‘Nayajj taqe jupanakaruw mayachtʼäjja’

1-3. ¿Kunatsa babilonionakajj Jehová Diosan servirinakapat burlasipjje? ¿Kamsasas jupanakat burlasipjje?

JUMAJJ Babilonia markan jakasiri Diosar taqe chuyma serviri judiökasmas ukham amuytʼam, mä 50 maranakarakiw mayni judionakampejj yaqha markan jakjjtajja. Jumajj sapa sabadow Jehová Diosar adoririnakamp tantachasir sarta. Sarkasajj callenakan walja jaqenakaruw uñjta, jachʼa templonaka, walja santuarionakwa uñjarakta. Uka lugaranakan Marduk diosaru ukhamarak yaqha diosanakar ofrendanak loqtañatakisa alabanzanak cantañatakis walja jaqenakaw tantachasipjjaraki.

² Uka jaqenakat jayankjjasajja, Diosar adoriri mä qhawqha jaqenakampiw jumajj tantachasta.a Uka cheqajj inas marka taypi paskäna uka jawir jakʼankchïna. Ukanwa Diosar orapjjta, salmonak cantapjjta, Diosan Arupatsa taqeniw amuykiptʼapjjarakta. Oraskasajja, jawir lakan utjki uka barconakan onoqetapwa istʼarakta. Ukankkasajj wali sumaw jumajj jikjjatasta, tantachäwi sum apaskakiñatakejj janirakiw uka markankir jaqenakan jutañap munktati. Uka markankirinakajj sapa kutiw jan waltʼayirejj jutapjje. ¿Kunatsa ukham lurapjje?

³ Babiloniajj walja guerranakanwa atipjäna, ukatwa jaqenakajj markapan chʼamapajj diosanakapatsa jutkaspa ukham amuyapjje. Jerusalenar qʼala tukjasitapajja, babilonionakatakejj Marduk diosas Jehová Diosat sipan jukʼamp chʼamanïkaspa ukhamawa. Ukatwa judionakatsa Diosatsa burlasipjje, awisajj jiskʼachasaw akham sapjjaraki: ‘Sionat parlir cancionanakat may canttʼarapipjjeta’ sasa (Sal. 137:3). Kunjamsa Sionajj (Jerusalenajj) Jehová Diosan enemigonakapar atipjäna uka toqet parlir salmonakajj waljaw utji. Amuyatajja uka salmonakatwa babilonionakajj wal burlasipjje, ukampis yaqhep salmonakajj jupanakatwa parlaraki. Sañäni, mä salmojj akham siwa: ‘Jerusalén markarojj qʼala tʼunjat markaruw tukuyapjje. Nanak muytpachan jakirinakas phenqʼachapjjetuwa, jiskʼachapjjarakituwa’ sasa (Sal. 79:1, 3, 4).

4, 5. 1) ¿Kun suytʼañatakis Ezequielan profecianakapajj judionakar yanaptʼäna? 2) ¿Kuna toqetsa aka yatichäwin yatjjataskañäni? (Aka yatichäwi qalltan utjki uka dibujo uñjjattʼäta).

⁴ Jehová Diosaru profetanakaru confiyatamatsa, apóstata judionakajj larusipjjewa. Ukhaman uñjaskasas familiamamp Diosar adorasajj kusisitäpjjtawa. Mayni judionakamp chika orasasa, cantasasa, Diosan Arup liytʼasas chuymachtʼatäpjjtawa (Sal. 94:19; Rom. 15:4). Ukhamaruw maynejj purini, jupajj Ezequielan profecianakapani mä rollo aptʼatawa. Uka rollo jistʼarasajj jachʼatwa liytʼapjje, kunjamsa Diosajj markapar pachpa oraqepar kuttʼayañatak mä promesa arsüna ukwa wali kusisit istʼaraktajja. Markamar familiamamp kuttʼañasa Dios saparuk adorasiñapatak yanaptʼañas kunja sumänisa uka toqet lupʼisajja, jumajj wal kusistajja.

⁵ Ezequiel libronjja kunjamsa Jehová Diosaruk adorasjjani uka toqet parlir walja promesanakaw utji. Uka toqet yatjjatañajja, jutïr urunak suytʼañatakiw yanaptʼistu. Yatjjatkasajj aka jisktʼanakaruw qhanañchaskañäni: ¿kunjamsa uka promesanakajj yaqha markar apat judionakan phoqasïna? ¿Kunjamsa jichhürunakan phoqasiraki? ¿Uka promesanakat yaqhepajj kunjamsa jutïrin qhep qhepa kutin phoqasirakini?

 6. ¿Diosajj kamsasas jan istʼasiri markaparojj kutin kutin ewjjtʼäna?

⁶ Jehová Diosajja, kunjamsa jan istʼasir markaparojj castigani ukwa Ezequiel toqejj akham sasin qhan säna: ‘Jupanakajj yaqha markar apatäpjjaniwa, preso apatäpjjaniwa’ sasa (Ezeq. 12:11). Kunjamtï 6 yatichäwin yatjjataniwayktanjja, kunjamsa ukajj phoqasiñapäna ukwa Ezequielajj uñachtʼayäna. Ukampis israelitanakajj janiw ukhakejj uka ewjjtʼa katoqapkänti. Niya waranqa maranak nayrajja, mä arun Moisesan urunakapanjja, Jehová Diosajj jan istʼasis sarnaqasipkakïta ukhajj yaqha markar apataw uñjasipjjäta sasaw sisjjäna (Deut. 28:36, 37). Isaías, Jeremías, ukat yaqha profetanakasa niya uka kikparakwa ewjjtʼapjjäna (Is. 39:5-7; Jer. 20:3-6).

 7. ¿Kunjamsa Jehová Diosajj markapar castigäna?

⁷ Diosan markapankirinakat waljanejja, ewjjtʼatajj janiw istʼasipkänti. Israelitanakajj janiw Diosarojj taqe chuyma sirvjjapjjänti, yaqha diosanakaruw adorjjapjjäna, jan casusiri ukhamäpjjänwa, jan wali pʼeqtʼirinakampi apnaqatäsajj kunayman juchanakwa lurapjjarakïna, ukatwa Jehová Diosajj chuymap wal usuyasïna. Israelitanakajj ‘lechempi miskʼimpi jalir oraqënwa’ jakapjjäna, ukampis jichhajj manqʼat pistʼataw sarnaqapjjäna, ukajj mä phenqʼapunïnwa (Ezeq. 20:6, 7). Ukatsti Jehová Diosan arsutaparjamajj uka jan istʼasir markajj Babiloniar apataw uñjasïna. 607 antes de Cristo (a.C.) maranjja, Nabucodonosor reyejj qhep qhepa kutin kuttʼasaw Jerusalén marksa templopsa qʼal tukjäna. Walja waranqa judionakas salvasipkchïnjja, jupanakajj Babiloniar apataw uñjasipjjäna. Kunjamtï aka yatichäwi qalltan saniwayktanjja, jupanakajj uka markanwa jan waltʼayata jiskʼachata uñjasipjjäna.

8, 9. ¿Kunanaksa Diosajj apostasía toqet cristianonakar ewjjtʼäna?

⁸ Babiloniar apat judionakjamarakiw cristianonakajj uñjasipjjäna. ¿Kunatsa ukham sistanjja? Kunjamtï walja maranak nayrajj judionakar ewjjtʼaskänjja, ukhamarakiw Criston discipulonakapajj jayäkipan ewjjtʼatäjjapjjäna. Diosan arunakap yatiyañ qalltkäna ukhajja, Jesusajj jupanakar akham sänwa: “Falso profetanakat wal amuyasipjjam, jupanakajj ovejat isthapitaw jumanakan ukar jutapjje. Ukampis manqhatjja, manqʼat jiwat qamaqenakar uñtatäpjjewa” sasa (Mat. 7:15). Walja maranak qhepatjja, Diosan amuytʼayatäsajj Pablojj akham sarakïnwa: “Nayajj yattwa, sarjjä uka qhepatjja, sinti jan wali qamaqenakaw jumanak taypir mantanipjjani, congregacionarojj janiw munasiñamp uñjapkaniti. Jumanak taypitwa jaqenakajj sartapjjani, qʼewjat yatichäwinakwa parlapjjarakini, ukhamat discipulonakar jitheqtayasajj jupanak toqer apañataki” sasa (Hech. 20:29, 30).

⁹ Cristianonakajja kunjamsa uka jan wali jaqenakar uñtʼapjjaspa, jupanakatsa jitheqtapjjaspa uk yatjjapjjänwa. Ancianonakarojja, apostatanakar congregacionat jaqsupjjañapatakiw ewjjtʼasirakïna (1 Tim. 1:19; 2 Tim. 2:16-19; 2 Ped. 2:1-3; 2 Juan 10). Ukhamäkchïnsa Israel, Judá markankirinakjamaw walja cristianonakajj Diosan ewjjtʼanakapar jan istʼapkänti. 100 después de Cristo (d.C.) mara jakʼanakanjja, congregación taypin apostasiajj utj-jjänwa. Uka urunakanjja apóstol Juanakiw jakjjäna, jupajj kunjamsa congregación taypin jan walinakajj uñstaskäna ukwa uñjäna. Jupa sapakiw uka jan walinak askichañatakejj jakjjäna (2 Tes. 2:6-8; 1 Juan 2:18). ¿Apóstol Juanan jiwatap qhepat kunas pasäna?

10, 11. Patak mara qalltanakanjja, ¿Jesusajj trigompit jan wali qorampit parlkäna ukajj kunjamas phoqasïna?

¹⁰ Apóstol Juanajj jiwjjäna uka qhepatjja, kuntï Jesusajj trigompita jan wali qorampit arskäna ukaw phoqasiñ qalltäna (Mateo 13:24-30 liytʼañataki). Jesusan arsutaparjamajja, Supayajj ‘jan wali qorwa’ congregación taypin phawantäna, mä arunjja falso cristianonakaw waljaptaskäna. ¡Uk uñjasajja Diosajj wal chuym ustʼayaspachäna! Jesusan uttʼayata congregacionanjja, idolonakaruw adorasjjäna, markanakan jan wali costumbrenakaparjamaw sarnaqjjapjjarakïna. Ukatjja jaqenakan amuyunakapampi kʼari yatichäwinakampiw apayasisipkäna, ukanakajj Supayatwa jutäna. ¿Kunsa Diosajj luräna? Kunjamtï jupat jitheqtiri nayra Israel markarojj jan yanaptʼkänjja, ukhamarakiw cristianonakarojj jan yanaptʼkänti. 100 d.C. maranak qalltanakanjja, falso cristianonakajj cheqpach cristianonakaruw chhaqtayasipkäna, ukatjja oraqpachankir taqpach falso religionanak taypinkapjjänwa. Ukhamatwa cristiano congregacionajj Jachʼa Babiloniampi apnaqatäjjäna. Falso cristianonakajj waljaptasipkäna ukhaw cristianöpjjtwa siri religionanakajj uñstäna.

¹¹ Uka religionanakajj walja patak maranakaw munañapar apnaqäna, uka maranakajj chʼamak maranakäkaspas ukhamänwa, ukampis Jesusajj ‘trigot’ parlkäna uka mä qhawqha cheqpach cristianonakajj utjaskänwa. Uka cristianonakajja, Ezequiel 6:9 texton parlki uka yaqha markar apat judionakjamarakiw cheqpach Diosat jan armasipkänti. Jupanakat yaqhepajja, cristianöpjjtwa sirinakan kʼari yatichäwinakap contrajj jan ajjsarasaw saytʼapjjäna, ukatwa arknaqata jiskʼachata uñjasipjjäna. ¿Jehová Diosajj wiñayatakit markaparojj falso religionanakamp apnaqayaspäna? Janiwa. Nayra Israel markarojj qhawqhatï wakiskäna ukarjamaw Diosajj cheqañchäna, jichhajj ukhamarakwa lurañapäna (Jer. 46:28). Ukhamarus Diosajj janiw markaparojj jan suytʼäwini jaytkänti. Babiloniar apat judionakat parltʼaskakiñäni, uka markat salvañatakejj kun lurañsa Jehová Diosajj arsüna uk uñjapjjañäni.

12, 13. Ezequiel profetan urunakapanjja, ¿kunatsa Jehová Diosajj markapatak jan coleratäjjäna?

¹² Diosajj markapatak kunja coleratänsa uk qhanwa säna, ukampis ‘colerasitajajj janiw wiñayäkaniti’ sasaw yatiyarakïna. Jupajj akham sänwa: ‘Colerasiñajajj tukusjjaniwa, jupanak contra wal colerasitajas chhaqtjjarakiniwa, chuymajas chuymäjjarakiniwa. Jupanak contra wal colerasitaj jupanak contra antutañ tukuyjjä ukhasti, naya Jehová Diosajj naya saparuk adorasiñapatak mayiñatakejj kutin kutin parlatajwa yatipjjani’ sasa (Ezeq. 5:13). ¿Kunatsa Diosajj jan coleratäjjäna?

¹³ Babiloniarojja suma judionakampi jan wali judionakampiw apatäpjjäna. Ukampis jan wali judionakat yaqhepajj arrepentisipjjänwa, ukajj kuntï Jehová Diosajj Ezequiel taypejj siskäna ukarjamaw phoqasiskäna. Arrepentisipkäna uka judionakajj Dios contra saytʼasajj kuna jan walinaktï lurapkäna ukanakwa arsusipjjañapäna, Jehová Diosamp perdonayasiñatakisa jupamp mayamp katoqayasiñatakisa wal mayisipjjañaparakïna (Ezeq. 6:8-10; 12:16). Ezequielasa, Daniel profetasa, Danielan kimsa amigonakapasa Diosar taqe chuyma serviri judionak taypinkapjjarakïnwa. Cheqansa, Daniel profetajj kunjamsa judionakajj yaqha markar apat uñjasipjjäna, kunjamsa qhepat pachpa markapar kuttʼjjapjjarakïna ukwa uñjäna. Daniel 9 capitulonjja, Diosar taqe chuyma orasitapwa liytʼsna, ukanjja Israel markan juchanakapat wal arrepentisitapwa amuysna. Danielan oracionapajja, yaqha markar apat walja waranqa israelitanakajj Jehová Diosamp perdonayasiña Jupan bendicionap mayamp katoqañ munapjjatapwa uñachtʼayäna. Ukatwa kuntï Diosajj Ezequiel taypejj pachpa markapar kuttʼapjjañapatak promesanak arskäna ukajj wal kusisiypachäna.

14. ¿Kuna wakiskir razonatsa Jehová Diosajj markapar salväna?

¹⁴ Ukhamäkchïnsa, Jehová Dios saparuk adorasiñapatakisa Diosajj markapar salvañapatakisa jukʼamp wakiskir mä razonaw utjäna. Diosan Jehová sutipajj markanak nayraqatan jachʼañchasiñapatak tiempöjjänwa, ukatwa yaqha markar apat judionakarojj salväna (Ezeq. 36:22). Babilonionakan jan wali diosanakapasa Marduk diosapasa, janipuniw Taqe Kunjjar Munañani Jehová Diosjamäpkänti, ukwa babilonionakajj yatipjjañapäna. Diosan amuytʼayatäsajj kuna phesqa promesanaksa Ezequielajj Babiloniar apat mayni judionakarojj yatiyäna uk uñjañäni. Nayraqatajja kunjamsa uka promesanakajj Diosar serviri judionakan phoqasïna, kunjamsa qhepat jukʼamp phoqasirakïna ukanakatwa yatjjataskañäni.

15. Markapar kuttʼapjjañapäkäna uka judionakajj ¿kunjamsa Diosar adorapjjañapäna?

¹⁵ PROMESA 1. Idolonakaru adorañasa falso religionan ajjtaskañ luratanakapas chhaqtayatäjjaniwa (Ezequiel 11:18; 12:24 liytʼañataki). Aka libron 5 yatichäwipanjja, Jerusalenansa templonsa falso religionanakan costumbrenakapampi idolonakar adorañampi utjatapwa yatjjataniwaytanjja. Israelitanakas jan walinakwa lurjjapjjäna, Jehová Diosatsa jitheqtjjapjjarakïnwa. Judionakajj mayampiw naya saparuk adorjjapjjetani sasaw Diosajj Ezequiel toqe arsüna. Diosajj arskäna uka bendicionanak katoqañatakejja, nayraqatajj Jehová Dios saparukiw adorasjjañapäna. Ukaw jukʼamp wakiskirïna.

16. ¿Kuna promessa Jehová Diosajj servirinakapar arsüna?

¹⁶ PROMESA 2. Markaparuw kuttʼjjapjjani. Yaqha markar apatäpkäna uka servirinakaparojja, ‘Israel oraqe churapjjarakïma’ sasaw Jehová Diosajj säna (Ezeq. 11:17). Babilonionakajja Diosan servirinakaparojj janis markapar kuttʼañ puedipkaspa ukhamwa amuyayapjjäna, jupanakatsa burlasipjjarakïnwa. Ukatwa uka promesajj Diosan markapatakejj wali wakiskirïna (Is. 14:4, 17). Kuttʼapkäna uka judionakatï Diosar taqe chuyma servisipkakispäna ukhajja, oraqenakapat walja manqʼañanakwa apthapipjjaspäna, trabajipjjatapas janiw inamayäkaspänti. Manqʼat pistʼañasa manqʼatjam tʼaqesiñasa phenqʼachatäñas janiw utj-jjaspänti (Ezequiel 36:30 liytʼañataki).

17. ¿Diosan markapajj kunsa mayamp lurjjaspäna?

¹⁷ PROMESA 3. Jehová Diosan altarapanjja mayampiw ofrendanak loqtjjapjjani. Leyirjamajja ofrendanaka sacrificionak loqtañaw Diosar adorañatakejj wali wakiskirïna, ukwa aka libron 2 yatichäwipan yatjjataniwaytanjja. Markapar kuttʼapjjañapäkäna uka judionakatï Diosaruk taqe kunan istʼapjjaspäna, Dios saparuk adorapjjaspäna ukhajja, Diosajj jupanakan ofrendanakap katoqaspänwa, Israel markankirinakas juchanakapat perdonatäpjjaspänwa, Diosampis sumwa apasjjapjjarakispäna. Jehová Diosajj israelitanakar akham sänwa: ‘Taqe israelitanakajj taqpachaniw oraqen servipjjetani. Ukanwa nayajj contribucionanakampi ofrendanakamat nayrirïki, kunanakatï sagradöki taqe ukanak apanipjjañamatak mayipjjäma’ sasa (Ezeq. 20:40). Ukhamatwa Diosaruk adorasjjaspäna, markapas bendicionanakwa katoqarakispäna.

18. ¿Jehová Diosan markap uñjirinakajj kunjamäpjjañapänsa?

¹⁸ PROMESA 4. Jan walinak luriri awatirinakajj janiw utj-jjaniti. Diosan markapar pʼeqtʼapkäna uka chachanakajj jan wali jaqenakäpjjänwa, ukatwa Israel markankirinakajj sinti jan walinak lurapjjäna. Ukampis Jehová Diosajj uk askichañwa arsüna. Uka jan wali awatirinakatjja Diosajj akham sänwa: ‘Janiw ovejanakajar manqʼayapjjañap permitjjäti. Nayajj lakanakapatwa ovejanakajar salväjja’ sasa. Taqe chuyma servirinakaparusti, ‘nayaw ovejanakajar uñjäjja’ sasaw sarakïna (Ezeq. 34:10, 12). ¿Kunjamsa uk lurañapäna? Jupat jan jitheqtiri taqe chuyma serviri chachanakaruw Diosajj markap uñjapjjañapatak uttʼayañapäna.

19. Mayachtʼatäñ toqet ¿kunsa Jehová Diosajj arsüna?

¹⁹ PROMESA 5. Jehová Diosar adoririnakajj mayachtʼataw servipjjani. Diosan markapajj janïr yaqha markar apatäkasajj tʼaqa tʼaqaw sarnaqäna, uk uñjasajj Diosar taqe chuyma servirinakajj wali llakitäpjjpachänwa. Falso profetanakasa jan wali pʼeqtʼirinakasa, Jehová Diosan profetanakap contra saytʼapjjañapatakiw jaqenakar wiytapjjäna. Israel markajja purapat jan waltʼayasiri gruponakar jaljtatänwa. Ukatwa Diosajj ‘taqe jupanakaruw mayachtʼäjja, mä machaq amuyu jupanakar ucharakëjja’ sasin arskäna uka promesan phoqasiñapajj wali suyatänjja (Ezeq. 11:19). Markapar kuttʼir judionakatï mayachtʼatäsipkakispäna Jehová Diosatsa jan jitheqtapkaspäna ukhajja, janiw enemigonakapajj jupanakar atipjañ puedipkaspänti. Israelitanakajj Jehová Diosar jiskʼachayañata jan walit uñjayañat sipansa, mayampiw jachʼañchapjjaspäna.

20, 21. ¿Kunjamsa Diosan promesanakapajj markapar kuttʼapkäna uka judionakan phoqasïna?

²⁰ ¿Markapar kuttʼapkäna uka judionakajj uka phesqa promesanak phoqasir uñjapjjänti? Walja maranak nayrajj Josué chachajj akham sänwa: ‘Kuntï Jehová Diosamajj jumanakar sapkayätam taqe uka suma arunakapajj phoqasïnwa. Jumanakatakejj taqpachaw phoqasïna, janiw ni mayas jan phoqaskänti’ sasa (Jos. 23:14). Josué chachan urunakapanjja uka arunakajj phoqasïnwa, judionakajj markapar kuttʼapkäna uka urunakansa ukhamarakiw uka arunakajj phoqasiñapäna.

²¹ Judionakajj janiw idolonakar adorjjapjjänti, Jehová Diosat jitheqtaykäna uka falso religionanakan ajjtaskañ luratanakapsa janirakiw lurjjapjjänti. Ukatsti pachpa markaparuw kutʼjjapjjäna, oraqenakapanwa yapuchasjjapjjäna, wali kusisitaw jakasjjapjjarakïna, ukajj janiw cheqaw sañjamäkänti. Markapar kuttʼasajja, nayraqatajj Jerusalenankir altarwa askichapjjäna, ukatsti Diosajj katoqkäna uka sacrificionakwa loqtapjjarakïna (Esd. 3:2-6). Jehová Diosajj suma awatirinak utjayasaw markapar bendisïna, uka awatirinakat yaqhepajj akanakänwa: copianak luriri Esdras sacerdote, Nehemías ukat Zorobabel gobernadoranaka, Josué sat jachʼa jilïr sacerdote, ukhamarak jan ajjsariri Ageo, Zacarías, Malaquías profetanaka. Israelitanakatï Jehová Diosan mayitanakaparjam sarnaqapjjaspäna ukhajja, mayachtʼataw jakasipjjaspäna. Walja tiempow jupanakajj mayachtʼat jan jakasjjapjjänti (Is. 61:1-4; Jeremías 3:15 liytʼañataki).

22. Diosan promesanakapajj qhepatwa jukʼamp phoqasiñapäna sasajj ¿kunatsa sistanjja?

²² Jehová Diosan promesanakapajj kunjamsa nayrïr kutin phoqasïna uk uñjañajj wali chʼamañchtʼkirïnwa. Ukhamarus Israel markan phoqaskäna ukajj kunatï qhepat jukʼamp sum phoqasiñapäkäna ukwa uñachtʼayäna. ¿Kunatsa? Judionakajj taqe chuymaw Diosar istʼapjjañapäna, ukhamatakwa Jehová Diosajj promesanakap phoqaspäna. Ukampis walja maranak qhepatjja judionakajj janiw Diosar istʼjjapjjänti, jan walinakwa lurjjapjjäna. Kunjamtï Josué chachajj siskänjja, Diosan arunakapajj phoqasipuniwa. Ukhamasti, Diosan promesanakapajj qhepatwa jukʼamp phoqasiñapäna, wiñayatakirakïñapänwa. Kunjamsa ukajj phoqasïna uk yatjjatañäni.

23, 24. ¿Kunapachas ‘taqe kun askichañatak tiemponakajj’ qalltawayi, kunjamsa qalltarakïna?

²³ Bibliarjamajja 1914 marat aksaruw aka jan wali pachan tukusiñapajj qalltawayi, mä arunjja qhep qhepa urunakanwa jakasktanjja. Uka marat aksaruw ‘taqe kun askichañatak tiemponakajj’ qalltawayaraki, ukwa Bibliajj qhanañchi. Uk yatiñajj wal chuymachtʼistu (Hech. 3:21). ¿Kunatsa ukham sistanjja? Kunatï 1914 maran alajjpachan paskäna uk amtañäni, uka maranjja Jesucristow Mesías Reyjam uttʼasiwayi. ¿Kunjamsa ukajj taqe kunan askichasiñapatak yanaptʼawayi? Jehová Diosajja, David reyirojj jumat jutiri wawamajj wiñayatakiw reyit apnaqani sasaw säna (1 Crón. 17:11-14). Ukampis babilonionakajj 607 a.C. maran Jerusalén tʼunjapkäna ukhajja, janiw Davidan familiapat jutiri reyinakajj jukʼamp apnaqjjapjjänti.

²⁴ Jesusajja ‘Jaqen Yoqapjamajj’ David reyit jutirïnwa, ukhamasti, reyit uttʼatäñatakejj derechonïnwa (Mat. 1:1; 16:13-16; Luc. 1:32, 33). Diosajj 1914 maranwa Jesusarojj alajjpachan reyit uttʼayäna, uka maranwa ‘taqe kun askichañatak tiemponakajj’ qalltäna. Uka maratwa Jehová Diosajj uka perfecto Rey toqejj Jupar sum adorasiñapatak yanaptʼaskaki.

25, 26. 1) ¿Kunapachas Diosan servirinakapajj Jachʼa Babiloniat mistjjapjjäna? ¿Kunjamatsa uk yattanjja? (“¿Kunatsa 1919 mara sistanjja?” sat recuadro uñjjattʼäta). 2) ¿Kunas 1919 marat aksarojj phoqasiñ qalltawayi?

²⁵ Reyit uttʼayatäjjasajja, Jesusajj Awkipamp chikaw kunjamsa aka oraqen Diosar adorasiski uk uñakipapjjäna (Mal. 3:1-5). Kunjamtï Jesusajj trigompita jan wali qorampit parlkänjja, walja maranakaw trigorusa (ajllit cristianonaka) jan wali qorarusa (falso cristianonaka) jan uñtʼañjamäkänti.b Ukampis 1914 maranwa ‘cosecha apthapiñ’ horasajj purinjjäna, uka marat uksaruw trigoru jan wali qoraru uñtʼañajj jan chʼamäjjänti. 1914 mara nayranakajja, Estudiantes de la Biblia sasin uñtʼata jilat kullakanakaw falso religionanakan jachʼa juchanakap qhanstayapjjäna, uka jan wali organizacionatsa jitheqtjjapjjarakïnwa. Ukapachaw Diosatakejj jupar sum adorjjapjjañapatak yanaptʼañ tiempöna. ‘Cosecha apthapiñajj’ qalltasjjäna ukhat mä qhawqha maranakak pasatarojja, mä arun 1919 mara qalltanakanjja Diosan markapajj Jachʼa Babiloniatwa mistjjäna (Mat. 13:30). ¡Janiw falso religionamp apnaqatäjjänti!

²⁶ Ezequiel libron Dios saparuk adorañat parlki uka profecianakajja, Diosan nayra markapan phoqaskäna uka qhepatwa jukʼamp phoqasirakïna. Phesqa promesanakat parlaniwayktan ukanakajj kunjamsa phoqasiwayi uk jichhajj yatjjatañäni.

27. ¿Kunjamatsa Diosan markapajj idolonakar adorañ apanukupjjäna?

²⁷ PROMESA 1. Idolonakaru adorañasa falso religionan ajjtaskañ luratanakapas chhaqtayatäjjaniwa. 1900 mara jakʼanakanjja, Diosar taqe chuyma serviri cristianonakajj jiskʼa gruponakanwa tantachasipjjäna, falso religionan jan wali luräwinakapsa jaytjjapjjänwa. Sañäni, trinidad ukhamarak infierno kʼari yatichäwinakarojj janiw creyjjapjjänti, almajj janiw jiwkiti sasin sapki ukarus janirakiw creyjjapjjänti, ukanakajj janiw Bibliarjamäkiti. Ukatjja, Diosar adorañatakejj santonaka jan ukajj idolonak apnaqañajj jan walïtapwa qhanstayapjjäna. Diosar adorkasin cruz apnaqañajj idolonakar adorañampi sasitapwa jukʼat jukʼat amuyjjapjjarakïna (Ezeq. 14:6).

28. ¿Kunjamatsa Diosan markapajj Dios saparuk adorjjäna?

²⁸ PROMESA 2. Diosan servirinakapajj Juparukiw adorjjapjjani. Diosan taqe chuyma servirinakapajja, falso religionanakat jitheqtjjasaw Dios saparuk adorjjapjjäna, ukajj mä suma bendicionänwa, Diosar serviñatakis walja yanaptʼanakwa katoqapjjäna (Ezequiel 34:13, 14 liytʼañataki). Kunjamtï aka libron 19 yatichäwipan yatjjatkañänejja, Jehová Diosajj markapar wal bendisiwayi, ukatwa markapajj nayrat sipansa Diosar serviskakiñatakejj jukʼamp yanaptʼanak utjayi (Ezeq. 11:17).

29. ¿Kunjamsa 1919 maran jukʼamp predicasjjäna?

²⁹ PROMESA 3. Jehová Diosan altarapanjja mayampiw ofrendanak loqtjjapjjani. Nayrïr patak maranakan jakir cristianonakarojja, janiw animalanak sacrificiot loqtapjjañapajj mayisjjänti, jan ukasti Diosar jachʼañchir sacrificionakwa loqtapjjañapäna, Diosatsa jaqenakar parlapjjañaparakïnwa, ukanakaw Diosatak jukʼamp valoranïna (Heb. 13:15). Diosan markapajj falso religionamp apnaqat uñjaskäna uka maranakanjja, Diosar adorañatakisa Jupat parlañatakisa mä organizacionajj janiw utjkänti. Ukampis Jachʼa Babiloniat niya mistuñampïsipkäna ukhajja, markapajj jachʼañchir sacrificionakwa Diosar loqtjjapjjäna. Jupanakajj predicañatakisa tantachäwinakan Diosar adorañatakis wal chʼamachasipjjäna. ‘Suma phoqeri amuyasir esclavojj’ 1919 maratwa jukʼamp predicasiñapatak wal chʼamachasïna, ukatwa Diosan markapar sum organizañ qalltäna (Mat. 24:45-47). Uka tiempotakejja, waljaniw Jehová Diosar adorjjapjjäna. Diosan altarapajj sacrificionakamp phoqtʼatäjjänwa.

30. ¿Diosan markapan suma awatirinak utjañapatakejj kunsa Jesusajj luräna?

³⁰ PROMESA 4. Jan wali awatirinakajj janiw utj-jjaniti. Cristianöpjjtwa sapki uka jan wali awatirinakatsa jupanakatakik taqe kun muniri jan wali chuymani pʼeqtʼirinakatsa Cristow Diosan markaparojj salväna. Uka falso awatirinakjam Criston tamapar jan sum uñjapkäna ukanakarojj puestopat apaqasjjänwa (Ezeq. 20:38). Jesusajja Suma Awatirjamajj ovejanakapan sum uñjatäpjjañapatakiw chʼamachasïna, 1919 maranwa suma phoqeri amuyasir esclavor uttʼayarakïna. Uka ajllit cristianonakaw Diosan servirinakapar sum uñjapjjäna, Diosar servisipkakiñapatakis wal yanaptʼapjjarakïna. Tiempompejja ancianonakaruw ‘Diosan congregacionapar’ sum uñjapjjañapatakejj wakichtʼasïna (1 Ped. 5:1, 2). Jehová Diosasa Jesucristosa kunjamsa ovejanakapar uñjapjjañap muni ukajj Ezequiel 34:15, 16 texton qellqatawa, ukaw ancianonakar amtayasi.

31. Ezequiel 11:19 texton qellqat arunak Jehová Diosajj phoqawayiwa sasin ¿kunatsa sistanjja?

³¹ PROMESA 5. Jehová Diosar adoririnakajj mayachtʼataw servipjjani. Walja patak maranak pasatatjja, cristianöpjjtwa sapki ukanakajj walja waranqa religionanakaru sectanakaruw jaljtawayi, jupanakkamas janiw waltʼayasipkiti. Ukampis Jehová Diosajj falso religión taypit apski uka markajj janiw ukhamäkiti, ukajj mä milagrowa. Diosajj Ezequiel toqejj ‘taqe jupanakaruw mayachtʼäjja’ sasin arskäna uka arunakaw phoqasi (Ezeq. 11:19). Aka oraqpachanjja, Cristojj walja millón discipulonakaniwa. Jupanakajj kunayman markatäpkchisa qollqenïpkchisa janisa, mä pachpa yatichäwikwa katoqapjje, taqenirakiw mayachtʼat predicapjje. Jesusar janïr jiwayapkäna uka arumajja, jupajj arkirinakapan mayakïpjjañapatakiw Jehová Diosar orasïna (Juan 17:11, 20-23 liytʼañataki). Diosajj Jesusan uka mayitap jichhürunakanwa phoqaski.

32. Dios saparuk adorasiñap toqet parlir profecianak phoqasir uñjasajj ¿kunjamakis jikjjatasta? (“Diosan markapat parlir profecianaka” sat recuadro uñjjattʼäta).

³² Jehová Dios saparuk kunjamsa adorasjje uk uñjañajj wali sumapuniwa. Jupar sirvkasajja, Ezequielan profecianakap phoqasir sumwa uñjasktanjja. Diosajj markapat wal kusisi, jupajj akham sänwa: ‘Jumanakat kusisïwa’ sasa (Ezeq. 20:41). Jiwasajj Diosan mayachtʼat markap taypinktanwa, Diosar serviskakiñatakis walja yanaptʼanakwa katoqaraktanjja. Diosan markapajj walja patak maranakas Jachʼa Babiloniamp katuntat uñjaskchïnjja, jichhajj aka oraqpachanwa Jehová Diosarojj adoraski. Taqe ukanakajj mä suma bendicionapuniwa. Janiw ukakïkiti, jutïr urunakan kunjamsa Jehová Diosaruk adorasjjani uka toqet parlir yaqhep profecianakan phoqasiñap wal suyaraktanjja.

33-35. 1) Ezequiel 36:35 texton qellqat profeciajj ¿judionakatakejj kamsañsa munäna? 2) Jichhürunakanjja ¿kamsañsa uka profeciajj munaraki? (“Taqe kun askichañatak tiemponaka” sat recuadro uñjjattʼäta).

³³ Kunjamtï yatjjataniwayktanjja ‘taqe kun askichañatak tiemponakajj’ 1914 maranwa qalltäna, ukhaw Jesusajj reyit uttʼayatäna (Ezeq. 37:24). Uka qhepatjja Jehová Diosajj Cristoruw autoridad churäna, jupaw markaparojj Diosaruk adorañapatak yanaptʼañapäna. Diosan markapajj walja patak maranakaw falso religionamp apnaqat uñjasïna. ¿Jesusan taqe kun askichatapajj ukjarut tukuyjjäna? Janiwa. Jutïrinjja Dios saparuk adorasiñapatakejj yanaptʼaskakiniwa, kunjamsa uk lurani ukjja Ezequielan profecianakapaw amuytʼayistu, ukajj wal kusisiyistu.

³⁴ Aka arunakat amuytʼañäni: ‘Jaqenakajj akham sapjjaniwa: “Chʼusa oraqëkäna ukajj Edén jardinjamäjjewa” sasa’ (Ezeq. 36:35). Ezequielatakisa yaqha markar apat judionakatakisa ¿kamsañsa uka promesajj munäna? Jupanakajj janiw kunjamtï Jehová Diosajj qalltan mä paraíso lurkäna ukhamäñap suyapkpachänti (Gén. 2:8). Jan ukasti, kunjamsa Jehová Diosajj jupanakan oraqep mayamp suma oraqer tukuyani ukakwa suyapjjpachäna.

³⁵ ¿Jiwasatakejj uka promesajj kamsañsa munaraki? Jiwasajj janiw Supayan apnaqata aka oraqen sumaptañap suyktanti. Antisas kunjamsa jichhürunakan Diosar adorasiski ukan phoqasitapwa amuytanjja, ukajj mä paraisor uñtatawa. Cheqansa, Jehová Diosan servirinakapajj sumaptayat oraqena, mä arunjja Diosar servisajj mä paraisonjamwa jakastanjja. Taqeniw suma jaqëñatak chʼamachastanjja, Diosar serviñas taqenitakiw nayrankaraki. Diosan markapajj sapürutjamaw jukʼamp suma paraisor tukuski. Ukampis ¿jutïr urunakat kamsaraksnasa?

36, 37. ¿Kuna promesanakas jutïrin phoqasini?

³⁶ Armagedón pasatat Jesusajj taqe kunwa askichaskakini, aka oraqsa sumaptayaniwa. Waranqa Maranak apnaqkani ukhajja, aka oraqe mä suma paraisor tukuyapjjañapatakiw jaqenakar yanaptʼani. ¡Qalltatpachwa Diosajj ukhamäñap munäna! (Luc. 23:43). Taqeniw maynit maynikam suman jakasiñäni, janiw kunat ajjsarañas utj-jjaniti. Aka arunakajj kunjamas phoqasini uk amuytʼañäni: ‘Jupanakampejj mä sumankañ pacto luräjja, markatjja ajjsarkañ salvaje animalanaks tukjäwa, ukhamat ovejanakajajj wasaran wali seguro jakapjjañapataki montenakans ikipjjañapataki’ (Ezeq. 34:25).

³⁷ Jan ajjsarasaw kawkjarus sarañäni, janirakiw animalanakajj jan waltʼaykistaniti. Janipuniw kuna jan walis llakisiyjjestaniti. Bosquenakansa jan ajjsarasaw sapaki sarnaqañäni, kuna sumanakatï uka cheqanakan utjki ukanaksa uñjarakiñäniwa. Uka lugaranakan iktʼañsa janiw ajjsarkañäniti, qhepürusti suma samartʼata jan kunas kamachtʼata ukhamaw sartjjarakiñäni.

38. Ezequiel 28:26 texton arunakapajj kunjamas phoqasini uka toqet lupʼisajj ¿kunjamakis jikjjatasta?

³⁸ Ukatjja aka promesa phoqasir uñjarakiñäni: ‘Ukanwa jupanakajj wali seguro jakapjjani, utanakwa lurasipjjani, uvasanak ayrusipjjani. Kunapachatï jupanak jakʼankapki jupanakar jiskʼachapki ukanakar juchañchkä ukhaw jupanakajj wali seguro jakapjjani. Jupanakasti Jehová Diosätaj yatipjjani’ (Ezeq. 28:26). Jehová Diosan taqe enemigonakapajj chhaqtayatäjjani ukhajja, jan ajjsarasaw suman jakasiñäni. Aka oraq sumwa cuidañäni, jiwasatakisa familiasatakisa kunanakatï jakañatak wakiski ukanakaw utjani. Suma utanakwa lurasiñäni, ‘uvasanak’ yapuchasiñäni, achunakapsa manqʼasirakiñäniwa.

39. Paraisot parlir profecianakajj phoqasipuniniw sasin confiyañatakejj ¿kunas yanaptʼtamjja?

³⁹ Taqe ukanakajj janiw cheqaw sañjamäkiti. Jichha tiempon ‘taqe kunatï askichasiski’ ukanak amtañasapuniwa. Supayan jarkʼatpachasa, Jesusajj Jehová Diosatwa autoridad katoqawayi. Jan wali urunakansa jakaskstanjja, Dios saparuk adorasiñapatakejj Jesusaw Diosan servirinakapar yanaptʼaski. Taqe ukanakajja, Ezequiel libron qellqatäki uka profecianakajj phoqasipuniniwa sasin confiyañatakiw yanaptʼistu.