Khuyapayasirïñsa altʼat chuymanïñsa Jesusat yateqasipjjañäni

 1. Jesusat yateqasisajj Jehová Diosaruw jakʼachastanjja sasajja, ¿kunatsa sistanjja?

MAYNIR askit uñjktan ukhajja, jupatwa yateqasiñ muntanjja. Cristianonakajj ¿khitit yateqasiñsa muntanjja? Jesusata. Jupajj Jehová Diosat yateqasisaw sarnaqäna. Ukatwa akham säna: “Khititejj nayar uñjkitu ukajj Awkirojj uñjarakiwa” sasa (Juan 14:9). Ukhamajja, Jesusat yateqasiñatak chʼamachasiñäni ukhajja, Taqe Kunjjar Munañani Jehová Diosatsa yateqasksna ukhamäniwa, Juparus jukʼampiw jakʼachasiñäni. Ukajj ¡wali askipuniwa!

2, 3. 1) ¿Kunatsa Jesusan sarnaqäwipat Biblian qellqatajja? 2) ¿Kun lurañassa Jehová Diosajj muni? 3) ¿Kunsa aka yatichäwinsa ukat jutïr yatichäwinsa yatjjataskañäni?

² Biblianjja, kunjamsa Jesusajj sarnaqäna ukaw sum qhanañchasi. ¿Kunatsa Diosajj ukanak qellqaypachäna? Jesusar uñtʼsna ukat yateqassna ukwa Jupajj muni (1 Pedro 2:21 liytʼañataki). Jesusan ‘kayup arkañasatakiw’ Bibliajj chʼamañchistu. Ukajj ¿kun sañsa muni? Kuntï Jesusajj lurkäna taqe ukanakatwa yateqasiñasa. Jupajj janis jiwasjam pantjasirïkchïnjja, Jehová Diosajj janiw Jesusjam jan pantjasis sarnaqañas maykistuti. Jan ukasti, Jesusjam sarnaqañatak chʼamachassna ukwa muni.

³ Kunsa Jesusat yateqassna uk jichhajj mä qawqha uñjañäni. Aka yatichäwinjja, Jesusan altʼat chuymanïtapata khuyaptʼayasirïtapatwa yatjjataskañäni. Jutïr yatichäwinjja, jan ajjsarirïtapata ukat amuytʼasirïtapatwa yatjjataskarakiñäni. Yatjjatkasajja aka jisktʼanakaruw qhanañchaskañäni: ¿Kun sañs muni? ¿Kunjamsa Jesusajj ukham chuymanïtap uñachtʼayäna? ¿Kunjamsa Jesusat yateqassna?

 4. Altʼat chuymanïñajja, ¿kun sañs muni?

⁴ Jachʼa jachʼa tukuri jaqenakajj akham sapjjewa: ‘Altʼat chuymaninakajj ajjsariri, pächasiri ukhamäpjjewa’ sasa. ¿Ukajj cheqäpachati? Janiwa. Altʼat chuymanïñatakejj jan ajjsarirïña, jan pächasirïñaw wakisi. Ukhamajja, altʼat chuymanïñajj ¿kun sañs muni? Khititï altʼat chuymanïki ukajj janiw jachʼa jachʼa tukkiti ni munañaparukis kuns lurkiti. Ukhamajja, altʼat chuymanïñatakejj kunjamätansa ukwa amuykiptʼasiñasa. Biblia toqet parlir mä diccionariojj akham siwa: ‘Altʼat chuymanïñajja, Diosat sipans jukʼamp jiskʼäksnas ukham amuyasiña sañ muni. Ukhamarusa, altʼat chuymanïstan ukhajja, janiw mayninakat sipansa jukʼampïksnas ukham amuyaskañäniti’ sasa (Rom. 12:3; Fili. 2:3). Awisajj pantjasirïtas laykojj altʼat chuymanïñajj chʼamakïspawa. Ukampis jiwasatï Jehová Diosajj kunja chʼamanisa uk amuyañäni, Jesusat yateqasiñatakis chʼamachasiñäni ukhajja, altʼat chuymanïñäniwa.

5, 6. 1) ¿Khitis arcángel Miguelajja? 2) ¿Kunjamatsa Miguelajj altʼat chuymanïtap uñachtʼayäna?

⁵ Jesusajj alajjpachan chʼamani mä angeläkäna ukhasa, aka Oraqen jan juchani mä jaqjam sarnaqkäna ukhasa, altʼat chuymanïnwa. ¿Kunjamatsa Jesusajj altʼat chuymanïtap uñachtʼayäna? Uka toqet mä qawqha uñjañäni.

⁶ Sarnaqatapampiw Jesusajj altʼat chuymanïtap uñachtʼayäna. Aka Oraqer janïr jutkäna ukhajja, alajjpachan mä arcangelänwa, jupaw walja angelanakar pʼeqtʼäna. Jesusarojj Miguel sasaw Biblian uñtʼasi. Judas libronjja, Miguelampi Supayampiw chʼajjwasipkäna sasaw qhanañchi (Judas 9 liytʼañataki). ¿Kunatsa chʼajjwasipkpachäna? Kunapachatï Moisesajj jiwjjäna ukhajja, Jehová Diosajj jan jikjjatañjam cheqaruw imantjjäna (Deu. 34:5, 6). ¿Kunatsa? Supayaw Moisesan cuerpop israelitanakampi yupaychayañatak apasiñ munpachäna. Ukampis uk jan lurañapatakiw Miguelajj jarktʼäna. Uka toqet parlkasajj mä librojj akham siwa: ‘Moisesan cuerpop apasiñatakejj janiw jumajj derechonïktati sasaw Jesusajj Supayar sispachäna’ sasa. Jesusajj jan ajjsartʼasas Supayar jarktʼkchïnjja, janiw taqe kunjjar munañanïkänti, uk jupajj sum yatisïna. Ukatwa altʼat chuymanïtap laykojj Jehová Diosar jaytäna. Cheqas Jehová Diosakiw juchañchañatak chʼamanejja.

 7. 1) ¿Kunjamsa Jesusajj parlatapamp altʼat chuymanïtap uñachtʼayäna? 2) ¿Kunjamsa Jesusajj luratanakapampi altʼat chuymanïtap uñachtʼayäna?

⁷ Jesusajj aka Oraqenkkäna ukhajja, parlatapampiw altʼat chuymanïtap uñachtʼayäna. Janipuniw jupa pachpak jachʼañchayasiñ munkänti, jan ukasti Jehová Diosarupuniw jachʼañchayañ munäna (Mar. 10:17, 18; Juan 7:16). Ukhamarusa, arkirinakaparojj janipuniw arunakapampejj jiskʼachirïkänti. Jupanakarojj respetompiw uñjäna, sum sarnaqapjjatapatsa ‘walik ukham lurapjjtajja’ sasaw sirïna. Ukhamatwa jupanakar confiyatap uñachtʼayäna (Luc. 22:31, 32; Juan 1:47). Ukatsti, luratanakapampis altʼat chuymanïtapwa uñachtʼayarakïna. Janiw walja yänakanïñ thaqkänti, kunatï wakiskäna ukampikiw jakasïna (Mat. 8:20). Kuntï jaqenakajj jan lurañ munapkäna ukanaks altʼat chuymampiw luräna (Juan 13:3-15). Maysa toqetjja, jachʼa jachʼa tukuri jaqenakat sipansa, Jesusajj Diosar istʼasapuniw sarnaqäna (Filipenses 2:5-8 liytʼañataki). ¡Jiwañkamaw Diosan munañap phoqawayi! Ukhamatwa ‘altʼat chuymanïtap’ uñachtʼayäna (Mat. 11:29).

8, 9. ¿Kunjamsa altʼat chuymanïtas uñachtʼaysna?

⁸ ¿Kunjamatsa Jesusat yateqasisajj sarnaqatasampi altʼat chuymanïtas uñachtʼaysna? Jiwasatï altʼat chuymanïstan ukhajja, janiw mayninakat sipans jilanksnas ukham amuyaskañäniti. Janiw jiwasarojj yaqhanakar juchañchañajj waktʼkistuti. Ukatwa jan wal lurapjjatap jan uñchʼukktanti ni jiskʼachktansa (Luc. 6:37; Sant. 4:12). Janirakiw sum lurtʼañ yatitasats jilanksna ukham tukktanti (Ecl. 7:16). Irpir chuymaninakajja, altʼat chuymanïpjjatap laykojj janiw jilat kullakanakat jukʼampïpkaspas ukham amuyasipkiti. Jan ukasti, ‘altʼat chuymampiw’ tamankirinakarojj wali askit uñjapjje (Fili. 2:3; Luc. 9:48).

⁹ Walter J. Thorn jilatat amuytʼañäni. Jupajj 1894 maranwa tamanak tumptʼirjam Diosar serviñ qalltäna. Walja maranak qhepatjja, Jehová Diosan Qhanañchirinakapan haciendaparuw wallpanak uñjañapatak khitapjjäna, ukasti Nueva York markanwa jikjjatasi. Awisajja, wallpanak uñjañat sipansa yaqha cheqansa jukʼampinak lurañapäkaspa ukhamwa amuyasirïna. Ukham amuyirïna ukhajja, jilatajj jupa pachpaw akham sasirïna: “Jiskʼa laqʼa, ¿kunatsa jachʼa jachʼa tukuñ munaskta?” sasa (Isaías 40:12-15 liytʼañataki). Uka arunakapanjja, ¡wali altʼat chuymanïtapwa amuytanjja!

10. 1) ¿Kunjamsa parlatanakasampejj altʼat chuymanïtas uñachtʼaytanjja? 2) ¿Kunjamsa luratanakasampejj altʼat chuymanïtas uñachtʼaytanjja?

¹⁰ Altʼat chuymanïtasjja parlatasampiw uñachtʼaysna (Luc. 6:45). ¿Kunjamsa? Kunapachatï yaqhanakamp parlktan ukhajja, janiw sum luratasatsa ni kuntï jikjjatawayktan ukanakats jachʼañchasktanti (Pro. 27:2). Jan ukasti, mayninakan sum luratap uñjasasa sum sarnaqatap uñjasasa, ‘walik ukham lurtajja’ sasaw chʼamañchtʼtanjja (Pro. 15:23). Maysa toqetjja, luratanakasampiw altʼat chuymanïtas uñachtʼayaraktanjja. Jiwasajj janiw akapachan wali askit uñjatäña ni walja yänakanïñsa thaqktanti. Jan ukasti, Jehová Diosar taqe chuyma serviñatakejj kuna trabajotï yanaptʼkistaspa ukwa thaqtanjja (1 Tim. 6:6, 8). Taqe ukanakat sipansa istʼasirïsaw altʼat chuymanïtas uñachtʼaytanjja. Ukatwa Diosan markaparusa irpir chuymaninakarus istʼtanjja (Heb. 13:17).

11. Khuyaptʼayasirïñajj ¿kun sañsa muni?

¹¹ Maynejja, munasiñatwa yaqhanakat sinttʼasi ukhamarus khuyaptʼayasiraki. Jehová Diosasa ukat Jesusas ukham ‘munasirïpjjewa’ ‘khuyapayasirïpjjarakiwa’ sasaw Bibliajj qhanañchi (Luc. 1:78; 2 Cor. 1:3). ‘Khuyaptʼayasirïñajj janiw aleq sinteqtʼasiñakïkiti, jan ukasti tʼaqhesitanakar yanaptʼañatakiw chʼamañchistu’ sasaw mä librojj qhanañchi. Ukhamasti, mayninakat khuyaptʼayasisin yanaptʼapjjañäni.

12. 1) ¿Kunjamsa Jesusajj mayninakat khuyaptʼayasirïtap uñachtʼayäna? 2) ¿Kunjamsa Jesusajj luratanakapamp khuyaptʼayasirïtap uñachtʼayäna?

¹² ¿Kun lurasas Jesusajj khuyaptʼayasirïtap uñachtʼayäna? Uk kimsa toqet uñjañäni. Maya, mayninakatwa khuyaptʼayasirïna. Kunapachatï Mariampiru mayninakampiru Lazaron jiwatapat jachir uñjäna ukhajja, jupanakamp chikaw Jesusajj jachäna (Juan 11:32-35 liytʼañataki). Walja jaqenakaru jupan ukar jutir uñjäna ukhasa, ‘jupanakat khuyaptʼayasïnwa’ sasaw Bibliajj qhanañchi (Mar. 6:34). Paya, Jesusajj luratanakapampiw khuyaptʼayasirïtap uñachtʼayäna. Amuytʼañataki, khuyaptʼayasirïtapatwa mä viuda warmin wawaparusa, Lázaro chacharus jaktayäna (Luc. 7:11-15; Juan 11:38-44). Ukhamatwa, Lázaro chachajj alajjpachar sarañatak suytʼäwinëjjpachäna. Ukatsti, walja jaqenakaru jupan ukar jutir uñjäna ukhajja, Jesusajj khuyaptʼayasiñatwa “walja yatichäwinak yatichañ qalltäna”. Uka yatichäwinakaw jaqenakarojj sum jakasiñatak yanaptʼäna. Kunjamtï uñjktanjja, Jesusajj khuyaptʼayasiñatwa jaqenakarojj yanaptʼirïna (Mat. 15:32-38; 20:29-34; Mar. 1:40-42).

13. ¿Kunjamsa Jesusajj jaqenakar parlirïna? (5 janankir dibujo uñjjattʼam.)

¹³ Kimsa, Jesusajj parlatapampiw khuyaptʼayasirïtap uñachtʼayäna. Khuyaptʼayasirïtap laykuw mayninakarojj munasiñamp parlirïna, yamas yaqhanakamp tʼaqhesiyat uñjasipkäna ukanakarojj jukʼampwa khuyaptʼayäna. Jesusat parlkasajja, Mateo apostolajj Isaías profetan arunakapat amtasaw akham qellqäna: “Janirakiw pʼakit soqosarus pʼakjkaniti, janirakiw phustʼkanisa niya jiwirjam aqaskir mecharusa” sasa (Mat. 12:20; Isa. 42:3). ¿Kunsa uka arunakajj sañ muni? Jesusajj janipuniw jaqenakarojj jan wal uñjirïkänti. Arunakapampis janiw mayninakar chuym ustʼayirïkänti. Ukatsti, ‘llaktʼatanakar chuymachañatakiw’ jutïrit suma yatiyäwinak yatiyirïna (Isa. 61:1). Tʼaqhesitanakarus chuymachtʼirïnwa (Mat. 11:28-30). Arkirinakaparojj akham sarakïnwa: ‘Jehová Diosajj jumanakatsa, ukhamarak jan askit uñjatäpki uka jaqenakatsa llakisiwa’ sasa (Mat. 18:12-14; Luc. 12:6, 7).

14. ¿Kunjamsa mayninakat khuyaptʼayasirïtas uñachtʼaysna?

¹⁴ Jiwasajja, Jesusjamarakiw mayninakat khuyaptʼayasiñasa. Ukham lurañajj chʼamakïspawa. Ukampis Bibliajj “khuyapayasiñampi [...] isthapitay sarnaqapjjam” sasaw chʼamañchistu, ukhamatwa machaq jaqer tukus Diosatakjam sarnaqañäni (Colosenses 3:9, 10, 12 liytʼañataki). ¿Kunjamsa mayninakar munasitas uñachtʼaysna? Mayninakar qhanwa parltʼañasa ukat qawqsa jupanakar munastan uksa sañasarakiwa, uk lurañatakiw Bibliajj chʼamañchtʼistu (2 Cor. 6:11-13). Kunapachatï maynejj kunjamsa chuymapan jikjjatasi, kunanakas llakisiyi uk sistani ukhajja, sumwa istʼañasa (Sant. 1:19). Ukat akham sasaw jisktʼasiñasa: “Nayatï jupïrista ukhajja, ¿kunjamsa chuymajan jikjjatasiristjja? ¿Kunjam uñjatäñsa muniristjja?” sasa (1 Ped. 3:8).

15. ¿Kunjamsa tʼaqhesitanakarusa jan ukajj familiärapat maynejj jiwjje ukanakarus yanaptʼsna?

¹⁵ Luratanakasampiw khuyaptʼayasirïtas uñachtʼayaraktanjja. Khuyaptʼayasiñatwa tʼaqhesitanakarusa, familiäranakapat jiwapki ukanakarusa yanaptʼtanjja. Ukampisa, ¿kunjamsa yanaptʼsna? Romanos 12:15 qellqatajj akham siwa: “Jachapjjarakim jachirinakampejja” sasa. Jaqenakajja, kunjamsa jan waltʼäwinakap askichapjjaspa uk satäñak janiw munapkiti, jan ukasti, chuymachtʼatäñwa munapjje. Jupanakat llakisipjjaspa, kun awistʼatas sum istʼapjjaspa ukwa munapjje. Amuytʼañataki, mä kullakan wawapajj jiwäna ukhajja, jilat kullakanakaw jupar chuymachtʼapjjäna. Kullakajj akham siwa: “Utajar jutas nayamp chik jachapjjatapat walpun yuspärta” sasa. Maysa toqetjja, mayninakar yanaptʼasaw khuyaptʼayasirïtas uñachtʼayaraktanjja. Inas mä viuda kullakajj utapan kun askichañatak yanaptʼa munchispa. Jan ukajj chuymani mä jilatajja, hospitalaru, tantachäwinakaru, jan ukajj yatiyir sarañatakiw maynin yanaptʼatäñ munaspa. Ukhamanak lurasaw mayninakar yanaptʼsna (1 Juan 3:17, 18). Taqe uka lurañanakat sipansa, Diosan Arup yatiyañatak chʼamachasisaw jaqe masisar khuyaptʼayasitas uñachtʼaytanjja. Ukhamatakwa suma chuymani jaqenakarojj yanaptʼañäni.

16. Llakitanakarusa, llakimp aynachtʼatanakarusa, ¿kunjamsa yanaptʼsna?

¹⁶ Parlatanakasampiw khuyaptʼayasirïtas uñachtʼayaraktanjja. Llakitanakarusa, llakimp aynachtʼatanakarusa chuymachtʼañasawa sasaw Bibliajj sistu (1 Tes. 5:14). ¿Kunjam arunakampis chuymachtʼsna? Jupanakajj jiwasatak qawqha wakiskirisa ukwa sañasa. Kunja suma chuymanïpjjesa uk amuytʼasipjjañapatakiw yanaptʼañasa. Ukatjja, suma luratanakap uñjasasa ‘walik ukham lurtajja’ sañasarakiwa. Ak sañas wali askirakiwa, ‘Jehová Diosajj wali askitwa jumar uñjtamjja, ukatwa tamapankasktajja’ sasa (Juan 6:44). Ukatsti Jehová Diosajja, tʼaqhesipki aynachtʼatäpki uka servirinakapats llakisirakiwa sasaw saraksna (Sal. 34:18). Arunakasampejja, chuymachtʼatäñ munapki ukanakarojj wal yanaptʼsna (Pro. 16:24).

17, 18. 1) ¿Kunjamsa irpir chuymaninakajj tamankirinakar uñjapjjañapa? 2) ¿Kuna toqetsa jutïr yatichäwin yatjjataskañäni?

¹⁷ Jehová Diosajja, irpir chuymaninakajj jilat kullakanakar munasiñampi uñjapjjaspa ukwa muni (Hech. 20:28, 29). Diosaw tamankirinakar yatichapjjañapatakisa, yanaptʼapjjañapatakisa, chʼamañchtʼapjjañapatakis uttʼayi (Isa. 32:1, 2; 1 Ped. 5:2-4). Irpir chuymaninakajj janiw munañaparjamak jilat kullakanakar apnaqapkiti. Janirakiw jan lurirjamäpki uk lurapjjañapatakis jariyapkiti. Jan ukasti, Jehová Diosar kusisit loqtapjjañapatakiw yanaptʼapjje. Ukhamarusa, tamankirinakajj Jehová Diosar munasipjjatap laykuw taqe chuym servipjjani sasaw confiyapjjaraki (Mat. 22:37).

¹⁸ Kunjamtï uñjawayktanjja, Jesusajj altʼat chuymani, khuyaptʼayasiri ukhamänwa, ukatwa jupat yateqasiskakiñ muntanjja. Jutïr yatichäwinjja, kunjamatsa Jesusjam jan ajjsartʼirïsna, ukat amuytʼasirïsna ukwa yatjjataskañäni.