Diosajj jiwatanakar jaktaykani ukajja, munasirïtapa yatiñanïtapa paciencianïtapwa uñachtʼayi

 1. ¿Kunatsa Jehová Diosajj taqe kun lurañ qalltäna?

MÄ TIEMPONJJA Jehová Diosajj sapakïnwa, ukampis janiw llakitäkänti. Kusisitäñatakejj janiw compaña munkänti. Ukhamäkchïnsa, yaqhanakajj jakapjjarakispa kusisitäpjjarakispa ukwa munäna. Ukatwa munasiñat taqe kun lurañ qalltäna (Hech. 17:24, 25; 1 Juan 4:19).

 2. Diosan luratanakap uñjasajj ¿kunjamsa Jesusas angelanakas jikjjatasipjjäna?

² Nayraqatjja Jesús Yoqaparuw Jehová Diosajj luräna. Ukjjarusti, Jesús toqew “taqe kunatï alajjpachansa oraqensa utjki ukanak luräna”, angelanakamppacharu (Col. 1:16). Jesusajj Awkipamp chik trabajisajj wali kusisitänwa (Prov. 8:30, TNM). Angelanakas wal kusisipjjarakïna. ¿Kunatsa? Jupanakajj kunjamsa Jehová Diosampi Jesusampejj aka oraqe ukhamarak alajjpacha lurapjjäna uk uñjapjjänwa. ¿Uk uñjasajj kamachapjjänsa? Bibliarjamajja, wal kusisipjjäna, cheqas taqe kun luratap uñjasajj Jehová Diosar wal jachʼañchapjjäna, yamas jaqenakar lurkäna ukhajj jukʼampiw jachʼañchapjjpachäna (Job 38:7; Prov. 8:31, TNM). Taqe luratanakapajja, wali munasirïtapa, wali yatiñanïtapwa uñachtʼayi (Sal. 104:24; Rom. 1:20).

 3. Kuntï 1 Corintios 15:21, 22 textojj siski ukarjamajja, ¿kunas Jesusan jiwatapat utji?

³ Diosajja wali suma oraqen jaqenakajj wiñayatak jakasipjjaspa ukwa munäna. Ukampis Adanampi Evampejj wali munasiri Awkip contraw saytʼapjjäna, ukatwa wiñay jakañ aptʼasipjjäna, wawanakapamppacharuw jiwañar apjjaruyapjjäna (Rom. 5:12). Uk uñjasajj ¿kunsa Jehová Diosajj luräna? Kunjamsa juchampit jiwañampit jaqenakar kutsuyaspa uk jankʼakiw amtäna (Gén. 3:15). Yoqap sacrificion churañwa amtäna, ukhamat juchampit jiwañampit Adanan wawanakapar kutsuyañataki. Ukatwa Diosar serviñ amtapki ukanakajj wiñay jakañ katoqapjjaspa (Juan 3:16; Rom. 6:23; 1 Corintios 15:21, 22 liytʼañataki).

 4. ¿Kunsa aka yatichäwin yatjjataskañäni?

⁴ Jehová Diosajj jiwatanakar jaktaykani uka toqet walja jisktʼanakaw utjaspa. Sañäni, ¿kunjamsa jiwatanakajj jaktanipjjpachäni? ¿Munat familiaranakasasa amigonakasas jaktanipkani ukhajj uñtʼaskpachañäniti? ¿Kunatsa jiwatanakan jaktanipjjatapajj wali kusiskayäni? Jiwatanakajj jaktanipkani ukajj ¿kunsa Jehová Diosan munasiñapata, yatiñapata, pacienciapata yatichistu? Uk uñjañäni.

 5. Jiwatanakajj janiw juntok jaktanipkpachäniti sasin ¿kunatsa sissna?

⁵ Jehová Diosajj Jesús taypiw walja millón jiwatanakar jaktayani. Ukampis janiw taqe jiwatanakajj juntok jaktanipkpachäniti. ¿Kunatsa? Taqeni juntok jaktanipjjaspa ukhajja, jankʼakiw aka oraqejj phoqantjjaspa, chʼajjwañakirakiw utj-jjaspa. Ukampis Jehová Diosarojja, janiw ukajj gustkiti. Sumankaña utjañapatakejj taqe kunas suma ordentʼatäñapawa, uk Jupajj sum yati (1 Cor. 14:33). Jehová Diosajj Jesusamp chika aka oraqe jaqenakatak lurkäna ukhajja, wali paciencianïtapa yatiñanïtapwa uñachtʼayäna. ¿Kunjamsa uk uñachtʼayäna? Janiw mäki taqe kuns lurkänti, jan ukasti jukʼat jukʼatwa luräna. Jesusajj waranqa maranaka apnaqkani ukhajja, khitinakatï Armagedón jakkir pasapkani ukanakampiw jiwatanakatak aka oraq wakichayani, ukhamatwa Awkipjam paciencianïtapa yatiñanïtap uñachtʼayani.

 6. Hechos 24:15 textorjamajja, ¿khitinakas jaktanipjjarakini?

⁶ Armagedón jakkir pasirinakajja, jaktanirinakaruw Diosan Reinopampita, mandamientonakapampit yatichapjjani, uk lurapjjañapajj wali wakiskirïniwa. ¿Kunatsa? Jaktanirinakat jilapartejja, Bibliarjamajj “jan cheqapar sarnaqer” jaqet uñtʼatäpki ukanakäniwa (Hechos 24:15 liytʼañataki). Kuna bendicionanakatï Jesusan jiwatapat utjki uk katoqañatakejja, jupanakajj cambiapjjañapäniwa. Cheqas Diosar jan uñtʼiri walja millón jaktanirinakar yatichañajj waljaw utjani. ¿Taqenirus juntokit Bibliat yatichpachañäni, jan ukajj sapa mayniruch kunjamtï jichhürunakan lurktan ukham yatichpachañäni? ¿Jaktanirinakajj congregacionanakar asignatäpjjpachäniti, jupanakat qhep jaktanirinakar yatichapjjañapatakejj jupanakar wakichaspachäniti? Janiw yatktanti, yatiñatakejj suytʼañaw wakisi. Ukampis Jesusajj waranqa mara apnaqañ niy tukuyjjani ukhajja, Jehová Diosan yatiñapajj taqe aka oraqpachan phoqtʼatäniwa (Is. 11:9). Uka waranqa maranjja, kunayman lurañanakan yanaptʼañatakejj waljaw utjani.

 7. ¿Kunatsa Diosan servirinakapajj khuyaptʼayasiñamp jaktanirinakar yatichapjjani?

⁷ Waranqa maranakanjja, Diosampi sumat uñjatäñatakejj taqeniw chʼamachasiskakiñäni. Ukatwa jaktanipkani ukanakarojj jan wali amuyunakap apanukupjjañapataki, Jehová Diosatakjam sarnaqañ munapjjañapatak khuyaptʼayasiñamp yanaptʼañäni (1 Ped. 3:8). Diosan servirinakapajj kunja humilde chuymanïpjjesa, Diosampi suma uñjatäñatakis kunjamsa chʼamachasisipkaki uk uñjasajja, jaktanirinakajj Diosar adorañwa munapjjarakini (Filip. 2:12).

 8. ¿Kunatsa jaktanipkani ukanakarojj uñtʼaskañäniwa sasin sissna?

⁸ Jaktanirinakar katoqapkani ukanakajja, familianakaparu amigonakaparu uñtʼasipkaniwa sañatakejj walja razonanakaw utji. Sañäni, nayra tiemponjja mä jaqejj janïr jiwkasajj kunjamänsa uka pachpwa Jehová Diosajj jaktayirïna, ukatwa ‘mä jaqejj kunjam uñnaqanïnsa, kunjam arunïnsa, kunjam amuyunïnsa uka pachpwa jaktayarakini’ sasin sistanjja. Yamas Jesusajja, jiwatanakajj ikisipkaspas ukhamawa, jiwatat jaktasajj ikitsa sartapkaspa ukhamarakiwa sasaw säna (Mat. 9:18, 24; Juan 11:11-13). Mä jaqejj ikit sartki ukhajja, pachpa uñnaqani pachpa aruni pachpa amuyuniw sarti. Lazarot amtañäni, pusi urunak jiwatäjjäna ukhaw Jesusajj jaktayäna, ukhamajj jañchipajj thujstjjpachänwa. Ukampis jaktkäna ukhajja, kullakanakapajj ukjpachaw Lazaröskapunitap amuyapjjäna, jupas ukhamarakiw kullakanakapar uñtʼaskakïna (Juan 11:38-44; 12:1, 2).

 9. Jiwatanakajj jaktanisajj janiw ukjpach perfectöpkaniti sasajj ¿kunatsa sissna?

⁹ Jesusajj aka oraq apnaqkani ukhajja, janiw khitis “usutätwa” sisjjaniti sasaw Jehová Diosajj säna (Is. 33:24; Rom. 6:7). Ukhamasti, Diosajj jiwatanakar jaktaykani ukhajja, jan usut cuerponwa jaktayani. Ukampis janiw ukjpachajj perfectöpkaniti. Perfectöjjapjjaspa ukhajja, familiaranakapajj inas jan uñtʼjjapjjchispati. Amuyatajja, Cristojj waranq maranak apnaqkani ukhaw jaqenakajj jukʼat jukʼat perfector tukusipkani. Waranq maranak tukuyjjani ukhajja, Jesusajj Awkiparuw Reino kuttʼayjjani. Uka Reinojja kuntï Diosajj munkäna ukanakwa lurani, jaqenakas uka Reinonwa perfectöpjjarakini (1 Cor. 15:24-28; Apoc. 20:1-3).

10. ¿Jiwatanakar jaktanir uñjasajj kunjamas jikjjatasiñäni?

¹⁰ Familiaranakasaru amigonakasaru jaktanir uñjasajj kunjamas jikjjatasiñäni uk amuytʼañäni. ¿Kusisiñat larusiñäniti jan ukajj jachañänicha? ¿Wali kusisitäsajj Jehová Diosarut cancionanakampi jachʼañchañäni? Janiw yatktanti, ukampis jiwatanakar jaktanir uñjasajja, jukʼampiw Jehová Diosampir Jesusampir munasiñäni.

11. Jesusajj kuntï Juan 5:28, 29 texton siskäna ukarjamajja, ¿kunsa Diosar istʼirinakajj katoqapjjani?

¹¹ Jaktanipkani ukanakajja, jan wali lurañanakap apanukusina ukhamarak Diosan mandamientonakaparjam sarnaqasina kunja kusisitäpjjanisa uk amuytʼañäni. Jaktanisajj cambiañatak chʼamachasipkani ukanakajja, wiñayaw jakapjjani. Ukampis cambiañ jan munapkani ukanakajja, janiw wiñay jakañ katoqapkaniti (Is. 65:20; Juan 5:28, 29 liytʼañataki).

12. ¿Kuna bendicionanaksa Jehová Diosajj aka oraqen jakirinakar churani?

¹² Diosan Reinopanjja, taqpach servirinakapaw kuntï Proverbios 10:22 texton siski ukajj cheqätap uñjapjjañäni, ukan akham siwa: “Tatitun bendicionapawa qamiriptayi; janiw kuna llakisiñsa ukampi chikajj apayankiti” sasa. Jehová Diosan espíritu santopampi yanaptʼatäsajja, walja bendicionanakwa katoqañäni. Diosan servirinakapajj jukʼat jukʼatwa Cristjam chuymanëjjañäni, perfectöjjarakiñäni (Juan 13:15-17; Efes. 4:23, 24). Urut urutjamaw usunakajj chhaqtjjani, suma jaqëjjarakiñäni. ¡Wali kusisitäñäniwa! (Job 33:25). Ukampis ¿kunjamsa jaktañ toqet lupʼiñajj jichhürunakan yanaptʼistu?

13. Salmo 139:1-4 qellqatarjamajja, ¿jiwatanakar jaktaykani ukajj kunjamsa Diosajj sapa maynir sum uñtʼatap uñachtʼayi?

¹³ Kunjamtï yatjjataniwayktanjja, Diosajj jiwatanakar jaktaykani ukhajj pachpa amuyuni, ukhamarak janïr jiwkasajj kunjam jaqënsa uka pachpwa jaktayani. Ukham lurañatakejj qhawqsa jaqenakar uñtʼpacha uk amuytʼañäni. Niyakejjay Jehová Diosajj wal munaschistojja, kunsa pienstan, kunjamäsktansa, kunsa parltan, kunsa lurtan ukanak sumwa yati. Ukatwa jaktayañajj wakiskani ukhajj kunjam jaqënsa uka pachpa jaktayani. David reyejja Jehová Diosajj qhawqsa sapa maynir uñtʼistu uk sum yatïna (Salmo 139:1-4 liytʼañataki). Diosajj sapa maynir sum uñtʼatap yatisajj ¿kunjamas jiwasajj jikjjatastanjja?

14. ¿Kunatsa Diosajj jiwasat taqe kun yatitapat jan llakisiñasäki?

¹⁴ Jehová Diosajj kunanaktï lurktan ukanak taqpachwa yati. ¿Kunatsa Diosajj pantjasitanakaj uñjarakpachaw sasin jan llakisiñasäki? Amtañäni, Diosajj sapa mayniruw wal munasistu, jupatakejj taqeniw wali valoranïtanjja. Kunanakas jakäwisan pasawayistu ukanak Diosajj sum yati. ¿Ukanak yatiñajj waljjay chuymachtʼistojja? Janipuniw sapakïksnas ukham amuyasiñasäkiti, Jehová Diosajj taqe horasanwa jiwasampïski, yanaptʼañsa wal munarakistu (2 Crón. 16:9).

15. ¿Kunjamsa jiwatat jaktaña utjatapajj Diosan yatiñanïtap uñachtʼayistu?

¹⁵ Jaqenakajj jiwañar wal ajjsarapki ukhajja, enemigonakapan amenazatajj jan walinak lurjjapjjakiwa. Supayampi apnaqat jaqenakajja, ukhamwa jaqenakarojj amigonakapar jan wal lurapjjañapatakisa, creencianakap jaytapjjañapatakisa jiwayämawa sasin ajjsarayapjje. Ukampis jiwasar ukham sapjjestu ukhajja janiw jiwañar ajjsarktanti. ¿Kunatsa? Jiwayapkistanisa Jehová Diosajj jaktayistaniwa (Apoc. 2:10). Kunanaksay lurasipkpan janipuniw kunas Jehová Diosat jitheqtaykistaniti (Rom. 8:35-39). Jiwatanakar jaktayäwa sasinjja, Jehová Diosajj wali yatiñanïtapwa uñachtʼayistu. Ukatwa Supayan arkirinakapajj jiwayañampi amenazapkistu ukhajj jan ajjsarktanti. Jehová Diosat janipun jitheqtañatakis wal chʼamañcharakistu.

16. ¿Kunanaksa jisktʼasiñasa, uka jisktʼanakar ‘jïsa’ sisstan ukhajj kunsa uñachtʼayañäni?

¹⁶ Enemigonakasajj jiwayapjjämawa sistaspa ukhajja, ¿Diosaw jaktayaskitani sasat confiyañäni? Uk yatiñatakejj akham sasaw jisktʼasiñasa: “¿Kunanak lurañtï nayajj sapür amtkta ukanakajj Jehová Diosar confiyatajti uñachtʼayi?” sasa (Luc. 16:10). Ukatjja “¿Diosan Reinop nayraqat thaqä ukhajja, Diosaw kunatï jakañatak wakiski uk churitani sasin confiyatajti luratanakajajj uñachtʼayi?” sasaw jisktʼasiñasaraki (Mat. 6:31-33). Uka jisktʼanakar jïsa sisstan ukhajja, Diosar confiyataswa uñachtʼayañäni, uka confianzaw jan walinakan aguantañatak yanaptʼistani (Prov. 3:5, 6).

17. 1) ¿Kunjamsa jiwatat jaktaña utjatapajj Jehová Diosan paciencianïtap uñachtʼayi? 2) ¿Kunjamsa Diosarojj paciencianïtapat yuspärsna?

¹⁷ Jehová Diosajja, kunürusa aka jan wali pachar tukjani uk amtjjewa (Mat. 24:36). Ukampis uka tiempo puriniñap pacienciampiw suyaski. Jiwatanakar jaktayañ walsa munkchejja, janiw nayrtʼkaniti (Job 14:14, 15). Horasap puriniñapwa suyani (Juan 5:28). Jehová Diosar wali paciencianïtapat yuspärañatakejj walja razonanakaw utji. Sañäni, pacienciampi suyatapatwa walja jaqenakan arrepentisipjjañapatakejj tiempojj utji, jiwasas ukhamatwa Diosar uñtʼaraktanjja (2 Ped. 3:9). Jehová Diosajja walja jaqenakan wiñay jakañ katoqapjjañapwa muni. ¿Kunjamsa Diosarojj paciencianïtapat yuspärsna? ‘Taqe khitinakatï wiñay jakañatak suma chuymanïpki’ ukanakar jikjjatañatak chʼamachasisa, ukhamarak Diosar munasipjjañapataki servipjjañapataki yanaptʼasa (Hech. 13:48). Ukhamatwa jupanakarojj kunjamtï Diosan pacienciapajj jiwasar yanaptʼkistu ukham yanaptʼarakini.

18. ¿Kunatsa mayninakar pacienciampi uñjañajj wakisi?

¹⁸ Jehová Diosajja, waranqa maranak phoqasiñap pacienciampiw suyarakini, ukhamat jaqenakajj perfectöjjañasataki. Uka tiempo puriniñapkamajja, Diosajj juchanakas perdonistaniwa. Ukatwa Diosat yateqasisajj kuna sumanaktï mayninakajj lurapki ukak amjjäsiñasa, pacienciampis jupanakar uñjañasaraki. Mä kullakat parltʼañäni, esposopajj llakimpi apayasisaw aynachtʼäna, ukatwa tantachäwinakar jan sarjjänti. Kullakajj akham siwa: “Ukham pasatapajj nayatak wali chʼamänwa. Kunanak lurañtï familiajan amtapkayäta ukanakas janiw phoqasjjänti” sasa. Ukhamäkchïnsa kullakajj munasiñampi pacienciampiw esposopar uñjaskakïna. Jehová Diosaruw confiyäna, janirakiw aynachtʼkänti. Jehová Diosat yateqasisajja, esposopajj mä problemäkaspas ukham uñjañat sipansa, esposopajj kunja suma jaqënsa uk uñjañatakiw chʼamachasïna. Kullakajj akham saskakiwa: “Esposojajj suma jaqewa, jukʼat jukʼat recuperasiñatakiw chʼamachasiski” sasa. Suma jaqëñatak chʼamachasisipki uka familiaranakasarusa, jilat kullakanakasarusa pacienciampiw uñjañasa.

19. ¿Kun lurañsa taqe chuym amttanjja?

¹⁹ Jesusampi angelanakampejja, Diosajj aka oraq lurkäna ukhajj wal kusisipjjäna. Jutïrin aka oraqejj perfecto jaqenakampi phoqantatäjjani, Diosar munasipjjani, servipjjarakini ukhajj ukhamarakiw jupanakajj wal kusisipjjani. Jesusamp chika gobernañatak alajjpachar sarapkani ukanakajja, jaqenakan kusisita jakasipjjañapatak yanaptʼapjjatapatjja wal kusisipjjani (Apoc. 4:4, 9-11; 5:9, 10). Llakisiñat jachañajj janiw utj-jjaniti, antisas kusisiñatwa jachañäni. Ukatsti usunakasa, llakisiñasa, jiwañasa wiñayatak chhaqtjjani ukhajj wali sumaw jakasjjañäni (Apoc. 21:4). Uka uru puriniñapkamajja, Diosat yateqasisajj munasirïñataki, yatiñanïñataki, paciencianïñatakiw chʼamachasiñasa. Ukham lurañäni ukhajja, kuna jan walinakan uñjaskasas kusisitäskakiñäniwa (Sant. 1:2-4). Ukhamasti jiwatanakan jaktanipjjañap yatisajj walpun Jehová Diosar yuspärañasa (Hech. 24:15).