Qhepïri uñisiri jiwañajj tʼunjatäniwa

1, 2. 1) ¿Kunjamsa Adanampi Evampejj qalltan jakasipjjäna? 2) ¿Kuna jisktʼanakarus aka yatichäwin qhanañchaskañäni?

JEHOVÁ DIOSAJJA, Adanampi Evampirojj jan juchanwa luräna, jupanakajj janiw kuna uñisirinïpkänsa, ukat mä suma paraisonwa jakasipjjarakïna. Diosan wawanakapjamajja, wali sumwa Jupampejj apasipjjäna (Gén. 2:7-9; Luc. 3:38). Ukatjja, qawqha tiempos jakapjjani ukjja, kuna luräwtejj Diosajj churkäna ukaw uñachtʼayäna (Génesis 1:28 liytʼañataki). Diosasti jupanakarojj sänwa: “Aka oraqerusti phoqhantapjjarakim, apnaqapjjarakim” sasa. Uk phoqañatakejja, janiw wiñayapunejj jakapjjañapäkänti. Ukampis Diosajj sarakïnwa: “Taqe chawllanakarusa, jamachʼinakarusa [yaqha animalanakarusa] apnaqapjjam” sasa. Uka animalanakar uñjañatakiw niyas wiñay jakañajj munasïna. Cheqas Adanampi Evampejj wiñayaw uk sum phoqapjjaspäna.

² Jichhürunakanjja, ¿kunatsa jan ukham jakktanjja? ¿Kunatsa kusisiñ apaqer walja uñisirinakanïtanjja? ¿Kunatsa jiwañajj utji? Ukanak tukjañatakejja, ¿kunsa Diosajj lurani? Bibliaw uka jisktʼanakampiru ukat yaqha jisktʼanakampiru sum qhanañchi. Uk jichhajj uñjapjjañäni.

3, 4. 1) ¿Diosajj kuna kamachsa Adanamp Evampirojj churäna? 2) Uka kamachir istʼañajja, ¿kunja wakiskirïnsa?

³ Adanampi Evampejj wiñayas jakasipjjchispänjja, jupanakajj janiw jan jiwir cuerponïpkänti. Jakañatakejja, samsuñasa, manqʼañasa, umañasa, iktʼañasa wali wakisirïnwa. Ukat sipansa, jakañ churiri Jehová Diosampiw sum apasipjjañaparakïna (Deu. 8:3). Wali sum jakasiskakiñatakejja, Diosampiw irpayasipjjañapäna. Jehová Diosajja, janïr Eva warmir lurkäna ukhajja, Adanarojj akham sasaw ewjjtʼäna: “Aka huerton taqe qoqanakat manqʼasïta, ukampisa aski ukhamarak ñanqha yatiñ churir qoqatjja janiw manqʼätati. Uka qoqan achunakapjja jan manqʼamti, manqʼäta ukapachasti cheqpachan jiwäta” sasa (Gén. 2:16, 17).

⁴ Diosakiw kunatejj walïki ukhamarak jan walïki ukjja saspajja, uk uñachtʼayañatakiw “aski ukhamarak ñanqha yatiñ churir” mä qoqa usküna. Adanajj kunatï walïki ukat jan walïki ukjja sumwa yatïna, jupajj Diosar uñtasita luratänwa, ukatjja Diosajj amuyasiri chuyma jan ukajj conciencia churarakïna. Ukhamajj Adanampi Evampejj Jehová Diosampipuniw irpayasipjjañapäna, ukwa uka qoqajj amtayäna. Ukampis jupanakatï uka qoqat manqʼapjjaspäna ukhajja, “janiw Jumampi irpayasiñ munapkti” sasinsa sapkaspa ukhamäspänwa. Diosat ukham jitheqtasajja, jan walinwa jupanakasa wawanakapasa uñjasipjjaspäna. Ukatjja, Diosan arsutaparjamaw jiwjjapjjarakispäna.

 5. ¿Kunatsa Adanampi Evampejj Jehová Diosar jan istʼapkänjja?

⁵ Adanajja, Jehová Diosat katoqkäna uka kamachjja, Evarojj yatiyarakïnwa. Ukhamasti Evajj uka kamachjja sumwa yatïna, ukatwa kunapachatï asirojj Evar arjjaykäna ukhajja, kuntï Adanajj siskäna ukjja, pachpa arunakampi arsurakïna (Gén. 3:1-3). Ukampis Supayaw uka asiru toqejj Evar parlaskäna. Uka Supayasti Diosan mä angelapänwa, jupasti munañanïña ukhamaraki Diosamp jan irpayasiña munasinwa Diosat jitheqtäna (Santiago 1:14, 15 uñjjattʼarakismawa). Jan wali amtap phoqañatakejja, Diosajj kʼarïkaspas ukhamwa Supayajj kʼarintäna. Ukatjja, Evarojj sarakïnwa: ‘Jumatï Diosar jan istʼkäta ukhajja, janiw jiwkätati, Diosjamarakiyätawa’ sasa (Gén. 3:4, 5). Evajj Supayar istʼasajja, qoqan achupatwa manqʼantäna, ukhamatwa Diosampi jan irpayasiñ munatap uñachtʼayäna. Ukjjarusti, Adanaruw manqʼantañapatak churarakïna (Gén. 3:6, 17). Ukhamwa Evajj Supayampi sallqjayasïna (1 Timoteo 2:14 liytʼañataki). Adanasti yatkasinwa, warmipar istʼarakïna. Asirojja, cheqsa parlkaspa ukhamänwa, ukampis jan sinttʼasiri Supayaw uka asiru toqejj parlaskäna. Jupajja, kuna jan walinakarus jaqenakajj kʼarip istʼasajj purtʼasipjjaspa ukjja, sumwa yatiskäna.

6, 7. ¿Kunjamsa Jehová Diosajj Adanampir Evampirojj juchañchäna?

⁶ Jehová Diosajja, Adanampi Evampirojj jakañ churäna ukat sum jakasipjjañapatakejj taqe kunwa churarakïna, ukampis jupanakajj munañapar sarnaqasaw Dios contra saytʼasipjjäna. Kuna jan waltï jupanakajj lurapkäna ukjja, Diosajj taqpachwa uñjaskäna (1 Cró. 28:9; Proverbios 15:3 liytʼañataki). Ukampis kunjamsa Adanasa Evasa Supayasa Jupar uñjapjjäna uk uñachtʼayapjjañatakiw Diosajj ukhamaruk jaytäna. Jupa contra saytʼapjjatapatjja, Diosajj Awkjamajj walpun chuym usuyaspachäna (Génesis 6:6 uñjjattʼarakismawa). Ukampis mä Juezjamajja, cheqaparjamaw jupanakarojj juchañchañapäna.

⁷ Qalltanjja, Diosajj Adanarojj akham sänwa: “Uka qoqan achunakapjja jan manqʼamti, manqʼäta ukapachasti cheqpachan jiwäta” sasa. Adanajj juchachasjjän uka qhepatjja, uka urpachas jiwañapäkaspa ukham inas jupajj amuychïna. Cheqas ‘tarde thayajj’ thaytʼaskän ukhaw Jehová Diosajj jupanakar parläna (Gén. 3:8). Cheqapar uñjir Juezjamajja, nayraqatajj jupanakaruw istʼäna (Gén. 3:9-13). Ukjjarusti, jiwapjjañapatakiw juchañchjjäna (Gén. 3:14-19). Diosatï ukaratpacha Adanampi Evampir jiwayaspäna ukhajja, kuntï jaqenakatakejj amtkäna ukajj janiw phoqaskaspänti (Isa. 55:11). Juchar puripjjatapatjja, jan walinakajj ukaratpachas qalltawaykchïnjja, Jehová Diosajj Adanamp Evampirojj wawanakanïpjjañapatakiw mä jukʼa tiempomp jakayäna, uka wawanakapaw jutïrin sum jakasipjjañapäna. Jehová Diosatakejja, Adanamp Evampejj juchachasipkän ukürutpachaw jiwatäjjapjjaspas ukhamäjjäna. Diosatakejj mä urojja waranqa marampi sasiwa, cheqapuniw mä ‘urunaki’ jiwjjapjjäna (2 Ped. 3:8).

8, 9. Adanan juchapatjja, ¿kunjamansa wawanakapajj uñjasiwayapjje? (23 janankir dibujo uñjjattʼam.)

⁸ Adanampin Evampin juchapatjja, ¿kunjamansa wawanakapajj uñjasipjjäna? Apóstol Pablojj Romanos 5:12 qellqatan akham sänwa: “Kunjämatejj mä sapa jaqe toqe juchajj aka oraqer mantankejja, ukat jiwajj uka jucha laykurak utjejja, ukhamarakiw jiwajj taqe jaqerojj katuntawayi juchachasitap layku” sasa. Pablojj akham saskakïnwa: ‘Mayni jaqen juchachasitap laykuwa waljanejj juchararäpjjejja’ sasa (Rom. 5:19). Adanan juchapatjja, nayraqatajj Diosar taqe chuyma servir Abel chachaw jiwäna (Gén. 4:8). Adanan mayni wawanakapasa allchhinakapasa ukhamarakiw chuymankipstasin jiwapjjäna. Ukhamatwa taqe jaqenakajj juchampi jiwañampi katoqawayapjje. Uka pä uñisirinakatjja janiw khitis qhespkaspati. Adanajj ¿kunjamsa juchampi jiwañampi wawanakapar pasayäna? Janiw ukjja yatktänti, ukampis kuna jan walinsa wawanakapajj uñjasiwayapjje ukajj qhanaw amuyasi.

⁹ Ukatwa Bibliajj jiwañampir juchampirojja ‘taqe markanakaru imjjatir mantökaspas’ ukham uñtasiypacha (Isa. 25:7). Uka mantot janiw khiti jaqes qhespkaspati. Biblianjja sarakiwa: “Adán chachankatas laykojj taqe jaqenaka[w] jiwarapjjejja” sasa (1 Cor. 15:22). Ukatwa Pablojj säna: “¿Khitis [aka] ñanqha janchin munañapatjja qhespiyitani? Jupasti jiwañarukiw apaskitu” sasa (Rom. 7:24). ¿Khitis Pablor qhespiyaspäna?a

10. 1) Jehová Diosajj jiwañ chhaqtayjjaniwa sasajja, ¿kawkïr qellqatanakas Biblian qhanañchi? 2) ¿Kunsa uka qellqatanakajj Jehová Diosampit Jesusampit yatichistu?

¹⁰ Jehová Diosakiw apóstol Pablorojj qhespiyaspänjja. Isaías profetajja, ‘taqe markanakaru imjjatir mantot’ parlkasajj akham sänwa: “[Jehová] Tatitojj wiñayatakiw jiwañarojj tʼunjani, taqe jaqenakana nayranakapatsti jachanakapsa pichararakiniwa” sasa (Isa. 25:8). Mä awkejja, kunatï wawanakapar tʼaqhesiyki ukjja chhaqtayiwa ukat jachanakapsa pichararakiwa, ukhamarakiw Jehová Diosajj Adanat katoqawayktan uka jiwañjja, jan mayampitaki chhaqtayani. Jesusaw ukatakejj yanaptʼaski. 1 Corintios 15:22 qellqatajj siwa: “Kunjämtejj Adán chachankatas laykojj taqe jaqenakajj jiwarapjjejja, ukhamarakiw Cristonkjjasinjja taqe jaqenakajj jakapjjani” sasa. Pablojj ‘khitis qhespiyitani’ sasin jisktʼaskäna ukhajja, akham sarakïnwa: “Dios maynikiw Jesucristo toqe luraspajja” sasa (Rom. 7:25). Adanampi Evampejj Dios contras saytʼasipkchïnjja, Jehová Diosajj jaqenakarojj munasiskakïnwa. Jesusajj ukhamarakiw munasïna, kunattejj jupaw nayrïr chacha warmir lurañjja yanaptʼäna (Pro. 8:30, 31, NM). Ukampis ¿kunjamsa juchampit jiwañampit jaqenakar qhespiyapjjaspänjja?

11. Jaqenakar yanaptʼañatakejja, ¿kunsa Jehová Diosajj lurawayi?

¹¹ Adán chachajj juchachaskäna ukhajja, Jehová Diosajj jiwañapatakiw juchañchäna. Ukhamatwa taqe jaqenakajj juchampi jiwañampi katoqawaytanjja (Rom. 5:12, 16). Bibliasti siwa: ‘Adanan juchap laykuw juchañchatäñajj taqe jaqetaki utjejja’ sasa (Rom. 5:18). Kamachip jan pʼakintasajj ¿kunjamatsa Jehová Diosajj juchampiru jiwañampiru chhaqtayaspäna? Jesusajj uka toqet akham sänwa: ‘Jaqen Yoqapajj jutiwa jakañap churiri walja jaqenakar qhespiyañataki’ sasa (Mat. 20:28). Jan juchan jaqjamajja, Jesucristow qhespiyawayistu. ¿Kunjamatsa uka qhespiyäwejj Jehová Diosan cheqa kankañaparjam lurasiwayi? (1 Tim. 2:5, 6.)

12. ¿Kunjamatsa Jehová Diosajj cheqaparjam qhespiyawayistu?

¹² Kunjamtï Adanajj jan juchar purkasajj jakkänjja, ukhamarakiw Jesusajj jan juchan jaqjamajj wiñayataki jakaspänjja. Ukampisa, Jehová Diosajja Adanan wawanakapampi aka Oraqe phoqantayañwa amtäna. Ukatwa Jesusajj Awkipar munasitap layku ukat Adanan wawanakapar munasitap layku jakañap loqtasiwayi, ukhamat kuntï Adanajj aptʼawayki uk kutsuyañataki. Qhepatsti, Jehová Diosajj Jesusarojj ajay cuerpo churasinwa jaktayjjäna (1 Ped. 3:18). Ukhamajj Jehová Diosajja, jan cheqakankañapar pʼakintasaw Jesusan jan juchan jakäwip toqe kutsuyawayistu. Ukatjja, Adanajj kunjam jakañapäkäntï ukham wiñay jakañasatakiw alawayistu. Ukhamatwa Jesusajj Adán lanti saytʼäna. Apóstol Pablojj akham sänwa: “Nayrïri Adán jaqejj mä jakkir jaqewa tukuwayjje”, “ukampis qhepa Adanasti jakañ churir ajayuruw tukuraki” sasa (1 Cor. 15:45).

13. ¿Kunjamsa ‘qhepa Adanajj’ jiwatanakar yanaptʼani?

¹³ ‘Qhepa Adanajja’, jakañ churir ajayjamajja, niyaw Adanan wawanakaparojj wiñay jakañ churistani. Niyakejjay wawanakapat waljanejj jiwatäjjapjjchejja, wasitampi aka Oraqen jakapjjañapatakiw jupanakarojj jaktayarakini (Juan 5:28, 29).

14. ¿Kunjamatsa jaqenakajj juchat qhespiyatäpjjani?

¹⁴ ¿Kunjamatsa Diosajj jaqenakar juchat qhespiyani? Jehová Diosajja, alajjpachanwa mä Reino uttʼayi, ukansti ‘qhepa Adanampi’ ukat 144.000 ajllitanakampiw apnaqapjjani, jupanakasti jaqenak taypit ajllitäpjjewa (Apocalipsis 5:9, 10 liytʼañataki). Niyakejjay 144.000 ajllitanakajj aka Oraqen jakawayapjjchejja, kunjamas juchanïñajj ukjja sumwa yatipjje. Ukatwa kunapachatï Jesusampi chika waranqa maranak apnaqanipkani ukhajja, aka Oraqenkir jaqenakarojj jan juchaniru tukupjjañapataki yanaptʼapjjani (Apo. 20:6).

15, 16. 1) ¿Kunarus Biblian qhepïri uñisiri jan ukajj jiwaña sasejja, ukat kunapachas ukajj chhaqtayatäjjani? 2) 1 Corintios 15:28 qellqatarjamajja, ¿kunsa Jesusajj lurani?

¹⁵ Waranqa maranak tukuyarojja, istʼasir jaqenakajj juchampita jiwañampita qhespiyatäjjapjjaniwa. Pablojj akham siwa: “Kunjämtejj Adán chachankatas laykojj taqe jaqenakajj jiwarapjjejja, ukhamarakiw Cristonkjjasinjja taqe jaqenakajj jakapjjani. Ukampis sapa mayniw horasapar sartani. Cristow nayraqata jaktejja nayraqata achur uñtata, ukjjarusti kunapachatejj Cristojj [kuttankani] ukkhajj jupar iyawsirinakarakiw [mä arunjja, jupampi chika apnaqerinakaw] jaktapjjarakini. [Uka qhepat] aka oraqen tukusiñapajj purinini, Cristosti qʼal tʼunjani taqe munañaninakaru, jilïrinakaru, ukhamaraki alajjpach chʼamanakaru, ukatsti Dios Awkiparurakiwa apnaqañapataki taqe kuna katuyjjani. Cristojj reinañapawa Diosajj taqe uñisirinakapar Cristompi atipjaykani ukkhakama. Qhepïri uñisiristi jiwañawa, ukas qʼala tʼunjatarakïniwa” sasa (1 Cor. 15:22-26). Ukhamasti “qhepïri uñisiristi”, mä arunjja, Adanat katoqawayktan uka jiwañajj jan mayampitaki chhaqtayatäniwa. Taqe jaqenakar ‘imjjatir mantosti’ janirakiw utj-jjaniti (Isa. 25:7, 8).

¹⁶ Apóstol Pablojj saskakiwa: “Kunapachatejj taqe kunas Criston munañapankjjanejja, Cristojj Diosan Yoqapäkasinjja, Dios Awkirurakiw katuyasjjani, Diosajj juparu taqe kuna katuyatap layku. Ukhamatwa Diosajj taqe kunjjarus munañanïni” sasa (1 Cor. 15:28). Kuna amtampitï Jesusarojj Reyjam uttʼayasiwayki ukajj ukhamaw phoqasini. Jesusasti wali kusisitaw Jehová Diosan apnaqjjañapatakejj jan juchani jaqenakarojj katuyjjani.

17. ¿Kunas Supayampejj pasani?

¹⁷ Taqe jan walinak utjayir Supayampejj ¿kunas pasani? Uka toqetjja, Apocalipsis 20:7-15 qellqataw qhanañchistu. Waranqa maranak tukuyarojja, jan juchanëjjapjjani uka jaqenakarojj wasitampiw Supayajj yantʼani. Ukjjarusti, jupasa ukat khitinakatï jupar arktapkani ukanakasa jan mayampitaki tukjatäjjapjjaniwa. Biblianjja ukarojj ‘payïri jiwaña’ sarakiwa (Apo. 21:8). Ukampis uka jiwañajj janiw ‘tʼunjatäkaniti’, kunattejj uka payïr jiwañan jiwirinakajj janiw jaktanjjapjjaniti, wiñayan wiñayapatakiw jiwjjapjjani. Jiwasatï Jehová Diosar taqe chuyma serviskstan ukhajja, janiw ‘payïri jiwañarojj’ ajjsarañasäkiti, ukasti janiw jiwasatakejj mä uñisirïkiti.

18. Kunanaktï Adanajj lurañapäkäna ukajj ¿kunjamsa phoqasini?

¹⁸ Ukapachasti taqe jaqenakaw jan juchani jakasjjapjjani, jupanakarusti Jehová Diosajj wiñay jakañwa churani. Janiw kuna uñisirisa utj-jjaniti. Adanajj janis ukankkchinejja, kunanaktï lurañapäkäna ukanakajj sumaw phoqasini. Aka Oraqejj Adanan wawanakapampi phoqantatäniwa, jupanakaw kunayman animalanakaru wali kusisita sum uñjapjjani. Jehová Diosajj niyaw qhepïri uñisiri jiwañarojj jan mayampitaki tukjani, ¡ukajj wali kusiskañapuniwa!