Jehová Diosan amtapajj phoqasipuniniwa

1, 2. 1) ¿Kunsa Jehová Diosajj qhanañchawayistu? 2) Isaías 46:10, 11; 55:11 qellqatanakajja, ¿Jehová Diosat kamsisa?

GÉNESIS librojj akham sasaw qallti: “Taqe kunan qalltäwipanjja Diosajj alajjpacha, ukhamarak akapacha luräna” sasa (Gén. 1:1). Jehová Diosan luratanakapajj waljawa, ukampis ukanakat mä jukʼakwa yattanjja, yamas yaqhep luratanakapajj janiw amuyañjamäkiti. Sañäni, alajjpachasa, qhanasa, ley de la gravedad ukasa wali muspharkañawa (Ecl. 3:11). Maysa toqetjja, kuna amtanis aka Oraqetakisa, jaqenakatakisa uk Jehová Diosajj qhanañcharakiwa. Jaqenakarojj Jupar uñtasitwa lurtʼawayi, ukatsti aka Oraqen kusisita, wiñay jakasipjjaspa ukwa munäna (Gén. 1:26). Jupanakajj wawanakajäniwa, nayasti Awkiparakïyäwa sasaw säna.

² Génesis 3 capitulot qalltasinjja, Jehová Diosan amtapa jan phoqasiñapatakejj kunas pasäna ukwa qhanañchi (Gén. 3:1-7). Ukampis Jehová Diosatakejj janiw kunas chʼamäkiti, kuntï qalltan amtkäna ukajj phoqasipuniniwa (Isa. 46:10, 11; 55:11). Ukhamasti ¡Diosan amtapajj horasaparuw phoqasini!

 3. 1) ¿Kunanak yatiñas Biblian yatichäwinakap sum amuytʼañatak yanaptʼistu, ukat kunatsa ukanakat yatjjatañäni? 2) ¿Kuna jisktʼanakatsa aka yatichäwin yatjjataskañäni?

³ Jehová Diosajj kuna amtanis aka Oraqetakisa, jaqenakatakisa uk sum yattanjja, uka amtap phoqasiñapatakejj kunjamsa Jesusajj yanaptʼaraki uksa yatiraktanwa. Uka toqenakat yatiñasajj wali wakiskiriwa. Bibliat yateqañ qalltkayätan ukhaw ukanak yateqayätanjja. Ukampis janiw jiwasak yatiñ munktanti jan ukasti mayninakan yatipjjañapwa munaraktanjja. ¿Kunjamsa uk lursna? Jesusan jiwäwipajj amtaski ukar invittʼasinwa yatiysna (Luc. 22:19, 20). Invitktan uka jaqenakatï Jesusan jiwäwip amtir jutapjjanejja, Jehová Diosan amtapajj kunasa uk sum amuyapjjani. Ukhamajja, uka tantachäwir jutapjjañapatakejj kuna jisktʼanakampis yanaptʼsna ukanak jichjatwa amtjjañasa. Aka yatichäwinjja, kimsa jisktʼanakaruw qhanañchaskañäni: ¿Kunas Jehová Diosan amtapajj aka Oraqetakisa jaqenakatakisa? ¿Kunatsa Jehová Diosan amtapajj jan phoqasiwayki? ¿Kunatsa Jesusan jiwatapaw Jehová Diosan amtap phoqasiñapatak yanaptʼi sasin sistanjja?

 4. ¿Kunjamsa Jehová Diosan luratanakapajj Jupar jachʼañchi?

⁴ Jehová Diosan taqe luratanakapajj wali muspharkaya suma lurtʼatawa (Gén. 1:31; Jer. 10:12). Ukanak uñjasinsa, yäpar suma uskutätap yatisinsa, Jehová Diosajj taqe kunsa jiwasan askisataki luratapwa amuytanjja. Jaqen cuerpopan utjki uka jiskʼa celulat amuytʼasasa, mä asu wawar uñjasasa jan ukajj Inti jalantir uñjasasa, wal musphartanjja. Jehová Diosaw ukham lurtʼawayistu, ukatwa kunatï sumäki uk uñjasin musphartanjja (Salmo 19:1; 104:24 liytʼañataki).

 5. Taqe kunas sumäñapatakejja, ¿kunanaksa Jehová Diosajj uttʼayi?

⁵ Taqe kunsa sum amuytʼasaw Jehová Diosajj lurawayi. Luratanakapjjar apnaqer leyinaksa (leyes de la naturaleza), sum sarnaqañ toqet leyinaksa (leyes morales) Diosaw uttʼayi. Taqe ukanakajja, aka oraqen sumäñapatakiw yanaptʼi (Sal. 19:7-9). Kunanakatï aka Oraqensa, alajjpachansa utjki ukanakajj mä amtampi lurtʼatawa. Sañäni, ley de la gravedad ukajja, atmósfera satäkis ukajj Oraqet jan jitheqtañapatakiw yanaptʼi, ukhamarusa lamar qotan jan jitsuniñapatakisa ukaw yanaptʼaraki. Janitï uka leyejj utjkaspajja, Oraqen jakañajj janiw utjkaspati. Ukhamarus uka leyinakaw taqe kunas lugarapankañapatak yanaptʼi. Ukaw aka Oraqesa, jaqenakasa mä amtampi lurtʼatätap uñachtʼayistu. Ukhamajj yatiyir sarasinjja, taqe kun Luriri Jehová Diosar uñtʼapjjañapatak jaqenakar yanaptʼapjjañäni (Apo. 4:11).

6, 7. ¿Kunjamsa Jehová Diosajj Adanarusa Evarusa luräna?

⁶ Taqe jaqenakajj aka Oraqen wiñay jakasipjjaspa ukwa Jehová Diosajj munäna (Gén. 1:28; Sal. 37:29). Jehová Diosajj wali munasiriwa, ukatwa Adanarusa Evarusa walja regalonak churäna (Santiago 1:17 liytʼañataki). Amuytʼañataki, Jehová Diosajj amtaparjam sarnaqeri, amuytʼiri, munasiri, mayninakampi kusistʼiri ukhamwa luräna. Ukhamarusa kunatï walïki uk lurañwa Diosajj Adanar yatichäna. Animalanakarusa, oraqerusa, jupa pachpasa kunjamsa uñjasiñapa uksa yateqarakïnwa (Gén. 2:15-17, 19, 20). Janiw ukakïkiti, Diosajj Adanarusa, Evarusa lajjrani, amparani, nayrani, jiñchuni, nasani ukhamwa luräna. Ukhamat Jehová Diosan taqe luratanakap uñjasin kusisita, sum jakasipjjañapataki. Adanatakisa Evatakis walja lurañanakaw utjäna, jupanakajj Jehová Diosatsa luratanakapatsa yateqasipkakispänwa.

⁷ Maysa toqetjja, Adanasa, Evasa jan juchani wawanakanïpjjaspa ukwa Jehová Diosajj munäna. Ukhamatwa aka oraqpach phoqantapjjañapäna. Ukatjja kunjamtï Jehová Diosajj nayrïr chacha warmir munaskänjja, uka pachpa munasiñampi awk taykanakajj wawanakapar uñjapjjaspa ukwa Jehová Diosajj munarakïna. Aka Oraqsa taqe kunatï ukan utjki ukanaksa, Diosajj jaqenakaruw churäna. Ukanwa jaqenakajj wiñayatak jakasipjjañapäna (Sal. 115:16).

 8. Génesis 2:16, 17 qellqatankir arunakjja, ¿kunatsa Jehová Diosajj säna?

⁸ Kuntï Jehová Diosajj qalltan amtkäna ukajja, janiw phoqaskänti. ¿Kunatsa amtapajj jan phoqaskäna? Kunsa lurapjjañapa kunsa jan lurapjjañapäkaraki uk sum amuyapjjañapatakejja, Jehová Diosajj akhamwa Adanampir Evampir säna: “Aka huerton taqe qoqanakat manqʼasïta, ukampisa aski ukhamarak ñanqha yatiñ churir qoqatjja janiw manqʼätati. Uka qoqan achunakapjja jan manqʼamti, manqʼäta ukapachasti cheqpachan jiwäta” sasa (Gén. 2:16, 17). Uka arunak amuyañasa, ukar istʼañasa Adanatakisa, Evatakisa janiw chʼamäkänti, ¿kunatsa ukham sistanjja? Jupanakatakejj wali suma frutanak achuri qoqanakajj waljaw utjäna.

9, 10. 1) ¿Kamsänsa Supayajj Jehová Diosatjja? 2) ¿Kunsa Adanasa Evasa amtapjjäna? (3 janankir dibujo uñjjattʼäta).

⁹ Supayajj mä asiru toqew Eva warmir engañjäna, ukhamat Jehová Dios contra saytʼasiñapataki (Génesis 3:1-5 liytʼañataki; Apo. 12:9). Supayajj akham sasaw Evar säna: “¿Ukhamajj Diosajj sapjjtamti: ‘Janiw kawkïri qoqan achunakapsa manqʼapjjätati’ sasa?”. Mä arunjja, ‘¿janit munañanakamarjam kuns lurapkasma?’ sasinsa Supayajj siskaspäna ukhamänwa. Ukjjarusti Jehová Diosar jan istʼapjjañapatakejja akham sarakïnwa: “Janiw jiwapkätati, [...] kunapachatejj jumanakajj uka qoqan achunakapata manqʼapjjasma ukkhajj yatipjjasmawa kunatejj askïki, ukhamarak ñanqhäki ukanakjja” sasa. Ukham sasinjja, Diosajj janis Adanasa Evasa Jupjam yatiñanïpjjañap munkaspa ukhamwa amuyayañ munäna. Tukuyañatakejj Supayajj akham saskakïnwa: ‘Jumanakatï uka qoqan achunakapat manqʼantapjjasma ukhajja, Diosjamäpjjasmawa’ sasa.

¹⁰ Adanasa, Evasa Jehová Diosarut istʼapjjani jan ukajj Supayaruch istʼapjjani ukwa amtapjjañapäna. Ukampis Diosar istʼañat sipansa, Supayaruw istʼapjjäna. Ukatwa Jehová Diosajj jupanakar jan yanaptʼjjänti (Gén. 3:6-13).

11. Nayrïr chacha warmin pantjasitanakapjja, ¿kunatsa Diosajj jan ukhamak jaytkäna?

¹¹ Adanasa, Evasa Jehová Diosar jan istʼapjjatap laykojja pantjasiri jaqëjjapjjänwa. Janiw ukakïkiti, Jehová Diosan enemigoparuw tukupjjarakïna, ¿kunatsa? Jehová Diosajj jan walinak uñisir Diosawa. Ukatwa Bibliajj Jupat akham qhanañchi: ‘Jumajj sinti qʼomätaw taqe jan walinak uñjañatakejja’ sasa (Hab. 1:13). Adanampin Evampin juchar purtʼasipjjatapat Diosajj jan kuns lurkaspäna ukhajja, angelanakasa, jaqenakasa, janiw arunakapar confiyjjapjjasapänti. Ukampis kunjamtï yatktanjja, Jehová Diosajj kuntï arski uk phoqapuniwa; janiw ina ukhamak arskiti (Sal. 119:142). Adanasa, Evasa jupanak pachpa amtir luratäpkchïnsa, pantjasipjjatap laykojj jan walinakanwa uñjasipjjäna. Qhepatsti jiwasin laqʼaruw kuttapjjarakïna (Gén. 3:19).

12. ¿Kunas Adanan wawanakapampejj pasäna?

¹² Kunapachatï Adanampi Evampejj qoqan achupat manqʼantapjjäna ukhajja, janiw Jehová Diosan familiap taypinkjjapjjänti. Edén jardinat wiñayatak jaqonukutaw uñjasipjjäna (Gén. 3:23, 24). Jehová Diosar jan istʼañ ajllipjjatapatjja, kunayman jan walinakanwa uñjasipjjäna (Deuteronomio 32:4, 5 liytʼañataki). Janirakiw Jehová Diosat yateqasisajj cheqaparjam kuns lurjjapjjänti. Adanajj wiñay jakañwa aptʼasïna, pantjasitap laykuw wawanakapajj pantjasiri, jiwiri ukhamätanjja (Rom. 5:12). Jupan juchachasitapatjja janiw wiñay jakktanti, wawanakasas jiwasjam pantjasirïpjjarakiwa. Nayrïr awk taykasaru Diosat jitheqtayasajja Supayajj taqe jaqenakaruw Diosat jitheqtayañ munaraki (Juan 8:44).

13. ¿Kunsa Jehová Diosajj jaqenakatak muni?

¹³ Nayratpachas jichhakamasa Jehová Diosajj jaqenakar munasiskakiwa. Adanampi Evampejj Supay toqetsa saytʼasipkchïnjja, jaqenakajj Jehová Diosamp sum apasipjjaspa, wiñayatak jakapjjaspa ukwa Diosajj muni (2 Ped. 3:9). Ukatwa Jupampi sumankthapiñatakejj kunatï wakiski ukanak lurawayi. ¿Kunsa Diosajj leyinakap jan pʼakintasajj lurpachäna? Uk jichhajj yatjjatañäni.

14. 1) Juan 3:16 qellqatarjamajja, ¿kunsa Diosajj jaqenakaru juchampita jiwañampita qhespiyañatakejj lurawayi? 2) ¿Kuna toqetsa jaqenakar qhanañchtʼañasa?

¹⁴ (Juan 3:16 liytʼañataki). Jesusan jiwäwip amtir jutapjjañapatakejja waljaniruw invittanjja, jupanakat waljaniw Juan 3:16 qellqat uñtʼapjje. Ukampis ¿kunjamsa Jesusan jiwatapajj wiñay jakañ katoqañatakejj yanaptʼistu? Jesusan jiwäwip amtir jutapjjañapatak jaqenakar invitktan ukhaw uka jisktʼar sum qhanañchtʼsna. Jesusan jiwäwip amtir jutapkani ukhasa jan ukajj utanakapar kuttʼkañäni ukhasa uka jisktʼar qhanañchtʼaraksnawa. Kunatsa Jesusajj jiwas layku jiwawayi uk sum amuyapjjani ukhajja, Jehová Diosajj kunja yatiñanisa, qawqsa munasistu ukwa amuyapjjani. Ukhamajj ¿kuna toqenakat qhanañchtʼañas wakisispa?

15. Adanat sipansa, ¿kunsa Jesusajj luräna?

¹⁵ Jehová Diosajja, Jesusaruw sacrificiot loqtawayi. Jesusasti Jehová Diosat jan jitheqtasaw serviwayi, jiwasar qhespiyañatakis jankʼakirakïnwa (Rom. 5:17-19). Ukatwa Jehová Diosajj alajjpachat aka Oraqer khitanïna (Juan 1:14). Aka Oraqenjja, Jesusajj Adán chachjam jan juchani jaqënwa. Ukampis Adanat sipansa Jehová Diosan arunakapar istʼasaw sarnaqäna. Kunayman yantʼanakansa uñjaskchïnjja, Diosan leyinakap janipuniw pʼakintkänti.

16. ¿Kunatsa Jesusan jiwas layku jiwatapajj wali wakiskirejja?

¹⁶ Niyakejjay Jesusajj jan juchanïchënjja, jupakiw juchampita jiwañampita jiwasar qhespiyañatakejj chʼamanïna. Kuntï Adanajj lurañapäkäna ukwa Jesusajj sum phoqäna, jupajj Jehová Diosat janiw jitheqtkänti, Jupar istʼasapuniw sarnaqäna (1 Tim. 2:6). Jesusaw jiwas layku jiwawayi, ukhamatwa chachanakasa, warminakasa, wawanakasa wiñay jakañataki suytʼäwinïtanjja (Mat. 20:28). Ukhamarusa Jesusan jiwatap toqekiw Jehová Diosan amtapajj phoqasispa (2 Cor. 1:19, 20).

17. ¿Kunsa Jesusan jiwatap toqejj katoqañäni?

¹⁷ Jehová Diosajja, wali munat Wawapar khitanisaw jiwasar qhespiyistu (1 Ped. 1:19). Jupajj wal munasistu, ukatwa Wawap toqe qhespiyistu (1 Juan 4:9, 10). Jesusas Adán lanti awkisjam saytʼawaykaspa ukhamawa (1 Cor. 15:45). Jesusan jiwatap toqejja, janiw wiñay jakañak katoqkañäniti jan ukasti Jehová Diosan familiap taypiruw kuttʼañäni. Jesusan jiwatap toqekirakiw taqe jaqenakajj jutïrin jan juchaniru tukuñäni, qhepatsti Jehová Diosan wawanakapjam uñtʼatäjjarakiñäniwa. Jehová Diosajja amtap sum phoqasiñapkamajj janiw leyinakap pʼakintkaniti. Kunapachatï Diosan servirinakapajj taqenis jan juchani jakasjjañäni ukhajja, ¡wali kusiskañäniwa! Aka Oraqensa, alajjpachansa taqenis mä wawakiw Jehová Diosar sirvjjañäni. Taqeniruw Jehová Diosajj wawanakaparjam katoqjjestani (Rom. 8:21).

18. ¿Kunapachas Jehová Diosajj “taqe kunjjarus munañanïni”?

¹⁸ Nayrïr awk taykasajj Jehová Diosarojj janiw istʼapkänti, ukhamäkchïnsa Diosajj jaqenakarojj munasiskakïnwa, ukatwa jupanakar qhespiyañatakejj Wawapar sacrificiot loqtawayi. Pantjasirïkstansa, Supayajj janiw Jehová Diosat jitheqtaykistaspati. Jesusan jiwatapajj Dios nayraqatan askit uñjatäñatakiw yanaptʼistu. ‘Diosan Yoqapar katoqerinakaru, ukhamarak jupar iyawsirinakar wiñay jakañ katoqeri’ uñjañajj wali kusiskañäniwa (Juan 6:40). Wali munasiri ukhamarak yatiñani Awkisajj amtap phoqapuniniwa, jupaw jan juchanir tukupjjañapatakejj taqe jaqenakar yanaptʼani. “Ukhamatwa Diosajj taqe kunjjarus munañanïni” (1 Cor. 15:28).

19. 1) ¿Jesusan jiwas layku jiwatapat yuspärañatakejj kunsa lurañasa? (“Aski jaqenakar thaqasipkakiñäni” siski uka recuadro uñjjattʼäta). 2) ¿Kuna toqetsa jutïr yatichäwin yatjjataskañäni?

¹⁹ Jesusan jiwas layku jiwatapat yuspäratas uñachtʼayañatakejja, jaqenakaruw uka toqet parlañasa. Jesusan jiwatap toqew wiñay jakañ katoqsna uk taqeniw yatipjjañapa. Maysa toqetjja, kuntï Supayajj Edén jardinan siskäna ukajj kʼarïtapwa Jesusan jiwatapajj uñachtʼayi. Uka toqetwa jutïr yatichäwin yatjjataskañäni.