‘Akaw templon leyipajja’

1, 2. 1) ¿Ezequielajj uñjkäna uka visionat kunsa pasïr yatichäwin yatjjataniwaytanjja? 2) ¿Kuna pä toqetsa aka yatichäwin yatjjataskañäni?

EZEQUIELAJJ uñjkäna uka templompi walja maranak qhepat apóstol Pablojj Diosan jachʼa templopat qhanañchkäna ukampejj jan pachpätapa, ukhamarak Diosar adorañatakejj jupan leyinakap phoqañ wakisitapwa 13 yatichäwin yatjjataniwaytanjja. Israelitanakajj uka leyinakarjam phoqapjjaspäna ukhakiw Jehová Diosampejj mayamp sum apasjjapjjaspäna. Ukham lurañajj wali wakiskirïnwa, ukatwa Diosajj uk qhanstayañatakejj ‘templon leyipa’ sasin pay kuti säna (Ezequiel 43:12 liytʼañataki).

² Ezequielajj visionan mä templo uñjkäna ukajj kunsa yatichistu ukwa jichhajj yatjjatañäni. Yaqha markar apatanakajja, Diosar adorañatak utjki uka leyinakat kunsa yateqapjjpachäna ukwa nayraqat yatjjatañäni. Ukatsti aka jan wali qhepa urunakan kunsa uka visionat yateqsna ukwa yatjjatarakiñäni.

 3. ¿Kunatsa kuntï Ezequielajj visionan uñjkäna ukajj israelitanakar phenqʼasiypachäna?

³ Babiloniar apata judionakajj kunsa yateqapjjpachäna uk yatiñatakejja, kuntï Ezequielajj visionan uñjkäna ukanakat mä qhawqha yatjjatañäni. Wali alto qollu. Ezequielajj visionan uñjkäna ukampi, Isaiasajj Diosaruk wasitat adorañat mä profecian parlkäna ukampejj igualakïtapwa judionakajj amuyapjjpachäna (Is. 2:2). ¿Diosan templopajj wali alto qollu patjjankatapajj kunsa israelitanakar yatichäna? Ukajj Jehová Diosar adorañajj wali altor aptatäñapwa uñachtʼayäna, mä arunjja jupar adorañaw taqe kunat sipansa nayrankañapäna. Cheqas Jehová Diosajj ‘taqe yaqha diosanakjjar jachʼañchatawa’, kunjamsa Jupar adorasiñapa uksa Dios pachpaw amtawayi, ukatwa Diosar adorañajj wali altor aptatäñapa (Sal. 97:9). Ukampis judionakajj janiw ukarjam phoqapkänti. Walja maranakarakiw Diosarojj jan sum adorjjapjjänti. Ukampis Diosan templopajj wali altonkatap uñjasajja, mä arunjja Diosar sum adorañajj wali wakiskirïtap amuyasajja, suma chuymani judionakajj jan wali luratanakapat phenqʼasipjjpachänwa.

4, 5. ¿Kunanaksa yaqha markar apat judionakajj templon jachʼa punkunakapat yateqapjjpachäna?

⁴ Wali jachʼa punkunaka. Ezequielajj visionap qalltan uñjkäna uka angelajja, punkunakwa mediskäna. Punkunakajj altorojj mä 30 metronakanïnwa (Ezeq. 40:14). Uka punkunak manqhanjja guardianakataki cuartonakaw utjäna. ¿Templon planopat yatjjatirinakatakejj kamsañsa ukajj munäna? Diosajj Ezequielar akham sänwa: ‘Templon mantañ cheqap wali amuyumpipun uñjam’ sasa. ¿Kunatsa ukham sispachäna? Israelitanakajj ‘jan wali chuymani ukhamarak jan circuncidata extranjeronakaruw’ sagrado templor mantayapjjäna. Ukatwa Diosajj ‘janiw respetomp temploj uñjapkiti’ sasin säna (Ezeq. 44:5, 7).

⁵ ‘Jan circuncidatäpkäna’ ukanakajja, Diosajj Abrahanan tiempopan churkäna uka ley janiw phoqapkänti (Gén. 17:9, 10; Lev. 12:1-3). Ukampis ‘jan wali chuymanïñaw’ jukʼamp jan walïnjja. ¿Kunatsa ukham sistanjja? Jan wali chuymaninakajj Jehová Diosan arunakapsa leyinakapsa janiw istʼapkänti. Uka jan istʼasir jaqenakarojja, Diosan sagrado temploparojj janiw mantayapjjañapäkänti. Diosajj kʼari chuymanïñarojj uñisiwa, ukampis templopajj kʼari chuymani jaqenakampi phoqantatänwa, markapajj ukhamakwa uk uñchʼukirakïna. Ezequielajj mä visionan templon punkunakapa, guardianakan cuartonakapa uñjkäna ukajja, janipun mayampi ukham lurasiñapwa uñachtʼayistu. Diosan templopar mantañatakejja, leyinakap respetañasawa. Ukham lurañäni ukhakiw Jehová Diosajj jupar adoratas sum uñjani.

6, 7. 1) ¿Taqpach templon anqäjja perqapat parlasajj kunsa Jehová Diosajj markapar yatichäna? 2) ¿Kunjamsa israelitanakajj Jehová Diosan templop uñjapjjäna? (Qhanañchäwi uñjjattʼäta).

⁶ Anqäjjankir perqa. Templon anqäjjankir perqapaw wali musparkañarakïna, ukajj templon taqpach oraqepwa muytäna. Uka toqet parlkasajja, sapa ladon perqapajj 1.555 metronakaw medïna sasaw Ezequielajj qhanañchäna, ukajj mä kilómetro chikatanitsa jilawa. Ezequielan uka visionapajj wali muspkañawa (Ezeq. 42:15-20). Taqpach templosa pationakapasa mä cuadrado oraqenkänwa, sapa ladojj 259 metronïnwa. Ukhamajj taqpach templor muytkäna uka perqat anqäjja perqakamajj mä jachʼa oraqew utjäna.a ¿Kunatsa ukham luratäpachäna?

⁷ Diosajj akham sänwa: ‘Jupanakajj jan jukʼamp nayat jitheqtapjjpanti, reyinakapan jiwat cuerponakaps nayat jayar uchasipjjpan. Nayasti jupanak taypinwa wiñayatak jakäjja’ sasa (Ezeq. 43:9). ‘Reyinakapan jiwat cuerponakapa’ sasajja, inas uka tiempon israelitanakajj idolonakar adorapkäna ukat parlaskchi. Templor muytkäna uka jachʼa oraqet parlkasajja, Diosajj “aka cheqat taqe uka ajjtaskañanak apasipjjam, janiw ukanak uñjañ munkti” sasinsa judionakar siskaspa ukhamänwa. Judionakajj Jehová Diosaruki adorapjjaspäna ukhajja, Diosajj jupanakampïsaw bendisispäna.

8, 9. Jehová Diosajj markap pʼeqtʼirinakar cheqañchkäna ukhajja, ¿kunsa Israel markankirinakajj yateqapjjpachäna?

⁸ Markar pʼeqtʼapkäna ukanakaruw cheqañchasïna. Markapar pʼeqtʼapkäna uka chachanakarojja, Jehová Diosajj qhana arunakampiw cheqañchäna, ukampis munasiñampiw uk luräna. Markapajj idolonakar adorjjapjjäna ukhasti, levitanakajj Diosat jitheqtjjapjjänwa, ukatwa Diosajj jupanakar cheqañcharakïna. Ukampis Sadoc chachan yoqanakaparojj felicitänwa, jupanakat akham sarakïnwa: ‘Israelitanakajj nayat jitheqtapkäna ukhajja, [...] uka levita sacerdotenakajj templojan lurañanakap phoqasipkakïnwa’ sasa. Sapa gruporojja Diosajj luratanakaparjamaw cheqaparjam munasiñamp uñjäna (Ezeq. 44:10, 12-16). Israelan pʼeqtʼirinakaparus Diosajj cheqañcharakïnwa (Ezeq. 45:9).

⁹ Ukhamasti Jehová Diosan markapar uñjirinakasa pʼeqtʼirinakasa kunjamtï lurañanakap phoqapkäna ukanakatwa Diosarojj cuenta churapjjañapäna, ukwa Diosajj ukham cheqañchasin uñachtʼayäna. Pʼeqtʼirinakan cheqañchatäpjjañapasa ewjjtʼatäpjjañapas wakisirakïnwa. Cheqas jupanakaw Diosan leyinakap nayraqat sum phoqapjjañapäna.

10, 11. ¿Ezequielan visionapajj kunanaktï yatichki ukarjamaw judionakajj lurapjjäna sasajj kunatsa sissna?

¹⁰ Jerusalenar kuttʼir judionakajja, ¿Ezequielan visionapat kuntï yateqapkäna uk phoqapjjänti? Uka tiempon Diosar taqe chuyma servirinakajja, kuntï uka visionat amuyapkäna uk janiw yatktanti. Ukampis Jerusalenar kuttʼasin judionakajj kunsa lurapjjäna, Diosar adorañsa kunjamsa uñjapjjäna taqe ukanakjja Bibliaw sum qhanañchistu. ¿Ezequielan visionapajj kunanaktï yatichki uk judionakajj phoqapjjpachänti? Babiloniar janïr apatäpkäna uka jan istʼasir judionakat sipansa, amuyatajj phoqasipkänwa.

¹¹ Ageo, Zacarías profetanakasa, Esdras copista sacerdotesa, Nehemías gobernadorasa, Diosar taqe chuyma servir yaqha chachanakasa, Ezequielan visionapan Diosajj kunanaktï yatichkäna ukanak Israel markankirinakar yatichañatakiw wal chʼamachasipjjäna (Esd. 5:1, 2). Wali utjirinïñat sipansa munañanakas thaqañat sipansa, Diosar serviñaw nayrankañapa sasaw jupanakajj yatichapjjäna (Ageo 1:3, 4). Diosaruki adorañatak utjki uka leyinak phoqapjjañapatakiw kutin kutin chʼamañchapjjarakïna. Sañäni, Esdrasampi Nehemiasampejja, extranjera warminakam khitanukjjapjjam sasaw qhan sapjjäna, uka warminakajj Diosatwa judionakar jitheqtayasipkäna (Esdras 10:10, 11 liytʼañataki; Neh. 13:23-27, 30). ¿Judionakajj idolonakar adorasipkakpachänti? Amuyatajj Jerusalenar kuttʼanjjasajj idolonakar adorañar uñisjjapjjänwa. Kunjamtï Ezequielan visionapajj uñachtʼaykejja, Jehová Diosajj sacerdotenakarusa markan pʼeqtʼirinakaparusa cheqañcharakïnwa (Neh. 13:22, 28). Waljanirakiw cheqañchäwip humilde chuymampi katoqasipjjäna (Esd. 10:7-9, 12-14; Neh. 9:1-3, 38).

12. ¿Kunjamsa Jehová Diosajj Jerusalenar kuttʼirinakar bendisïna?

¹² Ukham lurapjjatapatjja Jehová Diosajj markapar bendisïnwa. Ukatwa israelitanakajj Diosamp sum apasipjjäna, usunakat jarkʼaqata sumankañanwa jakasipjjäna, walja tiempow ukham jan jakasjjapjjänti (Esd. 6:19-22; Neh. 8:9-12; 12:27-30, 43). Israelitanakajj Diosan leyinakaparjamaw adorjjapjjäna, ukatwa ukham sum jakasjjapjjäna. Ezequielan visionapajj kunanaktï yatichkäna ukajja, walja suma jaqenakan chuymaparuw purtʼäna. Yaqha markar apatanakarojj aka pä toqetwa yanaptʼpachäna: 1) Diosarojj kunjamsa adorasiñapa uk qhanstayir leyinakat kunsa yateqapjjaspa, kunjamsa ukarjam sarnaqapjjaspa ukwa judionakar yatichäna. 2) Kunatï jutïrin pasañapäkäna ukwa yatichäna, mä arunjja kunjamsa Diosaruk adorasjjañapäna, kunjamsa Israel markajj ukarjam sarnaqasin Diosan bendicionap katoqaspäna ukwa qhanstayäna. Ukampis ¿Ezequielajj uñjkäna uka visionajj jichhürunakan phoqasirakiti?

13, 14. 1) ¿Kunjamatsa Ezequielajj visionan uñjkäna ukajj jichhürunakan phoqasitap yattanjja? 2) ¿Ezequielan visionapajj kuna pä toqenakatsa yanaptʼistu? (“Janiw mä pachpa templökiti, ni mä pachpa qhanañchäwinïkisa” sat recuadro 13 yatichäwin uñjjattʼäta).

¹³ ¿Ezequielan visionapajj jichhürunakan yanaptʼarakistaspati? ¡Jïsa! Ak amtañäni, Ezequielan visionapampi Isaiasan profeciapampejj niya kikpakiwa. Sañäni, Ezequielajj Diosan sagrado utapajj ‘wali alto mä qollu’ patjjankiwa sasaw säna, Isaiasajj akham sarakïnwa: ‘Kawkjantï Jehová Diosan utapajj jikjjataski uka qollojja taqe qollunakat sipansa jukʼamp jachʼäniwa, suma uttʼayatarakïniwa, lomanakat sipansa jukʼamp jachʼäniwa’ sasa. Uka profeciajj ‘qhepa urunakanwa’ phoqasini sasaw Isaiasajj qhanañchäna (Ezeq. 40:2; Is. 2:2-4, nota; Miqueas 4:1-4 uñjjattʼarakïta). Ukhamasti uka profecianakajj ‘qhepa urunakatwa’ parlaski, ukajj 1919 maranwa phoqasiñ qalltäna, uka marat qalltasaw Diosarojj sum adorasjjäna, Diosar adorañajj wali alto qollur aptatäkaspas ukhamänwa.b

¹⁴ Ukhamajja, Ezequielan visionapajj Diosar adorañat kuntï qhanañchki ukajj jichhürunakatakirakiwa. Kunjamtï uka visionajj yaqha markar apat judionakar yanaptʼkänjja, ukhamarakiw jichhürunakan pä toqet yanaptʼistu: 1) Diosar adorañatak utjki uka leyinak kunjamsa phoqsna ukwa yatichistu. 2) Kunjamsa jutïrin Jehová Diosaruk sum adorasjjani, kuna bendicionanaksa katoqarakiñäni ukwa yaticharakistu.

15. Ezequielajj visionan uñjkäna uka templot yatjjatkasajja, ¿kunsa amtañasa?

¹⁵ Kunanaktï Ezequielajj visionan uñjkäna ukanakat mä qhawqha yatjjatañäni. Ezequielamp chikas templo uñjir sarksna ukham amuytʼañäni. Ukampis ak amtañasawa: uka templojj janiw Diosan jachʼa templopäkiti, jan ukasti Ezequielajj visionan uñjkäna uka templojj kunjamsa Diosar adorañasa ukwa yatichistu. ¿Kunjamsa Diosar adorañasa?

16. ¿Kunsa Ezequielan visionapan uñstki taqe uka medidanakat yateqtanjja? (Aka yatichäwi qalltan utjki uka dibujo uñjjattʼäta).

¹⁶ ¿Kunatsa medidanakat wal parlasi? Ezequielajj cobrer uñtata mä angelaruw uñjäna, uka angelajj taqpach templo midtʼäna. Sañäni: perqanaka, punkunaka, guardianakan cuartonakapa, templon pationakapa ukhamarak altarapwa midtʼäna. Taqe ukanakat qhanañchaski ukajj mä liytʼirirojj qariyaspawa (Ezeq. 40:1-42:20; 43:13, 14). Ukampis kunanaksa ukanakajj yatichistu ukwa amuytʼañasa. Leyinakaparjam sarnaqañajj kunja wakiskirisa uk amtañasatakiw Diosajj taqe ukanak qellqayawayi. Jehová Diosaw uka leyinak churistu janiw jaqenakakejj churkistuti. Khitinakatï Diosarojj kunjamas adorasikispawa sasin amuyapki ukanakajj pantjasisipkiwa. Taqpach templo sum midtʼasitapajja, kunjamsa Jupa saparuk jutïrin sum adorasjjani ukwa Jehová Diosajj uñachtʼayi. Kunjamtï templon medidanakapajj wali exactökänjja, Diosan promesanakapajj ukhamarakiwa, mä arunjja taqpachaw sum phoqasini. Taqe ukanak qhanañchasajja, aka qhepa urunakan cheqpachapuniw Dios saparuk adorasjjani sañwa Ezequielajj munaskäna.

17. ¿Templon jachʼa oraqepar muytkäna uka anqäjjankir perqajj kunsa yatichistu?

¹⁷ Templon anqäjjankir perqapa. Kunjamtï yatjjataniwayktanjja, templon jachʼa oraqep muytir mä perqwa Ezequielajj uñjäna. Kunjamtï anqäjjankir perqajj templot wali jayankkänjja, ukhamarakiw Diosar servirinakatakejj jan walinakajj Diosar adorañat wali jayankañapa, ukhamatwa Diosan templopajj jan qʼañuchatäkaniti (Ezequiel 43:7-9 liytʼañataki). Jichhürunakanjja uka suma ewjjtʼanakajj wakiskirikïskiwa. Diosan markapajj 1919 maran Jachʼa Babiloniat mistjjäna ukhajja, Cristojj suma phoqeri amuyasiri esclavoruw uttʼayäna. Uka tiempotwa Diosan servirinakapajj falso yatichäwinaka, jan wali costumbrenaka, idolonakar adorañampi saski taqe ukanak apanukuñatak wal chʼamachasiwayapjje. Ukatwa Jehová Diosaruk adorañataki, kunatï jan walïki ukanak jayar apanukuñatak wal chʼamachasiraktanjja. Janirakiw Tantachasiñ Utan negocionak lurañ munktanti, ukhamatwa Diosar adorkasin jan walinak jayar apanukuñäni (Mar. 11:15, 16).

18, 19. 1) ¿Templon jachʼa punkunakapat kunsa yateqtanjja? 2) ¿Kunatï jan walïki ukajj walikïskiwa sasin amuyañasatak chʼamañchapjjestani ukhajj kunsa lurañäni? Uk mä uñachtʼäwimp qhanañchtʼam.

¹⁸ Jachʼa punkunaka. ¿Ezequielajj templon jachʼa punkunakap uñjkäna ukajj kunsa yatichistu? Kunjamtï jachʼa punkunakajj wali altökänjja, ukhamarakiw Diosan leyinakapajj wali altonkañapa, ukwa yaqha markar apat judionakajj amuyapjjpachäna. ¿Jichhürunakat kamsaraksnasa? Niyakejjay jiwasajj Jehová Diosar jachʼa templopan adorstanjja, jukʼamp sumwa Diosan leyinakap phoqañasa, janirakiw kʼari chuymampi Diosar serviñasäkiti (Rom. 12:9; 1 Ped. 1:14, 15). Aka qhepa urunakanjja, leyinakap phoqañapatakiw Jehová Diosajj markapar wal yanaptʼaski.c Sañäni, juchanakapat jan arrepentisipki ukanakajj congregacionat jaqsutäpjjewa (1 Cor. 5:11-13). Maysa toqetjja, jachʼa punkunak manqhan utjkäna uka guardianakan cuartonakapajj akwa amtayistu, maynejj Diosan mayitanakaparjam jan sarnaqkaspa ukhajja, janiw Jehová Diosar adorañatakejj jachʼa templopar mantkaspati. Maynejj Testigökasin jan wal sarnaqaspa tantachäwinakar saraskarakispa ukhajja, kuntï Diosar adorañatak lurki ukajj inamayakïspawa, sum sarnaqjjani ukhakiw Diosajj jupar sum uñj-jjani (Sant. 4:8). Niyakejjay akapachajj qʼañu juchanak lurir jaqenakampi, jan wali jaqenakampi phoqantatächejja, Diosar adorañajj jan qʼañuchatäñapatakiw ukajj jarkʼaqe.

¹⁹ Akapachan janïr tukuskipanjja, jukʼamp jan walinakaw utjani sasaw Bibliajj akham sasin qhanañchi: ‘Jan wali jaqenakasa engañjir jaqenakasa jan walit jukʼampi jan waliruw sarapjjani, yaqhanakar engañjasa jupanakas engañjatäsaraki’ sasa (2 Tim. 3:13). Jichhürunakanjja, Diosan leyinakap phoqañajj wali chʼamäkaspasa, nayra jaqenakatakïkaspänsa jan ukajj inamayakïkaspasa ukhamwa jilaparte jaqenakajj amuyapjje. ¿Jumajj ukhamti amuyarakta? Sañäni chacha pura, warmi pura sarnaqerinakajja, “kunatï ajjtaskayäki ukanak” lurapjje sasaw Biblian qhanañchi. Qʼañu jucha lurañajj walikïskaspas ukham jan amuyañasatakiw Diosajj ewjjtʼistu (Rom. 1:24-27, 32). Ukanakajj walikïskiwa sapjjestaspa ukhajja, ¿jupanakjamat amuyjjarakiñäni, jan ukajj Jehová Diosaruch istʼañäni? Ukham jan walinakan uñjaskañäni ukhajja, Ezequielajj jachʼa punkunakan templo uñjkäna ukat pienstʼañaw yanaptʼistaspa. Ukajj akwa amtayistu: jaqenakajj kunsay lurasipkpan kunsay sasipkpan Diosajj janipuniw leyinakap mayjtʼaykaniti. ¿Jiwasajj alajjpachankir Awkisarut apoyañäni, kunatï walïki ukatti saytʼasirakiñäni?

20. ¿Ezequielajj visionan uñjkäna ukanakat kunas ‘walja jaqenaka’ sasin uñtʼatäpki ukanakarojj wal chʼamañchtʼi?

²⁰ Templon pationakapa. Ezequielajj templon anqäjjankir jachʼa patiop uñjasajj wal kusispachäna, uka jachʼa pationjja waljaniw Diosarojj wali kusisit adorapjjaspäna. Jichhürunakanjja Diosan servirinakapajj uka templot sipansa jukʼamp sagrado lugaranwa Diosar adortanjja. Ezequielajj visionan uñjkäna ukajja, ‘walja jaqenakjam’ uñtʼatäpki ukanakarojj wal chʼamañchtʼi, jupanakajj Diosan jachʼa templopan anqäjja patiopankasipkiwa (Apoc. 7:9, 10, 14, 15). Ezequielajj visionan uñjkäna uka templon pationakapanjja, walja comedoranakaw utjäna, ukanwa judionakajj sumankañ sacrificionak loqtapkäna ukanakat mä parte juntok manqʼapjjaspäna (Ezeq. 40:17). Ukham manqʼasajj Jehová Diosamp chikas manqʼapkaspa ukhamänwa, ukajj Diosamp sumankapjjatapa suma amigöpjjatapwa uñachtʼayäna. Jichhürunakanjja, janiw Moisesan Leyiparjamajj judionakjam sacrificionak loqtjjtanti. Ukampis Diosar adorkasin tantachäwinakan arstʼasasa predicacionan Diosat yatiyasasa, ‘jachʼañchir sacrificionakwa’ Diosar loqttanjja (Heb. 13:15). Ukatsti Diosajj arunakapwa yatichistu, ukajj wal chʼamañchistu. Ukatwa Coré chachan yoqanakapjamajj amuyaraktanjja, jupanakajj akham sasaw Jehová Diosar cantapjjäna: ‘¡Mä uru pationakaman jakañaw jukʼamp sumajja, waranqa urunak yaqha cheqan jakañat sipansa!’ sasa (Sal. 84:10).

21. Ezequielajj visionan uñjkäna uka sacerdotenakatjja, ¿kunsa ajllit cristianonakajj yateqapjjaspa?

²¹ Sacerdotenaka. Ezequielajj uñjkäna uka templon manqhäjjankir patiopan utjkäna uka punkunakampi anqäjj pation utjkäna uka punkunakampejj igualakïpjjänwa. Templon manqhäjjankir patiopan utjkäna uka punkunaknämjja, sacerdotenakampi levitanakampikiw mantapjjerïna, ukampis anqäjjankir pation utjkäna uka punkunaknämsti jan levitäpki janirak sacerdotëpki ukanakas mantapjjarakirïnwa. Ukajj akwa sacerdotenakar amtaypachäna: Jehová Diosar adorañatak utjki uka leyinak jupanakajj phoqapjjañaparakïnwa. ¿Kunsa ukajj yatichistu? Jichha tiemponjja janiw sacerdotëñajj mä herenciar uñtata katoqasjjeti, ukampis ajllit cristianonakarojj Biblian akham siwa: “Jumanakajj ‘ajllit tribunkirïpjjtawa, sacerdotenakjam servir reyinakäpjjtawa, santo markankirïpjjtawa’” sasa (1 Ped. 2:9). Nayra Israel markanjja, sacerdotenakajj yaqha pationwa Diosar adorapjjerïna. Jichha tiemponsti ajllit cristianonakajj jilat kullakanakamp juntokiw Diosar servipjje, ukampis jupanakajj Diosan wawanakapjam katoqatäpjjewa (Gál. 4:4-6). Ezequielan visionapajj kunjamsa jupanakar yanaptʼaspa uk amuytʼañäni. Ajllit cristianonakajja, kunjamsa sacerdotenakar ewjjtʼasïna cheqañchasirakïna uk amtapjjapuniwa. Taqe cristianonakajj ‘mä sapa tamaki, mä sapa awatirin’ pʼeqtʼatakiw Diosar sirvtanjja, ukwa jiwasajj amtañasaraki (Juan 10:16 liytʼañataki).

22, 23. 1) ¿Ezequielajj visionan uñjkäna uka pʼeqtʼirit kunsa ancianonakajj yateqasipjjaspa? 2) ¿Kunas jutïrin paspachäni?

²² Pʼeqtʼiri. Ezequielan visionapanjja, pʼeqtʼirejj wali importante jaqënwa, jupaw markankirinakar uñjirïna, sacrificionak loqtañsa yanaptʼarakirïna. Niyakejjay jupajj jan levitäkchïnjja, templonjja sacerdotenakaruw istʼañapäna (Ezeq. 44:2, 3; 45:16, 17; 46:2). Uka pʼeqtʼirejj congregacionan pʼeqtʼapki uka jilatanakatakejj wali yateqaskayawa. Cheqas ancianonakasa congregacionanak tumptʼirinakasa, taqeniw Diosan uttʼayata suma phoqeri amuyasiri esclavorojj istʼapjjañapa (Heb. 13:17). Ancianonakajja, jilat kullakanakajj tantachäwinakansa, predicacionansa ‘jachʼañchir sacrificionak’ Diosar loqtapjjañapatakiw wal yanaptʼapjje (Efes. 4:11, 12). Nayra Israel markan pʼeqtʼirinakat yaqhepajj munañapar apnaqañ munapkäna ukhajja, kunjamsa Jehová Diosajj cheqañchäna ukwa ancianonakajj amtapjjaraki (Ezeq. 45:9). Jupanakajj uka pʼeqtʼirinakjamarakiw ewjjtʼatäpjjaspa cheqañchatäpjjarakispa uk sum yatipjje. Cheqas ancianonakajja, cheqañchatäsajj wal Jehová Diosar yuspärapjje, jukʼamp suma irpirïñatakiw Diosajj yanaptʼaskitu sasaw confiyapjjaraki (1 Pedro 5:1-3 liytʼañataki).

²³ Paraisonjja Jehová Diosajj munasiri yatjjattʼata pʼeqtʼirinak utjayaskakiniwa. Jichha tiemponjja walja ancianonakaw paraison suma awatirïñatak wakichtʼatäsipki (Sal. 45:16). Jupanakaw machaq mundon pʼeqtʼasipkakistani, uk yatiñajj wali kusiskañawa. Diosajj munani ukhajja, inas Ezequielan visionapatsa Dios saparukiw adorasjjani siski uka promesanakatsa jutïrin jukʼamp qhanañchaschini. Ukanakat yaqhepajj kunjamsa sum phoqasini ukjja inas jutïrin yatirakchiñäni, ukajj tiempompikiw sum yatisini.

24, 25. Jehová Diosajj kunjamsa markapar bendisini ukjja, ¿kuna pä toqenakatsa Ezequielan visionapajj qhanañchi?

²⁴ Ezequielan visionapat wali musparkañäki uk amtañäni: ukanjja Jehová Dios pachpaw templor mantäna. Ukatsti jumanakatï nayar adorañatakejj taqpach leyinakaj phoqapjjäta ukhajja, nayajj jumanakampïskäwa sasaw Diosajj markapar säna (Ezeq. 43:4-9). Jehová Diosajj markapampïspäna ukhakiw walja bendicionanakajj utjaspäna.

²⁵ Ezequielan visionapajj uka bendicionanakwa aka pä toqet sum qhanañchi: 1) templon santuariopatwa mä jawirajj mistu, ukatsti oraqenak suma laqʼaruw tukuyi, jakañ utjayaraki. 2) Markajj mä igualaki jaljatawa, templompi oraqepampejj chika taypinkiwa. ¿Kunjamsa taqe ukanakajj jiwasar yanaptʼarakistu? Jichhürunakanjja Jehová Diosajj jukʼamp sagradöki uka jachʼa temploparus mantkaspa ukhamawa, mä arunjja jupa saparuk adorasiñapatakiw Dios pachpajj markapar qʼomachawayi, uka templojj jupan suma uñjatarakiwa (Mal. 3:1-4). 19-21 yatichäwinakanwa uka profecianakat jukʼamp yatjjataskañäni.