Wali suma amuytʼat mayisïwit askinak yateqapjjañäni

 1. ¿Israel markan kuna tantachäwipatsa yatjjataskañäni, ukat kuna jisktʼanakarus qhanañchaskañäni?

“SARTASIPJJAM, ukatsti wiñayan wiñayapatak jakir Tatit Diosamaru yupaychapjjam.” (Neh. 9:4, 5.) Uka arunakampiw levitanakajj Jehová Diosar mayisiñatak Israel markar tantachthapipjjäna, Biblian utjki uka oracionanakatjja, ukaw jukʼamp jachʼajja. Uka tantachäwejja, Jerusalén markanwa judionakan paqallqöri tisri (septiembre/octubre) phajjsin 24 uru saraqatar apasïna, 455 nayrïr pacha marana. Kunatsa tantachasipjjäna uk nayraqat yatjjattʼañäni, ukat aka jisktʼanakaruw qhanañchtʼarakiñäni: ¿Uka tantachäwin askirjam mistuñapatakejj judionakan kun lurañ yatipjjatapas yanaptʼäna? ¿Suma amuytʼat mayisïwit kuns yateqsna? (Sal. 141:2.)

 2. Jerusalén markan perqanakap wasitamp saytʼayañ tukuyas tantachtʼasipkäna ukatjja, ¿kunsa yateqassna?

² Judionakajj uka phajjsi nayrakiw Jerusalén markan perqanakap wasitamp saytʼayañ tukuyapjjäna (Neh. 6:15). Jupanakajja 52 urunakanakwa tukuyapjjatayna, ukatsti Jehová Diosar yupaychañaruw chuym uchapjjäna. Ukatwa tisri phajjsin nayrïr uru saraqatarojj Esdras ukat yaqha levitanakaru Diosan Leyip liytʼiri ukat qhanañchtʼir istʼañatak plazar sarapjjäna . Ukarojja, familpachaw sarapjjäna ukat amuytʼirjamäjjapjje uka wawanakas sarapjjarakïnwa ukat “alwata chika urukamawa” saytʼata istʼapjjäna. ¡Ukajj jiwasatakejj yateqaskayapuniwa! Kunattejj wali suma Tantachasiñ Utanakanwa tantachastanjja, ukhamäkchi ukasa awisajj janiw sum istʼktanti ukat jan añcha wakiskirïki ukanakakwa lupʼtanjja. ¿Jumarojj ukham pasirïtamti? Ukhamächi ukhajja, kunsa israelitanakajj lurapjjäna uka toqet amuytʼam: jupanakajj janiw istʼamayak istʼapkänti jan ukasti uka arunakjja, chuymaparuw katoqapjjäna. Ukat Diosan Leyip jan phoqhapjjatap amuyasisajj jachaqtʼasipjjän kunawa (Neh. 8:1-9).

 3. ¿Kuna ewjjtʼarus israelitanakajj istʼapjjäna?

³ Ukampis uka urojja, janiw juchanak arsusiñ urükänti. Jan ukasti fiesta urünwa, Jehová Diosar kusisit yupaychañ urünwa (Núm. 29:1). Ukatwa Nehemiasajj israelitanakar akham säna: “Sarjjapjjam, manqʼasinipjjam sumïri manqʼanaka, umapjjarakim mojjsa vinonaka, ukatsti churapjjarakim khitinakantejj jan manqʼañapajj utjki ukanakaru, jichhürusti Tatitusaru loqtatätap layku. Janiraki llakisipjjamti; Tatitusti kusisiñapampiw jiwasar chʼamañchistani” sasa. ¿Israelitanakajj istʼapjjpachänti? Jïsa, istʼapjjänwa, kusisiñat ‘jachʼa fiesta lurapjjäna’ (Neh. 8:10-12).

 4. ¿Israelit familia pʼeqtʼirinakajj kuns lurapjjäna, ukat Enramada fiestan lurapkän ukan kunas wali wakiskirïnjja?

⁴ Ukat qhepürojja, familia pʼeqtʼirinakajj Diosan Leyip yatjjatañataki ukat kunjamsa markajj sum phoqhapjjaspa uk yatjjatañatakiw tantachtʼasipjjäna . Qellqatanakat yatjjatasajja, uka pachpa phajjsin Enramada fiesta amtasiñapa ukat mä jachʼa tantachäwimpi tukuyasiñapwa amuyapjjäna. Uka fiestajja, tisri phajjsit 15 urut 22 urukamaw apasiñapäna, uk yatisajja jankʼakiw wakichañ qalltapjjäna . Josué chachan urunakapat aksarojj janipuniw ukham suma fiesta amtapkänti. Markanjj “wali kusisiñaw utjäna”. Ukanjja, Diosan Leyip jachʼat liytʼapkäna ukaw wali wakiskirïnjja, ukat “nayrïr uruta qalltasina qhepa urukama[w]” uk lurapjjäna (Neh. 8:13-18).

 5. Levitanakajj Jehová Diosar oracionan janïr maykasajja, ¿kunsa israelitanakajj lurapjjäna?

⁵ Ukat fiesta tukuyatat pä uru qhepatjja (tisri 24 uru), Diosan Leyip jan phoqhapjjatap arsusiñ uruw purinïna. Uka urojj janiw manqʼaña ukat kusisiñ urükänti. Israelitanakajj ayunapjjänwa ukat llakisipjjatap uñachtʼayañatakejj chhankha isinakampiw isthapisipjjäna. Ukat alwajja, wasitampiw Diosan Leyip niya kimsa horanak liyipjjäna ukat jaypʼurojja “juchanakapa arsusipjjäna, ukhamarak Tatiturus yupaychapjjarakïna” . Ukapachaw levitanakajj israelitanakatakejj kuntï aka yatichäw qalltan qhanañchaniwayktan uka suma oración Jehová Diosar mayipjjäna (Neh. 9:1-4).

 6. ¿Sum amuytʼasin mayisiñatakejj kunas levitanakar yanaptʼäna, ukat kunsa yateqsna?

⁶ Levitanakajj Diosan Leyip liytʼañ yatitäpjjpachänwa ukat ukaw sum amuytʼasin Jehová Diosar mayisiñatak yanaptʼpachäna. Mayisiñ qalltkasajja, kuntï Jehová Diosajj lurkäna ukat kunjam Diosäkiti ukwa aytapjjäna. Ukatjja, kuna juchanaktï israelitanakajj lurapkäna ukwa aytapjjarakïna ukat ‘jachʼa khuyapayasiñap’ katoqañ jan wakisitap taqe chuymaw amuyasipjjäna (Neh. 9:19, 27, 28, 31). Jiwasatï levitanakjam Diosan Arupat sapüru lupʼiñäni ukhajja, mayisïwisajj ukham sumarakïniwa. Ukhamatwa, Jehová Diosarus nayraqat parlayksna ukhamäni ukat mayiskañäni ukhajj walja toqenakat jachʼañchañaw utjistani (Sal. 1:1, 2).

 7. ¿Kunsa levitanakajj mayipjjäna, ukat kunsa jupanakat yateqsna?

⁷ Levitanakajj oración tukuyasajja, jupanakatakejj akakwa mayisipjjäna: “Ukhamasti nanakan jachʼa Diosajja, taqe chʼamani ukhamarak ajjsarkañaraki, ukatsti sumankäwir mantatamsa, munasiñamsa imtawa, jichhajja uñjamaya aka jan waltʼañanakajja jutki reyinakajjarusa, jilïrinakajjarusa, sacerdotenakajjarusa, profetanakajjarusa, ukhamarak nayra awkinakajjarusa, ukatsti taqe markpacharusa, Asiriana reyinakapan urunakapatpacha jichha urukama” (Neh. 9:32). ¿Kunsa levitanakat yateqsna? Jehová Diosar mayisktan ukhajja, Juparuw nayraqat jachʼañchañasa ukat yuspärañasa, ukjjaruw kunatï jiwasatak wakiski uk mayisiñasa.

8, 9. 1) Diosar mayisiñ qalltkasajja, ¿kunjamsa levitanakajj altʼat chuymanïtap uñachtʼayapjjäna? 2) ¿Levitanakajj alajjpachankir kuna pä ejercitonakatsa parlasipkpachäna?

⁸ Levitanakajj kuntï Diosar oracionan sapkani ukjja sumsa amuytʼapkchïnjja, kunjamtï Jehová Diosar jachʼañchasiñapäki ukham jachʼañchañatak arunakap pistʼatapjja, altʼat chuymampiw amuyasipjjäna. Ukatwa taqe israelitanakatak mayisin akham sasin altʼat chuymamp qalltapjjäna: “¡Tatitusti bendecitäpan, ukhamaraki jachʼa qollan sutipasa jachʼañchatäpan!” sasa (Neh. 9:5).

⁹ Ukat akham sasaw levitanakajj mayisisipkakïna: “Jumakïtawa Tatitojja, ukhamarak janiw yaqha Diosajj utjkiti. Jumarakiw alajjpachsa lurtajja, ukhamarak alajjpachata jukʼamp altonkki uksa, ukatsti taqe warawaranaksa; jumarakiw oraqsa lurtajja taqe kunatejj ukan utjki ukanakamppachsa, jachʼa qotanaksa, ukhamarak kunatejj ukan utjki taqe ukanaksa. Jumaw taqe kunanakarus jakaña churtajja. Ukatarakwa alajjpachankir angelanakas jumar yupaychapjjtamjja” (Neh. 9:6). Jehová Diosaw alajjpachat jukʼampi altonkki uka warawaranaksa ukat galaxianaksa lurawayi, ukanakajj mä ejercitöpkaspas ukhamäpjjewa. Ukat taqe kunatï aka Oraqen utjki ukanaksa Juparakiw lurawayi. Oraqenjja, kunayman kasta animalanakaw utji, ukat ukarjamaw mirtapjjaraki. Ukat “alajjpachankir angelanakas” mä ejercitökaspas ukhamarakiwa, jupanakaw taqe kuntï Diosajj lurkatayna uk uñjapjjäna (1 Rey. 22:19; Job 38:4, 7). Uka angelanakajja, “khitinakatejj qhespiyasiñ katoqapkani” uka pantjasir jaqenakar yanaptʼasaw wali altʼat chuymampi Jehová Diosan munañap phoqhapjje (Heb. 1:14). Jupanakatwa altʼat chuymanïñ yateqasiñasa ukat wali wakichtʼat ejercitjamaw Jehová Diosar mayachtʼat serviñasa (1 Cor. 14:33, 40).

10. ¿Jehová Diosajj kunjamtï Abrahamar uñjkäna ukat kuns yateqtanjja?

¹⁰ Ukjjarojja, kunjamsa Jehová Diosajj Abramar uñjäna uka toqetwa levitanakajj oracionapan aytapjjarakïna. Abramajj Sarai warmipampejj janiw wawanïpkänti. Ukampis 99 maranëjjän ukhaw Jehová Diosajj Abraman sutip mayjtʼayäna, ukat Abraham sasaw sutichjjäna, uka sutejja, “walja markanakan awkipa” sañ muni (Gén. 17:1-6, 15, 16). Ukhamarusa wawanakamaruw Canaán oraqe churä sasaw arsuwayäna. Jiwasajja kuntï arsktan ukjja, niya jilapartejj armasiktanwa, ukampis Jehová Diosajj janipuniw armkiti. Ukatwa levitanakajj akham sapjjäna: “Juma [Jehová] Tatit Diosarakiw Abramarus ajllisiraktajja; jumaw caldeonakan markapana Ur sat lugarata apsuniraktajja, ukatsti Abraham sutimpirakiw suticharaktajja. Jumasti uñjtawa jupajj jumar iyawsatama, ukhamarak jupampejj mä suma amtäwiruw mantapjjtajja; juman churañamataki jupat saraqeri jaqenakaru cananeonakana [...] oraqenakapa. ¡Ukatsti jumajj phoqtawa arsutamarojj, jumajj wiñay phoqhañpuni yattajja, uka layku!” (Neh. 9:7, 8). Jehová Diosatwa yateqasiñasa ukat kuntï arsktan ukarojj phoqhañasapuniwa (Mat. 5:37).

11, 12. ¿Diosan Jehová sutipajj kamsañs muni, ukat uka suti apañapätap kunjamsa markapar uñachtʼayäna?

¹¹ Diosan Jehová sutipajj akham sañwa muni: “Kuntï Jupajj Munki ukjja Phoqhasiyapuniwa”. Mä arunjja, Diosajj kuntï arski ukjja, wakisitarjamaw phoqhe. Ukjja, kunjamsa Abrahaman wawanakapar uñjäna ukanwa uñachtʼayäna. Egipton esclavopjjäna ukhajja, Jehová Diosajj jupanakar qhespiyaña ukat Suma Oraqe churañwa arsutayna. Uka tiemponjja, ukajj janiw phoqhaskaspati sañjamänwa. Ukampis Jehová Diosajj kuntï arskäna ukjja, wakisitarjamaw phoqhäna. Ukhamatwa Jupa sapaki Jehová suti apañapätap uñachtʼayäna.

¹² Levitanakajj Jehová Diosat parlkasajj akham mayisisipkakïnwa: “Jumajj uñjtawa kunjämsa nayra awkinakajjajja Egiptona tʼaqhesipjjäna ukjja, ukhamarak istʼaraktawa llakisiñ horasan parlasitanakapjja Mar Rojo sat qota jakʼana. Jumasti wali muspharkaya jachʼa luräwinakwa Faraonatakejj lurtajja, ukhamarak servirinakapatakisa, markapankiri taqe jaqenakapatakisa, jumajj amuyastawa kunja jachʼa jachʼa tukuñampisa israelita jaqenakarojj apnaqapjjäna uka layku. Ukhamatwa jachʼar aytatätajja kunjämatejj jichhürunjama. Jupanakan nayraqatapanjja qotsa payaruwa jaljtaytajja, ukatsti jupanakajj uka cheqjja waña oraqenjam makhatapjjäna; ukatsti jupanakar arktirinakarojja qota manqherurakiw utjantaytajja, kunjämatï mä qalajj uma manqheru utjantki ukhama” sasa. Ukat nayra awkinakap laykojj kunsa Jehová Diosajj luräna uka toqet akham sapjjarakïnwa: “Ukhamarak jupanakajj Canaán oraqer mantasinjja katuntasipjjänwa oraqenaka [...]. Ukhamarakiw katuntasipjjäna nuwasiñataki perqampi muyuntata markanaksa suma yapuchaña oraqenaksa, suma yänakan phoqtʼata utanaksa, phujunaksa, uva yapunaksa, olivo yapunaksa, ukhamarak yaqha fruta alinaksa. Ukatjja manqʼapjjänwa sistʼasiñkama, likʼintapjjarakïnwa, ukhamarak wal kusisipjjarakïna juman jachʼa munasiñamata” (Neh. 9:9-11, 24, 25).

13. Israelitanakajj Egiptot mistunipkäna uka qhepatjja, ¿kunsa Jehová Diosajj jupanakar churäna, ukat kunsa lurapjjäna?

¹³ Jehová Diosajj arsutap phoqhañatakejj kunaymaninakwa luräna. Amuytʼañataki, israelitanakajj Egipto markat mistunipkäna uka qhepatjja, Jehová Diosajj leyinakwa churäna ukat kunjamsa Jupar yupaychapjjañapa uksa yaticharakïnwa. Ukatwa levitanakajj akham sapjjäna: “Sinaí qolluruwa saraqaniraktajja, ukhamarak jupanakampirakiwa alajjpachatpacha parlaniraktajja; jupanakarusti churtawa suma aski arsüwinaka, cheqa yatichäwinaka, ukhamarak leyinaka, suma mandamiento arunakampi” sasa (Neh. 9:13). Jehová Diosaw israelitanakarojj markapäñapatak ajllisïna, ukat jupanakaruw Suma Oraqe churañapäna ukat sutipatakjam sarnaqapjjañapatak yatichäna. Ukampis jupanakajj kuntï yateqapkäna ukjja armasjjapjjakïnwa (Nehemías 9:16-18 liytʼasiñapawa).

14, 15. 1) Juchanakarus purtʼasipkchïnjja, ¿kunjamsa Jehová Diosajj israelitanakar uñjäna? 2) ¿Kunjamtï Jehová Diosajj markapar uñjkäna ukat kunsa yateqtanjja?

¹⁴ Israelitanakajj Sinaí qollunwa Diosan Leyip phoqhañ arsuwayapjjäna, ukampis mä jukʼa tiempotjja, pä jachʼa jucharuw purtʼasipjjäna, uka toqetwa levitanakajj oracionapan arsupjjarakïna. Ukat wasaran jiwapjjañapas wakiskchïnjja, Jehová Diosajj jupanakar uñjaskakïnwa. Ukatwa levitanakajj akham sasin Jupar jachʼañchapjjäna: “Jachʼa khuyapayasiñama laykojja, janiw wasarana jaytanukktati [...] pusi tunka marawa manqʼañjja churäyätajja [...]. Janipuniw kunsa jupanakatakejja pistʼaykäyätati; janirakiw isinakapas thanthaskänti, ni kayunakapas pʼusuntkarakïnti” sasa (Neh. 9:19, 21). Jehová Diosajj jichhürunakanjja, ukhamarakiw Jupat jan jitheqtañasatakejj kunatï wakiski uk churistu. Janipuniw jan istʼasiri ukat Diosar jan confiyir waranq waranqa israelitanakjamäñ munktanti, jupanakajj ukhamäpjjatapatwa wasaran jiwarapjjäna. Ak janipun armañäniti: “Ukanakasti qellqatawa jiwasanakan amuytʼasipjjañasataki, ukatsti jan ukham lurañasataki” (1 Cor. 10:1-11).

¹⁵ Suma Oraqer mantjjapjjäna ukhajja, Canaán markankir jaqenakan kʼari diosanakapar yupaychjjasaw wachoq jucha lurapjjäna ukat wawanakapsa sacrificiot loqtapjjäna. Ukatwa uka jakʼankir markanakajj tʼaqhesiyapkäna ukhajj Jehová Diosajj jan jarkʼaqkänti. Ukampis juchanakapat arrepentisjjapjjäna ukhajja, khuyaptʼayasisaw perdonäna ukat uñisirinakapatsa jarkʼaqarakïnwa. Ukajj kutin kutiniw pasäna (Nehemías 9:26-28, 31 liytʼasiñapawa). Levitanakajj akham sapjjänwa: “Walja maranakawa jupanakarojj pacienciampi uñchʼuktajja, ukatsti ajayuma toqes ewjjtʼaraktawa, ukhamarak profetanakam toqesa; ukampis janiw istʼapkäyätamti, ukatwa katuyaraktajja aka oraqenkir jaqenakan apnaqapjjañapataki” sasa (Neh. 9:30).

16, 17. 1) Babilonia markat kuttʼanipkäna uka israelitanakajja, ¿kunansa nayra awkinakapat mayjapjjäna? 2) ¿Kun lurapjjatapsa israelitanakajj arsusipjjäna, ukat kun lurañatakis arsuwayapjjäna?

¹⁶ Babilonia markat kuttʼanipkäna uka qhepatjja, wasitatwa Jehová Diosar jan istʼjjapjjänti. Ukampis ¿kunansa mayjapjjäna? Levitanakan mayisitapajj akham saskakiwa: “Jichhajj uñtanipjjeta, nanakajj esclavo tukuyatäpjjtwa, kawkïr oraqtejj nayra awkinakajjaru churkta, achunakapata, utjirinakapata manqʼasipjjañapataki ukana. Kunanakatejj walja achki ukanakajja reyinakatakikiwa, nanakjjaruwa uchtajja juchanakajj layku [...]. Ukatwa nanakajj wali llaktʼasitäpjjta” sasa (Neh. 9:36, 37).

¹⁷ ¿Jehová Diosas jupanakar ina chʼusat tʼaqhesiykaspa ukhamti sañ munapjjpachäna? Janiwa. Jupanakajj akham sapjjänwa: “Jumajj cheqapätawa taqe kunanakatejj nanakjjaru jutkäna ukanakatjja; jumajja taqe phoqhañamampiwa phoqhäyätajja, ukampis nanakajja kunatejj jan walïki ukwa lurapjjäyäta” sasa (Neh. 9:33). Ukat mayisïwjja, markajj Diosan Leyip phoqhaniwa sasin arsusaw tukuyapjjäna (Nehemías 9:38 liytʼasiñapawa; Neh. 10:29). Ukat ukham phoqhañ amtapjjatapjja, mä documentoruw qellqantapjjäna ukat Judá marka pʼeqtʼirinakat 84 ukhaniw firmantapjjäna (Neh. 10:1-27).

18, 19. 1) ¿Machaq oraqer mantañatakejj kunas wakisi? 2) ¿Kunsa mayisipkakiñasa, ukat kunatsa?

¹⁸ Jiwasatï jutïrpachan mä suma paraisor mantañ munstan ukhajja, Jehová Diosamp cheqañchatäñasajj wakisipuniwa. Apóstol Pablojj uka toqet akham sänwa: “¿Utjaspati awkipan jan cheqachat wawajja?” sasa (Heb. 12:7). Diosan cheqañchäwip katoqasitasjja, Jupar taqe chuyma jan jitheqtas yupaychasaw uñachtʼaytanjja ukat Jupatakjam sarnaqañasatakis qollan ajayupampiw yanaptʼayastanjja. Ukat jachʼa juchar purtʼasiñäni ukhajja, ak amtapuniñäni: jiwasatï taqe chuyma arrepentisiñäni ukat altʼat chuymampi cheqañchäwip katoqasiñäni ukhajja, Jehová Diosajj perdonistaniwa.

¹⁹ Jehová Diosajj niyaw sutip jachʼañchani, israelitanakar Egiptot qhespiykäna ukat sipans jukʼampi (Eze. 38:23). Jehová Diosajj sutip jachʼañchkani ukhajja, kunjamtï israelitanakajj Suma Oraqer mantapkänjja, ukhamarakiw Jehová Diosar jan jitheqtas yupaychapki ukanakajj machaq oraqer mantapjjani (2 Ped. 3:13). Ukhamajja, Jehová Diosan sutip jachʼañchasiñapatak mayisipkakiñäni. Jutïr yatichäwinwa yaqha mayisïwit yatjjataskañäni, ukaw Jehová Diosampi jichhürunakansa ukat wiñayatakis askit uñjatäñatak yanaptʼistaspa.