Milagro lurasaw waljanir manqʼayäna

Jesusan 12 apostolonakapajj Galileypach yatiyasajj wali kusisitaw kuttʼanipjjäna. “Kunanaktï lurapkäna, yatichapkarakïna, taqe ukanakwa” Jesusar yatiyapjjäna. Jupanakajj wali qaritäpjjpachänwa. Walja jaqenakaw jut sarapjjäna, janirakiw manqtʼasiñatakis tiempojj utjkänti. Ukatwa Jesusajj säna: “Jutapjjam, yaqha cheqar sarañäni, mä chʼusa lugararu, ukhamat mä jukʼa samartʼañataki” sasa (Marcos 6:30, 31).

Jupanakajj Capernaúm jakʼankapjjpachänwa, mä boter sarjjatasaw Jordán Jawirat inti jalsu toqer sarapjjäna, Betsaidat khuriruw sarapjjäna. Waljaniw sarir uñjapjjäna, yatiykipasipjjarakïnwa. Ukatwa waña oraqnam sarapjjäna, botetsa nayraw puripjjäna.

Jesusajj botet mistjjäna ukhajja, walja jaqenakar uñjasajj walpun sinttʼasïna, “jan awatirini ovejanakar uñtasitäpjjatap layku”. Ukatwa Diosan Reinopat “kunayman toqenakat” yatichañ qalltäna (Marcos 6:34). “Usutanakarus qollarakïnwa” (Lucas 9:11). Jaypʼöjjäna ukhajja, discipulonakajj Jesusar akham sapjjänwa: “Janiw kunas aka cheqan utjkiti, niya arumäjjarakiwa. Aka jaqenakar khitanukjjam, ukhamat aka jakʼan utjki uka jiskʼa markanakat manqʼa alasinipjjañapataki” sasa (Mateo 14:15).

Jesusasti sänwa: “Janiw sarapjjañapajj wakiskiti. Jumanak antisas manqʼa churapjjam” sasa (Mateo 14:16). Jesusajj kunsa lurani uk yatkchïnsa, Feliper yantʼañatakejj akham sänwa: “¿Kawkitsa aka jaqenakar manqʼayañatakejj tʼantʼa alaniñäni?” sasa. Felipejj uka jakʼankir Betsaida markatänwa, ukatwa jupar ukham jisktʼpachäna. Ukampis tʼantʼajj janiw alcanzkaspänti, 5.000 chachanakaw ukankapjjäna, warminakamppacha wawanakamppachajj niya mä 10.000 ukhanïpjjpachänwa. Ukatwa Felipejj Jesusar akham säna: “Pä patak denario qollqemp tʼantʼa alansna ukhasa, sapa maynir mä jiskʼakam churañatakis pisïspawa” sasa (Juan 6:5-7). Mä uru jurnäl trabajitatwa mä denario pagapjjerïna.

Andresajj janiw taqenir manqʼayksnati sasaw amuypachäna, ukatwa akham sispachäna: “Phesqa cebada tʼantʼampi pä jiskʼa chawllampi aptʼasit mä waynituw akankaski, ukampis ¿kunjamarak ukhataq jaqenakatak ukajj alcanzaspasti?” sasa (Juan 6:9).

Pascua amtañ urojj 32 maran jakʼachasinjjänwa, ukhamajj marzo jan ukajj abril uka phajjsinakäjjpachänwa, qollunakas suma chʼojjñänwa. Ukapachaw Jesusajj jaqenakar tam tama pastor qonurayapjjam sasin discipulonakapar säna, sapa tamanjja 50 jan ukajj 100 jaqenakaw utjäna. Jesusajj phesqa tʼantʼampi pä chawllamp aptasajj Diosaruw yuspäräna. Tʼantʼanak chawllanak pachjasasti discipulonakaruw lakiranipjjañapatak churäna. Taqeniw sistʼasiñkam manqtʼasipjjäna, ukajj wali musparkañäpachänwa.

Qhepatjja Jesusajj discipulonakapar akham sänwa: “Jiltʼanak apthapipjjam, ukhamat jan kunas ina chʼusar wartasiñapataki” sasa (Juan 6:12). ¡Jiltʼanakjja 12 canastanakaruw apthapipjjäna!