Jehová Diosan servirinakapajj “jan walinakat jitheqtañapawa”

 1. Diosan yupaychirinakapjamajja, ¿kunsa wali askit uñjtanjja?

WALJA markanakanwa Diosan Jehová sutipajj jachʼa utanakan qellqkatata jan ukajj museonakan kunanakatï utjki ukan qellqata uñsti. Inas uk uñjirïsta, uk uñjasajj wal kusisirïpachätajja. Cheqansa, Jehová Diosan Qhanañchirinakapjamajj wali askitwa Diosan sutiparojj uñjtanjja. Jiwasarukipuniw Diosan sutip parliritjja uñtʼapjjestu, janiw yaqha ukham tamajj utjkiti. Ukampis Diosan sutip apirinakjamajja, janiw uka qollan sutiru jiskʼachayañasäkiti.

 2. Diosan sutip apirinakjamajja, ¿kunjamsa sarnaqañasa?

² Jehová Diosampi askit uñjayasiñatakejj janiw sutip mayaki aytasiñasäkiti, jan ukasti mayitanakaparjamaw sarnaqañasaraki. Ukatwa Bibliajj akham sasin sapa maynirojj amtayistu: “Ñanqha lurañat jitheqtasim” sasa (Sal. 34:14). Apóstol Pablojj akham sasaw uk sum qhanañcharakïna: “Taqe khitinakatejj [‘Jehová Diosan sutip aytasipki’, (NM)] ukanakajja taqe jan wali luräwinakatjja jitheqtañapawa” sasa (2 Timoteo 2:19 liytʼañataki). Jiwasanakarojj Diosan sutip aytasirinakatwa taqenis uñtʼapjjestu, ukampis ¿kunjamsa ‘jan wali luräwinakatjja jitheqtaraktanjja’?

3, 4. Biblia toqet yatjjatirinakatakejja, ¿kawkïr qellqat amuyañas wali chʼamajja?

³ Kuna toqet parlkasas 2 Timoteo 2:19 qellqatajj arsusïna uka amuytʼañäni. Uka qellqatanjja, “Diosajj mä suma jan onjjtkaya [cimiento] uskuwayi” sasaw sistu, ukansti pä qellqantat arunakaw uñstaraki. Nayrïrejj akham siwa: “[Jehová] Tatitojj uñtʼiwa jupankirinakarojja” sasa. Uka arunakajj Números 16:5 qellqatat apsutawa (Pasïr yatichäwi uñjjattʼam). Payïristi akham sarakiwa: “Taqe khitinakatejj [Jehová Diosar] iyawsirïki ukanakajja taqe jan wali luräwinakatjja jitheqtañapawa” sasa. Ukampis ‘aka payïrejj kawkïr textot apsutäpachasa’ sasaw Biblia toqet yatjjatirinakajj sapjjaraki. ¿Kunatsa?

⁴ Amuyatajja, Pablojj yaqha cheqat apstʼasaw uka arunakjja parlaskäna. Ukampis Hebreo Arut Qellqatanakanjja, janiw mä cheqansa uka arunakajj uñstkiti. Ukhamajja, “taqe khitinakatejj [Jehová Diosar] iyawsirïki ukanakajja taqe jan wali luräwinakatjja jitheqtañapawa” siski uka arunakjja, ¿kawkjatsa Pablojj apspachäna? Janïr uka arunak siskasajja, Pablojj Números 16 jaljatwa parlaskäna, ukanjja kunjamsa Coré chachajj Dios contra saytʼäna uk toqetwa parli. Ukhamajj ¿janit payïr qellqatajj uka tiempon kutkatasirinakat parlkarakpacha?

5-7. ¿Pablojj 2 Timoteo 2:19 qellqatanjja kuna toqet amtasas parlaskäna? (12 janankir dibujo uñjjattʼam.)

⁵ Moisés contra, Aarón contra saytʼasiñatakejja, Coré, Datán, Abiram sat chachanakaw pʼeqtʼapjjäna (Núm. 16:1-5). Moisesarojj taqe jaqenak nayraqatanwa jiskʼachapjjäna, janirakiw Diosan uttʼayat jilïriparjamas uñjapkänti. Maysa toqetjja, uka jaqenakajj israelitanak taypinwa jakasipkäna, ukajj Diosar taqe chuyma servirinakatakejj janiw askïkänti. Ukampisa, khitinakasa cheqpach yupaychirinakapajj uk qhanstayañ horasajj purinïna ukhajja, Jehová Diosajj qhana arunakampiw ewjjtʼarakïna.

⁶ Qellqatajj akham siwa: “[Jehová] Tatitusti Moisesarojj sänwa: ‘Taqe israelitanakar sanim, jitheqtapjjpan carpata, kawkhantï Coré, Datán, ukhamarak Abiram chachanakajj utjapki ukkhatjja’ sasa. Moisesasti Israelan jilïrinakapampi chikaw sarapjjäna, kawkhantejj Datán, ukhamarak Abiram jaqenakajj jikjjatasipkän ukkharu. Ukatsti markpacharuw säna: ‘Jitheqtapjjam uka juchan ñanqha jaqenakan carpanakapatjja, janiraki llamktʼapjjamti kunatejj jupanakankki ukanakjja, jan jumanakasa juchanakapat jiwapjjañamataki’ [sasa]. Taqe markpachaw jitheqtapjjäna Coré, Datán, Abiram jaqenakan jakʼanakapatjja” (Núm. 16:23-27). Ukhamatwa Jehová Diosajj taqpach kutkatasirinakarojj jiwarayäna. Cheqpach yupaychirinakasti, mä arunjja, jan walinakat jitheqtirinakajj qhespiyatäpjjänwa.

⁷ Kunapachatï Pablojj 2 Timoteo 2:19 qellqatan “[Jehová] Tatitojj uñtʼiwa jupankirinakarojja” sasin siskäna ukhajja, Números 16:5 qellqatatwa parlaskäna. Ukatjja, Pablojj akham sarakïnwa: “Taqe khitinakatejj [Jehová Diosar] iyawsirïki ukanakajja taqe jan wali luräwinakatjja jitheqtañapawa” sasa. Ukham sasajja, Números 16:23-27 qellqatatwa parlaskarakpachäna. Ukhamajja, kunatï kutkatasirinakar paskäna uka toqetwa parlaskäna. ¿Ukajj kunsa yatichistu? Jehová Diosajj jaqen chuymap sum yati, ukat khitinakas taqe chuyma yupaychasipki uksa sum amuyaraki. Ukatjja, yupaychirinakapajj jankʼaki jan walinakat jitheqtapjjaspa ukwa munaraki.

 8. Cristian tamankkasasa, Diosan sutip aytaskasasa, ¿kunamp lurañas wali wakiskirejja?

⁸ Moisesan urunakapan kunanakatï paskäna ukanakat parlkasajja, Pablojj Timoteorojja, Jehová Diosamp sum apasiñatakejj jankʼakiw kuna jan walitsa jarkʼaqasiñama sasaw amtayaskäna. Janiw maynejj cristianötwa sañapakïkänti, janirakiw Diosan sutip aytasiñakis wakiskänti, kunjamtï Coré chachasa arkirinakapasa lurapkäna ukhamjja. Jan ukasti, Diosan cheqpach yupaychirinakapajj ‘jan walinakatjja jankʼakiw jitheqtapjjañapäna’. ¿Kunjamsa ukajj Timoteor yanaptʼäna? Diosan jichha tiempo servirinakapajja, ¿kunanaksa Pablon ewjjanakapat yateqsna?

 9. ‘Arunakjjat chʼajjwañanakajja’, ¿kunjamsa nayra cristianonakar jan waltʼaykäna?

⁹ Cristianonakjamajj kuna jan walinakatsa jitheqtañasa ukjja Diosan Arupanjja qhan sistu. Amuytʼañataki, Pablojj akham sasaw Timoteor säna: “Jan arunakjjatjja chʼajjwapjjpati”, “amuyasim [...] jan kunataki servir chʼusa arunakatjja” sasa (2 Timoteo 2:14, 16, 23 liytʼañataki). Tamankirinakatjja yaqhepajj kʼari chuyman apostatanakan yatichäwinakapwa parlapjjerïna. Yaqhepasti chʼajjwañ arunakwa yatichapjjarakirïna, uka arunakajj janis Biblia contrapunïkchïnjja, jilat kullakanakaruw jan waltʼaykänti, janiw mayachtʼat sarnaqañaru chʼamañchkänti. Ukatwa Pablojj ‘jan yäqamti loqhe chʼajjwañanakaru’ sasajj Timoteor säna.

10. ¿Kʼari chuyman apostatanakan yatichäwiparojj kunjamsa uñjañasa?

¹⁰ Jichhürunakanjja, janiw khitisa tama taypirojj apostatanakan yatichäwinakap apankapuniti. Ukampis Biblia contra parlir yatichäwinak utjchi ukhajja, kawkitsa jutpan, janiw istʼañasäkiti. Ukhamaraki, janiw kʼari chuyman apostatanakampejj kuna toqes parlañasäkiti, ni Internet toqes jupanakar qellqañasäkiti. Janirakiw yanaptʼañ laykus ukjja lurañasäkiti. Kunjamtï akan yateqktanjja, jupanakamp parlañajj Diosar jan istʼañamp sasispawa. Jehová Diosajj janiw jupanakamp mä jukʼa parlañassa munkiti, ukhamajj kʼari chuyman apostatanakan yatichäwinakapatjja jitheqtapjjañasawa.

11. 1) ¿Kunas ‘loqhe chʼajjwañanakaru’ apaspajja? 2) ¿Kunjamsa irpir chuymaninakajj “suma yatichäwi” uñachtʼayapjjaspa?

¹¹ Tama taypinjja yaqha toqetwa jan waltʼañajj utjarakispa. Amuytʼañataki, kuna anatañanakasa, uñtañanakasa, ischʼukiñanakasa walïski ukjja, sapa mayniw mayj mayja uñjtanjja, ukhamajj ukanakaw ‘loqhe chʼajjwañanakaru’ apistaspa. Ukampis maynitejj jan walinakaru chʼamachaspa ukhajja, “chʼajjwañaruw” apistaspa sasajj janiw irpir chuymaninakajj ukhamak uñchʼukipjjañapäkiti, jan ukasti jankʼakiw askichapjjañapa (Sal 11:5; Efe. 5:3-5). Maysa toqetjja, janirakiw irpir chuymaninakajj amuyunakaparjamaki ewjjapjjañapäkiti, jan ukasti aka arunakarjamaw lurapjjañapa: “[Jehová] Tatitun ovejanakapsti sum awatipjjam, [...] jan jumanakas uka ovejanakjjaru munañïpkasmasa ukhamjja, jan ukasti ovejanakarojj mä suma yatichäwi uñachtʼayasa” (1 Ped. 5:2, 3; 2 Corintios 1:24 liytʼañataki).

12, 13. 1) ¿Kunjamsa Jehová Diosan Qhanañchirinakapajj anatañanakarusa, uñtañanakarusa, musicanakarus uñjapjje, ukat Bibliajj uka toqet kamsisa? 2) ¿Kunanakansa 12 tʼaqan yatjjatktan uka Biblian yatichäwinakapajj yanaptʼarakistaspa?

¹² Jehová Diosan Qhanañchirinakapajja, videonaksa, videojuegonaksa, libronaksa, musicanaksa janiw “walïskiti janicha” sasinjja uñakipapkiti. ¿Kunatsa? Biblianjja, sapa cristianow “[amuytʼasiñsa,] kunatejj walïki, jan walïkaraki uk uñtʼañsa” yateqapjjañapajja sasaw chʼamañchistu (Heb. 5:14). Ukhamajja, kawkïr anatañasa, uñtañasa, jan ukajj kawkïr musicas walïski uk yatiñatakejja, walja yatichäwinakaw Biblian utji. Ukatjja, taqe kunansa ‘kunatejj Diosatakejj askïki ukpunwa lurañasa’ (Efe. 5:10). Ukhamaraki, Biblianjja, familia pʼeqtʼirinakaw kunanakas walïski uk ajlliñapa sasaw yaticharaki (1 Cor. 11:3; Efe. 6:1-4).

¹³ Parlaniwayktan uka Biblian yatichäwinakapajj yaqha toqenakatsa wal yanaptʼarakistaspa. Amuytʼañataki, janiw taqenejj pachpsa isisktanti, ni kʼachachasktansa, janiw kikpsa qollasktanti, ni pachpsa manqʼkaraktanti, ukhamajj ukanakaw chʼajjwañ apanirakispa. Ukampis Jehová Diosan servirinakapajj janiw uka toqenakat chʼajjwañasäkiti. Janitï Diosan mayitanakap pʼakintkchi ukhajja, sapa maynitäjjewa, “Tatitun mä serviripajj janiw nuwasiñanakan sarnaqañapäkiti, ukatsipana taqenimpis sumankañapawa” (2 Tim. 2:24).

14. Jan wali jaqenakat jitheqtañasatakejja, ¿kunjamsa Pablojj amuytʼayäna?

¹⁴ ¿Kunjamatsa Jehová Diosan sutip aytasirinakajj ‘jan wali luräwinakat jitheqtapjjarakispa’? Juchanak luririnakatjja jitheqtapjjañapawa. Apóstol Pablojja, “Diosajj mä suma jan onjjtkaya [cimiento] uskuwayi” siskäna uka qhepatjja, akham sarakïnwa: “Mä jachʼa utanjja, janiw qori vaso, qollqe vasokiti utjkejja, jan ukasti kʼullu vaso, ñeqʼe vasorakiw utji; mayanakasti yäqañataki, yaqhanakasti jan yäqañataki” sasa (2 Tim. 2:20, 21, MT). Ukhamajj “jan yäqañataki” apnaqaski uka vasonakatjja jitheqtañasawa.

15, 16. Pablon ‘jachʼa utat’ parlatapatjja, ¿kunsa yateqsna?

¹⁵ ¿Kamsañsa Pablojj munpachäna? Tamarojj ‘mä jachʼa utaruw’ uñtayäna, ukat tamankirinakarusti ‘vasonakaruw’ uñtayarakïna. Mä utanjja, yaqhep vasonakasa jan ukajj yaqha ukham yänakasa, qʼañuchataw uñjasispa. Ukatwa qʼomäkis ukanakampejj jan kittatäkiti. Sañäni, mä cocina utanjja, qʼomäkis ukanakajj suma cheqar imatawa.

¹⁶ Tama taypinjja niya ukhamarakiwa. Yaqhepajj janiw Diosan yatichäwinakaparjam sarnaqañ munapkiti. Ukhamajj Dios nayraqatan sum sarnaqañataki chʼamachasirinakajja, janiw jupanakampejj chikachasipjjañapäkiti (1 Corintios 15:33 liytʼañataki). Niyakejjay tama taypin jan wali sarnaqerinakat amuyasiñasächejja, anqankirinakatjja jukʼampïñapawa. Akapachanjja, ‘qollqe chuyma, awk taykarus jan istʼiri, Diosar arkañsa jan muniri, kʼari arunak apnaqeri, jan wali luräwinakampi apnaqayasiri, aski luräwinakar uñisiri, wali qhoru, aljantasiri, Diosar munañat sipansa, munañanakap thaqeri’ ukham jaqenakaw utji (2 Tim 3:1-5).

17. ¿Kunjamsa taqe chuyma Diosar servir israelitanakajj jan walinakat jitheqtapjjatap uñachtʼayapjjäna?

¹⁷ Kunjamsa israelitanakajj Coré, Datán, Abiram sat chachanakat jitheqtapjjäna ukjja wali sum Bibliajj qhanañchi: “Jankʼakiw jitheqtapjjäna” sistuwa (Núm. 16:24, 27, NM). Janiw pächasipkänsa, ni mä jukʼsa qheparapkänti. Ukatjja, ‘taqe toqetwa jitheqtapjjäna’ sasaw sarakistu. Kunanaktï Moisesajj siskäna ukanakjja sum istʼapjjäna, ukarjamaw phoqapjjarakïna. Ukham lurasajja, Jehová Dios toqetwa saytʼasipjjäna, ukatjja, jan walinak contra saytʼapjjatapwa uñachtʼayapjjarakïna. ¿Kunanaksa ukat yateqsna?

18. “Waynanakan jan wali luräwinakapatjja jitheqtam” sasajja, ¿Pablojj kamsañs Timoteorojj munäna?

¹⁸ Kunanakatï Jehová Diosat jitheqtaykistaspa ukanakatjja, amuyasiñasawa, jankʼakiw jarkʼaqasiñasaraki. Apóstol Pablojj akham sasaw Timoteor ewjjtʼarakïna: “Waynanakan jan wali luräwinakapatjja jitheqtam” sasa (2 Tim 2:22). Ukapachajj Timoteojj jilïrëjjänwa, inas 30 maranëjjchïna, ukampis ‘waynanakan jan wali munañanakapatjja’ Timoteojj jitheqtañapänwa, uka jan walinakarojj janiw waynanakakejj puripkiti, jan ukasti jilïrinakas awisajj purtʼasipjjarakiwa. Jesusajj niya ukhamarakwa yatichäna: “Nayramatejj jucharu tinkuntayirjamächi ukajja, apsusjjam ukatsti jayaru liwtam” sasa (Mat. 18:9). Jichhürunakanjja, ukhamarakiw uka ewjjanakar istʼir cristianonakajj jan pächasisa, jankʼaki jan walinakatjja jitheqtapjje, ukhamat Diosamp sum apasiskakiñataki.

19. Diosat jan jitheqtañatakejja, ¿kunsa yaqhep jilat kullakanakajj amtapjje?

¹⁹ Yaqhep jilat kullakanakajja, janïr Jehová Diosan Qhanañchiripäkasajj machirïpjjänwa, ukampis jichhajj jan mä jukʼsa malltʼañatakiw amtawayapjje. Yaqhepanakajj jan wali amuyunak armañatakiw chʼamachasipjjaraki, ukatwa kuna anatañanaksa, uñtañanaksa, musicanaksa qʼal apanukupjje (Sal. 101:3). Amuytʼañataki, mä jilatajj janïr Jehová Diosan Qhanañchirïpäkasajja, wal fiestanakar sarirïna, ukanakansti jan wali lurañanaka, jan wali sarnaqañanakaw utjirïna. Ukampis jichhajja, cheqa yatichäwinak yateqjjasajja, janiw thoqoñ munjjeti. Janiw nayra jan wali amuyunakap amtañsa munkiti, ukatwa jilat kullakanakajj tantachasipjje ukhasa jan thoqjjarakiti. Cheqansa, cristianonakarojj alcoholat wakichat umañanakasa thoqoñanakasa janiw taqpachapunejj jarkʼaskiti, yaqha ukhamanakasa, jan Biblia conträkchi ukhajja, walikïskiwa. Ukampis Diosat jitheqtayañ munistaspa ukhajja, jankʼakiw kuna jan walsa apanukuñasa.

20. Jan walinakat jitheqtañajj awisajj chʼamakïkchisa, ¿kun yatiñas chuymachistu?

²⁰ Diosan sutip apasajja, ukarjamaw sarnaqañasaraki. ‘Jan walinakatsa’, ‘ñanqha lurañanakatsa jitheqtañasawa’ (Sal. 34:14). Ukham lurañajj awisajj chʼamakïspawa. Ukampis Jehová Diosajj “jupankirinakarusa” istʼasirinakarusa munasipuniniwa, ukaw wal chuymachistu (2 Tim. 2:19; 2 Crónicas 16:9a liytʼañataki).