Jesusajj “nayar arkita” sasajj ¿kamsañsa munaskäna?

1, 2. ¿Kuna suma invitacionas jaqenakatakejj utji, ukat kamsasas sapa maynejj jisktʼasiñasa?

¿JUMAJJ mä invitación katoqerïtati? Inas mä munat familiaramasa jan ukajj munat amigomas casaraschi, jan ukajj inas jumarojj mä importante trabajotak invittʼapjjstam. Ukham invitacionanak katoqasajj jachʼañchata ukat wali kusisitapuniw jikjjatasirïpachätajja. Ukampis uka invitacionanakat sipansa, taqeniw mä suma invitación katoqtanjja. Uka invitacionar jaysañajj wali importantepuniwa.

² ¿Kuna invitacionatsa parlasktanjja? Kuntï Taqe Chʼamani Diosan Jesús Yoqapajj arsuwayki uka toqetwa parlasktanjja, jupan arunakapajj Biblian qellqatawa. Marcos 10:21 textorjamajja, Jesusajj akham sänwa: “Jutam, nayar arkita” sasa. Uka invitacionajj taqe jaqenakatakiwa, ukatwa “¿jupan invitacionap nayajj katoqasïti?” sasin jisktʼasiñasa. Jesusan invitacionaparojj taqe jaqenakas iyawsapjjañapäkchejja, walja jaqenakajj janiw uka invitación katoqasiñ munapkiti. ¿Kunatsa ukham sistanjja?

3, 4. 1) “¿Wiñay jakañ katoqañatakejj kun lurañajas wakisi?” sasin Jesusar jisktʼaskäna uka waynajj kunanakanïnsa uk qhanañchtʼam. 2) ¿Jesusajj uka qamir waynan kunjam chuymanïtapsa uñjäna?

³ Uka pachpa invitacionjja, niya 2.000 maranak nayrajj mä jaqew katoqarakïna. Jupajj wali respetata wali qollqeni waynänwa, walja jaqenakaw jupjamäñ munapjjarakïna. Bibliajj jupat parlkasajj ‘waynänwa’, ‘mä pʼeqtʼirïnwa’, ‘wali qamirïnwa’ sasaw qhanañchi (Mateo 19:20; Lucas 18:18, 23). Uka waynajj Jachʼa Yatichiri Jesusat parlirwa istʼäna, kuntï istʼkäna ukajj chuymaparuw purtʼarakïna.

⁴ Uka tiempon utjkäna uka gobernantenakat jilapartejja, Jesusarojj janiw respetomp uñjapkänti (Juan 7:48; 12:42). Ukampis uka waynajj janiw uka gobernantenakjamäkänti. Bibliarjamajja, Jesusajj thak saraskäna ukhajj tʼijukamaw uka waynajj jupan ukar purïna, “nayraqatapar qonqortʼasisasti, akham sasaw jupar jisktʼarakïna: ‘Suma Yatichiri, ¿wiñay jakañ katoqañatakejj kun lurañajas wakisi?’ sasa” (Marcos 10:17). Uka waynajj Jesusamp wal parlañ munäna, mä pobre jaqer uñtataw Jesusan ukarojj tʼijukam sararakïna. Ukatjja respetompiw Jesusan nayraqatapan qonqortʼasïna, ukham lurasajj humilde chuymanïtapa ukat Jehová Diosat yatjjatañajj kunja wakiskirisa uk sum amuyatapwa uñachtʼayäna. Ukham chuymanïtapajj Jesusatakejj wali askipunïnwa (Mateo 5:3; 18:4). Ukatwa ‘Jesusajj munasiñamp uka waynar uñkatäna’ (Marcos 10:21). ¿Jesusajj uka waynar kamspachänsa?

 5. ¿Kamsänsa Jesusajj qamir waynarojja, ukat uka arunakampejj pobrer tukuñapti mayiskäna? (Nota uñjjattʼarakïta).

⁵ Wiñay jakañ jikjjatañatakejja, kun lurañas wakisi uk Awkip toqew Jesusajj yatïna. Ukatwa jupajj Qellqatanak aytasajj uka waynar wali sum amuytʼayäna, waynasti wawatpachaw Moisesan Leyip phoqta sasaw sarakïna. Ukampis Jesusajj kunas uka waynan chuymapan utjäna uk sum yatïna (Juan 2:25). Uka waynajj janiw Dios chuymäkänti, ukatwa Jesusajj jupar akham säna: “Ak phoqañamaw falti, kunatejj utjktam ukanak aljir saram, pobrenakar churanjjam, ukhamatwa alajjpachan wali valoraninakamajj utjani” sasa (Marcos 10:21). Uka arunakampejja, ¿maynejj jan kunaniw Diosar serviñapa sañti Jesusajj munaskäna? Janiwa.a Antisas uka arunakampejj mä suma yatichäwi qhanañchaskäna.

 6. ¿Kuna invitacionsa Jesusajj mä qamir waynar churäna, ukat kunjam chuymanïtapsa uka waynajj uñachtʼayäna?

⁶ Uka waynar kunas faltäna uk qhanstayañatakejja, Jesusajj aka suma arunakwa säna: “Jutam, nayar arkita” sasa. Cheqansa, Taqe Kunjjar Munañani Diosan pachpa Yoqapaw uka arunak säna, ukatjja uka waynarojj ‘alajjpachanwa wali valoraninakamajj utjani’ sasaw sarakïna. Ukampis ¿jankʼakit uka qamir waynajj Jesusan invitacionap katoqaspachäna? Janiwa. Antisas uk istʼasajja, “uka jaqejj wal llaktʼasïna, wali llaktʼatarakiw sarjjäna, walja utjirinïtap layku” (Marcos 10:21, 22). Maysa toqetjja, kuna jan walis uka waynan chuymapan utjäna ukwa Jesusan arunakapajj qhanstayäna. Uka qamir waynajj janiw kunäkipans yänakap jaytañ munkänti, janirakiw wali uñtʼatäñsa munañanïñs jaytañ munkänti. Ukatwa jupajj yänakapat llakisisajj Jesusan invitacionap jan katoqaskänti. Ukham pasatapajj wali llakkañapunïnwa, qamir waynajj Jesusampir Jehová Diosampirojj pata chuymakiw munasïna, janiw cheqpach munasiñajj chuymapan utjkänti. ¿Kunsa uka sarnaqäwejj yatichistu?

 7. ¿Kunatsa Jesusan invitacionapajj sapa maynitakiwa sasajj sissna?

⁷ Jesusan invitacionapajj janiw uka waynatakikïkänti, ni ajllit mä qhawqha jaqenakatakikïkänsa. Mä kutejja, Jesusajj akham sasaw istʼapkäna ukanakarojj säna: “Maynitejj nayar arkañ munchitojja, jupa pachpat armtʼaspan, tʼaqesiñ lawap apjjarusin jan qheparas sapür arkitpan” sasa (Lucas 9:23). Uka arunakarjamajja, taqeniw Jesusan arkiripäsna. Cheqansa, khitinakatï suma chuymanïpki ukanakarojj Jehová Diosaw Yoqapar jakʼachasipjjañapatakejj yanaptʼi (Juan 6:44). Ukatwa Jesusan invitacionapajj taqe jaqenakatakiwa sasin sistanjja. Ukhamasti “jutam, nayar arkita” sasin Jesusajj siskäna uka arunakajj sapa maynitakiwa. Ukampis ¿kuna razonanakas Jesusar arkañatakejj utji? ¿Kunjamsa Jesusar arkañasa?

 8. ¿Kunsa taqe jaqenakajj necesittanjja, ukat kunatsa?

⁸ Taqe jaqenakaw mä suma pʼeqtʼirinïñ necesittanjja, ukampis waljanejj janiw ukham amuyapkiti. Jeremías profetajj Diosan amuytʼayatäsajj akham sänwa: “Jehová Dios Tata, nayajj ak sum yatta, janiw jaqerojj pachpa thakip ajlliñajj waktʼkiti. Janirakiw jaqerojj chellqtatanakap amtañas waktʼkiti” sasa (Jeremías 10:23). Uka arunakajj cheqäskapuniwa, jaqenakajj janiw jupanak pachpajj apnaqasipkaspati, ni jupanakkam apnaqasiñatakis derechonïpkiti. Ukatwa nayrat jichhakamajj kunayman jan wali gobernantenakajj utjawayi (Eclesiastés 8:9). Jesusan urunakapanjja, marka apnaqerinakajj jaqenakar wal tʼaqesiyapjjäna, markankirinakarus engañompiw mä kuns apaqapjjerïna. Ukatwa pobre jaqenakajj ‘jan awatirini ovejanakar uñtasitäpkaspas’ ukham Jesusajj uñjäna (Marcos 6:34). Jichhürunakan jaqenakajj ukhamarakiw jan awatirin uñjastanjja, ukatwa jan wali gobernantenakamp apnaqatäsajj kunayman jan walinakan uñjastanjja. Ukham pasatapatjja, taqe jaqenakaw confiykañ pʼeqtʼirinïñ necesittanjja. Cheqas Jesusakiw suma pʼeqtʼirejja, kuna razonanakatsa ukham sistan ukanakatwa jichhajj yatjjataskañäni.

 9. ¿Kunatsa Jesusajj jan yaqha pʼeqtʼirinakjamäki?

⁹ Nayraqatajja, Jesusarojj Jehová Dios pachpaw ajlliwayi. Jilaparte apnaqerinakajja, jupanakjam jucharar jaqenakamp ajllitäpjjewa, ukatwa jupanakajj mä kun arsusas jan phoqapkiti, janirakiw jan walinaksa sum askichapkiti. Ukampis Jesusajj janiw uka jaqenakjamäkiti, ukhamätapwa kunjam sutinakampitï jupar uñtʼaski ukanakajj qhanstayi. Cristo arusa ukat Mesías arus “ajllita” sañwa muni. Jesusarojja Taqe Kunjjar Munañani Diosaw ajlliwayi, mä arunjja mä wakiskir luräwi katoqañapatakiw Jehová Diosajj uttʼayawayi. Ukatwa jupajj Yoqapat akham säna: “¡Uñtapjjam, jupaw nayan ajllit servirijajja, jupasti wali munatawa, nayajj wal jupat kusista! Juparuw espirituj churäjja” sasa (Mateo 12:18). Khitis jiwasar sum apnaqestaspa uk Jehová Diosakiw sum yati, ukhamarus jupan yatiñapajj jan tukuskiriwa, ukatwa Jesusar ajllitapat jan payachasktanti (Proverbios 3:5, 6).

10. ¿Kunatsa Jesusakiw jiwasar mä suma ejemplo jaytawayistu sasin sistanjja?

¹⁰ Payïrirjamajja, Jesusajj chuymar purtʼkir mä suma ejemplo jaytawayistu. Mä suma pʼeqtʼirejj yateqaskay suma chuymaniwa, arkirinakapatakis sarnaqatapampiw mä thaki jistʼari, ukatjja suma jaqëpjjañapatakiw servirinakapar chʼamañchtʼaraki. ¿Mä pʼeqtʼirirojj kunjam chuymanïtapatsa (cualidadanakanïtapatsa) wali sum uñjtanjja? ¿Jan ajjsarirïtapata? ¿Yatiñanïtapata? ¿Khuyaptʼayasirïtapata? ¿Jan waltʼäwinakar saykatirïtapata? Jesusajj aka oraqenkkäna ukhajja, taqe ukanakat sipans jukʼamp suma chuymanïtapwa uñachtʼayäna. Niyakejjay jupajj alajjpachankir Awkipar uñtasitächïnjja, Jehová Diosajj kunjam chuymanïkitï taqe ukanakwa uñachtʼayäna, janipuniw kun lurkasas pantjaskänti. Ukatwa Jesusat taqe kunan yateqasiñatak chʼamachasiñasa, kuna laykutejj taqe cristianonakaruw jupajj mä suma ejemplo jaytawayistu, ‘ukhamat wali amuyumpi kayup arkañasataki’ (1 Pedro 2:21).

11. ¿Kunjamsa Jesusajj ‘suma awatirïtap’ uñachtʼayäna?

¹¹ Kimsïrirjamasti, Jesusajj ‘suma awatirïtapwa’ uñachtʼayäna (Juan 10:14). Bibliajj qellqaskäna uka tiempon jakir jaqenakajja, mä suma awatirejj kunanaksa luräna ukanak sum yatipjjäna. Cheqansa, mä ‘suma awatirejj’ uywanakap sum uñjañatakejj wal chʼamachasirïna, jupatakejj askip thaqañat sipans uywanakapar jan walinakat jarkʼaqañaw jukʼamp importantënjja. Jesusan nayra awkipäkäna uka David reyejj ukhamätapwa uñachtʼayäna, jupajj waynitükäna ukhajj jan ajjsarasaw ovejanakapar salvaje animalanakat arjjatäna, niyaw vidapsa aptʼasirakïna (1 Samuel 17:34-36). Ukampis Jesusajj arkirinakap laykojj pachpa vidapwa churawayi (Juan 10:15). Janipuniw khiti pʼeqtʼiris ukham lurawaykiti.

12, 13. 1) Awatirimpi ovejanakampejja, ¿kunjamsa sum uñtʼasipjjatap uñachtʼayapjje? 2) ¿Kunatsa Jesusamp pʼeqtʼatäñ wal muntanjja?

¹² ¿Kunatsa Jesusajj ‘suma awatirit’ uñtʼatarakïna? Jupa pachpaw mä kutejj akham säna: “Suma awatirejj nayätwa, ovejanakajar uñtʼastwa, ovejanakajas nayar uñtʼasipjjarakituwa” sasa (Juan 10:14). Uka arunakajj kamsañsa muni uka toqet amuytʼañäni. Jan ovej awatirïpki ukanakat jilapartejja, mä ovej tamarojj tʼarwani uywanakarjamakiw uñjapjje, ukampis ovej awatirejj sapa mayni ovejanakaparuw sum uñtʼi. Kawkïr ovejanakas yanaptʼatäñ munapjje, kawkïrinakas usutäpjje jan ukajj usuchjatäpjje, kawkïrinakas jiskʼakïsipki taqe ukanakwa jupajj sum yati. Maysa toqetjja ovejanakajj sumwa awatiripar uñtʼasipjje, awatirin arup istʼasajj jankʼakiw jupan ukarojj sarapjjaraki. Ukhamarus kawkirutï awatirejj sarki uksaruw ovejanakajj sarapjje, kuna laykutejj awatirikiw kawkjansa suma pastonakasa, umasa ukat suma lugaras utji uk sum yati. Awatirin sum uñjatajja ovejanakajj jan walinakat jarkʼaqataw uñjasipjje, janirakiw ajjsarayasipkisa (Salmo 23).

¹³ Taqeniw ukham mä suma pʼeqtʼirinïñ muntanjja. Jesusajj arkirinakapar wali sumwa uñji, jan walinakats jarkʼaqarakiwa. Cheqas janiw jupjam yaqha awatirejj utjkiti. Jichhürunakanjja, jupajj kusisit sum jakasiñasatakiw yanaptʼistu, jutïrin wiñay jakañ katoqañasatakis yanaptʼarakistaniwa (Juan 10:10, 11; Apocalipsis 7:16, 17). Ukampis ¿kunjamsa Jesusar arksna?

14, 15. Jesusan cheqpach arkiripäñatakejja, ¿kunatsa ‘cristianötwa’ jan ukajj ‘Jesusar munastwa’ sañakejj jan wakiski?

¹⁴ Jichhürunakanjja, walja millón jaqenakaw Jesusan invitacionap katoqasipkaspas ukham amuyasipjje, kuna laykutejj jupanakajj cristianöpjjtwa sasaw sapjjaraki. Jupanakat yaqhepajja, awk taykapajj wawäkasin bautisasipkäna uka religionaruw sarapjje. Yaqhepanakasti, ‘nayar salvatap laykojj Jesusar wal munasta’ sasaw sapjjaraki. Ukampis ¿cheqpachapunit jupanakajj Jesusan arkirinakapäpjjpacha? Janiwa. Kuntï Jesusajj yatichkäna ukarjamajja, maynejj ‘cristianötwa’ jan ukajj ‘Jesusar munastwa’ sañat sipansa jukʼampinakwa lurañapa.    

¹⁵ Walja markanakanjja, jilaparte jaqenakajj cristianöpjjtwa sasinwa sapjje. Ukampis jupanakajj janiw Jesusan yatichäwinakaparjamajj sarnaqapkiti, ukatwa markanakapan uñisisiñanakasa, tʼaqesiñanakasa, jan wali lurañanakas wal utji, janirakiw kunas cheqaparjam luraskiti. Cheqansa, aka oraqenkir mayni markanakampejj ukhamaw pasaraki.

16, 17. Cristianöpjjtwa sapki ukanakampi ukat cheqpach cristianonakampejj ¿kunansa jan igualäpki?

¹⁶ Jesusan arunakaparjamajja, cheqpach cristianonakajj luratanakapampiw arkirinakapäpjjatap uñachtʼayapjjañapäna. Jupajj akham sänwa: “Janiw taqe khitinakatï ‘Tatay, Tatay’ sasin sapkitu ukanakajj alajjpachankir Reinorojj mantapkaniti, jan ukasti taqe khitinakatï alajjpachankir Awkijan munañap lurapki ukanakakiw mantapjjani” sasa (Mateo 7:21). ¿Kunatsa waljanejj Jesusajj ‘nayan Tatitujawa’ sasin sapjje, ukat kunatsa jupanakajj Jehová Diosan munañap jan lurapki? Jupanakajja, aka capítulo qalltan parlaniwayktan uka qamir waynar uñtasitäpjjewa, mä arunjja janiw Jesusarusa ni Jehová Diosarus taqe chuyma munasipkiti.

¹⁷ ¿Kunatsa ukham sistanjja? Walja millón jaqenakajj ‘cristianöpjjtwa, Jesusarus wal munasipjjta’ sasinsa sapkchejja, Jesusan cheqpach arkirinakapakiw Jesusarusa Jehová Diosarus taqe chuym munasipjje, janiw jupanakajj aru mayak arsupkiti. Jesusajj akham sänwa: “Khititï nayar munaskitu ukajja, arunakaj phoqaniwa, Awkijajj jupar munasirakiniwa” sasa (Juan 14:23). Ukat akham sarakïnwa: “Ovejanakajasti aruj istʼapjjewa. Nayajj jupanakar uñtʼtwa, jupanakajj arkapjjarakituwa” sasa (Juan 10:27). Ukhamasti, luratanakasampikiw Jesusar cheqpachapun munasitas uñachtʼaysna, janiw arusampikisa ni pata chuymakis uk uñachtʼayksnati.

18, 19. 1) ¿Kunjamsa Jesusat yatjjatañajj yanaptʼistani? 2) ¿Aka librojj kuna amtamp lurtʼatasa, ukat kunjamsa walja tiempo Jesusar arkasipki ukanakarojj yanaptʼarakini?

¹⁸ Kunanaktï lurktan ukajj kunjam jaqëtansa ukwa uñachtʼayi. Ukhamajja, suma jaqer tukuñatakisa cambionak lurañatakis chuymatpachwa chʼamachasiñasa. Jesusajj akham sänwa: “Wiñay jakañ katoqañatakejja, jupanakajj juma sapa cheqpach Diosar uñtʼapjjañapawa, jumajj khitankta uka Jesucristorus uñtʼapjjañaparakiwa” sasa (Juan 17:3). Jiwasatï Jesusar uñtʼañatak Biblia liytʼañäni ukat kuntï liytʼktan uka toqet lupʼirakiñäni ukhajja, kuntï yateqkañäni ukajj chuymasaruw purtʼistani. Ukhamatwa Jesusarojj jukʼamp munasiñäni, jukʼampirakiw jupar arkañs munañäni.

¹⁹ Aka librojj uka amtamp lurtʼatawa, mä arunjja janiw Jesusan sarnaqäwipataksa kunjamsa jupajj Diosan arunakap yatiyäna uka toqetaks parlkiti, jan ukasti kunjamsa Jesusar arksna uka toqet sum amuytʼasiñasatak lurtʼatawa.b Maysa toqetjja, kunjam jaqëtansa uk Biblian yanaptʼapamp amuytʼasiñasatak lurtʼatarakiwa, ukatjja “¿cheqapunit nayajj Jesusar arkasktjja?” sasin amuytʼasiñasatakis yanaptʼarakistaniwa (Santiago 1:23-25). Inas jumajj Jesusar walja tiempo arkasksta, ukampis taqeniw jupar jukʼamp jakʼachassna. Bibliajj akham sasaw chʼamachtʼistu: “Jumanakajj cristianjamat jakasipkta janicha ukjja amuykiptʼasisipkakim, kunjam jaqëpjjtasa uksa uñakiptʼasisipkakim” sasa (2 Corintios 13:5). Suma Awatiri Jesusarojj Jehová Diosaw jiwasar pʼeqtʼañapatak uttʼayawayi, ukatwa Jesusarojj sumti arkasktan janicha uk amuykiptʼasiñasa.

20. ¿Kuna toqetsa jutïr capitulon yatjjataskañäni?

²⁰ Aka librot yatjjatañajja, Jesusaru ukat Jehová Diosar jukʼamp munasiñatakiw yanaptʼistani. Ukatjja uka munasiñaw Jesusar sum arkañatakisa, sumankañ jikjjatañatakisa ukat kusisit jakasiñatakis yanaptʼarakistani. Ukhamarusa wiñayatakiw Jehová Diosarojj jutïrin adorañ puediñäni, kuna laykutejj jupaw mä Suma Awatir churistu. Ukampis Jesusar sum uñtʼañatakejja, jupajj khitipunisa ukwa nayraqatajj yatjjatañasa. Ukatwa capítulo 2 ukan kunjamsa Jesusajj Jehová Diosan amtap phoqañatak yanaptʼäna, kunanak lurañatakis jupajj chʼamachasïna uka toqet jukʼamp yatjjataskakiñäni.