Bautisasiñatakejja Jehová Diosar munasiñaw yanaptʼätam

1, 2. Hechos 8:27-31, 35-38 textonakarjamajja, ¿kunatsa Etiopía markankir mä jilïr servirejj bautisasïna?

¿JUMAJJ Criston discipulopjam bautisasiñ munasmati? Bautisasiñatakejja Jehová Diosar munasiñampi, yuspärañampiw waljanir wal chʼamañchawayi. Ukatakejj Etiopía markankir reinan mä jilïr serviripat parltʼañäni.

² Uka jilïr servirejja, Diosan Arup liytʼasajj bautisasiñ wakisitapwa amuyäna, ukatwa jankʼak bautisasïna (Hechos 8:27-31, 35-38 liytʼañataki). ¿Kunas jupar chʼamañchäna? Diosan Aruparojj wal munasïna, carropan viajkasajj Isaías librotwa liyiskäna. Kunapachatï Felipejj jupamp parltʼäna ukhamarak kuntï Jesusajj jupa layku lurkatayna ukanak qhanañchäna ukhajja, jupajj walpun chuymapan Jesusar yuspäräna. Ukhamarusa, uka jilïr jaqejj Jehová Diosar wal munasïna. ¿Kunjamatsa uk yattanjja? Jupajj Jehová Diosar adoririw Jerusalenar saräna uka cheqatwa kuttʼasinkäna. Amuyatajja, jupajj nayra religionap apanukünwa, ukatjja cheqpach Diosar serviri markampiw chikachasjjäna. Diosar ukham munasitap laykuw jichhajj yaqha suma amtar purïna: Criston discipulopjamaw bautisasjjäna (Mat. 28:19).

 3. ¿Kunas maynirojj bautisasiñ jarkʼaspa? (“¿Kuna kasta oraqer uñtasitas chuymamajja?” sat recuadro uñjjattʼäta).

³ Bautisasiñatakejj Jehová Diosar munasiñaw chʼamañchiristam. Ukampis kunanakar munañas bautisasiñ jarkʼiristam ukanakat amuytʼañäni. Inas jan Testigöpki uka familiaranakamarusa amigonakamarusa wal munassta, ukatwa ‘bautisasï ukhajj uñisjjapjjetaniwa’ sasin ajjsarayasisma (Mat. 10:37). Jan ukajja, inas Diosajj uñiski uka vicionakar yatintatästa, inas ukanak jaytañajj chʼamarakïchi (Sal. 97:10). Jan ukajja, inas falso religionanakan uñstayat fiestanakar jiskʼatpach sarirïsta, ukanak chuymar imasiraksta. Ukhamajj Jehová Diosajj uñiski uka fiestanak apanukuñaw jumatak chʼamäspa (1 Cor. 10:20, 21). Ukampis akhamwa jisktʼasiñama: “¿Khitirusa jan ukajj kunarus jukʼamp munastjja?” sasa.

 4. ¿Kunatsa maynejj bautisasiñapa?

⁴ Taqeniw kunarus munastanjja valoranit uñjaraktanjja, ukham munasiñajj walikïskiwa. Amuytʼañataki, Testigonakampi Bibliat janïr yatjjatkasajja, inas jumajj Bibliar wal munasjjchiyäta, Jesusarus munasjjarakchiyäta. Jichhajj Testigonakar uñtʼjjasajja, jupanakamp chikäñ wal munpachätajja. Ukampis taqe ukanakajja, janiw Jehová Diosar katuyasis bautisasiñatak yanaptʼkapunïtamti. Bautisasiñatakejja maynejj Diosaruw munasiñapa, ukaw wali wakiskirejja. Taqe kunat sipansa jupar jukʼamp munasïta ukhajja, janiw kunas ni khitis jupar serviñ jarkʼkätamti. Ukhamajj Jehová Diosar munasiñajj janiw bautisasiñatakikejj yanaptʼkistuti, jan ukasti Diosar serviskakiñatakiw yanaptʼarakistu.

 5. ¿Kuna jisktʼanakarus aka yatichäwin qhanañchaskañäni?

⁵ Jesusajj akham sänwa: “Jehová Diosamarojj taqe chuymamampi, taqe almamampi, taqe amuyumampi, taqe chʼamamampi munasiñamawa” sasa (Mar. 12:30). ¿Kunjamatsa Diosar ukham respetañsa munasiñsa yateqasma? Ukatakejj qhawqsa Diosajj munasistu uka toqetwa lupʼiñama (1 Juan 4:19). Diosar ukham munasiñajj ¿kunjam chuymanïñatakisa, kun lurañatakisa yanaptʼarakiristamjja?b Uk jichhajj yatjjatañäni.

 6. Romanos 1:20 textorjamajj ¿kunjamatsa Jehová Diosar uñtʼasma?

⁶ Jehová Diosarojj luratanakapat lupʼisaw uñtʼañama (Romanos 1:20 liytʼañataki; Apoc. 4:11). Alinakasa animalanakasa kunja yatiñampi lurtʼatäpjjesa ukanakatwa amuytʼañama. Jaqen cuerpopas kunja musparkañ luratasa uka toqetwa yatjjatañamaraki (Sal. 139:14). Ukhamarakiw intitsa amuytʼañama, Jehová Diosajja intirojj wali chʼamani lurawayi, ukampis intjam wali chʼamani walja millón warawaranakaw utjaraki (Is. 40:26).c Ukanakat amuytʼäta ukhajja, jukʼampiw Jehová Diosar respetäta. Jehová Diosajj wali yatiñaniwa, wali chʼamanirakiwa, uk amuyañaw amigopar tukuñatak yanaptʼarakistu. Jupar taqe chuyma munasiñatakejj jukʼampwa jupar uñtʼañama.

 7. Jehová Diosar taqe chuyma munasiñatakejj ¿kuna toqetsa jan pächasiñamäki?

⁷ Jehová Diosajj jumat wal llakisi, janiw ukat pächasiñamäkiti. ¿Aka oraqe ukhamarak alajjpacha lurir Diosajj janis jumat llakiskaspa, janis jupatakejj importantëkasma ukhamti amuyasta? Ukhamächi ukhajja, aka arunakwa amtañama, “[Diosajj] janiw sapa mayni jiwasanakat jayankkiti” (Hech. 17:26-28). Kunjamtï Davidajj Salomonar siskänjja, “Tatitusti taqe chuymanakjja sumwa uñji”. Biblian akham sistuwa: “Jumatï [Diosar] thaqtätajja, jupasti jumarojj jikjjatayasïtamwa” sasa (1 Crón. 28:9). Cheqas Jehová Diosaw jumar jawsastamjja, ukatwa Bibliat yatjjatasktajja (Jer. 31:3, TNM). Kunanaktï Jehová Diosajj juma layku lurawayki ukanakat jukʼamp yatjjataskakïta ukhajja, jukʼampiw jupar munasïta.

 8. ¿Kunjamsa Jehová Diosarojj munasiñapat yuspärasma?

⁸ Jehová Diosaru munasiñapat yuspärañatakejj orasiñamawa. Llakinakamat jupar cuenttʼäta, kunanaktï juma layku lurawayki ukanakat yuspärarakïta ukhajja, jukʼampiw jupar munasïta. Oracionanakamar kunjamsa jupajj istʼasktam uk amuyäta ukhasti, jukʼampiw jupar jakʼachasïta (Sal. 116:1). Ukhamatwa Diosajj jumat llakisitap amuyäta. Ukampis jukʼamp jupar jakʼachasiñatakejja, kunjam amuyunakanisa kun lurañamsa muni ukanak yateqañaw wakisi. Ukatakejj Bibliatwa yatjjatañama, ukhamatakwa ukanak yatïta.

 9. ¿Kunjamsa Bibliar valoranit uñjatam uñachtʼayasma?

⁹ Diosan Aruparojj valoranitwa uñjañama. Bibliakiw Jehová Diosat cheqa yatichäwinaksa amtanakapsa yatichistaspa. ¿Kunjamsa Bibliar valoranit uñjatam uñachtʼayasma? Sapüruw Biblia liyiñama, Bibliat yatichapktam ukatakis wakichtʼasiñamawa, yateqkta ukarjamaw sarnaqañamaraki (Sal. 119:97, 99; Juan 17:17). ¿Biblia sapüru liyiñatak horariomajj utjtamti, ukarjamat phoqaskarakta?

10. ¿Bibliajj kunjam lurtʼatasa?

¹⁰ ¿Bibliajj kunjam luratasa? Biblian mä qhawqha libronakapjja Jesusar uñtʼirinakaw qellqapjjäna. Bibliakiw kunsa Jesusajj juma layku luräna uk sum qhanañchi. Kuntï Jesusajj lurkäna yatichkarakïna ukanak yateqäta ukhajja, jupan amigopäñwa munäta.

11. ¿Kunas Jehová Diosar munasiñatak yanaptʼätam?

¹¹ Jehová Diosar jukʼamp munasiñatakejja, Jesusar munasiñwa yateqañama. Jehová Diosajj kunjam chuymanisa ukjja, Jesusaw sum uñachtʼayi (Juan 14:9). Jesusat jukʼamp yateqäta ukhajja, Jehová Diosajj kunjamasa uk jukʼamp sumwa amuyäta, ukat jukʼampirakiw jupar munasïta. Jesusajja, pobrenakatsa usutanakatsa aynachtʼatanakatsa wal khuyaptʼayasïna, uka toqetwa lupʼiñama. Jesusan ewjjtʼanakapatsa, ukarjam sarnaqañajj kunjamsa yanaptʼtam ukanakatsa lupʼiñamarakiwa (Mat. 5:1-11; 7:24-27).

12. Jesusat jukʼamp yateqañajja, ¿kunatakis yanaptʼätam?

¹² Juchanakasan perdonatäñapatakejj Jesusaw jiwas layku jiwawayi, uka toqet lupʼisaw Jesusar jukʼamp munasïta (Mat. 20:28). Jesusajj taqe chuymaw juma layku jiwawayi, uk yatiñajj juchanakamat arrepentisiñataki, Jehová Diosar perdón mayisiñatakiw yanaptʼätam (Hech. 3:19, 20; 1 Juan 1:9). Jehová Diosarusa Jesusarusa jukʼamp munasïta ukhajja, khitinakatï jupanakar munasipki ukanakan amigopäñwa munäta.

13. ¿Kunsa Jehová Diosajj churtamjja?

¹³ Jehová Diosan familiapar munasiñwa yateqañama. Inas jan Testigöpki uka familiaranakamasa, nayra amigonakamasa kunatsa Diosar serviñ munta uk jan amuyapkchiniti, inas juma contra saytʼapjjarakchini. Ukampis Jehová Diosaw jilat kullakanakarojj familiamäpkaspas ukham churätam. Uka familiat jan jitheqtkäta ukhajja, jupanakajj munasipjjätamwa, wakiski ukarjamaw yanaptʼapjjarakïtam (Mar. 10:29, 30; Heb. 10:24, 25). Jutïrinjja inas pachpa familiaranakamas Jehová Diosar sirvjjapjjarakchini, Diosan leyinakaparjamas sarnaqjjapjjarakchini (1 Ped. 2:12).

14. Kuntï 1 Juan 5:3 textojj siski ukarjamajja, ¿Jehová Diosan leyinakapat kamsasmasa?

¹⁴ Diosan leyinakap wali valoranitwa uñjañama, ukarjamaw sarnaqañamaraki. Jehová Diosar janïr uñtʼkasajja, inas munañamarjamak sarnaqchiyäta. Ukampis jichhajja Jehová Diosan leyinakapajj jukʼamp sumätapwa amuyjjpachätajja (Sal. 1:1-3; 1 Juan 5:3 liytʼañataki). Biblianjja casadonakatakisa, awk taykanakatakisa, wawanakatakisa kunayman ewjjtʼanakaw utji, ukanakat amuytʼam (Efes. 5:22-6:4). ¿Kunjamsa uka ewjjtʼanakarjam sarnaqañajj familiamar yanaptʼawayi uk uñjtati? Amigonak toqet Bibliajj ewjjkistu ukar istʼasajj ¿jan wali lurañanak jaytjjtati, suma luräwinak lurañatakit chʼamachasjjta? ¿Jukʼamp kusisitäjjtati? (Prov. 13:20; 1 Cor. 15:33). Ukhamäpachawa.

15. Biblian wiñay yatichäwinakap sum phoqañatak yanaptʼa munasma ukhajj ¿kunsa lurasma?

¹⁵ Awisajja, Bibliat yateqaskta uka wiñay yatichäwinaka jan ukajj principios bíblicos ukanak kunjamsa phoqasma uk amuytʼañajj chʼamakïspawa. Ukatwa Jehová Diosajj Bibliat apstʼat qellqatanak markap toqe churtamjja. Uka qellqatanakaw kunatï walïki jan walïkaraki ukanak amuytʼañ yanaptʼätam (Heb. 5:13, 14). Uka qellqatanak liytʼkäta yatjjatkarakïta ukhajja, Diosan yatichäwipajj wali qhanätapa wali yanaptʼkirïtapwa amuyäta, ukarakiw Jehová Diosan markapankañ munañamatakis yanaptʼätam.

16. ¿Jehová Diosan markapajj kunjam organisatasa?

¹⁶ Diosan markapar munasiñsa yanaptʼañsa yateqañamawa. Jehová Diosajja markaparojj congregacionanakaruw organisi. Uka congregacionanakan pʼeqtʼañapatakejj Jesús Yoqaparuw uttʼayaraki (Efes. 1:22; 5:23). Jesusasti ‘suma phoqeri amuyasiri esclavoruw’ uttʼayi, uka jiskʼa grupojj Jesusan mayitanakap lurasiñapatakiw pʼeqtʼaski. Jupanakaw Diosar jakʼachasiñamatakisa, jupat jan jitheqtañamatakisa wal chʼamachasipjje (Mat. 24:45-47). ¿Kunjamsa suma phoqeri esclavojj jumar cuidaraktamjja? Mä toqetjja, congregacionanakan wakichtʼat jilïr irpirinak uttʼayasiñapatakiw yanaptʼi (Is. 32:1, 2; Heb. 13:17; 1 Ped. 5:2, 3). Uka jilïr irpirinakajja jumar taqe horasan yanaptʼañatakejj jankʼakïpjjewa, Jehová Diosar jukʼamp jakʼachasiñamatakisa chuymachtʼatäñamatakisa wal chʼamachasipjjaraki. Ukanakat sipansa, Jehová Diosat jaqe masimar yatichañamatakiw jupanakajj yanaptʼapjjätam (Efes. 4:11-13).

17. Romanos 10:10, 13, 14 textorjamajja, ¿kunatsa Jehová Diosat jaqenakar yatiytanjja?

¹⁷ Jehová Diosar munasipjjañapatakiw yaqhanakar yanaptʼañama. Jesusajja ‘Diosatwa jaqe masimar yatichapjjañama’ sasaw discipulonakapar säna (Mat. 28:19, 20). Uka mandamientjja obligacionat phoqasksnawa, ukampis jumatï Jehová Diosar jukʼamp munasïtajja, kunjamtï Pedrompi Juanampejj sapkäna ukhamarakiw akham säta: “Kunanaktï nanakajj uñjapkta, istʼapkarakta ukanakat parlañjja janiw amuktʼapkiristti” sasa (Hech. 4:20). Jehová Diosar munasiñapatak maynir yanaptʼañajj wali kusiskañawa. Felipe sat cristianojja Etiopía markankir reinan mä jilïr serviriparu Qellqatanak uñtʼañapataki, ukhamarak bautisasiñapataki yanaptʼkäna ukhajja, wal kusispachäna. Jumajj Jesusan arunakapar istʼasa Felipjam predicäta ukhajja, Jehová Diosan Testigopäñ munatamwa uñachtʼayäta (Romanos 10:10, 13, 14 liytʼañataki). Kunjamtï Etiopía markankir jilïr servirejj siskäna ukhamarakiw jumajj akham sasma: “¿Kunarak nayan bautisasiñajatak jarkʼitaspasti?” sasa (Hech. 8:36).

18. ¿Kunanaksa akjjar jutki uk yatichäwin yatjjataskañäni?

¹⁸ Bautisasiñtï amtätajja, jakañ vidaman ukajj wali sumäniwa. Niyakejjay uka amtajj wali wakiskirïchejja, bautisasiñajj kamsañsa muni uk wali sumwa amuykiptʼañama. ¿Bautismo toqet kun yatiñamas wakisi? ¿Janïr bautisaskasasa bautisaskäta uka qhepatsa kunsa lurañama? Akjjar jutki uka yatichäwinwa uka toqenakat yatjjataskañäni.