‘Jupanakarusti aka arunak sarakim’

 1. 1) ¿Jesusampi Jeremiasampejj kuna toqetsa kipkäpjje? 2) ¿Diosan arunakap yatiykasajj kunatsa Jeremiasat yateqasiñasa?

DIOSAN arunakapat yatiyañjja Jesusat yateqastanjja; khä nayrïr patak maranakanjja, Jeremías profetäkaspas ukhamwa Jesusat amuyapjjäna (Mat. 16:13, 14). Jeremiasajj Jesusjamarakiw mä suma luräwi Diosat katoqäna. Mä kutejja, Diosajj aka arunak yatiyaniñapatakiw Jeremiasar khitäna: “Jupanakarusti [‘aka arunak’, NM] sarakim: ‘Israelan Tatitu Diosapajj siwa [...]’” sasa (Jer. 13:12, 13; Juan 12:49). Taqe chuymapuniw Diosan arunakap yatiyäna, Jesusajj ukhamarakwa yatiyäna.

 2. Jeremiasan markachir masinakapjamajja, ¿jichhürunakan jaqenakajj kun lurapjjañapas wakisiraki?

² Jehová Diosan Qhanañchirinakapat inas yaqhepajj akham sapjjchispa: “Jeremiasajj Diosan markaparuw yatiyañapäna, ukampis jiwasajj Jupar jan uñtʼapki uka jaqenakaruw yatiyir sartanjja, ukhamasti yatiyäwisajj janiw Jeremiasajj yatiykäna uka kipkäkiti” sasa. Uka arunakajj cheqäskapuniwa, kunattejj Jeremiasan marka masinakapajj “jan amuytʼan” jaqenakäjjapjjänwa ukat cheqpach Diosatsa jitheqtjjapjjarakïnwa (Jeremías 5:20-22 liytʼasiñapawa). Diosamp sum apasjjapjjañapatakejja, jan wali luräwinakap apanukjjapjjañapänwa. Jichhürunakanjj niya ukhamarakiwa, cristianöpjjtwa sapki ukanakasa ukat jan cristianöpki ukanakasa, Jehová Diosar ajjsartañ yateqapjjañapawa ukat cheqa yatichäwinakarjamaw sarnaqapjjañapa. Jeremiasat yateqasisajj kunjamsa cheqpach Diosar yupaychsna ukat jaqe masisar yanaptʼaraksna uka toqet yatjjatañäni.

 3. ¿Profetjam khitañatakejj Diosajj kunjams Jeremiasar chʼamañchäna ukat kunjamsa jupajj jikjjatasïna?

³ Kunapachatï Jeremiasajj profetjam irnaqañ qalltkäna ukhajja aka arunakwa istʼäna: “Kawkirutejj nayajj khitkäma ukaruw jumajj saräta. Kuntejj nayajj siskäma ukwa parlarakïta. Jan khitirus ajjsaramti, nayaw jumampi chiktʼatäskä jumar imañataki. Naya [Jehová] Tatituw ukjja arsta” sasa (Jer. 1:7, 8). Ukat ¿Jehová Diosajj kamachänsa? Jeremiasajj akham siwa: “[Jehová] Tatitojj amparapa loqtanisinjja, lakajjat llamktʼitu, sarakituwa: Nayaw arunakajj-jja lakamaru uchta. [‘Jichhüruw profetjam ajllissma’, NM]” sasa (Jer. 1:9, 10). Ukat aksarojja, Jeremiasajj Diosan arunakapat yatiyañapätapwa yatjjäna.a Jehová Diosamp chʼamañchatäsajja, Diosar serviñatakiw chʼamapajj wal jiljjattäna (Isa. 6:5-8).

 4. Kunjamsa jilat kullakanakajj Diosan arunakapat taqe chuym yatiyapjje uk qhanañchtʼam.

⁴ Jichhürunakanjja, Jehová Diosajj janiw yupaychirinakaparojj amparapamp llamktʼkiti, jan ukasti qollan ajayupampiw suma arunak yatiyapjjañapatakejj chʼamañchtʼi. Waljaniw wali chʼamañchtʼata ukat kusisita jikjjatasipjje. España markankiri Maruja sat kullakat parltʼañäni, jupan amparapasa, kayunakapas 40 maranak jilaw jan unjjtjjeti. Utat uta yatiyañajj jupatakejj chʼamawa, ukatwa jupajj Diosan arunakap yatiyañatakejj yaqha toqenakat chʼamachasi, sañäni cartanak apayasa. Kuntï Maruja kullakajj yatiyañ munki uka arunakjja phuchapaw qellqtʼi. Mä kutejja, phajjspach wali sum irnaqtʼañatakiw chʼamachasïna, uka phajjsinjja “Marujampi phuchapampejj” 150 cartanakwa mä tratadomp usktʼasa apayapjjatayna; ukhamatwa markap jakʼankir mä markan niya taqenir Diosan arunakap yatiyapjjatayna. “Bibliat taqe chuym yatjjatañ munirejj maynis utjchi ukhajja, Jehová Diosajj Bibliat mä yateqerimpiw bendicistani” sasaw Marujajj phuchapar satayna. Ukat tamapankir mä irpir chuyman jilatajj akham sasaw qellqatayna: “Maruja kullakjam jilat kullakanak utjatapatjja walpun Jehová Diosar yuspärta, jupanakajj kunatï wali wakiskirïki uk sum uñjañwa yatichistu” sasa.

 5. 1) Jan istʼasir jaqenakampis jikiskchïnjja, ¿kunjamsa Jeremiasajj Diosan arunakap taqe chuym yatiyaskakïna? 2) ¿Kunjamatsa jichhürunakan Diosan arunakap taqe chuym yatiyaskaksna?

⁵ Jeremiasajj jakkäna uka urunakanjja, Jerusalén markankirinakajj Diosan cheqa arunakaparojj ‘janiw munapkänti’. Jaqenakajj janis istʼañ munapkchïnjja yatiyaskakïnwa. Jupajj akham sänwa: “Colerasiñaman phoqhantatätwa, Tata; janiw jukʼampi [‘aguantañjamäjjeti’, NM]” sasa (Jer. 6:10, 11). Jiwasajja, ¿kunjamatsa taqe chuym chʼamachasitas uñachtʼayaraksna? Diosat yatiyañajj mä aski churäwipuniwa uka toqet lupʼisawa chʼamachasitas uñachtʼaysna. Politiconakasa ukat yupaychäwi pʼeqtʼirinakasa, Diosan sutipjja jiskʼachapjjewa ukajj qhanaw amuyasi, kʼari yupaychäwinkirinakajj jan phinqʼaniw jaktan uka cheqanakankir jaqenakarojj sallqjjapjje, kunjamtï Jeremiasan urunakapan sacerdotenakajj lurapkäna ukhama (Jeremías 2:8, 26, 27 liytʼasiñapawa). Ukampis Diosan Apnaqäwipat suma yatiyäwinak yatiyktan ukajja, Diosajj jaqenakar wal khuyaptʼayasirïtapwa qhan uñachtʼayi (Lam. 3:31, 32). Uka toqet sum amuyañajja, llampʼu chuymaninakar yanaptʼañataki ukat Diosan arunakap yatiyaskakiñatakiw yanaptʼistani.

 6. ¿Kuna jan waltʼäwinakans Jeremiasajj uñjasïna?

⁶ Cheqasa, Jehová Diosan arunakap taqe chuym yatiyaskakiñajj chʼamakiwa. Jeremiasasa Diosar yupaychäwipan jan waltʼayataw uñjasïna, kʼari profetanakaw jupar jan waltʼayapjjäna. Ukanakat mayajja, Jeremías 28 jaljaw qhanañchistu. Niya taqeniw arunakaparojj jan istʼañ munapkänti ukat awisajj sapakiw jikjjatasirakïna (Jer. 6:16, 17; 15:17). Ukatjja, uñisirinakapan jan waltʼayataw uñjasïna jupanakajj jiwayañ munapjjäna (Jer. 26:11).

7, 8. ¿Suma luräwinak lurañapatakejj kunjamsa Diosajj Jeremiasar ‘pantjasiyäna’?

⁷ Mä tiempojja, Jeremiasarojj sapa kutiw jan wali arunakampi sawkasipjjäna ukat jiskʼachapjjäna, ukatwa kunjamsa jikjjatasïna uk Jehová Diosarojj yatiyäna. Jeremías 20:7, 8 (liytʼasiñapawa) qellqatarjamajja, Jehová Diosaw Jeremiasarojj “pantjasiyatayna”. ¿Diosaw pantjasiyatayna siski ukajj kamsañs muni?

⁸ Jehová Diosajja, janiw kunäkipans jan wali lurañapatakejj ‘pantjasiykänti’, jan ukasti suma luräwinak lurañapatakiw ‘pantjasiyäna’ uk sañ muni. Jeremiasajj kuna luräwtï Diosat katoqkäna uk phoqañatakejj janis chʼamanïkaspa ukhamaw amuyasïna, kunattejj walpun jupar uñisipjjäna, ukampis Jehová Diosan yanaptʼapampiw uka jan walirojj saykatäna. Ukhamajja, Jeremiasan pantjasir chuymanïtapat sipansa, Diosaw jachʼa chʼamanejja, ukajj qhanaw amuyasi. Kunapachatï Jeremiasajj janipun chʼamanjam amuyasjjäna ukhaw Jehová Diosajj ‘pantjasiykaspas’ ukham jachʼa chʼamapamp yanaptʼäna. Ukhamajja, Jupan chʼamapampiw kuna jan waltʼäwintï uñjaskäna ukar saykatäna, ukatjja, jan istʼatasa, uñisitasa ukat jiwayañ munatasa Jeremiasajj Diosan arunakap yatiyaskakïnwa.

 9. ¿Jeremías 20:11 qellqatajj kunjamsa chʼamañchistu?

⁹ Jehová Diosaw ‘guerran jan atipjkaya nuwasir jaqjama’ Jeremiasarojj taqe kunan yanaptʼäna (Jer. 20:11). Jehová Diosar taqe chuyma yupaychaskakiñatakisa ukat jan atipjkañjam jachʼa jan waltʼäwinakampi jan aynachtʼañatakisa Jupaw yanaptʼarakistani. Jehová Diosas ‘guerran jan atipjkaya nuwasir jaqjam’ jiwasamp chiktʼatäkaspa ukham amuyañasawa.

10. ¿Uñisipjjestani jan ukajj aynachtʼayañ munapjjestani ukhajj kamachañänisa?

¹⁰ Apóstol Pablojj ukham amuyapjjañapatakiw uñisirinakamp arknaqata uñjasipkäna uka cristianonakarojj chʼamañcharakïna. Akham qellqatayna: “Jumanakasti Jesucriston arunakaparjam sarnaqapjjam. Nayasti [...] yatiñwa munta [...], chʼamampi sarantasa mä jaqjamaki, ukhamarak qhespiyasiña arunakar iyawsäwi laykusti taqenisa mayaki nuwasïwinkasasa, uñisirinakamampis jan sustjayasisa” sasa (Fili. 1:27, 28). Kunjamtï Jeremiasasa ukat nayrïr cristianonakas Diosan arunakap yatiyañatakejj Jehová Diosar atinisipkänjja, ukhamwa jiwasajj lurañasaraki. Kunapachatï uñisipjjestani jan ukajj aynachtʼayañ munapjjestani ukhajja, Diosaw jiwasamp chikäski ukat Jupaw chʼamañchistani uk amtañasapuniwa. Jeremiasarusa ukat walja jilat kullakanakarusa Jehová Diosaw chʼamañchäna, ¿jiwasarojj janit ukham chʼamañchkarakistaspa? Diosajj mayisitanakajarojj istʼapunitaniwa sasajj mayisiskakiñasawa. Ukat jan walinakar jan purtʼasiñatakis ‘pantjasiykistaspas’ ukhamwa jan waltʼäwinakar jan ajjsaras saykatañatakejj chʼam churistani. Ukat Jehová Diosan yanaptʼapampejja, jan phoqerjamäkayätan uka lurañanaksa phoqarakiñäniwa (Hechos 4:29-31 liytʼasiñapawa).

11, 12. 1) ¿Diosan arunakap yatiyañatakejj kunjamanakatsa walja jaqenakar jikjjatsna? 2) ¿51 janankki uka fotografiajj kuns amuytʼayistu?

¹¹ Jeremiasajj kunjamsa Diosar servïna uka toqet yatjjatañajja, suma yatichirïñatakiw walja toqet yanaptʼistani. Jeremiasajj pä tunk jila maranak profetjam irnaqjjasajj akham sänwa: “Nayasti jumanakarojj mayampi mayampwa [‘alwatpach’, NM] parlapjjaraksma, ukampisa jumanakajj janiw nayarojj istʼapkistati” sasa (Jer. 25:3). Kunjamtï amuyktanjja, Jeremiasajj alwatpach yatiyañ qalltirïna. ¿Kunsa ukajj yatichistu? Walja tamanakanjja, jilat kullakanakajj wali alwatwa autonakajj sayapki, trenanakajj mistki uka cheqanakan Diosan arunakap yatiyapjje. Pata toqenakanjja, yapuchirinakarusa jan ukajj khitinakatï wali alwat irnaqañ qalltapki ukanakarus jilat kullakanakajj yatiyapjjarakiwa. ¿Jeremiasajj taqe chuym yatiykäna uka toqet kunanakampsa yateqasiraksna? ¿Yatiyir mistuñataki tantachäwiru horasapar puriñatakejja alwat sartasiñatakejj chʼamachassnati?

¹² Yaqhep cheqanakanjja, jaypʼunaka ukat arumjaruw utat ut yatiyirejj sarapjje, ukhamatwa waljanir jikjjatapjje. Yaqhep jilat kullakanakajj arumjaruw gasolina aljapki, manqʼa aljapki uka cheqanakana ukat kawkhanakantï arum paqar irnaqapki uka negocionakan yatiyapjjaraki. ¿Utapansa jan ukajj yaqha cheqanakansa kuna horasanakas jaqenakar Diosan arunakap yatiyañatak jikjjatsna ukatakjam tiempo apstʼassnati?

13, 14. 1) Jeremiasan yateqaskañ luräwipajja, ¿kunjamsa yateqañ munirinakar kuttʼañasatakejj yanaptʼistu? 2) ¿Jeremiasan kuna luratapas yateqañ munirinakar kuttʼañajj wali wakiskirïtap uñachtʼayi?

¹³ Awisajja, templo punkuna jan ukajj Jerusalén punkun profecía arunak yatiyaniñapatakiw Jeremiasar Diosajj khitäna (Jer. 7:2; 17:19, 20). Ukhamatwa Diosan arunakapjja Jeremiasajj walja jaqenakar yatiyasapäna, markan aytata jaqenakasa, alakip lurir jaqenakasa uka punknämwa mistupjjerïna, mantapjjarakirïna, ukhamatwa kuntï nayrajj istʼapkäna uk sum amuytʼayañatakejj walja kuti jupanakampejj Jeremiasajj parlasapäna. Ukhamajja, Diosan arunakap yateqañ munapki jupanakan ukar kuttʼañasapuniwa, ukwa uka qellqatanakajj yatichistu.

¹⁴ Jeremiasajj Diosan profetapjam yatiykäna ukarjamäsapänwa jaqenakan jakäwipajja, uk jupajj sum yatïna. Mä kutejja, janiw Diosan arunakap markachirinakar yatiyirjamäkänti, ukatwa Baruc secretarioparojj jupa lanti khitäna (Jeremías 36:5-8 liytʼasiñapawa). ¿Kunjams uka kipka jiwasajj luraraksna? Maynirojj kuttʼanïwa sistan ukhajja, ¿arsutasarjamajj phoqasktanti? Bibliat yateqañ munki jan ukajj Bibliat yateqerisan ukar jan kuttʼirjamäkstan ukhajja, ¿jiwas lanti visittʼañapatakejj mayni jilatarusa jan ukajj kullakarus khittanti? Jesusajj akham sänwa: “Jumanakan arsuñamajja akakïñapawa, ‘Jïsa’” sasa (Mat. 5:37). Arsutasar phoqañajj wali wakiskiripuniwa, kunattejj Diosan khitatätanwa Jupajj cheq parliri ukat yäpar lurir Diosawa (1 Cor. 14:33, 40).

15, 16. 1) Jeremiasat yateqasisajja, ¿kunjamsa yaqhep jilat kullakanakajj jukʼamppach yatiyañatakejj tiempo apstʼasipjjaraki? 2) Chile markat mä experienciajj utjki uka toqetwa 53 janan jikjjataski uka fotojj qhanañchtʼi, ¿uka experienciat kuna askinaks yateqassna?

¹⁵ Jeremiasajj Babilonia markar apatäpkäna uka judionakarojja, ‘kuntejj jumanakataki arskta’ sasin Jehová Diosajj siskäna uka suma arunakamp chuymachtʼañatakiw carta apayäna (Jer. 29:1-4, 10). Jiwasajj ukhamarakwa kuntï jutiritak Diosajj arski uka suma arunak carta toqesa jan ukajj teléfono toqes yatiyaraksna. Parientenakasarusa, jaya cheqan jakapki uka jaqenakarus jan ukajj utapan jan jikjjatañjamäki ukanakarusa, ¿teléfono toqesa ukat carta toqes yatiyaraksnati?

¹⁶ Jeremiasat yateqasis lurapki ukat taqe chuym Diosan arunakap yatiyapki uka jilat kullakanakajj wali askinakwa jikjjatapjje. Chile markankir mä kullakajja, trenanakajj mistupki uka cheqat misttasinkir mä warmimpiw parltʼatayna. Uka warmejj Diosan arunakap istʼasajj wali kusisitaw jikjjatasïna ukat uka toqet jutïrin utajan parltʼaskakiñäniw sasaw satayna, ukampis kawkhans uka warmejj jaki uk qellqtʼasiñjja kullakajj armtʼasitaynawa. Bibliat yateqañ munapki ukanakar yanaptʼañajj wali wakiskirïtap amuyasisajja, Jehová Diosaruw yanaptʼa mayisitayna. Qhepa uruw pachpa horasar kuttʼatayna ukat ukanwa wasitat jikjjatatayna. Uka warmejj kawkhans jaki uk sum jichhajj qellqtʼasiwayjjäna, uka qhepatsti Bibliat sum amuytʼayañatakiw visittʼatayna. Jehová Diosajja, akapacharojj niyaw tʼunjani, ukampis khitinakatï arrepentisipki ukat suma yatiyäwinakar atinisipki jupanakan qhespiyasipjjañapatakejj mä suytʼäwiw utji (Lamentaciones 3:31-33 liytʼasiñapawa). Yatiyktan uka cheqanakan taqe chuym yatiyasaw uka suytʼäwir atinisitas uñachtʼayarakiñäni.

17. ¿Diosan arunakap yatiykasajj kunjamatsa Jeremiasat yateqasiraksna?

¹⁷ Jehová Diosajj judionakan jiwapjjañapjja janiw munkänti. Jerusalén markan tʼunjatäñapatak tunka maranak faltaskäna ukhajja, Babilonia markar apatäpkäna ukanakatakejj kuna suytʼäwis utjäna ukwa Jeremías toqejj yatiyäna. Akham sänwa: “Nayarakiw jupanakarojj suma uñjaskä, ukatsti aka markaruw kuttayanjjarakï; akanwa jupanakarojj wali suma jakasiyarakï, janirakiw mayampi jupanakarojj tʼunjkjjäti; ayruntäwa, ukatsti janirakiw jikʼinukkäsa” sasa, ukat Jeremiasajj saskakïnwa: “Qhepa urunakamatakejj mä suytʼañaw utjaski” sasa (Jer. 24:6; 26:3; 31:17). Kunjamtï Diosajj jaqenakat amuykäna ukhamwa Jeremiasajj amuyarakïna, ukatwa Diosan arunakap taqe chuym yatiyäna ukat akham sasaw Diosan ewjjanakap markachirinakarojj yatiyarakïna: “Uka jan wali sarnaqäwinakamsa ukhamaraki jan wali luräwinakamsa apanukupjjam” sasa (Jer. 35:15). Tamamajj yatiyki uka cheqankirinakarojja, ¿kunjamanakat yanaptʼañsa amuytʼaskta?

18, 19. 1) ¿Kuna amuyunaksa apanukuñasa Jehová Diosan arunakap yatiykasajja? 2) Jeremiasat yateqasisajja, ¿kunjam amuyunïñasasa?

¹⁸ Jaqenakar munasitapajj Jeremiasan janipuniw tukuskänti. Jerusalén marka tʼunjaskäna uka qhepatsa jaqenakarojj khuyaptʼayasiñamp uñjaskakïnwa (Lamentaciones 2:11 liytʼasiñapawa). Judionakajj jupanak pachpas jan waltʼäwir purtʼasipkchïnjja, janiw jupajja: “¡Sapjjarakiyäsmasä!” sasajj siskänti. Jan ukasti wali llaktʼataw jikjjatasïna. Jiwasasti, janiw phoqañ laykukejj Diosan arunakap yatiyir sarañasäkiti. Jan ukasti Diosan arunakap yatiyir sarañatak chʼamachasitasajja, Diosar taqe chuym munasitasa ukat jaqe masisar munasitaswa qhan uñachtʼayañapa, cheqas taqeniw Diosar uñtasit lurtʼatätanjja.

¹⁹ Jehová Diosan Qhanañchiripäñajja, wali aski churäwipuniwa. Ukhamwa Jeremiasajj amuyarakïna, ukat akham qellqatayna: “Kunapachatejj jumajj nayaru parljjayista ukapachajja, arunakamjja nayajj manqʼjamwa manqʼayäta; uka arunakamaw chuymajjarojj kusisiyarakïnjja, nayasti [‘sutimjjar profetat uttʼayatätwa’, NM] jumankarakstjjaya, taqe chʼamani Dios Tatitu” sasa (Jer. 15:16). Diosan arunakap yatiyatasatjja, waljaniw Diosar uñtʼapjjani ukat munasipjjarakiniwa, kunattejj Jupïpanwa jupanakajj jakapjjaraki. Ukar jukʼamp yanaptʼaskakiñatakejja, Jeremiasjamarakiw taqe chuyma ukat munasiñamp yatiyañasa.