Monjapjjayätwa, jichhasti Diosaruw yupaychjjapjjta

Felisa: Familiajajj catolicönwa. Jupanakatjja, tunka kimsaniw tatakurata jan ukajj católica religionatak irnaqapjjäna. Juan Pablo II papasa, taykajan primoparojj santot uñjatäñapatakiw bendicïna. Uka primopasti católica colegionwa yatichäna. Nanakajj pisin jakasipjjayäta. Awkijajj herrerotwa trabajïna, taykajasti, yapumpiw sarnaqarakïna. Kimsaqallqo jil sullkäpjjtwa, ukanakat nayaw jilïrïtjja.

Nayajj 12 maranïskayäta ukhaw España markan guerrajj qalltäna. Guerra tukuyatatjja, awkijarojj gobierno contra parlatapatwa carcelar jistʼantapjjäna. Taykajatakisti nanakar uywañajj chʼamakïnwa. Manqʼat jan tʼaqhesipjjañapatakejja, Araceli, Lauri, Ramoni kullakanakajarojj Bilbao (España) markankir mä conventoruw taykajajj jaytanïna.

Araceli: Conventor jaytanipkitäna ukhajja, nanakajj 14, 12, 10 maranikïsipkayätwa. Familiajat jitheqtañajj chʼamakïnwa. Conventonjja, qʼomachiritwa trabajipjjayäta. Pä mara qhepatsti, Zaragoza markan jilïrinakar uñjapkäna uka mä jachʼa conventoruw monjanakajj apapjjetäna. Ukansti, phayañ uta qʼomachasajj wali qaritaw jikjjatasipjjerïta.

Felisa: Kullakanakajajj Zaragoza markar sarjjapjjäna ukhajja, taykajampi tiojampejj uka pachpa conventoruw khitapjjetäna, tiojajj tatakuränwa. Jupanakajja, nayampïñ munkäna uka waynat jitheqtayañ munasaw khitapjjetäna. Niyakejjay catolicöchiyätjja, uka conventor sarañajj walikïnwa. África markankir primoj kikparakiw misioneröñ munayäta.

Diosar yaqha markan serviñatakejja, monjanakajj janiw chʼamañchapkitänti, antisas jistʼantatjamaw conventon jikjjatasiyäta. Ukatwa mä mara qhepatjja, tatakura tiojar uñjiri kuttʼjjayäta. Utan lurañanakampi yanaptʼasajja, sapa jaypʼuw tiojampejj rosario rezapjjerïta. Iglesiansti, virgenanakaru, santonakaru isthapiyasasa, panqaranakampi iglesia kʼachachtʼasasa wal kusisirïta.

Araceli: Monjäñatakejj votonakwa lurañajäna. Nayrïr votonakjja, Zaragoza markanwa lurayäta. Uka qhepatjja, monjanakajj jaljtayapjjetänwa. Ramoni kullakajajj Zaragoza markan qheparäna, Lauri kullakajajj Valencia markaruw sarjjäna, nayasti Madrid markaruw sarjjarakiyäta. Uka markanwa payïr votonak lurayäta. Uka conventonjja, walja lurañanakaw utjäna. Ukanwa yateqerinakasa, jilïrinakasa, mayni visitirinakas qorpachasipjjerïna. Nayajj conventon utjkäna uka hospitälanwa trabajiyäta.

Nayajj janiw monjäñak munkayätti, jan ukasti Biblia liytʼañsa, yatichäwinakap amuytʼañsa wal munayäta. Ukampis Diosatsa Jesusatsa janiw khitis conventon parlirïkänti, ni Biblsa liyipjjerïkänti. Latín arukwa mä jukʼa yateqawayta, santonakatsa, virgen Mariar yupaychañsa yateqawayaraktwa. Jilpachajj trabajipjjayätwa.

Wal llakisiyäta, ukatwa madre superiorar akham sayäta: ‘Familiajajj pisinwa jakasipki, nayasti yaqhanakan qamirïpjjañapatakiw akan trabajiskta, ukajj nayatak janiw walïkiti’ sasa. Uka amuyuj mayjtʼayañajatakisa, conventon qheparañajatakisa, mä jiskʼa cuartoruw llawintitäna.

Uka jiskʼa cuartotjja, kimsa kutiw irpsupjjetäna. Utajar sarañ munaskakitaj amuyasajja, akham sas mä carta qellqañajatakiw mayipjjetäna: “Diosar serviñat sipansa Supayar serviñ munasaw akat sarjjäjja” sasa. Ukham qellqañ mayipjjatapajj nayatak janiw akchʼas walïkänti. Sarjjañ walsa munkchiyätjja, janipuniw uk qellqkiriskayätti. Ukatwa mä tatakuramp parlañatak mayiyäta, juparusti taqe kunwa yatiyayäta. Uka tatakurasti, obispomp parlasajj Zaragoza markankir conventoruw khititäna. Mä qawqha phajjsinakatjja, utajaruw sarjjayäta. Mä jukʼa tiempotsti, Lauri, Ramoni kullakanakajas ukhamarakiw conventot mistjjapjjäna.

Felisa. Casarasisinjja, Cantabria (España) markaruw jakasir sarjjayäta. Ukanjja, sapa semanaw misar saraskakiyäta. Mä domingojja, La verdad que lleva a vida eterna libro uñachtʼayasajj akham sasaw mä tatakuraw wali colerat säna: “Aka librtï churapjjstamjja, jaqtapjjañamawa jan ukajj nayar churapjjeta” sasa.

Nayajj uka libronïñ wal munayäta. Mä qawqha urunakatjja, Jehová Diosan Testigonakapaw utajar purinipjjäna, jupanakaw uka libro churapjjetäna. Uka arumpachaw uka libro liytʼayäta. Wasitat kuttʼanipjjäna ukhajja, jupanakampiw Bibliat yateqañ qalltayäta.

Cheqa yatichäwinakajj chuymaruw purtʼitäna. Nayrajja, religionajar wal munasiyäta, jichhasti Jehová Diosaruw munasjjayäta, arunakap yatiyañsa munjjarakiyätwa. 1973 maranwa bautisasiwayta. Familiajaru Diosat parlañatak wal chʼamachasiwayta. Ukampis kunjamtï qalltan siskayätjja, janiw istʼañ munapkitänti, yamas Araceli kullakajajj jukʼampïnwa.

Araceli: Conventonkkayäta ukhajja, jan walinakwa lurapjjetäna. Ukatwa religionajat jan kuns yatiñ munjjayätti. Domingonakajj misar sarapunirïtwa, sapürurakiw rosario rezasirïta. Diosan Arupatjja wal yatjjatañ munayäta, Diosarus yanaptʼap mayisirakiyätwa. Felisa kullakajajja, Bibliat yateqkäna ukjja taqe chuymaw jan ajjsartʼas parlitäna, ukatwa jiskhisipjjapunirïta.

Tiempompejja, trabajiriw Madrid markarojj kuttʼjjayäta, ukanwa casarasiyäta. Uka markanjja, waljaniw iglesiar sarapjjeri, ukampis janiw Jesusan yatichäwinakaparjam sarnaqapjjerïkiti. Ukatwa misar jan sarjjayätti, tatakurarus janiw confesasjjayätti. Santonakatsa, infierno yatichäwitsa janiw yatiñ munjjayätti. Pachachanakjja, qʼalwa jaqtjjayäta. Ukham luratajajj walikïskänti janicha ukjja, janiw amuykayätti. Chuyma ustʼatäsajj akham sasaw mayisiyäta: “Dios Tata uñtʼañwa munsma, ¡yanaptʼita!” sasa. Testigonakajj walja kutiw utar jutapjjeri, ukampis janipuniw mä kutis katoqerïkti. Religionarojj janiw confiyjjayätti.

Lauri kullakajajj Francia markanwa jakasïna, Ramoni kullakajasti España markanaraki. 1980 maranakanjja, Testigonakampiw Bibliat yateqañ qalltapjjäna. Jupanakarojj Felisa kullakajarjamarakiw eñgañapjjpacha sasaw amuyayäta. Tiempompejja, Angelines vecinajaruw uñtʼayäta. Qhepatjja, jupampejj wali suma amigapjjayätwa. Angelinajj Jehová Diosan Testigopänwa. Angelinampi esposopampejj walja kutiw Bibliat yateqañajatak chʼamañchapjjetäna. Nayasti, ‘janiw kuns yatiñ munkti’ siriyätwa. Ukampis Bibliat wal yateqañ munatajwa amuyapjjäna. Mä urojja, jupanakar akham sayätwa: “Walikiwa, Bibliat yateqäwa. Ukampis Bibliajampikiw yateqañäni” sasa. Ukham sasinjja, Nácar-Colunga Bibliatwa parlaskayäta.

Felisa: 1973 maran bautisaskayäta ukhajja, 70 Testigonakakiw Santander (Cantabria) markan utjäna. Yatiyañatakejj walja markanakaw utjäna. Ukatwa uka cheqanakarojj jachʼa autot sarapjjañajäna. Qhepatsti, taqe markanakaru puriñatakejj jiskʼa autonakatwa sarapjjarakiyäta. Ukhamatwa taqenir yatiyapjjayäta.

Walja jaqenakaruw Diosan Arupat yatichawayta, jupanakatjja 11 bautisasiwayapjje, jilapartejj catolicöpjjänwa. Niyakejjay nayajj catolicöchiyätjja, jan wali creencianakap jaytapjjañapatakejj wali pacienciampiw yatichañajäna. Ukatsti, Bibliampi Diosan qollan ajayupampikiw chuymanakaparu purtʼañapäna, ukhamatakwa cheqa yatichäwinak amuyapjjasapäna (Heb. 4:12). Esposojajja nayrajj policiänwa. Jupajj 1979 maranwa bautisasïna. Taykajasa, janïr jiwkasajj Bibliat yateqañ qalltawayänwa.

Araceli: Testigonakamp Bibliat yatjjatañ qalltkayäta ukhajja, janiw jupanakar confiykayätti. Ukampis mä qawqha semanatjja, janiw ukham amuyjjayätti. Jupanakajja, yatichapkäna ukarjamaw sarnaqapjjäna, ukaw chuymar purtʼitäna. Diosarusa Aruparusa jukʼampiw confiyjjayäta, kusisitaw jikjjatasjjarakiyäta. Vecinonakajas akham sapjjetänwa: “Araceli, sarkta uka thakit jan saraqamti” sasa.

Mä urojja akham sasaw Diosar mayisiyäta: “Jehová Dios, walik nayat amtasistajja. Cheqa yatichäwi yatjjatañatakis yanaptʼarakistawa. Walpun yuspärsma” sasa. Felisa kullakajaru chuyma ustʼayir arunakampi satajatsa perdón mayisjjarakiyätwa. Toqesiñat sipansa, jichhajj Biblian yatichäwinakapatwa parltʼasjjapjjta. Nayasti, 61 maraniw 1989 maran bautisasiwayta.

Felisa: Jichhajja, 91 maranëjjtwa. Chachajas jiwawayjjarakiwa, chʼamas janiw utj-jjarakituti. Ukhampachasa Diosan Arupjja jan jaytasaw sapüru liyta. Tantachäwirus sarirjamäkta ukajj sarapuntwa. Diosan Arupat yatiyañatakis chʼamachasiraktwa, ukaw wal kusisiyitu.

Araceli: Tatakuranakarusa monjanakarus Bibliat yatiyapuntwa. Inas nayajj monjayäta ukat ukham lursta. Jupanakarojj Bibliat apstʼat walja qellqatanakwa jaytawayta. Wali sumarakwa parltʼasipjjerïta. Mä tatakurampi walja kuti parltʼasajja, jupajj akham sitänwa: “Araceli, kuntï jumajj siskta ukajj cheqäskapuniwa, ukampis ¿akham jilïrëjjasin kawkirus saräjja? ¿Iglesiar jutirinakasa, familiaranakajas kamsapjjetanisa?” sasa. Nayasti jupar sayätwa: “¿Diosajj kamspachänisa?” sasa. Ukham satajj walsa llaktʼaskchïnjja, Diosan cheqa yatichäwinakap janiw jukʼamp yateqañ munkänti.

Mä kutejja, esposojajj ‘tantachäwimar sarañäni’ sitänwa. Uk janipuniw armkti. Jupajj 80 maranëjjchïnsa, uka urut aksarojj tantachäwinakar sarapunirïnwa. Yatiyir sarapjjerït uksa amtapuntwa. Bautisasiñapatak pä phajjsi faltaskäna ukhaw jupajj jiwawayjje.

Felisa: Jehová Diosar serviñ qalltkayäta ukhajja, kimsa sullka kullakanakajajj janiw Diosat yatiñ munapkänti. Jichhasti jupanakajj Testigöjjapjjewa, ukajj walpun kusisiyitu, wali sumwa Jehová Diosatsa Arupatsa parltʼasjjapjjta. ¡Mayachtʼataw cheqpach Diosar yupaychapjjta!a