apnaqäwipat taqi profecianakax phuqasiskapuniniwa. Ukatwa kuntï Pedrox saskäna ukxa Isaiasan profeciapat jan payachasis akham sistanxa: “Ukampis jiwasax arsutaparjamaw suytʼasktan mä machaq uraqi, mä machaq alaxpachampi, kuntix Diosax: ‘Churapxämaw’ siskistu uka. Ukansti taqi kunasa chiqapapunïniwa” sasa (2 Ped. 1:4, 10, 11, 19; 3:13; Isa. 65:17, 18).

[Qhanañchäwi]