Qaritanakarojj walja bendicionanak churani

 1. ¿Suma oraqenjja kuna bendicionanaksa jumajj katoqañ munta?

“MÄ SUMA oraqe.” Uka arunak istʼasajja, ¿kuna bendicionanakattï Bibliajj parlki ukanakat jankʼakit amuytanjja? Janiw kunats usuntjjañäniti, manqʼañas jilarkiriw utj-jjani, janiw jan waltʼayir uywanakasa utj-jjarakiniti, taqeniw suma utanïpjjarakini... Uka toqetjja Bibliampis qhanañcharaksnawa. Ukampisa, Diosar yupaychañ toqeta ukat kusisit jikjjatasiñ toqet bendicionatjja janirakiw armañasäkiti. Jan uka bendicionanakampejja taqe kunas inamayakïspawa.

2, 3. Jeremías libron qellqatäki ukarjamajja, ¿kuna bendicionanaksa katoqañäni?

² Judionakajj Babilonia markat kuttʼanjjapjjaniwa sasin Jehová Diosajj Jeremías toqe arskäna ukhajja, kunjamas markapajj jikjjatasini uks sarakïnwa: “Jumarojj wasitatwa saytʼayjjäma, wasitatarakwa chhulluchhullunakamampi, kʼuchiki thoqtʼasir jutäta” sasa (Jeremías 30:18, 19 ukat 31:4, 12-14 liytʼasiñapawa). Ukat akham chuymachtʼkir arunakampiw sarakïna: “Qarjata, jan chʼamani sarnaqasipki ukanakarusti manqʼañampi, umañampjja jilarkirwa churarakï” sasa (Jer. 31:25).

³ ¡Ukajj mä suma suytʼäwiwa! Qaritanakaru ukat jan chʼamaninakarojj nayaw askinak churä ukat yanaptʼarakï sasaw Jehová Diosajj säna. Jupajj kuntï arski ukjja phoqapuniwa. Jeremías qellqatan jikjjataski uka arunakajj Diosar atinisiñwa yanaptʼistu, kunatï jakañatak wakiski ukjja churistaniwa. Ukatjja, kunjamsa chʼam jikjjatsna ukat jan ayñachtʼksna uksa amuytʼayarakistuwa. Ukatsti, yaqhanakarojj kunjamsa chʼamañchsna uksa yaticharakistuwa, ukhamatwa, jan chʼamani ukat qarjatäpki ukanakar yanaptʼsna.

 4. ¿Kunatsa Jeremías profetajj jiwasjamarakïnwa sasin sissna?

⁴ Uka arunakajj Jeremiasar wal chʼamañchtʼäna, jiwasarojj ukhamarakiw chʼamañchtʼistaspa. ¿Kunjamatsa? Amtañäni, Jeremiasajj Elías profetjam amuyun ukat amtani ukhamänwa, mä arunjja, “jiwasjam jaqekirakïnwa”, ukwa nayrïr yatichäwin uñjaniwaytanjja (Sant. 5:17). Ukhamäkchïnsa, kunatsa awisajj chuymas aynachtʼata mä jukʼ llakita sarnaqäna, uk uñjañäni. Ukatjja, ukhaman uñjasisajj kunjamsa jikjjatasisäna, ukat kunatsa awisajj llakit jikjjatassna ukanak amuytʼarakiñäni (Rom. 15:4).

 5. ¿Jeremiasajj kunjaman jikjjatasisas chʼam thayjtayaspachäna?

⁵ Anatot markankir jaqenakaw Jeremiasar chʼam thayjtayappachäna, jupajj uka markanwa nasitayna, Jerusalén markat niya inti jalsu alay toqenwa uka markajj jikjjatasi. Ukanwa jupar uñtʼirinakasa ukat familiaranakapas jakapjjpachäna. Mä kutejj akham sasaw Jesusajj säna: “Mä profetajj janiw pachpa markapanjj yäqatäkiti” sasa, ukhamanwa Jeremiasajj jikjjatasïna (Juan 4:44). Marka masinakapajj janiw jupatakejj aleqak mayjtʼasipkänti ni respetapkänsa, jan ukasti ‘Anatot cheqan jakir jaqenakajj jiwayañatakiw’ thaqapjje sasaw Diosajj säna. Cheqansa akham arunakwa sapjjäna: “Jan Tatitun sutipjjaru jukʼampi parlkjjamti, ukhamatsti janiw jiwayapkämäti” sasa. ¡Ukhaman jikjjataskasin familiaranakapasa ukat marka masinakapas yanaptʼañat sipansa jiwayañatakiw amtapjjarakïna! (Jer. 1:1; 11:21).

 6. Irnaqer masinakasampi jan ukajj yaqha jaqenakamp jan waltʼayat uñjasiñäni ukhajja, ¿kunjamsa Jeremiasan experienciapajj yanaptʼistaspa?

⁶ Utas jakʼankirinakasasa, irnaqeri jan ukajj yateqer masinakasasa ukat familiaranakasas jan waltʼaychistu ukhajja, kunjamsa Jehová Diosajj Jeremiasar yanaptʼäna uk yatiñaw chuymachtʼistani. Anatot markan jakir jaqenakarojj Diosajj akham sänwa: “Jumanakampejja parlaskañäniwa” sasa (Jeremías 11:22, 23 liytʼasiñapawa). Kuntï Jehová Diosajj uka markatak amtkäna uka yatiñaw Jeremiasar llakimp jan aynachtʼañatak yanaptʼpachäna. “Parlaskañäniwa” sasin Diosajj siskäna uka arunakampejja, ‘Anatot cheqan utjir jaqenakatakejj jachʼa tʼaqhesiñ apayanï’ sañwa uka arunakampejj munäna, ukat ukjja phoqarakïnwa. Jehová Diosajj taqe kunwa uñji ukat wakisirjamäki ukhajj tiempoparuw luri, uk yatisaw chuymas chuyma jikjjatastanjja (Sal. 11:4; 66:7). Jiwasatï Biblian yatichäwinakaparjam sarnaqañäni ukat kunatï askïki uk lurapuniñänejja, jan waltʼaykistu ukanakat yaqheparojj jan waltʼäwit qhespipjjañapatak yanaptʼaraksnawa (1 Tim. 4:16).

7, 8. ¿Kunjamsa Jeremiasar tʼaqhesiyapjjäna, ukat ukajj kunjamtʼayänsa?

⁷ Janiw uta jakʼankirinakapak Jeremiasarojj jan waltʼayapkänti. Mä kutejja, Pasur (Pasjur)a sat wali uñtʼat sacerdotew Diosan profecía arunakap Jeremiasar parlir istʼäna. Ukatjja, “jupajj Jeremiasaru nuwjapjjañapataki[w] khitäna, cepo sata mä katuntañaru katuntapjjañapataki” (Jer. 20:1, 2). Amuyatajja, janiw mä kutik nuwantkänti, jan ukajj Pasur sacerdotejj 40 kutiw jawqʼjayäna sasaw yaqhepajj sapjje (Deu. 25:3). Wali usuchjatäkän ukhajja, walja jaqenakaw phiskasipjjäna, jan wali arunakamp toqepjjäna ukat thuskatapjjän kunawa. Ukatsti, uka sacerdotejj arum paqaraw Jeremiasarojj cepo ukar uchayäna. Amuyatajja, hebreo arurjamajj akham sañ muni, profetan cuerpopjja wal kʼumuptayapjjäna. Ukhamasti, lawat lurat mä cepo maderaruw munkir jan munkir Jeremiasarojj arum paqar tʼaqhesiñapatak uchapjjäna.

⁸ ¿Ukham jan waltʼäwinjja Jeremiasajj kunjamsa jikjjataspachäna? Akham sasaw Jehová Diosar säna: “Nayatjja kunapachas larusisipkakituwa” sasa (Jer. 20:3-7). Ukat janiw mayampis Jehová Diosan arunakap parljjäti sas kunaw amuyäna, ukampis janiw amtap phoqkänti. Ukatjja akham sarakïnwa “arunakamajj chuymajjanjja ninjamaw nakhantitu, chʼakhanakamppacha jawqʼjarakitu” sasa, ukat Diosan arunakap yatiyaskakïnwa (Jeremías 20:8, 9 liytʼasiñapawa).

 9. ¿Kunatsa Jeremiasan sarnaqäwipat yatjjatañajj jiwasatakejj wali aski?

⁹ Familiaranakasampi, uta jakʼan qamasir jaqenakampi, irnaqeri jan ukajj yateqer masinakampi jiskʼachat uñjasisasa, ukat Diosan arup yatiyatasata jañchi toqet chhojjriñchata uñjasisasa, uka qellqataw yanaptʼistaspa. Ukhamanakan uñjasisajj janiw aynachtʼañasäkiti. Jeremiasajj jiwasjam jucharar jaqerakïnwa ukat jan waltʼäwinakansa jikjjatasirakïnwa. ¿Jiwasajj jupjamarakïtanjjaya? Ukampis Diosan yanaptʼatajja, Jeremiasajj kusisitaw jikjjatasjjäna ukat Juparuw atinisjjarakïna. Jupajj janiw llakimp aynachtʼatapunejj sarnaqerïkänti, jiwasajj jupjamarakïñasawa (2 Cor. 4:16-18).

10. ¿Kunjamsa Bibliajj Jeremiasan jikjjatasitap qhanañchi?

¹⁰ Jeremiasajja, awisajj llakitaw jikjjatasïna ukat awisajj kusisitarakirïnwa, ukhamätapajj qhana amuykayänwa. ¿Jiwasajj llakita ukat kusisit jikjjatasirakirïtanti? Nayraqatjja, kusisitäñat amuytʼañäni, ukatakejj Jeremías 20:12, 13 qellqat uñjjattʼañäni (liytʼasiñapawa). Pasur chachajj tʼaqhesiyäna uka qhepatjja, Jeremiasajj wal kusisïna, kunjamtï Jehová Diosajj “llakitarojj ñanqha jaqenakan amparapatjja qhespiy[kejja]” ukham qhespiyataw amuyasïna. Kunapachatï Diosajj jan walinakat qhespiyistu ukat Jupar yupaychasajj askinak jikjjattan ukhajja, wali kusisitaw jikjjatastanjja, Diosarojj wal qʼochuñ munaraktanjja. Ukhaman jikjjatasiñajj wali askiwa (Hech. 16:25, 26).

11. Kusisitäkasin llakitak sapa kuti jikjjatassna ukhajja, ¿kunsa Jeremiasat amtañasa?

¹¹ Pantjasirïtasatjja, kusisitäkasas llakisitaw uñjassna. Jeremiasajj Jehová “Tatitur qʼochupjjam” siskäna uka qhepatjja, llakiw apjjattarakïna ukat inas jachaqtʼasirakchïna (Jeremías 20:14-16 liytʼasiñapawa). Wali llakit uñjasisajja, kunatakis naspachäta sasaw jupajj jisktʼasïna. Ukham llakin uñjasisajja, mä yoqall wawan nasitapat awkijaru yatiykäna ukajj maldecitäpan. Ukat kunjamtï Sodoma Gomorra markanakajj jikjjataskäna ukham jikjjatasirakpan sasaw profetajj säna. Ukat ¿ukhaman jikjjatasisajj llakimp aynachtʼatakit jikjjatasjjpachäna? ¿Uka llakir janipunit atipjkpachäna? Janiw llakimp aynachtʼkänti jan ukasti nayrar sartaskakïnwa. Ukjja jupa pachpaw amuytʼayistu. Mä kutejja, kuntï Jerusalén toqet arskäna ukajj phoqasipunpachaniti janicha uk Jeremiasar jisktʼañapatakiw Pasur sat yanapiripar Sedequías reyejj khitäna. Jeremiasajja, kunjamantï jikjjataskän ukhampachasa, jan ajjsartʼasaw Jehová Diosan taripäwi arunakap yatiyäna ukat kunjamas uka markajj qheparani uksa qhanañcharakïnwa (Jer. 21:1-7). Ukhamajja, profetjamajj irnaqaskakïnwa.

12, 13. ¿Kusisitäkasin akatjamat llakisirïstan ukhajj kun lurañasasa?

¹² Jehová Diosan servirinakapat yaqhepajja, kusisitäkasin akatjamatwa llakisit jikjjatasipjje. Ukhamanakan jikjjatasiñajja, pachpa cuerposan mayjtʼäwinakaparjamäspawa. Ukhaman jikjjatasisasti, mä medicompi uñjayasiñaw wali askïspa, jupaw kunampis qollassna uk amuytʼayistaspa (Luc. 5:31). Ukampisa, awisajj llakit uñjassna ukajja janiw sinti walïkisa ni sinti jan walïkisa. Juchararätas laykuw chuymasan jan wal jikjjatassna, sañäni: qarjat jikjjatasisa, mä munat familiarasan jan ukajj munat masisan jiwatapata, jan ukajj yaqha jan walinwa jikjjatassna. Ukhaman uñjasisajj Jeremiasat amtapjjapuniñäni, jupajj llakitäkasinsa kusisitäkasinsa Jehová Diosamp sum apasiskakïnwa. Kuntï sapüru lurkta uk mayjtʼayañamajj inas wakischispa, ukhamat samartʼañamataki jan ukajj llakim jukʼat jukʼat armañamataki. Ukhamäkchisa, kawkhantï Bibliat yatjjatktan uka tantachäwinakar jan qheparas sarañajj wali askiwa ukat Diosatak luräwinakasansa jan qheparasaw lurañasa, uka pä aski luräwinakawa kusisitakïskañataki ukat Diosat jan jitheqtas yupaychañatak yanaptʼistani (Mat. 5:3; Rom. 12:10-12).

¹³ Jiwasajj awisakisa jan ukajj sapa kutis llakit sarnaqstan ukhasa, Jeremiasan sarnaqäwipat yatjjatañajj jiwasatakejj mä chuymachtʼäwiwa. Kunjamtï uñjaniwayktanjja, Jeremiasajj llakita ukat aynachtʼataw sarnaqäna, ukhamäkchïnsa kawkïr Diosarutï munaskäna ukat taqe chuyma loqtkäna ukatjja janipuniw jitheqtkänti. Kunapachatï uñisirinakapajj jan wal lurapjjäna ukhajja, Jehová Diosaruw mayisïna ukat atinisirakïna (Jer. 18:19, 20, 23). Ukhamajja, Jeremiasat yateqasipjjapuniñäni (Lam. 3:55-57).

14. ¿Khitis Jeremiasar wal chʼamañchtʼäna?

¹⁴ Jeremiasajj kawkitsa chʼam jikjjatäna ukat jupajj kunjamsa ‘qarjata ukat jan chʼamaninakar’ yanaptʼäna uk yatjjatañajj wali askiwa (Jer. 31:25). Jeremiasajj Jehová Diosatwa yanaptʼa katoqäna. Jiwasarojj Diosan aka arunakap istʼañajj wal chʼamañchtʼistaspäna, Jupajj akham sänwa: “Nayaw jichhajj jumarojj saytʼaysma, mä suma jachʼa perqani markäkaspas ukhama, [...] jupanakajj walpun juma toqejj saytʼasipjjani, ukampis janiw atipjapkätamti. Nayaw jumampïskäjja jumar imañatakejja. Uksti naya [Jehová] Tatituw arsta” sasa (Jer. 1:18, 19). Ukatwa Jeremiasajj Jehová Diosar akham säna: “Tata, nayar chʼam churiri, nayar arjjatiri; jan waltʼañ horasajjansa nayar imirïtawa” sasa (Jer. 16:19).

15, 16. Kunjamtï Diosajj Jeremiasar yanaptʼkäna ukhamjja, ¿kunjam arunakampis mayninakar yanaptʼsna?

¹⁵ Jehová Diosajj akham sasaw Jeremiasar säna: “Nayaw jumampïskäjja” sasa, uk amtañajj wali askipuniwa. ¿Mä munat masisar kuna arunakamp chamañchtʼañas wakisispa, ukti uka arunakajj amuytʼayistu? Mä jilatasa jan ukajj mä kullakasa ukat familiaranakasas yanap munapjjatap aleq yatiñampiki ukat yanap churañampejj janiw kikpäkiti. Kunjamtï Jehová Diosajj Jeremiasar yanaptʼkäna ukham yanaptʼañaw wali askirakïspa. ¿Kunjams yanaptʼsna? Llakitäpki jupanakampiw chikachassna ukat wal parlañat sipansa chuymachtʼkir mä qhawqha suma arunakampiw yanaptʼsna, ukajj jupanakar wal yanaptʼaspa. Yaqhanakaru ukham suma arunakamp chʼamañchtʼañatakejja, janiw wali yatjjatatäñasäkiti mä qhawqha arunakamp sañajja, cristianjam jupar munasitasa ukat jupat llakisitasa uñachtʼayañatakiwa. Uka kasta arunakajj wali yanaptʼkiriwa (Proverbios 25:11 liytʼasiñapawa).

¹⁶ Jeremiasajj akham sasaw artʼasïna: “Tatay, [...] ¡nayat amtasita, ukatsti jutarakim nayar yanaptʼiri!” sasa ¿Uka mayitapajj phoqaspachänti? Profetajj akham siwa: “Kunapachatejj jumajj nayaru parljjayista ukapachajja, arunakamjja nayajj manqʼjamwa manqʼayäta; uka arunakamaw chuymajjarojj kusisiyarakïnjja” sasa (Jer. 15:15, 16). Ukhamarakiwa, khitirutï chuymachtʼañ munktan ukajja, jiwasamp yanaptʼatäña ukat munasiñamp uñjatäñ muni. Kuntï siskañäni ukajja janiw Jehová Diosan arupjamäkaniti, ukampisa niya ukham arunakampiw yanaptʼaraksna. Biblian arunakaparjam taqe chuyma parltʼatajja llakitan chuymapjja kusisiyarakiwa (Jeremías 17:7, 8 liytʼasiñapawa).

17. ¿Jeremiasajj Sedequiasaru ukat Johanán chachar uñjkäna ukatjja kunsa yateqsna?

¹⁷ Ukat ak amtañajj wali askirakiwa, Jeremiasajj Diosat yanap katoqasajja, yaqhanakarojj chʼamañchtʼarakïnwa. ¿Kunjamatsa? Mä kutejja, judionakajj caldeo jaqenakampi mayachtʼasipkäna ukaw Sedequías reyirojj ajjsarayäna, ukwa profetar yatiyäna. Jeremiasajj arunakapampiw chuymachtʼäna ukat Diosarutï istʼäta ukhajja, taqe kunas sumakïskaniwa sasaw säna (Jer. 38:19, 20). Qhepatjja, Jerusalén markajj tʼunjatäjjäna ukhajja, jiltʼapkäna uka judionakaruw soldadonak pʼeqtʼir Johanán chachajj Egipto markar apañ amtäna, ukampis Jeremiasaruw nayraqat jisktʼäna. Ukat profetasti istʼasinjja Diosaruw mayïna. Ukat mä qhawqha urunakatjja, Jehová Diosan chuymachtʼir arunakapwa yatiyäna, khitinakatï Diosan arunakap istʼasin uka markar qheparapkani jupanakjja jan walinakat jarkʼaqatäpjjaniwa sasa (Jer. 42:1-12). Kunjamtï uñjawayktanjja, Sedequiasarusa ukat Johanán chacharusa nayraqatjja sumwa profetajj istʼäna. Yaqhanakar yanaptʼañatakejja, istʼañajj wali askipuniwa. Kunatï llakisiyki ukat jan waltʼayki uk yatiykistani ukjja sumwa istʼañasa. Ukat parltʼañjamäkani ukhajja, chuymachtʼkir mä jukʼa arunakampikiw parltʼañasa. Llakimp aynachtʼatanakar chuymachtʼañatakejja, janiw Dios toqet visionanak uñjañ suyañasäkiti. Ukatakejja Biblian utjki uka chuymachtʼkir arunakampiw yanaptʼsna, jutïrin kuna suytʼäwis utjistu uka arunak inas amtaysna (Jer. 31:7-14).

18, 19. Ébed-mélec chachata ukat recabitanakat Bibliajj parlki ukajja, ¿kunjamsa yaqhanakar yanaptʼañatak yanaptʼistaspa?

¹⁸ Jeremiasan chuymachtʼir arunakapjja, janiw Sedequiasas ni Johanán chachas katoqasipkänti. Jichhürunakanjja, ukhamarakiw yaqhep jaqenakajj kuntï yatiyktan uk jan istʼapkistuti. Ukampis ukanak uñjasajj janiw qheparañasäkiti. Jeremiasajj yanaptʼkäna ukanakat yaqhepajj istʼapjjarakïnwa, jichhürunakanjja ukhamarakïspawa. Recabitanakat amuytʼañäni, jupanakajj walja maraw Judionakamp chikachasipjjäna, Canaán markatapjjänwa. Jehonadab awkipajj akham sasaw satayna, jumanakajj janiw vino umapjjätati sasa, kunattejja yaqha markatapjjänwa. Kunapachatï babiloniankir soldadonakajj Jerusalén mark muyuntapkäna ukhajja, Jeremiasajj templor manqʼañ utar vino umapjjañapatak recabitanakar jawsatayna, uk lurañapatakejj Diosaw satayna. Jupanakajj janiw israelitanakjam jan istʼasirïpkänti, kuntï nayra awkinakapajj siskäna ukarjamajj janiw vino umapkänti (Jer. 35:3-10). Ukham lurapjjatapatjja Jehová Diosajj kunja sumsa jupanakar uñjäna ukat jutïritakejj kuna amtapsa phoqani ukwa Jeremiasajj jupanakar yatiyäna (Jeremías 35:14, 17-19 liytʼasiñapawa). Yaqhanakar chʼamañchtʼañatakejja, jupat yateqasipjjañäni: wakisirjamäni ukhajja, luratanakapat taqe chuyma walik ukham lurtajja sapjjañäni.

¹⁹ Ébed-mélec chacharojj ukhamarakwa Jeremías profetajj uñjatayna, uka chachajj Etiopía markatänwa Sedequías reyiruw yanapäna. Kunapachatï reyin wawanakapajj ina chʼusatak Jeremiasar jachʼa manqha ñeqʼerar phuchʼur jiwañapatak jaqontapkäna ukhajja, Ébed-mélec chachaw Sedequías reyir parlir saräna ukatsti reyejj apsunmay sasaw sarakitayna. Uka yaqha markankir chachajj jan walin uñjasiñap yatkchïnsa, jan ajjsartʼasaw profetar jiwañat qhespiyäna (Jer. 38:7-13). Reyin wawanakapampi jan walit uñjayasitapatjja jutïrin kunjamänisa sasaw jupajj wal llakispachäna. Ukhaman Ébed–mélec chachajj jikjjataskäna ukhajja, Jeremiasajj janiw ukhamak uñchʼukkänti, jan ukasti Jehová Diosajj kunjamsa jutïrin bendecini uka arunakampiw chʼamañchtʼäna (Jer. 39:15-18).

20. Jilat kullakasajj wayna tawaqosipkpansa jan ukajj jilïrïsipkpansa, ¿kunsa jupanak laykojj lurañasa?

²⁰ Cheqansa Jeremías libro liytʼasaw kuntï apóstol Pablojj Tesalonikankir jilat kullakanakar ewjjtʼkäna ukarjam lursna, jupajj akham sasinwa säna: “Chʼamañchasipjjam maynit maynikama, [...] Tatit Jesucristosajj jumanakar bendispan” sasa (1 Tes. 5:11, 28).