Wiñay jakañ churir Diosat yateqasipjjañäni

 1. ¿Kunas Jehová Diosat yateqasiñatakejj yanaptʼistaspa?

KUNJAMSA mayninakajj jikjjatasipjje uk jiwasajj amuysnawa. ¿Kunatsa? Jehová Diosaw ukham amuytʼir lurawayistu. Inas mayninakjampun jan jikjjataskchiñäniti, ukampis kunjamsa jikjjatasipjje uk amuysnawa (Efesios 5:1, 2 liytʼañataki). Ukham amuytʼirïñajja Jehová Diosan mä regalopawa, jupaw ukham amuytʼir lurawayistu. Ukhamajja, ¿kunjamsa ukajj Jupat yateqasiñatak yanaptʼistaspa? ¿Kunjamsa uka regalo uñjañasa?

 2. Tʼaqhestan ukhajja, ¿kunjamsa Jehová Diosajj jikjjatasi?

² Jehová Diosajja, ajllit cristianonakarojj alajjpachan jan jiwiri cuerponïpjjañapatakiw mä suytʼäwi churawayi, ‘yaqha uwijanakarusti’ aka Oraqen wiñay jakapjjañapatakiw mä suytʼäwi churawayaraki (Juan 10:16; 17:3; 1 Cor. 15:53). Alajjpachan jakirinakasa aka Oraqen jakirinakasa, janiw tʼaqhesiñanak uñj-jjapjjaniti. Jehová Diosajja, kunjamsa jichhürunakan tʼaqhestan uk uñjaskiwa. Nayra tiemponjja ukhamarakiw kunjamsa israelitanakajj Egipto markan tʼaqhesipjjäna uk uñjarakïna. ‘Diosajj ayqopjjatap uñtanïnwa, arnaqasitanakaparus istʼarakïnwa.’ (Sal. 106:44.) Kunapachatï judionakajj templo wasitat jan saytʼayañ munirinakar ajjsarapjjäna ukhajja, Diosajj akham sasaw judionakar säna: “Khititejj llamktʼi markajjarojja, ukajj nayan nayrajjaruw llamktʼaski” sasa (Zac. 2:8). Kunjamtï mä taykajj wawapar munaskejja, ukhamarakiw Jehová Diosajj markaparojj munasiñat yanaptʼi (Isa. 49:15). Cheqansa Jehová Diosajj kunjamsa mayninakajj jikjjatasipjje uk amuyiwa, jiwasarojj jupjam amuytʼirwa lurawayarakistu (Sal. 103:13, 14).

 3. ¿Kunjamatsa Jesusan khuyaptʼayasirïtap yattanjja?

³ Jesusajja, kunjamsa jaqenakajj jikjjatasipjjäna uk sum amuyirïna. Jupajj janis kunapachas ukhaman uñjasirïkchïnjja, kunjamansa mayninakajj jikjjatasipjje uk amuyirïnwa. Amuytʼañataki, jaqenakajj religión pʼeqtʼirinakarojj wal ajjsarapjjerïna. Jupanakajja, jan phoqañjam leyinakwa apsupjjerïna, jaqenakarus engañapjjerïnwa, ukanak Jesusajj sum yatïna (Mat. 23:4; Mar. 7:1-5; Juan 7:13). Jesusajj janiw khitirus ajjsarirïkänti ni khitis jupar engañirïkänti, ukhamäkchïnsa, kunjamsa mayninakajj jikjjatasipjjäna uk amuyirïnwa. Mä kutejja, “walja jaqenak uñjasinsti, Jesusajj jupanakatjja khuyaptʼayasïnwa, jupanakasti wali llakitäpjjänwa, tʼaqhesitäpjjarakïnwa jan awatirin ovejanakjama” (Mat. 9:36). Cheqansa Jesusajj Awkipjam munasiri khuyaptʼayasir chuymanïnwa (Sal. 103:8).

 4. Jaqenakar tʼaqhesir uñjasajja, ¿kunsa Jesusajj lurirïna?

⁴ Kunapachatï Jesusajj jaqenakar tʼaqhesir uñjirïna ukhajja, munasiñatwa jupanakar yanaptʼirïna. Ukhamatwa Awkipjam munasirïtap uñachtʼayäna. Mä kutejja, jaya cheqanakar yatiyir sarasinwa apostolonakapampi wali qarit kuttʼanipjjäna, ukatwa jaya cheqan mä jukʼa samartʼañ munapjjäna. Ukampis walja jaqenakaw ukan suyapjjäna, ukatwa jupanakat khuyaptʼayasisin “walja yatichäwinak yatichañ qalltäna” (Mar. 6:30, 31, 34).

5, 6. Diosat munasirïñ yateqasiñ munstan ukhajja, ¿kunjamsa jaqe masisar uñjañasa? Mä uñachtʼäwimp uk qhanañchtʼam. (24 janankir foto uñjjattʼam.)

⁵ Jaqe masisar sum uñjasaw Diosat munasirïñ yateqasitas uñachtʼaytanjja. Alan sutini mä cristiano waynat amuytʼañäni, jupajja chuymani mä jilatatwa amuytʼaski. Uka chuyman jilatatakejja, liytʼañasa utat uta yatiyir sarañasa chʼamakëjjewa. Ukampis Alan waynajj Jesusan aka arunakap amtasi: “Kunjämtejj jumanakajj mayninakampejj lurayasiñ munapktajja, ukhamarak jumanakajj jupanakarojj lurapjjam” sasa (Luc. 6:31). Ukatwa Alan waynajj akham jisktʼasi: “Mayninakan naya layku ¿kun lurapjjañapsa muniristjja?” sasa. Jupasti akham siwa: “¡Nayamp pelot anatapjjañapwa muniristjja!” sasa. Ukampis ¿uka chuyman jilatajj Alan waynampejj pelot anataspati? Janiwa. Ukhamajja Jesusan arunakaparjamajja, Alan waynajj akham sasaw jisktʼasiñapa: “Nayatï uka chuyman jilatïrista ukhajja, ¿kunjam uñjatäñsa muniristjja?” sasa.

⁶ Alan waynajj janis chuymankipstatäkchejja, kunjamsa mayni jilatajj jikjjatasi uk amuytʼaspawa. Ukatakejja, jilatampiw walja kuti parltʼasi ukat wali munasiñampiw istʼaraki. Ukhamatwa kunja chʼamasa chuyman jilatatakejj Biblia liytʼañasa, utat uta yatiyir sarañasa uk jukʼat jukʼat amuytʼi. Kunjamas jikjjatasi uk amuytʼjjasajja, kunsa yanaptʼañatak luraspa ukwa amuytʼi, ukatjja yanaptʼañsa munarakiwa. Jiwasajj ukhamarakiw lursna. Diosat munasirïñ yateqasiñ munstan ukhajja, jiwas pachpas ukhaman jikjjatasksna ukhamwa amuytʼañasa (1 Cor. 12:26).

 7. Mayninakajj kunjamsa jikjjatasipjje uk amuyañatakejja, ¿kunsa lurañasa?

⁷ Kunjamsa mayninakajj jikjjatasipjje ukanak amuytʼañajj chʼamakïspawa. Waljaniw kunayman jan waltʼäwinakan uñjasipjje. Sañäni, usuchjata, chuymankipstata, usuntata, jaqenakan jan waltʼayata, sinti llakita ukhamaw jikjjatasipjje. Yaqhepanakasti wali ajjsarayasisaw aynachtʼapjjaraki. Ukhamanakan uñjasisaw chuymanakapan jan walin uñjasipjje. Mayninakasti, awkipampiki jan ukajj taykapampikiw jakasipjje, yaqhepansti janiw taqpach familiapajj Diosar servipkiti. Cheqansa taqeniw jan waltʼäwinakan uñjasipjje. Inas jiwasajj ukham jan waltʼäwinakan jan uñjaskstanti, ukampis mayninakar jan walinakan uñjasajja, ¿kunjamsa Diosat yateqasisin munasiñ uñachtʼaysna? Kunjamas chuymapan jikjjatasi uk amuytʼañatakejj wali amuyumpiw istʼañasa, ukhamatwa kunjam yanaptʼañsa yatiñäni. Ukham lurasajja, Jehová Diosat munasirïñ yateqasitaswa uñachtʼayañäni. Jan waltʼäwin uñjasirinakarojja, janiw mä kikpak yanaptʼañajj wakiskapuniti, jan ukasti inas maynirojj Diosar jukʼamp confiyañapatak yanaptʼsna, mayninakarusti qollqe toqeta, jan ukajj yaqha ukhamanakampiw yanaptʼaraksna (Romanos 12:15; 1 Pedro 3:8 liytʼañataki).

 8. Jaqenakaru khuyapayasiñampi uñjañatakejj ¿kunas Jesusarojj yanaptʼäna?

⁸ Jesusasti akham sänwa: “Diosajj khuyapayasirirakiw, jupar jan yuspagaririnakatsa, juchararanakatsa” sasa (Luc. 6:35). Jesusajj Awkipjam khuyaptʼayasirïnwa. ¿Kunas ukham chuymanïñatakejj yanaptʼäna? Arunakapasa luratanakapasa, jaqenakarojj kunjamtʼayaspasa uk janïräkipanwa amuytʼirïna. Amuytʼañataki, mä kutejja mä jucharar warmiw Jesusar jakʼachasïna, ukatsti jachtʼasisaw jachanakapampi Jesusan kayunakap jareqäna. Uka warmiru ukham lurir uñjasajja, juchanakapat arrepentisitapwa Jesusajj amuyäna. Jupatï uka warmir toqenoqasin khitanukusapäna ukhajja, uka warmejj chuyma ustʼataw jikjjatasispäna. Ukatwa Jesusajj suma arunakamp akham säna: “Juchanakamatjja perdonatätawa” sasa. Ukham luratapajj mä fariseotak janis walïkchïnjja, Jesusajj suma arunakapampiw jupar parltʼäna (Luc. 7:36-48).

 9. ¿Kunas Jehová Diosjam khuyaptʼayasirïñatak yanaptʼistaspa? Mä uñachtʼäwimp qhanañchtʼam.

⁹ ¿Kunjamatsa Jehová Diosat khuyapayasirïñ yateqassna? Apóstol Pablojj akham sasaw qellqäna: “Tatitun mä serviripajj janiw nuwasiñanakan sarnaqañapäkiti, ukatsipana taqenimpis sumankañapawa” sasa (2 Tim. 2:24). Taqenimpis sumankir mä jaqejja, janiw mayninakan chuymanakap ustʼaykiti. Akhamanakan uñjasisajj kunjamsa munasirïtas uñachtʼaysna uka toqet amuytʼañäni: trabajosantï patronasar luräwinakap jan sum phoqer uñjsna ukhajja, ¿kamachsnasa? Mä jilatasa jan ukajj mä kullakasa walja phajjsinak qhepatak tantachäwir jutaspa ukhajja ¿jupar kamsnasa? Yatiyir sarkasatï utanejj “janiw parlañatak tiemponïkti” sistaspa ukhajja, ¿parlaskaksnati? Espososasa jan ukajj esposasasa “jichha sabadojj kun lurañtï amtkta uk kunatsa jan awisista” sistaspa ukhajja, ¿suma arunakampit qhanañchtʼsna? Kunjamsa mayninakajj jikjjatasipjje ukat arunakasas kunjamtʼayaspasa uk janiräkipan amuytʼañäni ukhajja, parlatasampisa luratasampisa Jehová Diosjam khuyaptʼayasirïtaswa uñachtʼayañäni (Proverbios 15:28 liytʼañataki).

10, 11. ¿Kunas Diosjam yatiñanïñatakejj yanaptʼistaspa? Uk mä uñachtʼäwimp qhanañchtʼam.

¹⁰ Jutïrin kunanakas pasani ukjja jiwasajj amuytʼsnawa. Ukaw Jehová Diosat yatiñanïñ yateqasiñasatakisa, ukhamarak luratanakasajj kunarus jiwasarusa mayninakarus puriyaspa uk amuytʼañatakis yanaptʼistaspa. Jehová Diosajj wali yatiñaniwa, ukhamajj kunatï jutïrin paskani ukjja sumwa Jupajj yatispa. Kunanakas jutïrin pasani ukanakjja jiwasajj janiw yatktanti, ukampis kun lurañtï amtktan ukajj mayninakarusa jiwasarusa kunjamtʼayistaspasa ukjja amuytʼañasawa. Israelitanakajj janiw ukham lurapkänti, Diosar jan istʼasajj kunanakarus purtʼasipjjaspa ukjj janiw amuytʼapkänti. Diosajj taqe kunsa jupanak laykojj lurkchïnjja, Moisesajj jan walinak lurapjjañap yatïnwa, ukatwa mä qʼochun jupanakarojj akham säna: “Israel markasti janiw amuyunïkjjeti, janirakiw amuytʼañ kankañapas utjkjjeti. Jupanakatejj yatiñanïpjjaspa ukkhajj amuytʼapjjaspawa; ukatsti yatipjjarakispawa kunanakatï suyki ukanaksa” sasa (Deu. 31:29, 30; 32:28, 29).

¹¹ Jehová Diosjam yatiñanïñatakejja, luratanakasajj jiwasarusa mayninakarus kunjamtʼayaspasa uk janïräkipanwa amuytʼañasa. Sañäni, maynimpitï casarasiñatak uñtʼasiskstanjja, jañchin munañanakapamp jan apayasiñatakiw amuytʼasiñasa. Kunanakatï Jehová Diosampi sum apasitas aptʼasiykistaspa ukanakat janipuniw lupʼiñasäkiti ni lurañasäkisa, jan ukasti Jehová Diosan aka arunakaparjamaw sarnaqasa: “Chʼikhi jaqejj jan waltʼaña uñjasinjja jaltjjewa, ukampis jan amuytʼasir jaqejja mantaskakiwa, ukatsti ñanqha luräwinak jikjjati” (Pro. 22:3).

12. ¿Kunanak lupʼiñas jan walïkaspa?

¹² Lupʼiñajj ninamp sasispawa, ukjja mä amuytʼasir jaqejj sum yati. Ninarutï sum apnaqañänejja, ninajj wali wakiskirïspawa, manqʼsa phaytʼassnawa, ukampis ninatï jan sum apnaqaskaspa ukhajja, utsa phichhantaspawa ukankirinakarus jiwarayarakispawa. Lupʼiñajj niya ukhamarakiwa, Diosat yateqasiñatakiw yanaptʼistaspa, ukampis qʼañu luräwinakak lupʼisksna ukhajja jan walinakaruw purtʼassna. Sañäni, jan walinakak sapa kutis lupʼisksna ukhajja, ukanak lurañaruw purtʼassna. Ukhamajja, qʼañu luräwinakat lupʼiñajj Diosar serviñatwa jitheqtayistaspa (Santiago 1:14, 15 liytʼañataki).

13. ¿Kunjam jakasiñsa Eva warmejj amuypachäna?

¹³ Eva warmejj kunjamatsa “aski ukhamarak ñanqha yatiñ churir qoqatjja” manqʼantäna uk amuytʼañäni (Gén. 2:16, 17). Asirojj jupar sänwa: “Janiw jiwapkätati. Diosajj yatiwa, kunapachatejj jumanakajj uka qoqan achunakapata manqʼapjjasma ukkhajj yatipjjasmawa kunatejj askïki, ukhamarak ñanqhäki ukanakjja, ukatsti Diosjamäpjjasmawa” sasa. Ukjjarojj Evajj “uka qoqan achupajj manqtʼañatakisa ukhamaraki yatiñanïñatakisa sumätapwa uñkatäna”. Ukat ¿kunsa luräna? Jupajj “mä achu apaqasinjja manqʼantänwa. Ukatsti chachaparurakiw churäna, jupasti manqʼantarakïnwa” (Gén. 3:1-6). Eva warmitakejj kuntï Supayajj siskäna ukajj wali sumäkaspas ukhamäpachänwa. Kunatï askïki jan askïkaraki uk maynimp ewjjtʼayasiñat sipansa jupa pachpaw amtañ munäna. Ukham amuyatapajj janipuniw walïkänti, ukham luratapatwa ‘mä sapa jaqe toqe juchajj aka oraqer mantanejja, ukat jiwajj uka jucha laykurakiw utjejja’ (Rom. 5:12).

14. ¿Kunjamsa Bibliajj wachoq juchar jan purtʼasiñatak yanaptʼistu?

¹⁴ Eva warmejj Edén jardinan jucharus purtʼaskchïnjja, juchapajj janiw wachoq juchäkänti. Ukampis Jesusajj wachoq jucha toqet jan lupʼiñasatakiw akham ewjjtʼistu: “Khititejj mä warmirojj munapayañataki uñtejja, niyaw chuymapanjja jupampi wachoqa juchjja lurjje” sasa (Mat. 5:28). Apóstol Pablojj akham ewjjtʼarakïna: “Janiraki lupʼipjjamti janchin munañapa lurañjja” sasa (Rom. 13:14).

15. ¿Kuna suma yänaksa alajjpacharu imasiñasa, ukat kunatsa?

¹⁵ ¿Kun lupʼiñas jan walïkarakispa? Walja qollqenïña toqet lupʼisin Diosat armasiñaw jan walïkaspati. Cheqans mä qamir jaqejja, ‘jupan yänakapajj mä markar alto perqanakampi muyuntatäkaspas ukham’ amuyasi (Pro. 18:11). Jesusajja, “jupatakik taqe kuns arkuntasir jaqempejja” kunas pasaspa uka toqet parlasinjja, akham sänwa: “Dios nayraqatanjja jan kunanikiwa” sasa (Luc. 12:16-21). Jehová Diosajja, taqe kuns Jupatakjam lurtan ukhajja wal kusisi (Pro. 27:11). ‘Alajjpacharu suma yänaka imasitasatjja’ Jehová Diosajj wali askitwa uñjistu, uk yatisajj wali kusisitaw jikjjatastanjja (Mat. 6:20). Cheqas Jehová Diosampi sum apasiñaw taqe kunat sipansa wali askejja.

16. ¿Kunsa jan sinti llakisiñatak lurañasa?

¹⁶ ‘Akapachan walja yänaka’ jikjjatañatakiki chʼamachasisksna ukhajja, sinti llakinakanwa uñjassna (Mat. 6:19). Jesusajj sänwa: “Suma arunak istʼkasinsa, sintwa llakisipjje akapach yänakatsa, qollqetsa. Taqe ukanakasti juparojj atipjiwa, suma arunakasti janirakiw jupan chuymapanjja jiltkaspati” sasa (Mat. 13:18, 19, 22). Yaqhepanakajj janis qollqet sinti llakisipkchejja, kuna jan walinakansa jutïr urunakan uñjasipjjaspa ukanakatwa sinti llakisipjje. Ukanakatak jiwasajj sinti lupʼisksna ukhajja, usuntjjsnawa Diosarus janiw confiyjjsnati. Ukhamajja, jan walinakan uñjasisajj Jehová Diosaw yanaptʼitani sasin confiyapjjañäni. Ukat ak amtapjjarakiñäni, “llakejj jaqerojj mayjtʼayiwa; suma arusti kusisiyiwa” (Pro. 12:25). Kunjamsa jikjjatastan uk amuytʼasin suma arunakampi maynejj chuymachtʼistu ukhajja kusisitaw jikjjatastanjja. Ukatjja, Jehová Diosar servir awk taykasampi, espososampi esposasampi, jan ukajj sum uñtʼkistu uka amigosampi parltʼañajja, jan sint llakisiñatakiw yanaptʼistu.

17. ¿Kunjamsa Jehová Diosajj llakinakaru atipañatakejj yanaptʼistu?

¹⁷ Chuymasan kunjamas jikjjatastan uk Jehová Diosakiw amuyaspa. Ukatwa Pablojj akham säna: “Jan jumanakajj kunats llakisipjjamti, taqe kunsa Diosar sapjjam oracionana, mayipjjam yuspagarapjjarakim. Diosajj jumanakarojj churapjjarakïtamwa samarañapa, ukasti taqe kuntejj jaqejj amuytʼkaspas ukat jukʼamp jachʼawa. Uka samarañasti jumanakan chuymanakamsa, amuyunakamsa imaniwa Cristomp mayakïpjjatam layku” sasa (Fili. 4:6, 7). Ajay toqet jan aynachtʼañatakejja, jilat kullakanakasa, irpir chuymaninakasa, Amuyasiri Cheqapa Uywatasa, angelanakasa, Jesusasa, Jehová Diosasa walpun yanaptʼapjjestu uk janipuni armañäniti.

18. ¿Kunjamsa amuytʼañajj yanaptʼistaspa?

¹⁸ Kunjamtï uñjawayktanjja, amuytʼañajj Jehová Diosat yateqasiñatakiw yanaptʼistu (1 Tim. 1:11, NM; 1 Juan 4:8). Jiwasatï jaqe masisarus munasiñäni, luratanakasajj kunarus jiwasarusa mayninakarus puriyaspa uks janiräkipan amuytʼañäni, ukhamarak jan inamay sint llakisiñäni ukhajja, kusisitaw jakasiñäni. Jehová Diosajj amuytʼirwa lurawayistu, ukhamajja kunjamsa jutïrin jakasiñäni ukanakat amuytʼapjjañäni, ukatjja Diosjam munasiri, khuyaptʼayasiri, yatiñani ukhamarak kusisit chuymanïpjjañäni (Rom. 12:12).