“Jumajj Diosar adoram”

1, 2. 1) ¿Kunsa sapa maynejj amtañasa? 2) ¿Apóstol Juanajj mä angelar adorañ munkäna ukhajja uka angelajj kamsänsa?

SAPA mayniw khitirus adorañäni uk amtjjañasa. Inas waljanejj akham sapjjchispa ‘walja religionanak utjatapat khitirus adorañäni uk amtañajj chʼamawa’ sasa. Ukampis Diosarut adorañäni jan ukajj Supayaruch adorañäni uk ajlliñasaw wakisi.

² Supayajj adorayasiñwa wal muni, ukajj Jesusar yantʼkäna ukhaw qhanstäna. Kunjamtï 1 yatichäwin yatjjataniwayktanjja, Supayajja ‘jumatï qonqortʼasisin mä kutik adoritäta ukhajja’, aka oraqenkir taqe markanakwa churäma sasaw Jesusar säna (Mat. 4:9). Ukampis apóstol Juanar mä visión uñjaykäna uka angelajja, janiw adoratäñ munkänti (Apocalipsis 22:8, 9 liytʼañataki). Juanajj uka angelar adorañ munkäna ukhajja, jupajj humilde chuymampiw “¡jan uk luramti!” sasin säna. Adorayasiñat sipansa, “jumajj Diosar adoram” sasaw qhan säna.

 3. 1) ¿Aka librojj kuna amtampis qellqasiwayi? 2) ¿Kuna toqetsa jichhajj yatjjatañäni?

³ Kunjamtï angelajj siskänjja Jehová Dios saparukiw adorañasa, aka librojj ukatakiw chʼamañchtʼistu, uka amtampi luratarakiwa (Deut. 10:20; Mat. 4:10). Jichhajj Diosaruk adorañat kunsa Ezequielan profecianakapasa visionanakapasa yatichistu ukwa mayamp yatjjataskañäni. Ukjjarusti Biblian yanaptʼapampiw kunas jutïrin pasani uk yatjjatañäni, mä arunjja aka oraqenkirinakajj qhep qhepa kutin yantʼatäpkani ukwa yatjjatañäni. Khitinakatï uka yantʼa pasapkani ukanakajja, kunjamsa Dios saparuk wiñayatak sum adorasjjani ukwa uñjapjjani.

 4. ¿Kuna kimsa yatichäwinakas Ezequiel libron jukʼamp qhansti?

⁴ Ezequiel librorjamajja Diosar adorañatakejj akanakwa phoqañasa: 1) Jehová Dios saparukiw adorañasa, 2) Jehová Dios saparuk adorañatakejj mayachtʼatäskakiñasawa, 3) mayninakarojj munasiñampiw uñjañasa. Aka libron yatjjataniwayktan uka profecianakasa visionanakasa kunjamsa uka kimsa toqet jukʼamp qhanañchi uk yatjjatañäni.

5-9. Jehová Dios saparuki adorañat ¿kunsa aka libron yatjjataniwaytanjja?

⁵ 3 yatichäwi.a Ezequielan mä visionaparjamajja Diosajj mä jachʼa kurmimpi muytatawa, wali chʼamani angelanakaruw apnaqaraki. Uka visionajj akwa yatichistu: Taqe Chʼamani Jehová Dios sapakiw adoratäñatakejj derechoni (Ezeq. 1:4, 15-28).

⁶ 5 yatichäwi. Israelitanakajj jan walinak luras templo qʼañuchapkäna ukajj sinti jan walipunïnwa. Ezequielan uka visionaparjamajja janipuniw kunsa Jehová Diosar imtʼksnati, Israelitanakajj idolonakar adorapkäna uk Diosajj sum uñjaskäna. Ukhamasti jamasan jan walinakajj luraski ukjja Jehová Diosajj sum uñjaski, ukatwa ukanak uñjasajj wal chuym usuyasi, ukham luririnakarus castigarakiwa (Ezeq. 8:1-18).

⁷ 7 yatichäwi. Israel markar ‘wal jiskʼachapkäna’ uka markanakarojja Diosajj juchañchänwa, jutïrin ukhamarakiw khitinakatï Diosan markapar jan walinak lurapki ukanakarojj cuenta mayini (Ezeq. 25:6). Maysa toqetjja, Israel markajj uka jakʼankir markanakampi chikachasitapajj akwa yaticharakistu: jiwasajj janiw Jehová Diosat jitheqtañasäkiti, ukaw taqe kunat sipansa nayrankañapa, Diosar jan servipki uka familiaranakasar kusisiyañ laykukejj janipuniw leyinakap pʼakintañasäkiti, janirakiw qollqerukis confiyañasäkiti, ni Diosan leyinakap pʼakintasas gobiernonakar apoyañasäkiti, jan ukasti Jehová Dios saparukiw taqe kunan istʼañasa.

⁸ 13, 14 yatichäwinaka. Ezequielan visionapanjja Diosan templopajj wali alto mä qollunkiwa, ukhamätapajj Jehová Diosan mayitanakaparjam sarnaqañajj wali wakiskirïtapwa yatichistu, ukatsti Jehová Diosjam yaqha diosajj jan utjatapwa yaticharakistu (Ezeq. 40:1-48:35).

⁹ 15 yatichäwi. Profecianakarjamajja Israel markampi Judá markampejj prostituta warminakampi sasïpjjänwa, ukajja yaqha diosanakar adorañajj Jehová Diosatak wali ajjtaskañätapwa yatichistu (Ezequiel libron 16, 23 capitulonaka).

10-14. Jehová Diosar mayachtʼat adorañ wakisitapjja, ¿kunjamsa aka libron walja kuti qhanañchasiwayi?

¹⁰ 8 yatichäwi. Uka yatichäwinjja, Jehová Diosajj markapar uñjañatakejj ‘mä sapa awatirik’ uttʼayani sasin qhanañchir profecianakwa yatjjataniwaytanjja. Jesusampi pʼeqtʼatäsajj mayachtʼatäñasa sumankañasa kunja wakiskirisa ukwa uka profecianakajj qhanañchistu (Ezeq. 34:23, 24; 37:24-28).

¹¹ 9 yatichäwi. Diosan markapajj Babiloniat mistjjasin markapar kutʼjjäna uka toqet parlir profecianakajja, jichhürunakan khitinakatï Diosar adorañ munapki ukanakarojj akwa yatichaspa: Jehová Diosar adoririnakajj falso religionat mistjjapjjañapawa, janirakiw jan wali luräwinakapampejj qʼañuchasipjjañapäkiti. Jiwasajj kunayman markatätanwa, kunayman kasta jañchinïtänwa, yaqhepajj qollqeni jan qollqeni ukhamarakïtanwa, nayrajj inas yaqha religionanakar sarchiyätan, ukampis Diosan markapan mayachtʼatäñatakiw chʼamachasiñasa (Ezeq. 11:17, 18; 12:24; Juan 17:20-23).

¹² 10 yatichäwi. Ezequielan visionapan wañsut chʼakhanakan jaktatapajja, mayachtʼatäñajj wali wakiskirïtapwa qhanstayi. Jiwasajj Jachʼa Babiloniat mistusin Jehová Dios saparuk adorapki uka marka taypinktanwa, uka markajj mä ejercitor uñtataw mayachtʼat nayrar sartaski. Cheqas Diosan markapankañajj wali kusiskañawa (Ezeq. 37:1-14).

¹³ 12 yatichäwi. Profeciarjamajj pä lawanakan mayar tukutapajja, mayachtʼatäñajj kunja wakiskirisa ukwa jukʼamp qhanstayi. Ukajj ajllit cristianonakampiru yaqha ovejanakampiruw phoqasi, jupanakajj mayachtʼataw Diosar servipjje, ukajj Diosar jukʼamp confiyañatakiw yanaptʼistu. Akapachan markanakkama, religionanakkam uñisisiñanak utjatapatwa jaqenakajj tʼaqa tʼaq sarnaqapjje, ukampis jiwasajj munasirïtasata jan jaytjasirïtasatwa mayachtʼatätanjja (Ezeq. 37:15-23).

¹⁴ 16 yatichäwi. Tinta apnaqañ cajitanïkäna uka chachampi, jiwayañatak armas aptʼasitäpkäna uka chachanakampi visionan uñstkäna ukajj akwa amtayistu: ‘jachʼa tʼaqesiñ tiempojj’ purinkani ukhajja, khitinakatï Jehová Dios saparuk adorapkani ukanakakiw jan jiwañatak marcatäpjjani (Mat. 24:21; Ezeq. 9:1-11).

15-18. ¿Kunatsa mayninakarojj munasiñampi uñjaskakiñasa? ¿Kunjamsa uk lursna?

¹⁵ 4 yatichäwi. Ezequielan visionapan uñstkäna uka pusi querubín angelanakajja, Diosan cualidadanakapatwa yatichistu, ukanakat parlkasajj munasirïtapaw jilanki. Mayninakar munasiñamp uñjtan munasiñampi parlaraktan ukhajja, Jehová Diosar servitaswa uñachtʼaytanjja (Ezeq. 1:5-14; 1 Juan 4:8).

¹⁶ 6, 11 yatichäwinaka. Jehová Diosajj munasiñatwa marka uñjir guardianak (centinelanak) uttʼayäna. Uka guardianakat maynejj Ezequiel profetänwa. Niyakejjay Diosajj munasiñächejja, jupajj Supayan apnaqat akapachar tukjkani ukhajj janiw khitin jiwañapsa munkiti (2 Ped. 3:9). Jichha tiempon marka uñjir guardiat uttʼayatäki ukan lurañanakap phoqañatak yanaptʼktan ukhajja, Jehová Diosjam munasirïtaswa uñachtʼayasktanjja (Ezeq. 33:1-9).

¹⁷ 17, 18 yatichäwinaka. Jutïrin waljaniw Jehová Diosampi khuyaptʼayatäñ jan munapkaniti, ukatsti Diosan servirinakapar qʼal tukjañwa munapjjarakini, uk Diosajj sum yati. ‘Magog oraqenkiri Gog satäki’ ukajj markapar atackani ukhajja, Diosajj munasiñatwa markapar arjjatani. Jiwasajj markapar jan walinak lurapki ukanakajj qʼala tukjatäpjjaniwa sasinwa munasiñat waljanir yatiyaraktanjja (Ezeq. 38:1-39:20; 2 Tes. 1:6, 7).

¹⁸ 19, 20, 21 yatichäwinaka. Ezequielajj jakañ churir umampi oraqe jalanoqasitapampi visionan uñjkäna ukajja, Jehová Diosajj wali munasirïtapwa qhanstayi, ukajj wali munat yoqapar jaqenak layku jiwañapatak khitankäna ukanwa qhan uñjasiwayi. Uka visionanakarjamajja, Jesusan jiwatapajj juchanakasat perdonatäñasataki jutïrin perfecto jaqenakjam Diosan familiap taypinkañasatakiw yanaptʼistu. Jiwasajj Jehová Diosjamarakiw jaqenakar munastanjja, ukatwa Diosaw Jesús yoqapar confiyapki ukanakarojj wiñay jakañ churani sasin yatiytanjja (Ezeq. 45:1-7; 47:1-48:35; Apoc. 21:1-4; 22:17).

19. ¿Jesusajj Waranqa Maranak apnaqkani ukhajj kunsa lurani? (“Qhep qhepa yantʼan kunanakas pasani” sat recuadro uñjjattʼäta).

¹⁹ Jesusajj Waranqa Maranak apnaqjjani ukhajja, walja millón jaqenakaruw jaktayani, ‘jiwañarojj’ chhaqtayarakiniwa (1 Cor. 15:26; Mar. 5:38-42; Hech. 24:15). Jaqenakajj nayratpachwa llakinakana, jachañanakana uñjasiwayapjje. Ukampis jiwatanakajj jukʼat jukʼat jaktanipkani ukhajja, kunanakatï nayrajj jaqenakar wal tʼaqesiyawayki ukanakwa Jesusajj chhaqtayjjani, ukatjja jiwatat jaktanirinakarojj sum jakasipjjañapatakiw yanaptʼarakini. Niyakejjay Jesusajj juchanakas layku jiwawaychejja, jupaw usuntañanaksa, guerranaksa, manqʼat pistʼañanaksa chhaqtayjjani. Janiw ukakïkiti, kuna kawsattï tʼaqesiñanakajj utjki uksa chhaqtayarakiniwa, mä arun Adanajj juchar aptʼawaykistu ukwa chhaqtayjjani (Rom. 5:18, 19). Ukatsti ‘Diablon luratanakapwa’ qʼal chhaqtayjjarakini (1 Juan 3:8).

20. ¿Kunatsa Jesusampi 144.000 ajllitanakampejj wali humilde chuymanïpjjaniwa sasin sissna? (Aka yatichäwi qalltan utjki uka dibujo uñjjattʼäta).

²⁰ 1 Corintios 15:24-28 liytʼañataki. Jaqenakajj perfectöjjapjjani, Jehová Diosajj amtkäna ukarjam aka oraqes mä paraisöjjarakini ukhajj ¿kunas pasani? Jesusampi 144.000 ajllitanakampejj wali humilde chuymanïpjjatapwa uñachtʼayapjjani. Jupanakajj 1.000 maranakas reyinakjam apnaqawayapkchinejja, Diosarojj taqe chuymaw Reino katuyjjapjjani. Ukampis kunanaktï Reinojj lurawayki ukanakajj wiñayatakïniwa.

21, 22. 1) ¿1.000 maranak qhepatjja aka oraqejj kunjamäjjanisa? 2) ¿Kunatsa Jehová Diosajj Supayampiru demonionakampirojj antutani?

²¹ Ukatsti Jehová Diosajj oraqenkiri servirinakapar wal confiyatapwa uñachtʼayani. ¿Kunjamsa uk lurani? 1.000 maranak mikʼayar (wali manqha mä pʼiyar) jistʼantatäpkani uka Supayampiru demonionakampiruw antutani (Apocalipsis 20:1-3 liytʼañataki). Antutatäpkani ukhajja, aka oraqejj janiw jaytapkäna uka pachpäjjaniti. Armagedón guerra nayrajja Supayajj jila parte jaqenakaruw engañjäna, uñisisiñanaka yaqhachasiñanakaw jaqenakarojj tʼaqa tʼaqa sarnaqayäna (Apoc. 12:9). Ukampis 1.000 maranak qhepatjja, taqpach jaqenakaw mayachtʼata munasisa mä familiaki Jehová Diosar adorapjjani. Aka oraqejj mä suma paraisöjjaniwa.

²² Niyakejjay aka oraqpachajj wali sumäjjchinejja, ¿kunatsa Jehová Diosajj jan sinttʼasir Supayampiru demonionakampir antutani? 1.000 maranak tukuyan jakapkani uka jaqenakat jila partejja, Jehová Diosar taqe chuymat munasipjje janicha uk jan uñachtʼayas jiwapki ukanakäpjjaniwa. Jupanakat waljanejj Diosar jan uñtʼasaw jiwapjjäna, aka oraqejj mä suma paraisöjjäni ukhaw jaktapjjarakini. Jakañ vida churasajja, Jehová Diosajj taqe kunwa jakapjjañapatak churarakini, jupar servipjjañapatakis yanaptʼarakiniwa. Jupanakajj wali munasir jaqenak taypina, Diosar serviri jaqenak taypinwa jakapjjani, janiw jan walinak lurañatakejj yantʼatäpkaniti. Ukhamasti inas Supayajj Job chacharjam akham sasin jupanakar kʼarintchini: Jehová Diosaw jupanakar wal jarkʼaqe bendisiraki ukatwa jupar servipjje sasa (Job 1:9, 10). Ukatwa jakañ libror sutinakas janïr qellqantkasajj Jehová Diosajj taqenir mä oportunidad churistani, ukhamat taqe chuymat jupar munastan, Awkisarjamat uñjtan, Taqe Kunjjar Munañani Diosarjamat uñjtan janicha uk uñachtʼayañasataki (Apoc. 20:12, 15).

23. ¿Sapa mayni jaqenakan kun uñachtʼayapjjañapas wakisini?

²³ Supayajj mä jukʼa tiempo antutatäkani ukhajja, jaqenakar Diosat jitheqtayañwa yantʼani. Ukaw qhep qhepa yantʼäni. Taqeniw Adán chachjama Eva warmjamajj yantʼat uñjasiñäni, mä arun Jehová Diosarut adorañäni, mayitanakaparus istʼañäniti, gobiernopar yanapañäniti, jan ukajj Dios contra saytʼasisajj Supay toqetcha saytʼasiñäni ukanak uñachtʼayañasaw wakisini.

24. ¿Kunatsa Dios contra saytʼirinakajj “Gog” ukhamarak “Magog” satäpjjani?

²⁴ Apocalipsis 20:7-10 liytʼañataki. Waranqa Maranak qhepat Dios contra saytʼirinakajja, “Gog” ukhamarak “Magog” satäpjjaniwa. ¿Kunatsa ukham satäpjjani? Ezequielajj ‘Magog oraqenkiri Gog satäki’ ukat parlkäna ukar uñtasitäpjjaniwa (Ezeq. 38:2). ‘Magog oraqenkiri Gog satäki’ ukajja, Jehová Diosan gobiernop contra saytʼiri mayachtʼat markanakawa, jupanakaw Diosan markaparojj jachʼa tʼaqesiñ tiempon atacapjjani. Jesucristojj Waranqa Maranak apnaqañ tukuykani uka tiempon Dios contra saytʼirinakajja, ‘markanaka’ sasin uñtʼatäpjjarakiniwa. ¿Kunatsa ukham sistanjja? Aka oraqen janiw walja markanakar tʼaqanoqtatäjjañäniti, mä sapa gobiernokiw oraqpachan utj-jjani, ukajj Diosan Reinopäniwa. Ukhamasti Diosar adoriri mä markakëjjañäniwa. Profeciarjamajja Dios contra saytʼirinakarojj “Gog”, “Magog” ukhamarak ‘markanaka’ sasiwa. ¿Kunsa ukajj uñachtʼayi? Supayajj tʼaqa tʼaqa sarnaqapjjañapatakiw jaqenakar wiytani, mä qhawqhanirojj Diosatwa jitheqtayarakini. Ukampis janiw khitis Supay toqet saytʼasiñatakejj obligatäkaniti. Perfecto jaqenakjamajja sapa mayniw kunsa lurañäni uk amtjjañäni.

25, 26. 1) ¿Qhawqhanis Supayampi mayachtʼasipjjani? 2) ¿Kunas Dios contra saytʼirinakarojj pasani?

²⁵ ¿Qhawqhanis Supay toqet saytʼasipjjani? Dios contra saytʼasirinakajj ‘lamar qotankir chʼallar uñtatäpjjaniwa’. Uka arunakarjamajja Dios contra saytʼirinakajj waljapunïniwa sañ janiw munkiti. ¿Kunatsa? Kuntï Diosajj Abrahanar siskäna uk amtañäni, wawamarojj ‘lamar qota lakankir chʼallar uñtataw waljar tukuyäjja’ sasaw säna (Gén. 22:17, 18). Ukampis wawanakapajj 144.001 ukhanikïpjjewa (Gál. 3:16, 29). Ukajj aka oraqen jakirinakat sipan jukʼakiwa. Supay toqet saytʼasirinakarojj niya ukhamaw pasarakini, jupanakajj waljanïpkaspas ukhamäkchinisa, aka oraqenkirinakat sipans jukʼanikïpjjaniwa. Ukhamasti jupanakajj janiw Diosat jan jitheqtiri servirinakaparojj jan waltʼayapkaniti.

²⁶ Dios contra saytʼirinakajja mä jukʼa tiemporojj Supayampi demonionakamp chika qʼala tukjatäpjjaniwa, janirakiw jiwatat jaktañatak mä suytʼäwinïpkaniti. Jupanakajja jan walinak lurañ amtapjjatapat jiwayatäpjjaniwa, ukakiw jupanakat amtatäni (Apoc. 20:10).

27-29. ¿Qhep qhepa yantʼa pasirinakajj kunjamas jutïrin jakasipjjani?

²⁷ Ukampis qhep qhepa yantʼa pasirinakan sutinakapajja, wiñayatakiw “jakañ libron” qellqantatäni (Apoc. 20:15). Ukhaw mä familiar uñtata Diosat jan jitheqtiri wawanakapajj Jehová Dios saparuk adorapjjani.

²⁸ Ukham jakañajj wali sumapunïniwa. Jiwasasa familiaranakasasa janiw mayampsa tʼaqesjjañäniti, ukanjja wali kusisitaw trabajiñäni, taqeniw suma amigosäpjjarakini. Uka tiemponjja janiw jucharar jaqëjjañäniti, ukatwa Jehová Diosajj cheqap jaqet uñj-jjestani, taqenirakiw Diosan suma amigopäpjjani. Alajjpachansa aka oraqensa Jehová Dios saparukiw adorasjjani, ukaw taqe kunat sipansa jukʼamp wakiskirïni. ¡Jehová Dios saparuk adorasjjatap uñjañajj wali kusiskañäniwa!

²⁹ ¿Ukanak phoqasir uñjañatakejj ukankätati? Jumatï Ezequiel libron yateqawaykta uka kimsa wali wakiskir yatichäwinak phoqäta ukhajja ukankätawa. Akanakwa Ezequiel libron yateqawaytanjja: 1) Jehová Dios saparukiw adorañasa, 2) Jehová Dios saparuk adorañatakejj mayachtʼatäskakiñasawa, 3) mayninakarojj munasiñampiw uñjañasa. Ezequielan profecianakapajj jiwasatak yaqha suma yatichäwinirakiwa. ¿Ukajj kawkïrisa?

30, 31. 1) ¿‘Jehová Diosätaj yatipjjani’ siski ukajja, Diosan enemigonakapatak kamsañsa munani? 2) ¿Uka arunakajj Jehová Diosan servirinakapatak kamsañsa munarakini?

³⁰ Ezequiel libronjja ‘Jehová Diosätaj yatipjjani’ siski uka arunakajj walja kutiw uñsti (Ezeq. 6:10; 39:28). Diosan enemigonakapatakejja uka arunakajj guerra, jiwaña sañ munani. Jupanakajj janiw Diosan utjatapak yatipkaniti, jan ukasti sutipajj “Jupaw taqe kunsa utjayi” sañ munatapwa yatipjjarakini. Cheqas ‘ejercitonakan Jehová Diosapajja’, ‘guerran nuwasiri wali chʼamani Diosjamaw’ jupanak contra nuwasini (1 Sam. 17:45; Éx. 15:3). Jiwapjjañapajj jakʼankjjani ukhakiw Diosan enemigonakapajj ak amuyapjjani: Jehová Diosarojj janipuniw kunasa ni khitisa amtanakap phoqañ jarkʼkaspati.

³¹ Diosan servirinakapatakejja, ‘Jehová Diosätaj yatipjjani’ siski uka arunakajj vida, suman jakasiña sañ munani. Kuntï Diosajj qalltatpach amtkäna ukaw phoqasini, mä arunjja taqpach wawanakapajj jupjam suma chuymanïpjjaniwa (Gén. 1:26). Jehová Diosajj wali munasir Awkisawa, jan walinakat jarkʼaqasiri suma Awatirisarakiwa, niyarakiw atipjir Reyjamajj oraqpach apnaqjjani. Uka uru janïr purinkipanjja, Ezequielan arunakapar istʼañatakiw chʼamachasiñasa. Jehová Diosajj khitisa kunjam Diosasa uk sum yatitasajja, arunakasansa luratanakasansa qhanäñapawa. Ukhamatwa jachʼa tʼaqesiñ tiempojj qalltkani ukhajj jan ajjsarkañäniti. Antisas salvasiñas jakʼankjjatap yatisajja, pʼeqwa waytañäni (Luc. 21:28). Ukampis janïr uka uru purinkipanjja, adoratäñatak derechonïki uka Diosar uñtʼapjjañapataki munasipjjañapatak jaqenakar yanaptʼaskakiñäni, cheqas Jehová sutini yaqha diosajj janiw utjkiti (Ezeq. 28:26).