Jehová Diosan taqe kunjjar munañanïtap arjjatañäni

1, 2. ¿Kunanakatsa jan pächasiñasäki? (Aka paginankir dibujo uñjjattʼäta).

KUNJAMTÏ pasïr yatichäwin yatjjataniwayktanjja, Jehová Diosan jaqenakar apnaqañapajj janiw wakiskiti sasaw Supayajj säna. Janiw Diosajj cheqapar apnaqkiti, jaqenakatï jupanak pachpa apnaqasipjjaspajja, jukʼamp sumaw jakasipjjaspa sasaw sarakïna. ¿Supayan uka arunakapajj cheqänti? Jaqenakajj jupanak pachpa apnaqasipjjaspa, wiñayatakirak jakapjjaspa ukhajja, ¿jukʼamp sumat jakasipjjaspa? Sapa maynejj amtasarjam sarnaqsna, wiñay jakaraksna ukhajja, ¿jukʼamp kusisitat jaksna?

² Uka jisktʼanakarojj sapa mayniw qhanañchsna. Sapa mayniw ukanakat sum amuytʼañasaraki. Ukham lurasajja, Jehová Diosamp apnaqatäñajj wali wakiskirïtapwa amuyañasa, taqe chuyma Jupar yanaptʼañ wakisitapsa amuyañasarakiwa. Bibliaw ukham amuyañatak yanaptʼistu. Jehová Dios sapakiw alajjpachsa aka oraqsa apnaqañatak derechoni, Bibliajj uka toqet kamsisa uk jichhajj uñjañäni.

 3. ¿Kunatsa Jehová Diosakejj apnaqañatak derechoni?

³ Jehová Diosajj taqe kun lurawayi, taqe chʼamanirakiwa, ukatwa alajjpachansa aka oraqensa taqe kunjjar munañanejja (1 Cró. 29:11; Hech. 4:24). Jesusamp chika reyinakjam apnaqanipkani uka 144.000 ajllitanakajj akham sapjjewa: “Nanakan Jehová Diosaja, jumaw jachʼañchäwi, honra katoqañatakisa, chʼamanïñatakisa derechonïtajja. Jumaw taqe kunsa lurtajja, juman munañamatwa taqe kunas utji, munañamat luratarakiwa” sasa (Apo. 4:11). Cheqas Jehová Diosaw taqe kuns lurawayi, ukatwa jupa sapakejj alajjpachansa aka oraqensa apnaqañatak derechoni.

 4. Amtasarjam sarnaqer luratäkstansa, ¿kunatsa Dios contra saytʼasiñajj jan walïki?

⁴ Jehová Diosaw taqe kuns lurawayi, Supayajj janiw kuns lurkiti, ukatwa Supayajj gobernañatak jan derechonïkiti. Supayasa, nayrïr chacha warmisa, Jehová Diosamp apnaqatäñ jan munasajja pantjasipjjänwa (Jer. 10:23). ¿Kunsa lurañäni uk jiwas pachpa amtir luratätanwa sasin Jehová Diosampi gobernatäñ jan munapjjatapajj walikïskänti? Janiwa. Amtasarjam sarnaqer luratätas laykuw kunsa lurañäni uk amtsna, ukampis Dios contra saytʼasiñatakejj janiw derechonïktanti. Ukhamajja, kunsa lurañäni uk jiwas pachpa amtir luratätanwa sasin Dios contra saytʼañajj janipuniw walïkiti. Jehová Diosamp gobernatäñasa ukhamarak Jupamp yanaptʼatäñas taqe jaqetakiw wakisi.

 5. ¿Kunatsa Jehová Diosan amtanakapajj cheqapawa sasajj sissna?

⁵ Kunatsa Jehová Diosajj apnaqañatak derechoni uk maysa toqet uñjarakiñäni. Jupajj taqe kunjjar munañanïkchisa, cheqaparjamaw kuns luri. Diosajj akham siwa: “Nayan [Jehová] Tatitütajj yatitapata, aka oraqen munasiñampi, askiru, cheqaparuraki luratajjata, ukarakiw nayatakjamajja” sasa (Jer. 9:24). Jehová Diosajja, kunatï walïki ukjja janiw jaqenakan leyinakaparjam amtkiti. Jan ukasti Jupa pachpaw askïki uk lurañatakejj leyinak usku. Jehová Diosajj cheqaparu uñjasaw jaqenakar leyinak churawayi. Salmo qellqerejj akham sänwa: “Cheqapar uñjañampi, aski kankañampiw reyi qonuñamarojj thurjjäsiyi” sasa. Ukatwa Jehová Diosan leyinakapasa, yatichäwinakapasa, amtanakapas cheqaparupuni (Sal. 89:14; 119:128). Jehová Diosajj janiw suma apnaqerïkiti sasinsa Supayajj siskchejja, jupa kikpajj janipuniw akapacharojj sumankañ apankaspati.

 6. ¿Kunatsa Jehová Diosakiw apnaqañatakejj derechoni sistanjja?

⁶ Maysa toqetjja, alajjpacha aka oraqe uñjañatakejj Jehová Dios sapakiw yatiñani, taqe kuns sum uñtʼaraki, ukatwa jupa sapakejj apnaqañatak derechoni. ¿Kunatsa ukham saraktanjja? Kawkïr usunaktï doctoranakajj jan qollirjamäpki uk qollañapatakiw Diosajj Jesusar yanaptʼäna (Mat. 4:23, 24; Mar. 5:25-29). Ukanakajj jiwasatak mä milagrowa, ukampis Jehová Diosajj janiw ukham uñjkiti. Jaqen cuerpopajj kunjamasa uk sum yati, ukatwa kunjam qollañas wakisi uk yatiraki. Jiwatanakarus jaktayaspawa, oraqen jan waltʼañanakapsa askicharakispawa.

 7. Supayan apnaqat akapachanjja, ¿kunatsa Jehová Dios sapakejj wali yatiñani?

⁷ Supayan apnaqata akapachanjja, janiw suman jakasiñajj utjkaspati, mä marka pachpansa yaqha markanakampis janiw sumankañajj utjkaspati. Jehová Dios sapakiw sumankañ apaniñatak yatiñani (Isa. 2:3, 4; 54:13). Apóstol Pabljamarakiw akham sistanjja: “¡Kunja jachʼasa Diosan bendicionapajja! ¡Kunja jachʼasa Diosan yatiñapasa uñtʼañapasa! ¡Amtatanakapas jan yatjjatkayawa! ¡Thakinakapas jan amuykayarakiwa!” sasa (Rom. 11:33).

 8. ¿Jehová Diosan gobiernopat kunas chuymar purtʼtam?

⁸ Kunjamtï uñjaniwayktanjja, Jehová Diosakiw gobernañatak derechoni sasaw Bibliajj qhanañchi. Ukatsti Diosakiw sum apnaqaspa sasaw Bibliajj qhanañcharaki. ¿Kunatsa? Diosajj munasiñampiw apnaqestu. Jupajj “khuyapayasiri[wa]. Janiw jankʼaki colerasirïkiti, jan ukasti jachʼa munasiriwa, ukhamarak cheqaraki”, uk yatisaw Diosar jukʼamp jakʼachastanjja (Éxo. 34:6). Jehová Diosajj munasiñampi, respetompiw uñjistu, jiwaspachpa cuidasksna ukat sipansa jukʼamp sum uñjistu. Jehová Diosajj servirinakapan kusisit jakasipjjañap janiw munkiti sasinsa Supayajj siskchejja, uka arunakapajj kʼariwa. Amtañäni, wiñay jakañ katoqañasatakejj Yoqaparuw Diosajj khitanïna (Salmo 84:11; Romanos 8:32 liytʼañataki).

 9. ¿Jehová Diosajj sapa maynit llakisitap kunjamatsa yattanjja?

⁹ Jehová Diosajj munasiñampiw markapar uñji. Janiw ukakïkiti, sapa maynitwa llakisiraki. Kunas nayra tiempon pasäna uk amuytʼañäni. Niya kimsa waranqa maranakaw markapar juezanakampi irpäna, ukhamat enemigonakapar guerran atipapjjañapataki. Markapar ukhamsa yanaptʼkchïnjja, sapa maynirus yanaptʼarakïnwa, jupanakat maynejj Rut satänwa. Jupajj janiw israelitäkänti, ukampis Jehová Diosar serviñatakejj taqe kunwa jaytäna. Jehová Diosajj mä esposo churasa ukhamarak mä wawa churasaw bendisirakïna. Ukatsti, Jesucristos jupan wawanakapatwa nasirakïna. Diosajj Bibliaruw Rut warmin sarnaqäwip qellqayäna, uka librojj Rut satarakiwa. ¿Rut warmejj jaktankani ukhajja, ukanak yatisajj kusispachäniti? (Rut 4:13; Mat. 1:5, 16).

10. ¿Kunatsa Jehová Diosajj wali munasir apnaqeriw sissna?

¹⁰ Jehová Diosajj janiw jan sinttʼasir apnaqerïkiti, antisas khitinakatï Jupar istʼapki ukanakajj librew jakasipjje, wali kusisitäpjjarakiwa (2 Cor. 3:17). Davidajj Jehová Diosat akham sänwa: “¡Jupan nayraqatapanjja jachʼa kankañawa utji! ¡Chʼamasa, kusisiñasa, Santuariopan utji!” sasa (1 Cró. 16:7, 27). Salmonak qellqeri Etán chachajj akham sarakïnwa: “Tatay, jumar kusisiñamp yupaychir markajj kusisiñaniwa: qhanamamp qhantʼayat sarnaqer markajj kusisiñaniwa, juman sutim laykuw sapür kusisiñanïpjje, juman aski kankañam laykuw kusisipjje” sasa (Sal. 89:15, 16).

11. Jehová Diosakiw suma apnaqerejja sañatakejja, ¿kunas yanaptʼistaspa?

¹¹ Jehová Diosajj kunja munasirisa uk sum amuytʼañasawa, ukaw Jupamp apnaqatäñajj wali askïtap amuyañatak yanaptʼistani. Salmo qellqerjamaw Diosar akham sistanjja: “Mä urukis utaman qamañajj jukʼamp sumawa, waranq urunak anqankañat sipana” sasa (Sal. 84:10). Jaqejj Jehová Diosan luratätanwa, ukatwa kunas kusisiyistaspa uk sum yati. Munasiñatwa kuntï munktan ukat sipansa jukʼamp churistu, kun lurañtï maykistu ukas jiwasan askisatakiwa. Jehová Diosar istʼañatak kun lurañatï wakiski uk lurañäni ukhasa kusisitäñäniwa (Isaías 48:17 liytʼañataki).

12. ¿Kunatsa Jehová Diosan taqe kunjjar munañanïtap arjjattanjja?

¹² Jesucristojj waranqa maranak apnaqañ tukuyjjani ukhajja, waljaniw Jehová Dios contra saytʼasipjjani sasaw Bibliajj qhanañchi (Apo. 20:7, 8). ¿Kunatsa Dios contra saytʼasipjjani? Supayajj sapa mayni jupatak llakisiñapatakiw jaqenakar chʼamañchani. Jupajj nayratpachwa ukham lurirïna. Supayajj inas jaqenakar akham sischini: ‘Wiñay jakañatakejj janiw Jehová Diosar istʼañajj wakiskiti’ sasa. Ukajj janipuniw cheqäkaniti. Ukampis akham jisktʼasiñasawa: “¿Supayan uka arunakap nayajj creyïti?” sasa. Jehová Diosar taqe chuyma munasstan, Jupajj wali munasirïtap amuystan, gobernañatakis Jupa sapak derechonïtap amuystan ukhajja, janipuniw uka kʼari arunak creykañäniti. Antisas munasiri Jehová Diosampik gobernatäñwa munañäni.

13. ¿Kunatsa Diosat yateqasisin sarnaqktan ukhajj gobiernoparus yanaptʼksna ukhamajja?

¹³ Kunjamtï yateqaniwayktanjja, Jehová Diosakiw gobernañatak derechoni, Jupakirakiw sum apnaqestaspa. Taqe kunjjar munañanïtaparus taqe chuymaw yanaptʼañasaraki, ukatakisti Jehová Diosat janiw jitheqtañasäkiti, Jupat yateqasis sarnaqañasawa. Taqe kunans Jehová Diosat yateqasis lurañatak chʼamachastan ukhajja, jupar munasitasa ukhamarak gobiernopar yanaptʼataswa uñachtʼaytanjja (Efesios 5:1, 2 liytʼañataki).

14. ¿Kunjamsa jilïr irpirinakasa, familia pʼeqtʼirinakas Jehová Diosat yateqasipjjaspa?

¹⁴ Jehová Diosajj taqe chʼamanïkchi ukas munasiñampipuniw kuns luri sasaw Bibliajj qhanañcharaki. Familia pʼeqtʼirinakasa, jilïr irpirinakas Jehová Diosan taqe kunjjar munañanïtap wali askit uñjapjjchejja, Jupatwa yateqasipjjani, janiw jan sinttʼasiri, munañaparu apnaqeri ukhamäpkaniti. Apóstol Pablojj Jehová Diosampita, Jesucristo yoqapampit yateqasiñatakiw chʼamachasïna (1 Cor. 11:1). Apóstol Pablojj janiw mayninakar jiskʼachirïkänti, janirakiw kunatï askïki uk lurapjjañapatak obligkänti, jan ukasti kunatï askïki uk lurapjjañapatakiw chʼamañchtʼäna (Rom. 12:1; Efe. 4:1; File. 8-10). Jehová Diosajj ukham munasiñampiw taqe kuns luri, ukatwa khitinakatï Diosar munasipki, taqe kunjjar munañanïtap arjjatapki ukanakajj ukham lurapjjañaparaki.

15. Diosajj pʼeqtʼapjjañapatak uttʼayki ukanakar istʼasajja, ¿kunjamsa Diosan taqe kunjjar munañanïtap uñachtʼaytanjja?

¹⁵ Diosajj khitinakarutï markap pʼeqtʼapjjañapatak uttʼayki ukanakar respetasa, yanaptʼasaw Jehová Diosan gobiernop toqe saytʼasitas uñachtʼaytanjja. Jupanakajj kunanaktï amtapki uk janis sum amuykstanjja, jan ukajj janis jiwasatak walïkchejja yanaptʼaskakiñasawa. Akapachankir jaqenakajj janiw ukham lurapkiti, ukampis jiwasajj Jehová Diosar apnaqerisarjam uñjatasatwa ukham yanaptʼtanjja (Efe. 5:22, 23; 6:1-3; Heb. 13:17). Ukham lurañajja, jiwas kikparuw yanaptʼistu, kunattejj Diosajj jiwasan kusisit jakasiñaswa muni.

16. ¿Kunjamsa Diosan gobiernopar yanaptʼatas uñachtʼayaraksna?

¹⁶ Jehová Diosan taqe kunjjar munañanïtapjja, suma amtanakar purisaw yanaptʼaraktanjja. Jehová Diosajja, jakäwisan kunanaksa lurañasa uk janiw taqe kunatak sawaykistuti, jan ukasti jiwaspachpa amuytʼañasatakiw yanaptʼistu. Ukaw kuntï lurañasäki uk amuytʼañatak yanaptʼistu. Sañäni, kuna issa uchasiñasa, kuna kasta issa jan uchasiñasäki uk Jehová Diosajj janiw mä listar churkistuti. Jan ukasti, Testigonakaparojj sum isthaptʼasipjjañapatakiw ewjjtʼi (1 Tim. 2:9, 10). Kuntï amtktan ukajj kunjamsa mayninakar jan waltʼayaspa uk amuytʼañaswa Diosajj munaraki (1 Cor. 10:31-33). Jehová Diosajj kunjamtï amuyki ukarjam amttan ukhajja, Diosar munasitasa, ukhamarak Jupan gobiernopar yanaptʼañ munataswa uñachtʼaytanjja.

17, 18. ¿Kunjamanakatsa casarat cristianonakajj Jehová Diosan gobiernopar yanaptʼapjje?

¹⁷ Casarat cristianonakajj kunjamsa Jehová Diosan taqe kunjjar munañanïtap uñachtʼayapjjaspa uk uñjañäni. Chacha warmejja, inas amuyapkäna ukarjam jan sum jakapkchiti, inas jupanakkam jan waltʼayasipjjchi. Ukhaman uñjasisajja, kunjamsa Jehová Diosajj Israel markar uñjäna uk amuytʼañaw yanaptʼaspa, uka markan chachapäkaspas ukhamwa Dios pachpajj qhanañchi (Isa. 54:5; 62:4). Uka markajj walja kutiw Diosarojj chuym ustʼayäna. Ukatwa jan waltʼayasiri chacha warmimpi sasejja. Ukhamäkchïna ukasa, Jehová Diosajj janiw uka markarojj jankʼak jaytanukkänti. Jan ukasti sapa kutiw perdonäna, arsutapsa phoqarakïnwa (Salmo 106:43-45 liytʼañataki). Taqe chuyma munasirïtapatwa Jehová Diosar jakʼachastanjja.

¹⁸ Diosar munasiri casado cristianonakajja, Diosat yateqasiñatakiw chʼamachasipjje. Purapat jan waltʼayasiñ utjchi ukasa, janiw Bibliarjamajj jan walïki ukanak lurasajj jaljtañ thaqapkiti. Casarasipki uka urojj kuntï arsuwayapki uk phoqañajj Jehová Dios nayraqatan wali wakiskirïtapsa yatipjjarakiwa. Diosajj ‘mayachtʼata’ jakasipjjañapwa muni. Jupanakat maynejj qʼañu juchar purtʼasispa ukhakiw Bibliarjamajj divorciasipjjaspa, mayampsa casarasirakispa (Mat. 19:5, 6, 9). Casado cristianonakajj sum jakasiñatak chʼamachasipki ukhajja, Jehová Diosan gobiernoparuw yanaptʼapjje.

19. ¿Kunsa juchar purtʼastan ukhajj lurañasa?

¹⁹ Taqeniw pantjasirïtanjja, awisajja luratanakasampiw Jehová Diosarojj chuym ustʼaysna. Pantjasirïtas Diosajj sum yati, ukatwa Jesucristo yoqaparojj jiwasanak layku jiwañapatak khitanïna. Ukhamajja, juchar purtʼasktan ukhajj jankʼakiw Jehová Diosar perdón mayisiñasa (1 Juan 2:1, 2). Jan wal luratasat janiw ukhamak llakisiñasäkiti, jan ukasti kunsa yateqsna ukwa amuytʼañasa. Jehová Diosat janipuniw jitheqtañasäkiti, Jupajj perdonistaniwa, chuymachtʼistaniwa, Jupar serviskakiñatakis yanaptʼarakistaniwa (Sal. 103:3).

20. ¿Kunatsa Jehová Diosan taqe kunjjar munañanïtap jichjatpach arjjatañasa?

²⁰ Jutïrinjja, Jehová Diosaw oraqpach apnaqani, taqenirakiw Jupan cheqa yatichäwinakap yateqarakiñäni (Isa. 11:9). Ukampis jichjatpachwa Jehová Diosajj kunsa amuyi, kunjam sarnaqañassa muni uk yatjjatañasa. Akat mä jukʼa tiemporojja, Jehová Diosajj janiw gobernañatak derechonïkiti sasin janiw khitis sisjjaniti. Ukhamasti, Diosar taqe chuyma servisa, istʼasirïsa, Jupat yateqasisin sarnaqañataki chʼamachasis Jehová Diosan taqe kunjjar munañanïtap arjjatañäni.