“Khitinakatï Jehová Diosar thaqapki ukanakarojj janiw kunatï sumäki ukajj faltkaniti”

 1. ¿Kuna jan walinsa Davidajj uñjasïna?

DAVIDAROJJ Israel marka apnaqeri Saúl reyiw jiwayañ amtäna, ukatwa Davidajj escapaskäna. Manqʼañap jan utj-jjepanjja, Nob sat markaruw purïna, ukanwa phesqa tʼantʼanak mayïna (1 Sam. 21:1, 3). Uka qhepatsti, Davidampi servirinakapampejj mä qollu pʼiyaruw imantasipjjäna (1 Sam. 22:1). ¿Kunatsa Davidajj ukhaman uñjasïna?

 2. ¿Kunatsa Saúl reyejj jupa pachpaw jan waltʼayasiskäna sasajj sissna? (1 Samuel 23:16, 17).

² Davidajj wali uñtʼatäjjänwa, walja guerranakanwa atipjarakïna, ukatwa Saúl reyejj jupat wal envidiasjjäna. Jehová Diosajj jupar jan istʼatap laykuw reyïñap jan munjjänti, Israel marka apnaqañapatakejj Davidaruw ajllïna, uksa Saúl reyejj yatirakïnwa (1 Samuel 23:16, 17 liytʼäta). Niyakejjay Israel marka apnaqaskakchïnjja, Saúl reyejj mä jachʼa ejercitonïnwa, waljanirakiw jupar apoyapjjäna, ukatwa Davidajj salvasiñatak escapjjäna. ¿Saúl reyejj kuntï Jehová Diosajj Davidat siskäna uka contrajj saytʼaspänti? (Is. 55:11). Bibliajj janiw uka toqet kamskisa, ukampis akwa amtañasa: jupa pachpaw jan waltʼayasiskäna. Dios contra saytʼirinakajja, aynachtʼapjjapuniwa.

 3. ¿Kunsa Davidajj jan walinakan uñjaskasas luräna?

³ Davidajj humilde chachänwa. Janiw Israel markan reyipäñatakejj jupa pachpa ajlliskänti, jan ukasti Jehová Diosaw jupar ajllïna (1 Sam. 16:1, 12, 13). Ukatwa Saúl reyejj jupar wal uñisïna. Ukampis Davidajj janiw ukham jan walinakan uñjasisajj Jehová Diosar juchañchkänti. Janirakiw jukʼa manqʼanikïtap laykusa, qollu pʼiyan imantasitap laykus quejaskänti. Antisas uka qollu pʼiyan imantaskasaw aka yatichäwejj kuna textot apstʼatäkitï uka suma canción lurpachäna. Uka cancionan mä partepajj akham siwa: “Khitinakatï Jehová Diosar thaqapki ukanakarojj janiw kunatï sumäki ukajj faltkaniti” sasa (Sal. 34:10).

 4. ¿Kuna jisktʼanakarus qhanañchaskañäni, ukat kunatsa ukanakajj wali wakiskirejja?

⁴ Jichha tiemponjja, Jehová Diosan walja servirinakapaw jukʼa manqʼañanikïpjje, jakañatak kunatï munaski ukapas jukʼakiw utji.b Jukʼampis pandemia utjatapatwa ukhaman uñjasipjje. ‘Jachʼa tʼaqesiñ tiempojj’ sapürutjamaw jakʼankjjaraki, ukhamajja jukʼamp jan walinakaw utjani (Mat. 24:21). Ukatwa aka pusi jisktʼanakar qhanañchañajj wali wakiskirïni: ¿Davidarojj “kunatï sumäki” ukajj janiw faltkänti sasajj kunatsa sissna? ¿Kunatï utjkistu ukampik kusisitäñ kunatsa yateqañasa? ¿Jehová Diosaw cuiditani sasajj kunatsa jan payachasiñasäki? ¿Kunjamsa jutïritak jichhjatpach wakichtʼassna?

5, 6. Diosan servirinakaparojj “kunatï sumäki” ukajj janiw faltkaniti sasaw Davidajj säna, ¿uka arunakampejj kamsañsa munäna uk amuytʼañatakejj kunjamsa Salmo 23:1-6 qellqatajj yanaptʼistu?

⁵ ¿Jehová Diosan servirinakaparojj janiw “kunatï sumäki” ukajj faltkaniti sasajj kuna toqetsa Davidajj parlaskäna? Salmo 23 ukanwa ukar uñtasit arunakajj utji, uk yatjjatañaw kamsañsa Davidajj munäna uk amuytʼañatak yanaptʼistani (Salmo 23:1-6 liytʼäta). Davidajj aka arunakampiw uka salmo qallti: “Jehová Diosaw Awatirijajja. Janiw kunas faltkitaniti” sasa. Uka salmon mayni versiculonakapanjja, Davidajj kunatï wali wakiskirïki ukanakwa ayti, mä arunjja Jehová Diosar Awatiripjam uñjatap laykojj kuna suma bendicionanaksa katoqäna ukanakwa ayti. Jehová Diosaw juparojj ‘cheqap thaknam irpäna’, walinsa jan walinsa janipuniw jaytanukkänti. Jehová Diosan ‘walja pastonakapansa’ jakkchïnjja, jan walinakan uñjasispänwa, Davidajj uk sumwa yatïna. Awisajj inas aynachtʼata jikjjatasisajj ‘wali chʼamak vallensa sarnaqkaspa’ ukham amuyaschïna, nayar uñisirinakas utjarakiniwa sasaw sarakïna. Ukampis niyakejjay Jehová Diosajj Awatiripächïnjja, Davidajj “janiw kuna jan walirus ajjsarkti” sasaw sarakïna.

⁶ Ukhamajj ¿kunatsa Davidarojj janiw “kunatï sumäki” ukajj faltkänti sasajj sissna? Diosar serviñan janiw kunas faltkänti. Kusisitäñapatakejj janiw walja utjirinïñapajj wakiskänti. Kuntï Jehová Diosajj jupar churkäna ukampejj kusisitakïnwa. Davidatakejj Jehová Diosan bendicionap katoqaña, jupamp jarkʼaqatäñaw jukʼamp wakiskirïna.

 7. Lucas 21:20-24 textorjamajja, ¿Judea markan jakasiri cristianonakajj kuna jan walinsa uñjasipjjäna?

⁷ Kuntï Davidajj siskäna ukarjamajja, janiw wali utjirinïñajj taqe kunat sipans nayrankañapäkiti, ukwa yateqtanjja. Cheqas kunanakatï utjkistu ukampejj kusisitaw jakassna, ukampis janiw taqe kunat sipans ukajj nayrankañapäkiti. Ukwa Judea markankir jilat kullakanakajj amuyapjjäna (Lucas 21:20-24 liytʼäta). ‘Jerusalenajj ejercitonakan muyuntataw’ uñjasini sasaw Jesusajj jupanakar säna. Uk uñjasajja, Judeankirinakajj ‘qollunakaruw escapjjapjjañapäna’, jupanakajj escapasakiw salvasipjjaspäna, ukampis ukatakejj walja cosasanakapwa jaytapjjañapäna. La Atalaya sat revistan akham sasaw qhanañchasïna: “Utanakapsa oraqenakapsa, jupanakajj jaytjjapjjänwa. Kunanakatï utanakapan utjkäna ukanaksa, ukhampachwa jaytapjjarakïna. Jehová Diosaw yanaptʼistani cuidaskarakistani sasaw confiyapjjäna. Jupanakatakejj Diosar serviñaw taqe kunat sipans nayrankäna” sasa.

 8. ¿Kunatï Judea markankir cristianonakar paskäna ukat kuna wakiskirsa yateqsna?

⁸ ¿Kunatï Judea markankir cristianonakar paskäna ukajj kuna wakiskirsa yatichistu? Párrafo 7 ukan parlaniwayktan uka revistajj akham sarakïnwa: “Jutïrin inas yantʼanakan uñjaschiñäni, ukhaw kunanakatï utjkistu ukat jiwasatak importante janicha ukajj qhan uñjasini. ¿Kunas jiwasatak wali importantejja? ¿Diosat jan jitheqtatasat salvatäña, jan ukajj kunanakatï utjkistu ukacha? Akapachajj tukusjjani ukhajja, inas jan walinakan uñjaschiñäni, kunatï utjkistu ukanak jaytañas wakisirakchini. Nayrïr cristianonakajj Judea markat escapañatakejj wakichtʼatäpjjänwa, jiwasajj ukhamarakiw kun lurañatakis wakichtʼatäñasa”.c

 9. Kuntï apóstol Pablojj hebreonakar ewjjtʼkäna ukajja, ¿kunjamsa jumarojj chʼamañchtʼtam?

⁹ ¿Uka cristianonakatakejj taqe kun jaytasa yaqha cheqar jakir sarjjañajj kunja chʼamäpachänsa uk amuysnati? Jehová Diosaw kunatï jakañatak wakiski uk jikjjatañatak yanaptʼitani sasaw confiyapjjañapäna. Romanonakan Jerusalenar muyuntapjjañapatak phesqa maranak faltaskäna ukhajja, apóstol Pablojj wakiskir ewjjtʼanakwa hebreonakar churäna. Akham sänwa: “Jakañ vidanjja jan qollqe sinti munirïpjjamti, kunanakatï utjapktam ukanakampejj kusisitakïpjjam. Diosajj akham siwa: ‘Nayajj janipuniw jaytanukkämati, janipuniw apanukkämasa’ sasa. Ukhamajj jan ajjsarapjjañäniti, jan ukasti akham sapjjañäni: ‘Jehová Diosaw yanapirijajja, janiw ajjsarkäti. ¿Jaqejj kamacharakitaspasti?’” sasa (Heb. 13:5, 6). Apóstol Pablon uka arunakaparjam luriri cristianonakatakejja, kunanakatï jupanakan utjkäna ukampik yaqha cheqan jakañajj janiw chʼamäkänti, kusisitakiw jakasipjjäna. Jehová Diosaw kunatï jakañatak wakiski ukanak churistani sasaw confiyapjjäna. Apóstol Pablon uka arunakapajja, ukhamarakiw Jehová Diosar confiyañatak yanaptʼistu.

10. ¿Kunsa apóstol Pablojj yateqäna?

¹⁰ Apóstol Pablojj niya ukhamarak Timoteor ewjjtʼäna, uka arunakajj jiwasar yanaptʼarakistuwa. Jupajj akham sänwa: “Jiwasantejj manqʼasa isisa utjaskchistojja, ukanakampejj kusisitakïskañäniwa” sasa (1 Tim. 6:8). Uk sasinjja, janiw suma manqʼanak manqʼañasäkiti, janiw suma utanïñasäkiti, ni machaq isinaksa alasiñasäkiti ¿sañti munaskäna? Pablojj janiw uk sañ munkänti, jan ukasti kunatï jakañatak utjkistu ukampejj kusisitakïñasawa sañwa munaskäna (Filip. 4:12). Ukwa jupas yateqarakïna. Kunanakatï utjkistu ukat sipansa, Jehová Diosamp sum apasiñaw jukʼamp valoranejja (Hab. 3:17, 18).

11. ¿Moisesajj kuntï israelitanakar siskäna ukat kunsa yateqsna?

¹¹ Amuyusarjamajj kuntï munktan ukajja, janiw Jehová Diosan amuyuparjamäkaspati. Kuntï Moisesajj israelitanakar siskäna uk uñjañäni, israelitanakajj 40 maranak wasarankjjapjjäna ukhajja, jupajj akham sänwa: “Taqe kunanaktï jumanakajj lurapkta ukanakanjja Jehová Diosajj bendisipjjtamwa. Aka jachʼa wasarnam sarnaqatanakamsa jupajj sumwa uñjaski. Aka 40 maranakajja jumanakan Jehová Diosamajj jumanakampïskänwa, janirakiw kunas faltapkayätamti” sasa (Deut. 2:7). Uka 40 maranakanjja, Jehová Diosajj maná tʼantʼwa jupanakar churäna. Egipto markat mistunipkäna uka isinakapas janiw merqʼeskänti (Deut. 8:3, 4). Yaqhep israelitanakajja, kunatï jupanakan utjkäna ukajj janis kunäkaspa ukhamwa amuyapjjäna, ukampis Moisesajj kunatï jakañatak wakiski ukanakajj jupanakan utjatapwa amtayäna. Jiwasatï kunanakatï utjkistu ukanakamp kusisit jakasiñ yateqañäni, mä arunjja kunanaktï Diosajj churkistu ukajj jiskʼäkchi ukhas valoranit uñjañäni, mä bendicionarjam uñjañäni, yuspärarakiñäni ukhajja, Jehová Diosajj wal kusisini.

12. Davidajj jupa pachpar confiyañat sipansa Jehová Diosaruw confiyäna, ¿kunjamatsa uk yattanjja?

¹² Jehová Diosajj jupar munasipki ukanakat wal llakisi, janirakiw jaytjkiti, Davidajj uk yatïnwa. Salmo 34 qellqkäna ukhajj jiwayatäñatak arknaqatäkchïnsa, Jehová Diosarojj wal confiyäna, ukatwa ‘Jehová Diosan angelapas’ jupar jarkʼaqañatakejj jakʼapankkaspa ukham amuyasïna (Sal. 34:7). Jehová Diosan angelapajj mä soldador uñtasitas enemigonakapat jarkʼaqañatak uñchʼukkaspa ukhamwa Davidajj amuypachäna. Davidajj jan ajjsartʼiri soldadönwa, Jehová Diosan arsutaparjamajj reyïñaparakïnwa, ukhamäkchïnsa janiw sum qʼorawtʼañ yatitaparusa, ni espadampi enemigonakapar jiwayañ yatitaparus confiyaskänti (1 Sam. 16:13; 24:12). Antisas Jehová Diosaru, kunjamsa Diosan angelapajj jupar ajjsaririnakar jarkʼaqe ukaruw confiyäna. Cheqas jichhürunakan janiw mä milagro toqe jarkʼaqatäñ suyktanti. Ukampis akwa yattanjja: Jehová Diosar confiyirinakajja, jiwapkanis wiñay jakañwa katoqapjjani.

13. Magog oraqenkiri Gog sasin uñtʼatäki ukajj jiwas contra saytʼkani ukhajja, ¿kunatsa jiwasajj fácil atipjañjamäksnas ukham amuyapjjani, ukampis kunatsa jiwasajj jan ajjsarkañäni? (Nayrïr paginankir dibujo uñjjattʼäta).

¹³ Akat mä jukʼampirojja, Jehová Diosajj jiwasar jarkʼaqañatak chʼamanïtapar confiyatasajj yantʼataw uñjasini. Magog oraqenkiri Gog sasin uñtʼatäki ukajj jiwas contra saytʼkani, mä arunjja mayachtʼat markanakajj jiwas contra saytʼapkani ukhajja, qʼal jiwarayistani sasin amuyañjamäniwa. Ukapachasti Jehová Diosaw salvistaspa, cheqas jupaw salvistani sasin confiyañasaw wakisini. Uka markanakatakejja, jan khiti jarkʼaqerini ovejanakäksnas ukhamäñäniwa (Ezeq. 38:10-12). Jiwasajj janiw armanakanïktanti, ni guerran nuwasiñatakis yatichatäktanti, ukatwa fácil atipjañjamäksnas ukham amuyapjjani. Jehová Diosan angelanakapajj jiwasar jarkʼaqañatakejj listokïpjjewa. Ukampis mayachtʼat markanakajja, Diosar jan confiyapjjatap laykojj janiw uk yatipkiti. Jiwasajj Jehová Diosar confiyatas laykuw uk yattanjja. Alajjpachankir ejercitonakajj jiwas lanti nuwasipkani ukhajja, jupanakajj wal musparapjjani (Apoc. 19:11, 14, 15).

14. ¿Kunsa jutïritak jichhatpach wakichtʼasiñatak lursna?

¹⁴ ¿Jutïritak wakichtʼasiñatakejj kunsa jichhatpach lursna? Janiw kunanakatï utjkistu ukas taqe kunat sipans jukʼamp importantëkaspa ukham amuyañasäkiti, mä urojj taqe ukanak jaytjjañaw wakisini. Kunatï jakañatak wakiski ukampis kusisitakïñasawa, Jehová Diosan amigopäsajj wali kusisitäñasarakiwa. Jehová Diosar jukʼamp sum uñtʼañäni ukhajja, Magog oraqenkiri Gog sasin uñtʼatäki ukajj jiwas contra saytʼkani ukhajj Diosaw jarkʼaqestani sasaw confiyañäni.

15. Jehová Diosajj yanaptʼapunitaniwa sasin confiyañatakejja, ¿Davidarojj kunjamanakan uñjasitapas yanaptʼäna?

¹⁵ Kunas yantʼanakar atipjañatakejj Davidar yanaptʼäna uk uñjañäni. Jupajj akham sänwa: “Jehová Diosajj kunja suma Diosasa uk yantʼapjjam, uñjapjjarakim, khititejj jupar imantaski ukajj kusisitawa” sasa (Sal. 34:8). Uka arunakajja, kunatsa Davidajj Jehová Diosan yanaptʼapar confiyäna ukwa uñachtʼayistu. Davidajj Jehová Diosaruw confiyäna, Diosasti juparojj yanaptʼapunïnwa. Waynitükasajj Goliat sat filisteo jachʼa jaqempiw nuwasïna, juparojj akham sänwa: “Jichhürpachaw Jehová Diosajj amparajar jumar katuyätam” sasa (1 Sam. 17:46). Uka qhepatjja, Davidajj Saúl reyiruw servïna, Saúl reyisti juparojj walja kutiw jiwayañ munäna, ukampis Jehová Diosaw Davidampïskäna (1 Sam. 18:12). Niyakejjay Jehová Diosan yanaptʼap nayrajj katoqchïnjja, jichhajj jan walinakan uñjaskä ukhajj yanaptʼaskakitaniwa sasaw confiyäna. Davidjam lurañarakiw yantʼanakan uñjaskañäni ukhajj yanaptʼistaspa.

16. ¿Kunjamanakatsa Jehová Diosan suma Diosätap yantʼsna?

¹⁶ Jehová Diosan yanaptʼap thaqapuniñäni ukhajja, jutïrins yanaptʼitaniwa sasaw jukʼamp confiyarakiñäni. Sañäni, asamblear sarañatak jefesar permiso mayiñatakejj Jehová Diosar confiyañaw wakisi. Taqpach tantachäwinakar sarañatakisa, jukʼamp predicañatakis inas jefesarojj horario cambiañapatak maychiñäni, ukatakejj Jehová Diosar confiyañaw wakisirakini. Jefesajj kuntï mayktan ukar janis istʼkistaspa, trabajos aptʼasjjaraksna ukham amuytʼañäni. Ukhaman uñjasisajja, Jehová Diosajj janipuniw jaytjkitaniti, kunatï jakañatak wakiski ukanaks churapunitaniwa ¿sasat confiytanjja? (Heb. 13:5). Precursorat serviri walja jilat kullakanakajja, yanaptʼa munapkäna ukhajj kunjamsa Jehová Diosajj yanaptʼapunïna ukanakat walja experiencianakwa cuenttʼapjjestaspa. Jehová Diosajj jan jaytjasiri Diosawa.

17. ¿Kawkïris 2022 maratak apstʼat textojja, ukat kunatsa wali wakiskiri?

¹⁷ Jehová Diosatï jiwasampïskchejja, janiw kunatï jutïrin paskani ukar ajjsarañasäkiti. Juparutï jakäwisan nayrar uchañäni ukhajja, janipuniw jaytjkistaniti. Kuna jan walinakantï jutïrin uñjaskañäni ukatak wakichtʼatäñatakisa, Jehová Diosajj janipuniw jaytjkistaniti sasin confiyañatakisa, Cuerpo Gobernantejj Salmo 34:10 textwa aka 2022 maratakejj ajlliwayi, ukan akham siwa: “Khitinakatï Jehová Diosar thaqapki ukanakarojj janiw kunatï sumäki ukajj faltkaniti” sasa.