Jehová Diosan organizacionapat janipun jitheqtapjjañäniti

SANTIAGOJJ akham sasaw qellqäna: “Diosar jakʼachasipjjam, jupajj jumanakar jakʼachasirakiniwa” sasa (Sant. 4:8). Jehová Diosajj jukʼamp jachʼa autoridadaniwa, ukampis jiwasajj pantjasiri aleq jaqekïtanwa, ukhamäkchisa jupajj oracionanakas istʼiwa, kuna laykutejj sapa mayni jiwasanakat janiw jayankkiti (Hech. 17:27). Diosar jakʼachasisakiw amigopar tuksna. Ukham amigopäñatakejj sapa kutiw orasiñasa (Sal. 39:12). Sapa kutirakiw Bibliat yatjjatañasa, janitï ukham lurksna ukhajja, janiw Diosar uñtʼañ puedksnati, kunas jupan munañapajja, kun lurañassa muni ukanaks janiw yatkaraksnati (2 Tim. 3:16, 17). Orasisasa Bibliat yatjjatasasa Jehová Diosaruw munastanjja, jupar jan chuym ustʼayañatakiw chʼamachasiraktanjja (Sal. 25:14).

² Jesucristo toqekiw Jehová Diosar jakʼachassna (Juan 17:3; Rom. 5:10). Jesusajj Awkipar sum uñtʼi, ukatwa akham säna: “Janiw khitis Yoqarojj uñtʼkiti, jan ukasti Awki sapakiw juparojj uñtʼi. Janirakiw khitis Awkirojj uñtʼkiti, jan ukasti Yoqa sapakiw jupar uñtʼi. Khitinakarutï Yoqajj Awkit qhanañchañ munki ukanakaw uñtʼapjjaraki” sasa (Luc. 10:22). Evangelio libronak liytʼasaw Jesusar sum uñtʼsna, Jehová Diosarus jupa toqew uñtʼaraksna. Ukhamatwa Diosar jukʼamp jakʼachassna.

³ Jehová Diosamp sum apasiñatakejja, janiw jupar istʼañ yatichkistu uka organizacionapat jitheqtañasäkiti. Ukhamarus Jesusajj qhawqha autoridadanisa uksa respetañasarakiwa. Kunjamtï Mateo 24:45-47 texton siskejja, Jesusajj ‘suma phoqeri amuyasir esclavoruw’ Diosan servirinakapar ‘tiempopar manqʼa’ churañapatak uttʼayi. Uka esclavojj luräwip sum phoqaski, ukatwa Diosar serviñ toqen walja yanaptʼanak churistu. Jehová Diosajj jupanak toqew Biblia sapüru liyipjjam, tantachäwinakar sarapjjam, ‘Reinon suma yatiyäwinakap’ yatiyañatak chʼamachasipjjam sasin sistu (Mat. 24:14; 28:19, 20; Jos. 1:8; Sal. 1:1-3). Ukhamajj uka esclavor istʼapjjapuniñäni. Janipun Diosan markapat jitheqtapjjañäniti, antisas instruccionanakaparjam sarnaqañatak chʼamachasipjjañäni. Ukham lurañäni ukhajja, jukʼampiw Jehová Diosar jakʼachasiñäni, jan walinakan uñjaskañäni ukhas jupaw yanaptʼistani, chʼamaps churarakistani.

⁴ Jumatï walja maranak Jehová Diosar servisksta ukhajja, jan walinakan uñjasiñajj kunjamasa uk sumwa amuypachätajja. Ukampis jumatï mä qhawqha maranakak Diosan markapankasksta ukhajja, Supayajj Jehová Diosar istʼapki ukanak conträtap sumwa amuyarakpachätajja (2 Tim. 3:12). Jaya maranakasa jan ukajj jukʼa maranakakis Diosar serviskstajja, janipuniw Diosar serviñan aynachtʼañamäkiti ni ajjsarañampis apayasiñamäkiti. Jehová Diosajj yanaptʼapjjämawa, salvapjjämawa, wiñay jakañwa churapjjarakïma sasaw arsuwayi (Heb. 13:5, 6; Apoc. 2:10).

⁵ Diosan Reinopajj 1914 maranwa apnaqañ qalltawayi, ukhat aksarojja Supayajj janiw alajjpachankjjeti, jupasa demonionakapas aka oraqer jaqoqanitäpjjewa. Niyakejjay Supayajj wali coleratächejja, Diosan markapankirinakarojj jukʼampiw jan waltʼayaski, jaqenakarus jukʼampiw tʼaqesiyaskaraki. Taqe ukanakajj qhep qhepa urunakan jakaskataswa uñachtʼayistu (Apoc. 12:1-12). Ukampis Supayan tukjatäñapatakejj mä jukʼa tiempokis faltjjchejja, jiwasajj jan walinakan uñjasikipuniñäniwa.

⁶ Supayajj qʼala jiskʼachat uñjasisasa jukʼa tiemponikïtap yatisas wali coleratawa. Ukatwa jupasa demonionakapas jan predicasiñapatakejj kunaymaninak lurapjje, Diosan markapan mayachtʼatäñapsa chhaqtayañwa munapjje. Jiwasajj Diosar serviñ toqen mä guerranksnas ukhamawa. “Janiw jaqenakampejj nuwasktanti, jan ukasti gobiernonakampi, autoridadanakampi, aka chʼamak mundon apnaqerinakapampiw nuwastanjja, mä arunjja alajjpachankiri demonionakampiw nuwastanjja”. Janiw qarjtañ horasäkiti, antisas Diosar serviñan suma saytʼatäñasawa, janiw aynachtʼañasäkiti. ‘Diablon trampanakapar jan jaltʼañatakiw’ chʼamachasiñasa (Efes. 6:10-17). Taqe ukanakatakejj aguantañaw yanaptʼistani.

⁷ Aguantatas laykuw jan walinakar saykattanjja. Cristianonakajj aguantatasatwa jan walinakarusa, arknaqat uñjasktan ukanakarusa, jan ukajj kunanakatï Diosat jitheqtaykistaspa ukanakarus saykattanjja. Aguantañ yateqañatakejj tiempow munasi, kunapachatï Diosar serviñan jukʼamp jilttan ukhaw aguantañajj jiltaraki. Diosar serviñ qalltkasajj inas jiskʼa jan walinakan uñjaschïyätan, ukampis ukhaman uñjasisajj aguantawaypachätanwa. Ukham luratasaw jutïrin jachʼa yantʼanakar saykatañatakejj yanaptʼistani (Luc. 16:10). Ukhamajj qalltatpachwa Diosat jan jitheqtas serviñ amtañasa, aguantañ yateqañatakejj janiw sinti jan walinakan uñjasiñ suyañasäkiti. Jiwasatï ‘jan walinakan uñjaskä ukhaw aguantañ yateqaskäjja’ sasin amuysna ukhajj janipuniw walïkaspati. Apóstol Pedrojja aguantirïñasa ukat yaqha ukhamanakan chʼamachasiñas qhawqha wakiskirisa uk qhanwa säna. Jupajj akham sänwa: “Ukhamajj Diosar confiyasajja kunatï walïki ukanak lurañatak chʼamachasipjjam, kunatï walïki uk lurasajja sum yatiñatak chʼamachasipjjam, yatjjasajja munañanakamamp jan apnaqayasiñatak chʼamachasipjjam, munañanakamamp jan apnaqayasisajja aguantañatak chʼamachasipjjam, aguantasajja Dios chuymäñatak chʼamachasipjjam, Dios chuymäsajja jilapurjam munasiñatak chʼamachasipjjam, jilapurjam munasisajja taqenir munasiñatak chʼamachasipjjam” sasa (2 Ped. 1:5-7; 1 Tim. 6:11).

⁸ Santiagojja aguantañajj kunja wakiskirisa uka toqet parlarakïnwa. Cartapan akham sänwa: “Munat jilanakaja, jumanakatejj kunayman jan waltʼäwinakan uñjasipjjätajja, kusisipjjam. Jumanakajj yatipjjtawa, jan waltʼäwinkkasajj Diosar confiyasipkakta ukhajja, aguantañwa yateqasipktajja. Jumanakatejj aguantasipkakïtajja, jukʼamp suma wakichtʼat jaqëpjjätawa, ukhamatwa jumanakajj phoqatäpjjäta, taqe kunansa sanöpjjäta, janirakiw kunas faltapkätamti” sasa (Sant. 1:2-4). ¿Mä kutis jan walinakan uñjasirïtati? Jan walinakan uñjasisajj kusisipjjam sasaw Santiagojj säna. ¿Kunatsa uk lurañajj wali wakiskirejja? Kuna laykutejj jan walin uñjasisajj aguantañwa yateqtanjja, uka aguantañajj suma cristianöñatakiw yanaptʼistu, ukhamat Jehová Diosajj jiwasar sum uñjañapataki. Cheqansa aguantañajj jukʼamp suma chuymanïñatakiw yanaptʼistu.

⁹ Jiwasar aguantir uñjasajj Jehová Diosajj wal kusisi, ukatwa wiñay jakañ churañ munistu. Santiagojj akham sänwa: “Jan waltʼäwinakan uñjasisajj aguantaskaki uka jaqejj kusispan. Jupajj suma jaqet uñjatäni ukhajja, jakañ corona katoqani. Jehová Diosajj khitinakatï jupar munasisipkaki ukanakar uk churañatakiw arsüna” sasa (Sant. 1:12). Cheqas ukhamawa, wiñay jakañ katoqañ munasaw aguanttanjja. Akapachajj kunayman toqetwa jan walinakar jaltʼayañ munistu, jiwasatï ukanakamp apayassna ukhajj Diosan markapatwa jitheqtawayjjsna. Janitï aguantañ puedksna ukhajja, Diosan cheqa yatichäwinakapat katjjarusiñsa, Jehová Diosan espíritu santop katoqañsa janiw puedjjsnati, ni espíritu santon achuparjam sarnaqañs puedjjaraksnati.

¹⁰ Akapachan jan walinakar saykatasajj aguantañwa yateqtanjja, ukatwa jan walinakan uñjaskasajj jan aynachtʼañasäkiti. Uka toqet Santiagojj akham sänwa: ‘Jan waltʼäwinakan uñjasisajj aguantaskaki uka jaqejj kusispan’ sasa. Ukham kusisitäñajj chʼamakïspawa, kuna laykutejj amuyusansa jañchi toqensa awisajj aynachtʼataw jikjjatassna. Ukampis ak amtapjjañäni: jiwasatï jan aguantañ puedksna ukhajj janiw wiñay jakañ katoqksnati. Ukhamajj ¿kunjamatsa jan waltʼäwinakan uñjaskasas kusisitäsna? Hechos librow uka toqet sum qhanañchi. Uka qellqatarjamajja, mä kutejj fariseonakajj apostolonakar jawsasajj jawqʼjayapjjänwa, Jesusat jan parlapjjañapatakiw ordenapjjarakïna, ukatjja antutjjapjjarakïnwa. Ukhaman uñjasisajj ¿kunsa apostolonakajj lurapjjpachäna? “Jupanakajj Sanedrinankir jaqenakan nayraqatapatjja wali kusisitaw sarjjapjjäna. Kuna laykutejj Jesusan sutip layku phenqʼachat uñjasipjjatapat Diosajj wali sum jupanakar uñjäna” (Hech. 5:40, 41). Apostolonakajj Jesusar istʼapjjatap layk tʼaqesipjjatapa ukhamarak Diosamp suma uñjatäpjjatapwa amuyapjjäna. Mä qhawqha maranak qhepatjja, justicia layku tʼaqesiñajj kunja wakiskirisa uka toqetwa apóstol Pedrojj nayrïr cartapan qellqäna (1 Ped. 4:12-16).

¹¹ Jichhajj yaqha toqet parltʼañäni. Pablompi Silasampejj Filipos markan predicasipkäna ukhajja, markan leyinakaps pʼakintapkaspa, costumbrenakapsa mayjtʼayapkaspa ukham kʼarintasaw jaqenakajj katuntapjjäna. Ukatjja autoridadanakajj jupanakar jawqʼjayasajj carcelar jaqontapjjañapatakiw ordenapjjäna. Pablompi Silasampejj carcelan llawintataw uñjasipjjäna, janirakiw khitis usuchjatanakap qollirejj mantirjamäkänti, ukhaman uñjasiñajj wali chʼamäpachänwa. ¿Kunsa jupanakajj lurapjjpachäna? Bibliajj akham siwa: “Niya chika arumäjjäna ukhajja, Pablompi Silasampejj oracionwa lurasipkäna, cantasaw Diosar jachʼañchasipkarakïna. Preso katuntat jaqenakas istʼapjjarakïnwa” sasa (Hech. 16:16-25). Ukham lurasajj Diosat jan jitheqtapjjatapwa uñachtʼayapjjäna, jaqenakas ukhamätapwa amuyapjjarakïna. Ukatjja Pablompi Silasampejj predicañajj kunja wakiskirïnsa, kunjamsa jupanakan tʼaqesipjjatapajj suma chuyman jaqenakar Diosar jakʼachasipjjañapatak yanaptʼäna uksa amuyapjjarakïnwa. Ukatwa carcelar jaqontatäpkäna uka arumpachajj cárcel uñjirimpiru familiapampir predicapjjäna, jupanakajj cristianoruw tukjjapjjäna (Hech. 16:26-34). Pablompi Silasampejj Jehová Diosaruw wal confiyapjjäna, jupajj jiwasar yanaptʼañatakejj wali chʼamaniwa sasaw confiyapjjäna. Cheqas Jehová Diosaw jupanakar yanaptʼäna.

¹² Pablompi Silasampejj aguantapjjänwa, jichhürunakan ukham aguantañaswa Jehová Diosajj munaraki, ukatwa jan waltʼäwinakar saykatañatak walja yanaptʼanak churistu. Jupajj kuna amtanakanisa uk yatiñasatakejj Biblia churistu, ukaw jupar jukʼamp confiyañatakejj yanaptʼistu. Ukatjja jilat kullakanakamp chikachasisajj mayachtʼataw jupar sirvtanjja. Maysa toqetjja, oración toqew jupar jakʼachassna, kunjamtï mä amigomp parltʼasksna ukhamwa jupampejj parltʼasiraksna. Qʼom sarnaqañatakiw Diosar yanaptʼa maysna, jan ukajj taqe kunatwa yuspärsna ukat jachʼañcharaksna (Filip. 4:13). Ukat janipun ak armapjjañäniti: kuntï jutïrin katoqkañäni uka toqet lupʼiñajj Diosar serviskakiñatakiw chʼamañchtʼistani (Mat. 24:13; Heb. 6:18; Apoc. 21:1-4).

¹³ Jehová Diosan Testigonakapajja, Jesusan nayrïr discipulonakapajj kuna yantʼanakantï uñjasipkäna niya ukham yantʼanakanwa uñjasiraktanjja. Yaqhep jaqenakajja, jiwasat kʼarinak istʼasajj jiwas contraw saytʼapjje, arunakapampiw chuym ustʼayapjjestu, jan ukajj jupanakamp nuwjata jan waltʼayataw uñjastanjja. Taqe ukhamanakan jiwasar uñjasiyañatakejj falso religionanakaw wal chʼamachasipjje, kuna laykutejj Bibliaw jupanakan jan wali luratanakapsa pata chuymak Diosar servipjjatapsa qhanstayi (Hech. 17:5-9, 13). Awisanakajj gobiernonakaw derechonakas arjjatañatak yanaptʼapjjestu, ukampis yaqhep gobiernonakajj Diosar serviñsa ukat predicacionsa jarkʼañwa amtapjje (Hech. 22:25; 25:11; Sal. 2:1-3). Taqe ukanakajj pasi ukhajja, jan ajjsarasaw aguanttanjja, ukatjja apostolonakatwa yateqasiraktanjja, jupanakajj akham sapjjänwa: “Jaqenakar istʼañat sipansa Diosar istʼapjjañajawa” sasa (Hech. 5:29).

¹⁴ Pachpa markapat saytʼasirinakajj (nacionalismo) walipuniw oraqpachan jiljjattawayi, ukatwa suma yatiyäwinak yatiyapjjam sasin Diosajj maykistu ukamp phoqañajj wali chʼamäjje. Ukham pasatapatjja, kuntï Apocalipsis 14:9-12 textojj ‘salvaje animalata estatuapat’ parlki uk sumwa amuytanjja. Apocalipsis 14:12 texton jikjjataski uka arunakan wali importantëtapsa amuyaraktanwa, ukan akham siwa: “Ukatwa santo jilatanakajja, mä arunjja khitinakatejj Diosan mandamientonakap phoqapki, Jesusar confiyas jakapkaraki ukanakan aguantapjjañapajj wakisini” sasa.

¹⁵ Guerranakasa, mä marka taypin chʼajjwañanakasa, proscripcionanakasa Diosar taqe chuyma serviñatwa jarkʼistaspa. Ukanak pasatap laykojja, tantachäwinakarojj janiw sarañ puedjjsnati, janirakiw superintendente de circuito jilatas visitir jutañ puedjjaspati. Maysa toqetjja, janiw sucursalamp contactasiñ puedjjsnati, ni Bibliat apstʼat qellqatanak katoqañsa puedjjsnati. Ukhaman uñjasisajj ¿kunsa lursna?

¹⁶ Ak sumwa yattanjja: taqe kuntï puedktan ukwa lurañasa. Ukham jan walinakan uñjasisajja, jan khitimp uñjayasisaw Bibliat sapaki yatjjatsna, utanakanwa jiskʼa gruponakan tantachasiraksna. Ukanak lurasajj Bibliatwa yatjjatsna, nayrajj yatjjatkayätan uka qellqatanakwa mayamp yatjjatsna. Janiw llakisiñasäkiti, ni ajjsarañasäkisa. Mä jukʼa tiempotjja, Cuerpo Gobernantew congregacionan encargatäpki uka jilatanakamp horasapar contactasjjaspa.

¹⁷ Yaqha jilat kullakanakamp jan jikisiñ puedjjañäni ukhajja, sapakïksnas ukham janiw amuyasiñasäkiti. Jehová Diosampi Jesusampejj jiwasamp chikäsipkapuniniwa, janipuniw aynachtʼañasäkiti. Jehová Diosajj oracionanakas istʼistaniwa, espíritu santopampiw chʼamañchtʼarakistani. Jupar yanaptʼa mayiñjja janipun armasiñäniti. Diosan serviripätassa, discipulopätassa janiw armasiñasäkarakiti. Ukhamajj taqe horasan predicapjjañäni, ukham luratasatjja Jehová Diosajj bendisistaniwa. Jaqenakat maynikis Diosat yatiñ munapuniniwa, Jehová Dios toqetsa saytʼasirakiniwa (Hech. 4:13-31; 5:27-42; Filip. 1:27-30; 4:6, 7; 2 Tim. 4:16-18).

¹⁸ Inas jiwayañ munapjjchistani, cheqas ukhamwa nayrajj apostolonakarusa Diosan mayni servirinakaparus amenazapjjäna. Ukhaman uñjasiñäni ukhajja, ‘jiwatanak jaktayir Diosaruw’ confiyañasa; jiwatat jaktañar confiyañajj sinti jan walinakan uñjaskasas aguantañatakiw chʼamañchtʼistani (2 Cor. 1:8-10; Luc. 21:19). Jesusajj janipuniw Diosat jitheqtawaykiti, ukham luratapajj kunjamsa discipulonakapar chʼamañchtʼañapäna, aguantañatakis yanaptʼañaparakïna uk jupajj sum yatïna. Aguantatasajj ukhamarakiw jilat kullakanakasar chʼamañchtʼaspa (Juan 16:33; Heb. 12:2, 3; 1 Ped. 2:21).

¹⁹ Cristianonakajj yaqha yantʼanakanwa uñjasiraksna. Amuytʼañataki, jaqenakajj Diosat jan yatiñ munapki ukhasa, usuntat jikjjatastan ukhasa, pantjasir jaqëtasat jan walinakan uñjasisas awisajj desanimassnawa. Apóstol Pablos “mä chʼapiw jañchijan utji” sasaw säna, ukajj Diosar sum serviñatwa jarkʼäna (2 Cor. 12:7). Filipos markankir Epafrodito sat mä cristianojja, amigonakapajj jupan usutätap yatipjjäna ukhajj llakimpiw qʼal aynachtʼäna (Filip. 2:25-27). Jiwasan pantjasitasasa mayninakan pantjasipjjatapasa jan waltʼayasiñanakwa utjayaspa, janiw aguantañsa puedjjaraksnati. Congregacionansa familiansa jan pachpa amuyunïtas laykojj jan waltʼayasiñanakaw utjarakispa. Biblian ewjjtʼanakaparjamatï sarnaqañäni ukhajja, taqe ukanakwa aguantañäni (Ezeq. 2:3-5; 1 Cor. 9:27; 13:8; Col. 3:12-14; 1 Ped. 4:8).

²⁰ Jehová Diosajj congregación Pʼeqtʼañapatakejja, Jesucristoruw uttʼayawayi, ukhamajj janipuniw jupat jitheqtañasäkiti (Col. 2:18, 19). ‘Suma phoqeri amuyasir esclavorusa’, Diosan markapan pʼeqtʼapjjañapatak uttʼayatäpki uka jilatanakarus istʼapjjapuniñäni (Heb. 13:7, 17). Jehová Diosan mayitaparjam autoridadanïpki ukanakar respetomp uñjañäni ukhajja, mayachtʼataw munañap lurañäni. Niyakejjay oracionajj mä privilegiöchejja, aprovechtʼañasapuniwa. Ak amtapjjapuniñäni: celdanakan sapaki llawintat uñjaskasasa mä carcelan perqanakapamp muyuntatäkasas Jehová Diosampejj oración toqejj parlasiskakiñäniwa, Diosan markapas mayachtʼatakïskaniwa.

²¹ Janipun payachasipjjañäniti ni qarjtapjjañänisa. Kuntï Jesusajj jiwatat jaktjjäna uka qhepat discipulonakapar siskäna uk lurañatak chʼamachasipjjañäni, jupajj akham sänwa: “Ukhamasti sarapjjam, taqe markanakankir jaqenakar nayan discipulojar tukuyapjjam, bautisapjjam Awkina, Yoqana, espíritu santon sutipjjaru. Ukatsti taqe kuntï nayajj jumanakar yatichapksma ukanak phoqañ yatichapjjarakim” sasa (Mat. 28:19, 20). Jesusjam aguantañatakiw chʼamachasiñasa. Diosan Reinopajj apnaqjjani ukhajj wiñayatakiw aka oraqen jakasiñäni, uk taqe chuyma suytʼasipkakiñäni (Heb. 12:2). Jesucriston discipulonakapajja, aka qhepa urunakan aka profecía arunakan phoqasiñapatakiw yanaptʼasktanjja: “Reinon aka suma yatiyäwinakapajja, aka oraqpachanwa yatiyasini, ukhamat taqe markanakan yatipjjañapataki. Ukjjaruw akapachan tukusiñapajj jutani” (Mat. 24:3, 14). Ukhamasti jan qarjtas Diosan Reinopat predicasipkakiñäni. Niyaw Jehová Diosajj walja bendicionanak jutïrin wiñayatak churistani.