¿Diosar uñtʼatasjja kunjamsa uñachtʼaysna?

1, 2. ¿Kunatsa Joacim reyin palacio lurañapajj jan wakiskäna?

ALTUSAN mä jachʼa utwa Joacim (Jehoiaquim) reyejj lurayaskäna, thayas thaytʼañapataki ukat lupis qhanantañapatakejj jachʼa ventananakan kunwa lurayaskäna. Ukajj mä palacioñapänwa, ukanwa reyisa ukat familiapas sum jakasipjjaspäna. Perqanaksti suma qʼapkir cedro maderampiw muyuntayañ munäna, ukatjja jaya markat apanit wila pinturampiw wali sum pintsuyañ munarakïna, ukjja walja qollqeninakakiw apnaqapjjerïna (Jer. 22:13, 14).

² Utanak lurañajj qollqetakïnwa. Ukampis janiw ukakïkänti, markar arjjatañatakiw walja qollq aptapjjatayna ukat walja qollqwa Egiptor impuestot churapjjarakïna, ukatwa jan qollqen uñjasipjjäna (2 Rey. 23:33-35). Ukampis kawkhantï jakañapäkäna uka ut lurayaskakiñatakejja, Joacim reyejj irnaqerinakapar jan pagañwa amtäna, esclavor uñtataw irnaqayäna, jupanakajj chʼamanakapampis yanaptʼapkaspa ukhamwa uñjäna.

 3. ¿Joacim reyimpi ukat awkipampejj kunans jan kipkakïpjjäna ukat kunatsa?

³ Joacim reyejj jupatakikiw taqe kuns munirïna, ukatwa Jehová Diosajj Jeremías profeta toqejj cheqañchäna.a Kunjamsa Josías awkipajj irnaqerinakar wal munasïna, pobrenakats sinttʼasïna ukat taripañatak apat uñjasipki ukanakarus arjjatäna ukwa amtayäna. Cheqansa, Josías reyejj kunjamsa jan waltʼayat uñjasipki ukanakarojj uñjirïna ukwa Jehová Diosajj Joacim chachar amtayäna, ukatwa akham säna: “Ukham lurañampiw nayar uñtʼaña satajja” sasa (Jeremías 22:15, 16 liytʼasiñapawa).

 4. ¿Kunatsa Jehová Diosar uñtʼañasajj wali aski?

⁴ Supayan apnaqat akapachajj ukhamarakiw jukʼamp jan walir saraski. Ukhamäkipansa, kunjamtï Jehová Diosajj Jupar uñtʼirinakar yanapki ukat jan walinakat jarkʼakqkejja ukham uñjatañ muntanjja. Ukatwa Diosar sapürutjam jukʼampi jakʼachasiñ muntanjja. Ukatsti, Diosan arunakap sum yatiyañatakejja Jupajj kunjam chuymanisa, ukwa yateqasiñasaraki. Ukatwa akham jisktʼasiñasa: “¿Kunjamatsa nayajj Josías reyjam Jehová Diosar sum uñtʼiristjja?” sasa.

5, 6. 1) ¿Kunjamsa mä wawajj awkipat yateqasispa? 2) Joacim chachan sarnaqäwipat yatjjatasajja, ¿kun lurañatakis chʼamachasiñasa?

⁵ Kunjamsa mä wawajj awkipjam sarnaqaspa uk amuytʼañäni. Pobrenakar wajjtʼir uñjasajja, wawajj ukham khuyapayasirïrakïspawa. Ukat kunjamsa chachajj esposapar munasiñampi ukat respetompi uñji uk uñjasasa, ukhamarakiw imill wawanakarus sum uñjaspa. Kunjamsa qollqsa sum apnaqe uk uñjasajja, wawajj ukhamarakiw taqe kuns cheqapar uñjani. Awkipajj kunjamäkiti uk yatisasa ukat kunsa luri ukanak uñjasasa jilskasajj jupat yateqasiñwa wawajj munarakini.

⁶ Mä cristianojj ukhamarakiwa, Josías reyjam Diosar uñtʼasajj janiw taqe kunjjar Munañanïtapak amuykiti: Biblia liytʼasajja, kunjamsa alajjpachankir Awkipajj yupaychirinakapar uñji uk sum amuyi ukat Jupat yateqasiñwa munaraki. Ukatjja, kunas Jupatakejj aski ukat kunsa uñisi uk amuyasajj sapürutjamwa Diosarojj jukʼamp munasi. Ukampis khititï cheqpach Diosan kamachinakapar jan istʼkiti ni ewjjanakaparus jan yäqkiti ukat janirak Jupats yateqaskiti ukajja, Diosarojj janiw uñtʼkiti. Joacim chachjamäpjjewa, jupajj ninaruw kuntï Jeremiasajj Diosan amuytʼayatäsin qellqkatayna ukjja phichhantäna (Jeremías 36:21-24 liytʼasiñapawa).

 7. ¿Kunatsa Jehová Diosarojj Josías reyjam uñtʼañasa?

⁷ Jehová Diosar sum yupaychañatakisa ukat mä suma Oraqen wiñay jakasiñatakisa Jupar sum uñtʼañaw wakisispa (Jer. 9:24). Ukatakejja, Diosajj kunjam chuymanisa ukanakat mä qhawqha yatjjatañäni, kunjamtï Jeremías qellqatan qhanañchaski ukhama. Amtapjjañäni, Josías reyejj Diosar uñtʼañataki ukat Jupat yateqasiñatakiw chʼamachasïna, jiwasajj ukhamarakwa yatjjatkasin chʼamachasiñasa.

 8. ¿Kunas suma chuymanïñajja?

⁸ Diosarojj suma chuymampi munasirïtapata jan ukajj jan jaytas munasirïtapat uñtʼtanjja. Ukampisa yaqhep arunakanjja uka pachpa amuytʼayañatakejja janiw arojj utjkiti. Uka arojja, hebreo arurjamajj taqe chuyma, jan jaytjaña ukat munasiña sañwa muni sasaw Biblia toqet parlir mä diccionariojj qhanañchi, uka kimspach arojj mayachtʼatawa. Uka pachpa qellqatajj akham saskakiwa: “Yaqha aruru uka kimspach amuyojj jan jaqokipaskaspa ukhajja, janiw qhanäkaspati” sasa. Suma chuymani mä jaqejja, janiw aleq munasirikïkiti, jan ukasti, jan kun mayisaw mayninakar yanaptʼañatak chʼamachasi, yamas Diosar yupaychañ toqet yanaptʼañatakejj jukʼampiw chʼamachasi. Jupajj Diosan munañaparjam sarnaqañwa muni.

 9. ¿Kunsa Jehová Diosajj Israel markapar uñjasajj uñachtʼayäna?

⁹ ‘Suma chuymampi munasiña’ sasin Biblian siski uka aru sum amuytʼañatakejja, kunjamsa Diosajj servirinakapar walja maranak uñjäna ukanak yatjjatañaw yanaptʼistaspa. Israelitanakajj pusi tunka maranak wasar pampan sarnaqapkäna ukhajja, Jehová Diosajj jan walinakat jarkʼaqäna ukat manqʼañs churarakïnwa. Ukat Suma Oraqenjja, uñisirinakapat qhespiyañatakisa ukat Jupar kuttʼapjjañapatakisa taripirinaka jan ukajj juesanak Diosajj uttʼayäna. Jehová Diosajj walja maranakaw jupanakamp chikaskäna ukat walinsa jan walins markaparojj sum uñjäna, ukatwa akham sasin säna: “Wiñay munasiñampiw nayajj munsma, ukatarakwa khuyapayasiñampi jichhakam uñjasksma” sasa (Jer. 31:3).

10. Babiloniankir judionakat amuytʼasajja, ¿kunjamsa Diosajj mayisitanak istʼasajj taqe chuyma munasirïtap uñachtʼayi?

¹⁰ Jichhürunjja, ukhamarakiw Jehová Diosajj taqe chuyma munasiñapamp servirinakapar uñjaski, ukatwa askinak katoqtanjja. Oración toqet amuytʼañäni. Taqe chuym mayisitanakjja Diosajj istʼiwa, ukampis jan jitheqtas Jupar yupaychapki ukanakarojj jukʼamp sumwa istʼi. Walja maranakasay pachpa jan waltʼäwinakas Diosar yatiykstanjja, jiwasatakejj wali paciencianiwa, mayisitanakas istʼañatakejj janiw qarjkaspati. Mä urojja, Babilonia markankir mä qhawqha judionakar mä yatiyäwi churaniñapatakiw Diosajj Jeremiasar khitatayna. Jerusalén markatjja 800 kilometronak jayankapjjänwa, Judá markankir familianakapatsa ukat amigonakapatsa jayarstʼatäpjjänwa. Wali jayankasipchïnsa, mayisitanakap Jehová Diosajj istʼänwa ukat Jupar yupaychapkäna ukanaksa wali askit uñjarakïna. Kunapachatï mayisitanakas istʼatap amuyastan ukhajja, ¿kunjamas jikjjatastanjja? Judionakajj kunja chuymachtʼatak Diosan arunakap istʼasajj jikjjatasipkäna. Diosan uka arunakapajja, Jeremías 29:10-12 qellqatanwa jikjjatasi (liytʼasiñapawa).

11, 12. 1) ¿Kunsa Jehová Diosajj Jerusalén markankir jaqenakatakejj amtäna? 2) ¿Kuna yanaptʼsa cheqañchäwi katoqerinakajj katoqapjjaspa?

¹¹ Kunjamsa Diosajj munasir chuymanïtap uñachtʼayäna uk uñjarakiñäni. Jerusalén markan tʼunjäwipajj jakʼachasinjjäna ukhajja, Jehová Diosar jan istʼasa, mä arunjja, Dios contra saytʼir markachirinakajja, ¿kunarus puripjjañapäna? Inas manqʼatjama jiwarapjjchispäna jan ukajj Babilonia markan soldadonakapan jiwarayat uñjasipjjchispäna. Jan ukasti, jaya markar apataw qhepat jiwarapjjaspäna. Ukampisa, khitinakatï arrepentisisa jan walinak jaytapjjäna ukanakatakejja, Jehová Diosajj ‘suma arunïnwa’ (NM). Ukat akham säna “wasitat” sum uñjapjjäma ukat ‘kuttʼayjjapjjäma’ sasaw Diosajj jupanakar säna, mä arunjja, Babilonia markat Judá Oraqer kuttʼjjapjjañapäna (Jer. 27:22). Ukatwa akham sapjjaspäna: “Taqe chʼamani Diosaru yuspagarapjjam, Tatitusti sumawa, munasiñapas wiñayatakirakiwa” sasa (Jer. 33:10, 11).

¹² Khitinakatï jaqen amuyuparjamajj jan waltʼäwin jikjjatasipki ukanakajja, Jehová Diosatwa chuymachtʼäwi katoqapjjaspa, Jupajj wali munasir chuymaniwa. Mä tiemponjja, yaqhepajj Diosan markapankapjjänwa, ukampis wakisitarjamaw cheqañchäwi katoqawayapjje. Inas jupanak pachpas juchañchasipjjchi ukat Diosan markapar kuttʼañs pächasipjjchi. Ukat inas akham jisktʼasipjjchispa: “¿Jehová Diosajj juchanak pampachitaspati ukat wasitat katoqjjetaspati?” sasa. Ukampis Taqe Chʼamani Jehová Diosajj jupanakatakejj ‘suma aruniwa’. Jupan yanapapampiw jan wali amuyunakapa ukat amtanakap armjjaspäna. Kuntï tunka mayani tʼaqan liytʼaniwayktan uka arunakajj jupanakatak wali askiwa. Diosajj kusisit markap taypir ‘kuttʼañwa’ jupanakar yanaptʼani (Jer. 31:18-20).

13. ¿Jehová Diosajj Jeremiasar yanaptʼkäna ukajj kunatsa jiwasar chʼamañchtʼistaspa?

¹³ Munasir chuyman Jehová Diosajja, jan jitheqtas yupaychirinakaparojj yanaptʼarakiwa. Supayan apnaqat aka jan wali qhepa urunakanjja, Diosan Apnaqäwip nayraqat thaqapki ukanakarojj uñjaskaniwa ukat jarkʼaqarakiniwa sasaw atinistanjja. Janipun armapjjañäniti, Jerusalén markajj qhepa urunakankjjäna ukhajja, Jeremías profetarojj Diosaw jan walinakat jarkʼaqäna ukat manqʼañs churarakïna, kuntï siskäna ukjja phoqapunïnwa (Jer. 15:15; Lamentaciones 3:55-57 liytʼasiñapawa). Jan pächasiñäniti, kunayman jan walinakar wiytatäkasasa, Diosatakjam taqe chuyma kuns lurktan ukjja Jupajj janiw armkiti. Munasir chuymanïtapatwa jan chhaqañasatak yanaptʼistani (Lam. 3:22).

14. ¿Kuna kasta ina chʼusat tʼaqhesiñanakas uñjasi?

¹⁴ Yaqhepajja, walja maranakaw carcelan ina chʼusat jistʼantat uñjasipjje. Yaqhepasti wali juchanïkaspas ukham jiwayat kunaw uñjasipjje, ukat qhepatakwa jan juchanïtapajj qhansti. Yaqhep markanakanjja, pistʼañanwa jakasipjje, ukatwa awk taykanakajj yaqhep wawanakapar esclavor uñtat aljapjje ukhamat familiapar manqʼañ churañataki. Taqe uka jan waltʼäwinak jan cheqaparjam uñjasitapatjja, ¿kunjamsa jumajj jikjjatasta? ¿Kunjamsa Jehová Diosajj jikjjataspacha? Taqe kasta tʼaqhesiñanakwa Jupajj chhaqtayañ muni sasaw Bibliajj qhanañchi, cheqas Diosakiw uk lurañatakejj chʼamani. Ukatwa pistʼañanakan jakapki, ina chʼusat tʼaqhesipki ukanakajj chʼamañchtʼat jikjjatasipjjaspa. Jupanakar jan walinakat qhespiyañatakiw cheqapar uñjir Jehová Diosajj amtaski (Jer. 23:5, 6).

15, 16. 1) ¿Kunsa Jeremiasajj Jehová Diosat qhanañchäna? 2) ¿Kunatsa Diosan leyinakaparu ukat arsutanakapar atinissna?

¹⁵ Jeremías profetan urunakapanjja, Jehová Diosan cheqapätapjja yaqhepajj sum amuyapjjäna. Amuytʼañataki, Israel markajj arrepentisipjjaspa ukat jan wali luräwinakapsa jaytjjapjjaspa ukhajj kunjamäspas ukwa Jeremías profetajj akham arunakamp säna: “Cheqaparu lurasa, askiru ukhamaraki qhanarusa [lurir Jehová Dios Awki]” sasa (Jer. 4:1, 2). Ukajj cheqawa, Diosajj janiw jan walinakan utjañap munkänti. Jupajj taqe kunsa cheqaparuw uñji, ukjja kunaymanitwa uñjtanjja.

¹⁶ Jehová Diosajj kuntï arski ukjja phoqapuniwa, janiw jaqenakjam kʼariskiti. Jupajj janiw kuns inamayak arskaspati. Ukat luratanakapjjar apnaqki uka leyinakapas jiwasan askisatakiwa ukat jan tʼunjkayarakiwa (Jer. 31:35, 36). Ukatsti, kuntï arskäna ukarusa, amtanaparus atinissnawa, ukanakajj askipuniwa (Lamentaciones 3:37, 38 liytʼasiñapawa).

17. 1) ¿Kunsa taripañatakejj Jehová Diosajj luri? 2) Taman jan waltʼäwinakap irpir chuymaninakajj uñjapki ukhajja, ¿kunatsa jupanakar atinisiñasa? (“Jehová Diosatakiw taripapjje” siski uka recuadro uñjjattʼäta, ukajj 198 janan jikjjatasi.)

¹⁷ Jehová Diosajj janiw aleq uñkatasaki kunsa cheqapar uñjkiti. Jan ukasti, kunatsa jaqejj ukanak luri ukat kuna amtampisa luri ukanak sum uñjaraki. Doctoranakat amuytʼañäni, mä jaqen chuymapajj kunjamäskisa ukat maymurupajj kunjamsa wil qʼomachaski ukanakjja maquinanakampiw uñjapjje. Ukampis Jehová Diosajj ukat sipans jukʼamp sum uñji. Chuymas manqhasan kunjamäsktansa, kuna amtanïtansa ukat kunjams jikjjatastan ukanakjja sumpun yatjjati. Ukhamasti, kunapachatï kuns lurtan ukhajja, kunas chuymasan utji ukat kuna amtampis lurtan ukjja sum yatistu. Ukhamatwa Jehová Diosajj taqe ukanak sum amuykiptʼasajj cheqaparjam apnaqaspa. Jaqenakat yaqhepajj wali amuytʼani taripirïpkchisa, taqe chʼamani Dios Awkisajj ukat sipans jukʼamp sum uñji (Jeremías 12:1a ukat 20:12 liytʼasiñapawa).

18, 19. ¿Kunatsa Diosan cheqakankañap uñtʼañajj wali aski?

¹⁸ Jan wali luratasatsa awisajj chuym usuyaschiñänejja, Jehová Diosar atinisiñasatakejj walja razonanakaw utjistu. Amtapjjapuniñäni, jaqenakajj kunjamatsa juchañchañwa thaqapjje, ukampis Jehová Diosajj janiw ukhamäkiti khuyaptʼayasir Taripiriwa, yanaptʼañwa munistu. Nayra jan wali luräwipatï maynir llakisiychi jan ukajj maynimp jan waltʼayaschïna ukhasa, ‘armjjañataki’, jan ukajj chuymapan kunatï utjki uk uñjañapatakiw Jehová Diosar yanaptʼa mayisiñapa, ukhamat jan mayampis amtjjañataki.b Diosan yanaptʼapampejja, kuna luräwtï Diosajj churkistu ukjja wali askit uñjañäni (Lamentaciones 3:58, 59 liytʼasiñapawa).

¹⁹ Niyakejjay Jehová Diosajj taqe kuns cheqaparjam uñjchejja, khitinakatï Jupatakjam sarnaqañ munapki uka jaqenakajj cheqapar sarnaqapjjaspa ukwa Diosajj munaraki (Jer. 7:5-7; 22:3). Kunapachatï, suma yatiyäwinaka taqenir mä khuskata yatiytan ukhaw Diosan cheqakankañap qhan uñachtʼaytanjja. Khitinakarutï yatiyktan ukanakar jan qarjtas kuttʼasa ukat Bibliat yatichasaw Diosan cheqakankañanïtap wali askirjam uñachtʼaytanjja. Taqenis Jupar uñtʼasin qhespipjjaspa, ukwa Diosajj muni (Lam. 3:25, 26). ¡Diosan yanaptʼiripjam irnaqañasa ukat jaqenakan qhespiyasipjjañapatak Diosan cheqapätap jichhürunakan uñachtʼayañasa, jiwasatakejj wali aski churäwiwa!

20. 1) ¿Kunjamsa Diosajj markapar uñji ukanakatjja kunsa Jeremiasajj qhanstayäna? 2) ¿Chuyma pisayasiñampi ukat Jehová Diosan perdonapampejj kikpakiti? (“¿Kunjamsa Jehová Diosajj ‘amtasi’?” siski uka recuadro uñjjattʼäta, ukajj 201 janan jikjjatasi.)

²⁰ Jeremías ukat Lamentaciones libronakajj taripañ arunikïkaspas ukham jaqenakajj uñjapjje. Ukampis ukham amuyasajja, kuntï Jehová Diosajj perdonañatak lurki ukjja armtʼasipjjewa. Amuytʼañataki, judionakarojj akham sasaw Diosajj säna: “Jan wali sarnaqäwinakamjja apanukupjjam, luräwinakamsa ukhamaraki sarnaqäwinakamsa askichasipjjarakim” sasa. Mä urojja, Jeremiasajj akham ewjjtʼarakïna: “Sarnaqäwinakamsa, luräwinakamsa askichasipjjam, jumanakan Tatitu Diosamaruraki istʼapjjam, ukatsti jupajj janiw kuna jachʼa tʼaqhesiñanaktejj arski ukanakjja apayanipkätamti” sasa (Jer. 18:11; 26:13). Jichhürunakanjja, khitinakatï taqe chuyma arrepentisipki ukat jan wali luräwinakapa jaytjjapjje ukanakarojj ukhamarakiw Jehová Diosajj juchanakap perdonaski.

21. ¿Kuna amtampis Jehová Diosajj maynir perdoni?

²¹ Jehová Diosajja, perdonañ toqet janiw inak parlkiti, jan ukasti ukarjamaw phoqe. Markapar akham sañapatakiw Jeremías profetar khitäna: “Nayatak saytʼasir Israel, kuttanjjam [...]. Janiw nayajj jumarojj colerata katoqkämati janirakiw wiñayatakisa coleratäkäti” sasa (Jer. 3:12). Khitinakarutï perdonki uka yupaychirinakapatakejja, Diosajj janiw chuym usuyaskiti ni tʼaqhesiyañs amtkarakiti. Jan walsa lurkchejja, Jehová Diosajj wali sumwa apasjjañ munaraki. Jan wal luratapat maynitï taqe chuyma arrepentischi ukat perdonayasiñ munarakchi ukhajja, Jehová Diosajj ‘katoqjjarakiniwa’, mä arunjja, sumwa uñj-jjani ukat bendicionapsa churarakiniwa (Jer. 15:19). Khitinakatï Diosat jitheqtirinakarojja, kuttʼanjjapjjañapatakiw uka arunakajj yanaptʼaspa. ¿Jehová Diosajj perdonkistu ukajj janit Jupar jukʼamp jakʼachasiñatak yanaptʼkistu? (Lamentaciones 5:21 liytʼasiñapawa.)

22, 23. Diosat perdonañ yateqasisajja, ¿kun lurañs amtañasa?

²² Kunapachatï maynejj luratanakampi jan ukajj arunakampi chuym usuchjistu ukhajja, Jehová Diosat yateqasiñasarakiwa. Khitinakatï perdonasipki ukanakarojj ‘qʼomachjjarakïwa’ sasaw Jehová Diosajj nayra judionakarojj säna (Jeremías 33:8 liytʼasiñapawa). Qʼomachkaspas ukhamjja, khitinakatï jan wali luräwinakapat arrepentisipki ukanakan juchapjja Jupajj armjjewa; janipuniw jan walinakapat amtjjeti. Maynejj Jehová Diosan perdonap jikjjatasajja, ¿janiw juchararäjjeti sañti munpacha? Janiwa. Ukhamasti, Diosajj jaqenakar qʼomachaniwa siski ukatjja, yateqäsnawa. Maynejj jan wal lurkistu ukjja perdonañasawa, ukham lurasajja kunatï chuymasan utjki uk qʼomachksnas ukhamäspawa. ¿Kunjamsa uk lursna?

²³ Maynejj mä suma munkañ nayra jarro churistaspa ukham amuytʼañäni. Ukat akatjamat qʼañuchtʼasispa ukhajja, ¿jankʼakit basurar jaqtsna? Janiwa. Kuna cheqatï qʼañuchtʼatäki ukjja, wali amuyumpiw jankʼak phiskursna, kunattejj suma qʼomäñapwa muntanjja. Ukhamarakwa, kawkir jilat kullakatï chuym ustʼaykistu ukatakejj jan chuymas ustʼat qheparañasatakiw chʼamachasiñasa. Kuna arunakasa jan ukajj kuna luräwis chuym ustʼaykistu uk janiw sapa kuti amtañasäkiti. Kunapachatï armjjañäni ukhajja, kuna jan waltï jilata kullakasajj lurkistu uk pampachasaw chuymas qʼomachtanjja. Ukatsti jan wali amtanaka chuymasat chhaqtayasajja, kunjamäkayätanti nayrajj ukham sum wasitat apasjjaraksna.

24, 25. ¿Kunjamtï Josías reyejj Jehová Diosar uñtʼkäna ukham uñtʼasajj kuna askinaksa katoqañäni?

²⁴ Jehová Diosar sum uñtʼkasajja, kunjam chuymanisa ukat ukampejj kunjamsa markapar uñji ukajj qhanaw amuyasi. Diosajj kunjam chuymanïkiti ukjja mä qhawqhakwa amuytʼawaytanjja, ukampis sapa mayni Jupar sum uñtʼasajja kunjamtï yupaychayasiñ munki ukham yupaychañatakiw yanaptʼistu. Jehová Diosajj kusisir chuymaniwa, jiwasatï Josías reyjam uñtʼañatak chʼamachasiñäni ukhajja, wali kusisitaw jikjjatasirakiñäni.

²⁵ Jehová Diosar sum uñtʼasajja, jaqe masisampejj sumwa apasiñäni. Jehová Diosat yateqasiñäni ukat munasiñ chuymanïñataki, cheqapar lurañataki ukat perdonasirïñataki chʼamachasiñäni ukhajja, tamasankir jilat kullakanakasampejj wali sumwa apasiñäni ukat jupanakarojj sumwa uñjarakiñäni. Ukatsti khitinakarutï Bibliat yatiyasin wasitat kuttʼktan uka jaqenakar Dios toqet yatichañatakisa ukat Bibliat yateqerinakasan nayrar sartapjjañapatak yanaptʼañatakis wakichtʼatarakiñäniwa. Cheqansa Diosan arunakap yateqañ munirinakajja, jiwasjam sarnaqañwa munapjjarakini, kunattejj Diosan arunakapat yateqatasarjamaw sarnaqañäni. Ukhamasti, Jehová Diosar yupaychapjjañapatak yaqhanakar yanaptʼañatakejj jukʼamp wakichtʼatäñäniwa, ukhamat ‘suma thakinjam’ sarapjjañapataki (Jer. 6:16).