‘Nayaw arunakaj-jja lakamar uchta’

1, 2. Biblian jikjjataski uka arunakarojja, ¿kunatsa atinistanjja?

“MÄ AMIGOW utji jilat sipansa jukʼamp suma.” (Pro. 18:24.) Uka qellqatarjamajja, ¿jumajj ukham amigonirakïtati? Cheqpach amigon arunakaparojj atinistanwa. Kuna aski luratanakatsa jan ukajj kun lurañs amtki uk yatiyistu ukhajj janiw pächasktanti. Ukat kuna toqenakats ewjjtʼistu uksa katoqtʼastanwa. Kunayman toqetwa yanaptʼañ munatap uñachtʼayawayistu, ukatwa awisajj ewjjtʼistu. Jupajj jiwasan askiswa muni, jiwasas jupan askip munaraktanwa ukat jupampis sum apasiskaksna uk muntanjja.

² Ukham suma amigonakampirakiw Diosajj Biblia qellqayatayna. Qellqawayapki uka arunakajj atiniskañawa ukats askisatakirakiwa, janipuniw pächasiñasäkiti. Nayra israelitanakajj ukhamwa uka qellqerinakar uñjapjjañapäna, uka qellqerinakajj “Diosar katuyata jaqenakäpjjänwa, Dios toqetarakwa parlapjjänjja, qollan ajayun amuytʼayata” (2 Ped. 1:20, 21). Profecianakani libronakatjja, Jeremías librow jukʼamp jachʼajja. Uka libro qellqañapatakejja Jeremiasaruw Jehová Diosajj ajllitayna, ukat juparakiw Lamentaciones sat libro ukat yaqha pä libronaksa qellqarakitayna.

3, 4. ¿Kunjamsa Jeremías ukat Lamentaciones sat libronakat yaqhepajj amuyapjje, ukat uka amuyunakapajj kunatsa jan walïki? Uk uñachtʼäwinakamp qhanañchtʼam.

³ Ukampis Jeremías ukat Lamentaciones libronakajj janis jupanakatakïkaspa ukham yaqhepajj amuyapjje. Sinti ajjsarkaña ukat llakiskañ profecianakataksa parlkaspa ukham amuyapjje. ¿Ukhamäpachati?

⁴ Cheqansa Jeremiasajj wali qhana ewjjtʼanakpunwa saskäna, ¿janit mä suma amigojj ukham ewjjtʼkarakistu? Jesusas ukhamarakiw apostolanakaparojj jan wali amtanïpjjäna ukhajj qhan ewjjtʼarakïna (Mar. 9:33-37). Jesusan arunakapajj yanaptʼkirïnwa, kunattejj kunjamsa Diosan katoqatäpjjaspa ukat kunjamatsa jutïrin kusisipjjaspa ukwa qhanañchäna (Mat. 5:3-10, 43-45). Jeremiasan qellqatapajj niya ukhamarakiwa, kunattejj Diosan amuytʼayat ‘taqe Qellqata’ utjki ukanwa jikjjatasi ukat ‘cheqañchañatakisa’ wali askirakiwa (2 Tim. 3:16). Maysa toqetjja, khitinakatï Diosaruw yupaychapjjta sapki, ukampis jan wali luratanakapat kuna jan walinsa Dios nayraqatan uñjasipjjañapäna uksa qhanañcharakiwa, ukat maysa toqetjja mä suma suytʼäwi churarakistu ukat kunjamas jutïrin kusisita jakassna uksa qhanañcharakiwa. Jeremías ukat Lamentaciones libronakan profecianakapajja, kunjamsa Diosajj markapar uñjañapäna uk qhanañchi, jiwasaw uk phoqasir jichhürunakan uñjasktanjja, janiw ukakïkiti uka qellqatanakan suma yatiyäwinakajj utjaskakiwa ukaw wal chʼamañchtʼistu (Jeremías 31:13, 33; 33:10, 11 ukat Lamentaciones 3:22, 23 liytʼasiñapawa).

 5. Jeremiasan qellqatanakapat askinak apsuñatakejja, ¿kun lurañas wakisi?

⁵ Diosan markapan kusisita jakasktan ukasa ukat jutïritak kuna suma suytʼäwinïktanti ukasa, Jeremiasan qellqataparjamarakiwa. Uka qellqatanakajja, kunjamsa jilat kullakanakasamp sum apassna ukat kunjamsa apóstol Pablon ewjjtʼanakaparjam luraraksna ukatakiw yanaptʼistu, jupajj akham sänwa: “Jilatanaka, kusisitäpjjapunim. Jakañanakamansti cheqapapunïpjjam, chuymachasipjjarakim, sumanaraki jumanakkamajj jakapjjam. Samarañ churir munasir Diosaw jumanakampïskanejja” sasa (2 Cor. 13:11). Kuntï Jeremiasajj qellqkatayna ukhamarakwa jiwasajj Diosan arunakapat yatiytanjja: cheqas aka qhepa urunakatsa ukat akapachan tukusiñapatsa jaqenakar yatiykstanjja, janiw llakkañ arunakatpun yatiyktanti, kunattejj mä suma suytʼäwitwa yatiyaraktanjja. Ukatjja Jeremiasan yatiyatapasa, jakäwipasa jiwasan sarnaqäwisampejj niya kipkarakiwa, ukatwa qellqatanakapajj jiwasatak wali askejja. Ukanak sum amuytʼañatakejja, Jeremiasan jakäwipajj kunjamänsa ukat kuna luräwsa Diosajj churäna uk sum yatjjatañäni, uka profetarojj Diosajj akham sänwa: “Nayaw arunakajj-jja lakamaru uchta” sasa (Jer. 1:10).

6, 7. ¿Kunatsa Diosajj Jeremiasan nasiñap wal suyäna sasajj sissna, ukat kunjam tiemponsa nasïna?

⁶ Mä chacha warmejj wawapan nasiñapjja wali kusisitaw suyapjje ukat uka toqet wal lupʼipjjaraki. ¿Kunjamänisa ukat kuns jakäwipanjj lurani? ¿Kunanaks munani, kuns yateqani ukat kuna askinaks jikjjatani? Janïr jumajj naskayäta ukhajj inas awk taykamajj ukham lupʼipjjarakchïna, ukhamarakiw Jeremiasan awk taykapajj lupʼipjjarakpachäna. Ukampis jakäwipajj mayjäñapänwa. ¿Kunatsa? Kunattejj taqe kun Lurir Jehová Diosaw mä aski luräwi churañapäna (Jeremías 1:5 liytʼasiñapawa).

⁷ Jeremiasajj sacerdote familiat nasiñapäna, jupanakajj Jerusalén marka alay toqen jakapjjäna uka familia taypit Jeremiasajj profetäñataki nasiñapajj wali askïnwa, uk Jehová Diosajj sum yatïna, kunattejj Diosajj jutïr urunakatjja sumwa yati. Jeremiasajj jan wali tiemponwa nasïna kunattejj Manasés qhoru reyiw Judá mark apnaqaskäna (23 jana uñjjattʼäta). Manasés reyejj 55 maranak apnaqäwipanjja jilapartejj Jehová Diosan nayraqatapan jan walinakpunwa luräna, ukat Amón sat yoqapasa uka kipkarakiw jan walinak lurarakïna (2 Rey. 21:1-9, 19-26). Ukampis uka qhepat Josiasajj apnaqjjäna ukhajja taqe ukanakajj mayjtʼjjänwa. Jupajj Jehová Diosan yanaptʼap thaqhäna ukat 18 maranak apnaqäwipanjja idolonakar yupaychañäki ukanak qʼal tukjäna. Ukajj Jeremiasan awk taykaparojj wal kusisiypachäna, uka tiemponarakwa Jehová Diosajj Jeremiasar profetjam uttʼayäna (2 Cró. 34:3-8).

 8. ¿Kuna luräwsa Jeremiasajj katoqäna ukat kamsänsa?

⁸ “Markanakan profetapäñamatakiw jumarojj” uttʼaysma sasin Jeremiasar Jehová Diosajj siskäna ukhajj qhawqha maranïpachänsa Jeremiasajj uk janiw yatktanti. Inas 25 maranïchïna, kunattejj 25 maraninakaw sacerdotjam irnaqañ qalltapjjerïna (Núm. 8:24). Ukhamäkchïnsa, Jeremiasajj akham sänwa: “¡Ay, Tata! ¡Nayajj wawäsktwa, janiw parlañsa yatkti!” sasa (Jer. 1:6). ¿Kunatsa Jeremiasajj ukham sispachäna? Uka wakiskir luräwi phoqañatakisa ukat jaqenak nayraqatan parlañatakisa inas wawäskatap amuyasisin ukham sischïna, kunattejj mä profetajj ukanakwa lurañapäna.

9, 10. ¿Kunjam urunakansa Jeremiasajj profetjam irnaqañ qalltäna, ukat kunatsa uk phoqañajj wali chʼamäna?

⁹ Kunapachatï Josías reyejj kʼari yupaychäwinak tukjkäna ukat cheqa yupaychäw qʼomachaykäna ukhaw Jeremiasajj uka aski luräwi katoqäna. Kunjamjjay irnaqapjjchïna ukjja janiw yatktanti, ukampis uka tiemponakan profetjam irnaqañajj janiw chʼamäkpachänti. Josiasajj apnaqañ qalltkäna uka tiemponakanjja Sofonías ukat Nahúm jupanakaw profetjam Judá markan irnaqapjjarakïna.a Josiasajj apnaqkäna ukharakiw Hulda sat warmejj profetisjam irnaqarakïna. Jupasti jan wali tiemponakaw utjani sasaw säna, ukat Jeremiasajj uk uñjawayänwa (2 Rey. 22:14). Ukatsti, Ébed-mélec ukat Baruc sat amigonakapaw uñisirinakapatsa ukat jiwañatsa Jeremiasar awisajj qhespiyapjjarakïna.

¹⁰ Juchañchañ arunak markanakar yatiyaniñamatakiw mä profetjam ajllissma sasin Diosajj siristam ukhajja, ¿kunjamakis jikjjatasisma? (Jeremías 1:10 liytʼasiñapawa.) Mä kutejja, Jehová Diosan arunakap qhanañchañaw Jeremiasarojj waktʼäna. Babilonia markankir ejercitopaw 609 maran Jerusalén marka tʼunjañatak sarasipkäna. Diosan suma yatiyäwinakapwa, Sedequías reyejj Jeremiasat istʼañ munäna, ukampis jupatakejj jan wali yatiyäwinakakiw utjäna (Jeremías 21:4-7, 10 liytʼasiñapawa).

11. ¿Kuntï Jeremiasajj lurañapäkäna ukajj kunatsa chʼamäpachäna, ukat kunjamsa Diosajj chʼamañcharakïna?

¹¹ Jan sinttʼasiri qhoru sacerdotenakaru, kʼari profetanakaru ukat ñanqha amtani apnaqerinakar juchañchir sarañ waktʼistaspa ukhajja, ¿kunjamakis jikjjatassna? Uk lurañaw Jeremiasarojj waktʼäna. Ukampis janiw sapakïkänti Diosaw yanaptʼäna, jiwasarus Diosaw yanaptʼarakistu (Jer. 1:7-10). Ukampis jan ajjsarañapatakejj akham sasaw Jehová Diosajj chʼamañchtʼäna: “Nayaw jichhajj jumarojj saytʼaysma, mä suma jachʼa perqani markäkaspas ukhama, mä hierrot sayir pirqäkasmas ukhama, broncet lurat pirqäkasmas ukhama, taqe Judá oraqempi katuntasiñamataki: reyinakapampi, jilïrinakapampi, sacerdotenakapampi, ukhamaraki taqe jaqenakampisa. Jupanakajj walpun juma toqejj saytʼasipjjani, ukampis janiw atipjapkätamti. Nayaw jumampïskäjja jumar imañatakejja. Uksti naya [Jehová] Tatituw arsta” sasa (Jer. 1:18, 19).

12. ¿Kunatsa Jeremiasajj jiwasjam jaqekirakïnwa sasajj sissna?

¹² Jeremías profetajj jiwasjam jaqekïnwa janiw jiwasat jukʼampïkänti. Khä nayrapachans jakkchïnjja, jiwasjamarakiw jan waltʼäwinakan uñjasirakïna. Kunayman jaqenak taypin jakasïna ukat irnaqarakïna, kunjamtï jiwasajj irnaqäwinsa yaqha jaqenakampi chikachastan ukat tamasan kuna luräwinakatakis jilat kullakanakamp chikachastan ukhama. Ukhamajja, Jeremiasat wali askinakwa yateqassna, kunattejj jupajj Elías profetjama “jiwasjam jaqekirakïnwa” (Sant. 5:17). Jichhajj mä qhawqhanak yatjjatañäni.

13, 14. Pasur sacerdotejj kunjamsa Jeremiasar tʼaqhesiyäna ukajj 12 janan uñjasi, uka toqet amuytʼañajja, ¿kunatsa yaqhep cristianonakatakejj jan chʼamäki?

¹³ Taqeniw kunayman jan waltʼäwinakan uñjastanjja, Jeremiasajj ukhamarakiw uñjasïna. Mä kutejj Pasur (Pasjur) sat munañan sacerdotew jan walinak lurasinjja cepor uskuyatayna. Cepo siski ukajja maderat luratänwa, ukaruw maynin kayunakapsa, amparanakapsa ukat kunkapsa achuntayapjjerïna, ukanwa wal tʼaqhesiyapjjerïna. Jeremiasajj walja horanakaw uka cepon tʼaqhesïna ukat uñisirinakapas wal jupat larusipjjäna, jiskʼachapjjarakïna. ¿Jiwasar ñanqha arunakampi jiskʼachjapjjestaspa jan ukajj jañchi toqet tʼaqhesiyistaspa ukhajj aguantsnati? (Jer. 20:1-4.)

¹⁴ Taqe uka jan walinakan uñjasisaw Jeremiasajj akham sispachäna: “¡Maldecitäpan kunürutejj naskta uka urojja! [...] ¿Kunataraki nayasti taykajjan purakapata mistpachätsti, tʼaqhesiñanaka, llakisiñanaka uñjañatakisti, ukhamaraki jakañajjasa mä pʼinqa tukuyatäñapataki?” sasa (Jer. 20:14-18). Jupajj aynachtʼata jan kamachtʼirjamaw jikjjataspachäna. Jiwasajj inas Jeremiasjam awisajj jikjjatasirïstan, janiw kunatak askïktsa, luratanakajajj inamayakiwa, janjamakiw nayrar sartañajajj wakisjjaspati sasin inas amuyasirïstan. Ukhamajja, kunjamas Jeremiasajj jikjjatasïna ukat kun lurasas askinak jikjjatäna ukanak sum yatjjatañaw khitinakatï Jeremiasjam jikjjatasipki ukanakarojj yanaptʼani.

15. ¿Jeremiasajj kusisitäkasajj mä akatjamatwa llakita uñjasïna, uk yatiñajj kunjamsa yanaptʼistu?

¹⁵ Jehová Diosar qʼochuñata ukat jachʼañchañat parlañ tukuykasinwa Jeremías 20:14-18 jiskʼa tʼaqanak qellqatayna, ukanjja Jeremiasajj aynachtʼat jikjjatasitapatwa qellqatayna (Jeremías 20:12, 13 liytʼasiñapawa). ¿Jiwasajj mä akatjamat mayjtʼirïtanti? ¿Kusisitäkasin mä akatjamat llakitakit jikjjatasirïtanti? Cheqansa, taqeniw Jeremiasan sarnaqäwipat yatjjatasajj askinak apssna. Jupajj jiwasjam jaqerakïnwa, ukhamajja Jeremiasajj kuns luräna kunjamas jikjjatasïna uk yatjjatañajj wal yanaptʼistani kunattejj Jehová Diosaw arunakap yatiyañatakejj jupar ajllïna (2 Cró. 36:12, 21, 22; Esd. 1:1).

16. ¿Jeremiasan solterjam qheparatapajj khitinakarus amuytʼasiñ yanaptʼi?

¹⁶ Yaqhep soltero jilat kullakanakajj Jeremiasan sarnaqäwipatwa yateqasipjjaraki, ¿kunatsa ukham sistanjja? Kunattejj Jehová Diosajj jan casarasimti sasaw Jeremiasar satayna, uk istʼañajj jupatakejj inas chʼamächïna (Jeremías 16:2 liytʼasiñapawa). ¿Kunatsa Jehová Diosajj jan casarasimti sasajj sispachäna, ukat uka arunakar istʼañajj kunatsa askïnjja? Solterüsipki uka jilat kullakanakat inas yaqhepanakajj sapak qheparañ amtawayapjjchi jan ukajj inas jan ukhamäkarakchiti, ukampis ¿kuntï Diosajj Jeremiasar siskäna uka arunakat kunsa yateqasipjjaspa? Wawanïpki jan ukajj jan wawanïpki uka matrimonionakasa, ¿kunjams uka arunakarjamajj amuytʼasipjjaspa? ¿Kunjamsa Jeremiasan sarnaqäwipajj sapa maynir yanaptʼistaspa?

17. ¿Jeremías 38:20 jiskʼa tʼaqan qellqatäki uka arunakajj kuna toqet amuytʼasiñatakis yanaptʼistu?

¹⁷ Kuntï Jeremiasajj Judá marka apnaqerir ewjjtʼkäna uk qhanañchtʼañajj wali askiwa, jupajj akham sänwa: “Jachʼa rey, jumajj jaysam Tatitun arunakaparu kuntejj nayajj jumaru yatiyksma uka arunakaru, ukapachasti taqe kunas walikïskakiniwa, janiw jiwayatäkarakïtasa” sasa (Jer. 38:20). Kunjamsa mayninakar uñjañasa uk amuytʼasiñasatakiw uka arunakajj yanaptʼistu. Ukatjja, khitinakatejj Jehová Diosan kamachinakaparjam jan sarnaqapki ukampis inas yanaptʼañjamäskchi ukanakar parltʼañatakis yanaptʼarakistuwa. Kunjam chuymampis Jeremiasajj Diosar istʼapki ukanakar uñjäna ukajj yateqaskañjamarakiwa. Ukhamajja, uka profetan sarnaqäwipat wali askinakwa yateqassna.

18, 19. ¿Kunjamanakatsa Jeremías ukat Lamentaciones libronakat sum yatjjatsna?

¹⁸ Kunanakatsa Jeremías ukat Lamentaciones libronakajj parli, ukat kunjamsa yateqassna ukanak sum yatjjatañatakiw aka librojj yanaptʼistani. ¿Kunjamsa? Diosan amuytʼayatäsaw apóstol Pablojj akham qellqatayna: “Taqe Qellqatasti Diosan amuytʼayatawa, askirakiw yatichañataki, cheqachañataki, ukhamarak qʼoma jakañan sarnaqañ yatichañatakisa” sasa (2 Tim. 3:16). Ukhamajj Jeremías ukat Lamentaciones libronakajj ‘Taqe Qellqata’ siski uka taypinkarakiwa.

¹⁹ Uka pä libronakat aski yatichäwinak jikjjatañatakejj kunayman toqenakatwa yatjjatsna. Mayajj akäspawa, sapa tʼaqa liytʼasa, ukat uka tʼaqajj kun sañs muni, kuna aski yatichäwinakanisa uk sum amuytʼasa. Ukat yaqhasti akarakïspawa, Jeremías ukat Lamentaciones libronakan parlki uka sarnaqäwinakajj kunjamas jichhürunakan niya ukar uñtasit sarnaqäwejj utjaraki jan ukajj ukar uñtasitajj kunanakas pasaski ukanakat sum amuytʼañatakiw chʼamachasiraksna (Jeremías 24:6, 7 ukat 1 Corintios 3:6 uñjjattʼarakismawa). Ukatsti Jeremiasan urunakapanjja kunanakas pasatayna ukanakatwa yatjjataraksna (Jer. 39:1-9). Cheqansa ukanakat jukʼamppach yatjjatañajj sum amuytʼañatakiw yanaptʼistani. Ukhamajja aka libron payïr yatichäwipan “Mä profetajj ‘qhepa urunakanwa’ Jehová Diosar servïna” siski ukajja, kunjam urunakansa Jeremiasajj jakasïna ukat kunanakatï pasañapäkäna uk kunjams Diosajj phoqasiyäna, ukanakatwa sum qhanañchtʼistani.

20. ¿Kunjamsa Jeremías ukat Lamentaciones libronakarojj uñjaskañäni?

²⁰ Aka libron yatichäwipajj yaqha toqetwa sum amuytʼayistani. Jeremías ukat Lamentaciones libronakajj cristiano jakäwisatakejj Diosan mä suma churäwipjamwa uñjaskañäni (Tito 2:12). Uka qellqatanakan jikjjataski ukajj ‘yatichañatak askïtapwa’ jukʼamppach amuytʼayistani. Ewjjanakapasa ukat yateqaskañjam suma sarnaqäwinakasa, jakäwisan jan waltʼäwin uñjasisajj kunjamsa saykatsna ukatakiw yanaptʼistani. Tama irpir jilatanakatakisa, precursoranakatakisa, solteronakatakisa, casadonakatakisa, familiapatak irnaqer jilatanakatakisa, familiap uñjir kullakanakatakisa ukat yateqañ utar saririnakatakisa wali askipunïniwa. Cheqasa taqeniw Diosan amuytʼayat uka pä libronakat suma yatichäwinak yatjjatañäni, ukhamatwa suma luräwinak lurañatakejj ‘suma wakichtʼatäñäni’ (2 Tim. 3:17).

21. ¿Kunatsa jutir yatichäwit yatjjatañ wal muntanjja?

²¹ Aka libron sapa yatichäwipat yatjjatkasajja, kuna aski yatichäwinakas jiwasatak utji ukwa jikjjatañasa. Jeremías ukat Lamentaciones libronakajj apóstol Pablon aka arunakap qhan uñachtʼayi, jupajj akham sänwa: “Taqe kunatejj nayratpach Qellqatan uchatäkän ukanakajj jiwasanakaruw yatichistu, llampʼu chuyma toqe suytʼañasataki, ukanrakwa mä samarañsa jikjjattanjja” sasa (Rom. 15:4).