Jilat kullakanakar uñjir superintendentenaka

AKA oraqenkkäna ukhajja, Jesusajj ‘suma awatirïtapwa’ uñachtʼayäna (Juan 10:11). Jupar arkir jaqenakat Jesusajj wal sinttʼasïna, “jupanakajj jan awatirini ovejanakjam qʼala usuchnoqata, ananukuta ukhamäpjjänwa” (Mat. 9:36). Israel markan religión pʼeqtʼirinakat sipansa Jesusajj wali suma awatirïnwa. Uka religión pʼeqtʼirinakajj Diosan ovejanakapar janiw sum uñjapkänti, ukatwa Diosar servirinakajj jan yäqata qʼala aynachtʼat jikjjatasipjjäna (Ezeq. 34:7, 8). Ukampis Jesusajj Diosan ovejanakapar yatichañatakiw chʼamachasïna, jupanak laykus jakañ vidapwa churäna. Pedrompi mayni apostolonakampejja, Jesusajj kunja munasiñampis jaqenakar uñjäna uk sumwa amuyapjjäna, ukatwa jupat yateqasisajj ‘almanakap awatirïki uñjirïkaraki’ uka Diosar kuttʼanjjapjjañapatak jaqenakar yanaptʼapjjäna (1 Ped. 2:25).

² Mä kutejja Diosar serviñan jaqenakar yanaptʼañasa, sum cuidañas kunja wakiskirisa ukwa Jesusajj Pedror amtayäna (Juan 21:15-17). Kuntï yateqkäna uk Pedrojj janipuniw armkpachänti. Mä qhawqha tiempotjja, jupa pachpaw ancianonakar akham säna: “Diosan congregacionaparojj sum awatipjjam, jumanakar katuyatätap layku, ukampis jan obligatjamajja, jan ukasti Dios nayraqatan taqe chuyma uk lurapjjam; jan qollqe chuymäpjjamti, janirak kunatï jumanakatak walïki ukak thaqapjjamti, antisas taqe chuym yanaptʼañ munirïpjjam; janirak Diosan herenciaparojj munañanakamaruk apnaqapjjamti, jan ukasti congregacionatakejj yateqaskayäpjjam” sasa (1 Ped. 5:1-3). Jichhürunakanjja, superintendentenakajj uka arunakaruw istʼapjjaraki. Jesusjamarakiw Diosan ovejanakapar suma chuymamp uñjapjje, Diosar servisipkakiñapatakis yanaptʼapjjarakiwa (Heb. 13:7).

³ Congregacionanakanjja Diosan espíritu santopamp ajllit superintendentenakaw utji, ukham jilatanak utjatapat wal yuspärtanjja. Kuna laykutejj jupanakaw chʼamañchtʼapjjestu, sapa mayniruw sum uñjapjjestu, tantachäwinaks sarayapjjarakiwa. Cheqansa uka tantachäwinakanwa Diosar jukʼamp munasiñatak yanaptʼanak katoqtanjja (Rom. 12:8). Maysa toqetjja, jupanakaw kunanakatï jan waltʼaykistaspa ukanakatsa jan wali jaqenakatsa jarkʼaqapjjestu, ukhamatwa wali seguro jikjjatastanjja (Is. 32:2; Tito 1:9-11). Ukhamarusa predicañatakiw chʼamañchtʼapjjarakistu, jupanakajj uka toqet wali yateqaskayäpjjewa (Heb. 13:15-17). Uka jilatanakajj Jehová Diosan regalopäpjjewa, jupanakaw congregacionarojj nayrar sartaskakiñapatak yanaptʼapjje (Efes. 4:8, 11, 12).

⁴ Jehová Diosajj congregacionar sum uñjasiñapwa muni, ukatwa kuna mayitanakampis (requisitonakampis) superintendentenakajj phoqapjjañapa uk Bibliar qellqayawayi. Uka mayitanak phoqer superintendentenakajj espíritu santomp ajllitäpjjewa (Hech. 20:28). Superintendentet serviñajj mä jachʼa responsabilidädawa, ukatwa Biblian mayitanakapajj superintendentenakatakejj wali importantejja. Ukampis Biblian mayitanakapajj Jehová Diosar munasipki, jupar istʼañ munapki ukanakatakejj janiw jan phoqañjamäkiti. Antisas superintendentet serviñatak chʼamachasipki uka jilatanakajja, Biblian ewjjtʼanakaparjamaw jakañ vidapan sarnaqapjje.

⁵ Kuna mayitanakampis mä superintendentejj phoqañapa ukajj Biblian qellqatawa, mä arunjja 1 Timoteo ukat Tito libronakan qellqatawa. Apóstol Pablojj Timoteor akham sänwa: “Aka arunakajj wali confiykañawa: maynitejj ancianot serviñatak wal chʼamachasiskchejja, mä suma luräwi katoqañwa jupajj muni. Ukhamasti ancianojj sum sarnaqañapawa, ukhamat jupatjja jan khitis jan wal parlañapataki, mä sapa warminikïñapawa, janiw kunansa jiljañapäkiti, wali amuyumpiw kuns lurañapa, taqe kunsa suma lurirïñapawa, katoqtʼasirïñapawa, yatichañatakis wakichatäñapawa, janiw machirïñapäkiti, janiw nuwasirïñapäkisa, jan ukasti amuytʼirïñapawa, janiw chʼajjwirïñapäkiti, janirakiw qollqe chuymäñapäkisa. Familiaparus sum pʼeqtʼañapawa, wawanakapas istʼasiri suma sarnaqeri ukhamäpjjañapawa. (Maynitejj familiapar jan sum pʼeqtʼañ yatkchejja, ¿kunjamaraki Diosan congregacionaparojj pʼeqtʼaspasti?). Janiw machaq creyentëñapäkiti, ukhamat jan jachʼa jachʼa tukuñapataki, janirak kunjamtï Diablojj juchañchatäki ukham juchañchatäñapataki. Khitinakatejj jan congregacionankapki uka jaqenakas jupjjat sum parlapjjañapawa, ukhamat jiskʼachat jan uñjasiñapataki, Diablon trampaparus jan jaltʼañapataki” sasa (1 Timoteo 3:1-7).

⁶ Apóstol Pablojj Titor akham sarakïnwa: “Nayajj Creta islaruw jumar jaytawaysma, ukhamat kunanakatï jan walïki ukanak askichañamataki, sapa markan ancianonak uttʼayañamataki, kunjamtï nayajj sisksma ukarjama: mä ancianojj sum sarnaqañapawa, ukhamat jan khitis jupat jan wal parlañapataki, mä warminikïñapawa, wawanakapajj creyentëpjjañapawa, janiw jan wali sarnaqerit uñjatäpjjañapäkiti ni kutkatasirïpjjañapäkisa. Diosan mayordomopjamajja, ancianojj sum sarnaqañapa, ukhamat jan khitis jupat jan wal parlañapataki, janiw munañaparuk kun lurañsa munirïñapäkiti, janiw jankʼaki colerasirïñapäkiti, ni machirïñapäkisa, ni nuwasirïñapäkisa, janiw qollqe chuymäñapäkiti, janirakiw kunatï jupatak walïki ukak thaqerïñapäkisa, antisas jupajj katoqtʼasiri, kunatejj walïki ukar munasiri, taqe kuns suma amuytʼasis luriri, cheqapar sarnaqeri, Diosat jan jitheqtiri, munañapamp jan apnaqayasiri ukhamäñapawa. Yatichkasajj Diosan cheqa arunakaparjamaw yatichañapa, ukhamat cheqa yatichäwirjam chʼamañchtʼañapataki, cheqa yatichäwi contra parlapki ukanakarusa cheqañchañapataki” sasa (Tito 1:5-9).

⁷ Yaqhep cristiano jilatanakajj uka mayitanak phoqañajj chʼamäkaspas ukhamwa amuyapjjaspa. Ukampis desanimasiñat sipansa, uka mayitanak phoqañatakiw wal chʼamachasipjjañapa. Ukhamatwa suma chuymanïpjjatap uñjasajj jilat kullakanakajj jupanakat yateqasiñ munapjjani. Congregacionatak regalöpki uka chachanakat parlkasajja, Jehová Diosaw superintendentenak uttʼayi sasaw apóstol Pablojj säna, “ukhamat jupanakajj santo jilatanakar cheqañchapjjañapataki, yaqhanakar servipjjañapataki, Criston cuerpopar chʼamañchapjjañapataki. Jupanakaw taqe kunanaktï jiwasajj creyktan ukanakan mayachtʼatäñasatakisa Diosan Yoqapar sum uñtʼañasatakis yanaptʼistani, ukhamat jilïr jaqëjjañasataki, qhawqchʼäkitejj Cristojj ukar puriñkam jiltañasataki” sasa (Efes. 4:8, 12, 13).

⁸ Superintendentenakajj janiw sinti waynitüpkiti, ni machaq creyentëpkisa, jan ukasti cristianjamajj experienciani jilatanakäpjjewa. Biblian qellqatanakapsa sum amuyapjje, congregacionankirinakarus wal munasipjjaraki. Jan ajjsarirïpjjewa, jan walinak lurapki ukanakarus jan ajjsarasaw cheqañchapjje, ukhamatwa jilat kullakanakarojj jan walinakat jarkʼaqapjje (Is. 32:2). Jupanakajj Jehová Diosar serviñan suma saytʼat jilatanakäpjjatapsa, Diosan ovejanakapat wal llakisipjjatapsa congregacionajj sumwa amuyi.

⁹ Superintendentet serviñ munapki uka jilatanakajja, yatiñanïpjjatapwa jakäwipan uñachtʼayapjjañapa. Casadonakajja matrimonionakatak mayitanakajj utjki ukwa sum phoqapjjañapa, mä arunjja mä sapa warminikïpjjañapawa, ukatjja familiaparus sum pʼeqtʼapjjañapa. Jehová Diosar servir wawanakapas istʼasiri suma sarnaqeri ukhamäpjjañapawa, janiw jan wali sarnaqerit uñjatäpjjañapäkiti ni kutkatasirïpjjañapäkisa, ukhamatwa congregacionankir jilat kullakanakajj confianzamp familia toqetsa Jehová Diosar sum serviñ toqetsa ewjjtʼanak mayipjjani. Mä superintendentejj sum sarnaqañapa, janiw khitis jupat jan wal parlañapäkiti, khitinakatejj jan congregacionankapki uka jaqenakas jupjjat sum parlapjjañapa. Ukhamatwa jupanakar juchañchasajj jan khitis congregacionan sutip qʼañuchkaniti. Maysa toqetjja, janirakiw mä jachʼa jucha luratapat censuratäpjjañapäkiti. Ukhamatwa jilat kullakanakajj seguro jikjjatasipjjani, ‘jupanakaw Jehová Diosar serviñan yanaptʼapjjestani’ sasaw confiyapjjarakini, ukatjja jupanakat yateqasiñsa wal munapjjani (1 Cor. 11:1; 16:15, 16).

¹⁰ Jichha tiempon superintendente jilatanakajja, Israel tiemponkir ancianonakjamaw kunayman lurañanakamp phoqapjje. Israel markankir ancianonakajj “yatiñani, amuytʼasiri, experienciani” ukhamäpjjänwa (Deut. 1:13). Ancianonakajj pantjasir jaqenakäpjjewa, ukampis congregación anqansa, congregación taypinsa Bibliarjam sarnaqerita, Jehová Diosar ajjsaririta, Biblian yatichäwinakaparjam sarnaqerit uñtʼatäpjjewa (Rom. 3:23). Ukham jaqet uñtʼatäpjjatapatjja, jupanakajj congregacionankirinakar qhana arunakampi jan ajjsartʼasaw parltʼapjjaspa.

¹¹ Superintendentenakajj janiw kunansa jiljapjjañapäkiti, janirakiw jilat kullakanakarojj kuntï jan puedipki uk lurapjjañap mayipjjañapäkiti. Ukatjja jupanakajj taqe kuns wali amuyumpiw lurapjjañapa, munañapamp jan apnaqayasiri ukhamäpjjañaparakiwa. Kusistʼañ toqensa, manqʼañ toqensa, umañansa ukat yaqha ukham toqenakansa janiw jiljapjjañapäkiti. Wali amuyumpiw alcoholani umañanaksa umapjjañapa, ukhamat machirit jan uñtʼatäpjjañapataki. Machantat mä jaqejj jan lurañanakwa luraspa jan ukajj parlaspa, janiw congregacionarus Jehová Diosar serviñan yanaptʼkaspati.

¹² Congregacionar sum uñjañatakejja, superintendentejj taqe kunsa sum lurirïñapawa. Ukhamätapajj uñnaqapansa, isisitapansa, utapansa, yaqha ukhamanakansa qhanaw amuyasiñapa. Janiw qhepatak apur apur kuns lurañapäkiti, jan ukasti janïräkipanwa wakichtʼasiñapa. Ukatjja Biblian wiñay yatichäwinakap (principios bíblicos) respetompiw uñjañapa.

¹³ Mä superintendentejj amuytʼirïñapawa. Congregacionankir mayni ancianonakampis sumwa apasiñapa. Jupa pachpat sum amuytʼasisajja, janiw mayninakarojj kuntï jan puedipki uk lurapjjañap mayiñapäkiti. Niyakejjay jupajj amuytʼirïchejja, jupakis mayni ancianonakat sipan jukʼamp sum amuykaspa ukham janiw amuyañapäkiti, jupakis wali suma chuymanïkaspa ukhams janirakiw amuyañapäkiti. Antisas Bibliarjamapuniw kuns amtañapa, ukatjja Jesusat yateqasiñatakiw chʼamachasiñaparaki (Filip. 2:2-8). Mä ancianojj janiw chʼajjwirïñapäkiti, ni nuwasirïñapäkisa, jan ukasti wali respetompiw mayninakajj jupat sipan jilankapkaspas ukham uñjañapa. Janirakiw munañaparuk kuns lurayañ munirïñapäkiti, mä arunjja janiw arsutaparjampun kuns lurayañapäkiti. Ukatsti janiw jankʼak colerasiñapäkiti, jan ukasti taqe cheqan sumankañ utjañapatakiw chʼamachasiñapa.

¹⁴ Superintendentet servir jilatanakajja sum amuytʼasisaw kuns lurañapa, mä arunjja jan waltʼayasiñanakajj utjki ukhajj llampʼu chuymanïñapawa, janiw jankʼak colerasiñapäkiti ni jankʼakis kun juzgañapäkiti. Suma amuytʼir mä jaqejj Jehová Diosan mayitanakap sumwa amuyi, ewjjtʼanaksa taqe chuymaw katoqasi, ukatsti instruccionanakarjamaw taqe kuns luri, janiw pata chuymak ukanak lurkiti.

¹⁵ Mä superintendentejj kunatejj walïki ukar munasiri, cheqapar sarnaqeri, Diosat jan jitheqtiri ukhamäñapawa sasaw apóstol Pablojj Tito jilatar amtayäna. Taqe ukanakajja kunjamsa superintendentejj mayninakar uñji, kunjamsa kunatï walïki uk lurañatak chʼamachasi ukanwa qhan amuyasi. Jehová Diosan yatichäwinakap respetompiw superintendentejj uñjañapa, janirakiw kunasa ni khitisa Diosar munasiñap apaqañapäkiti. Ukatjja secretonak sum imañwa yatiñapa, katoqtʼasirirakïñapawa, mayninakaw jupatakejj nayrankañapa, kunanakapatï utjki ukampis taqe chuymaw mayninakar yanaptʼañaparaki (Hech. 20:33-35).

¹⁶ Mä suma superintendentejj yatichañatakejj wakichtʼatäñapawa. Titor carta qellqkäna ukanjja, Pablojj akham sänwa: “Diosan cheqa arunakaparjamaw yatichañapa, ukhamat cheqa yatichäwirjam chʼamañchtʼañapataki, cheqa yatichäwi contra parlapki ukanakarusa cheqañchañapataki” sasa (Tito 1:9). Mä superintendentejj mayninakarojj sumwa amuytʼayañapa, pruebanakampiw parlañapa, jisktʼanakarus sumwa qhanañchtʼañaparaki. Bibliampiw mayninakan chuymanakapar purtʼañapa, Diosar jukʼamp confiyapjjañapatakis yanaptʼañapawa, “suma tiemponsa jan wali tiemponsa” yatichañaparakiwa (2 Tim. 4:2). Juchar purtʼasirirojj pacienciampiw cheqañchañapa, payachaski ukarus Diosar confiyaskakiñapatakiw yanaptʼañaparaki. Plataformatsa ukat mayni saparukis wali sum parltʼañ yatiñapa.

¹⁷ Ancianonakajj taqe chuymaw predicapjjañapa. Predicacionan Jesusat yateqasiñatak chʼamachasipjjatapajj qhana amuykayäñapawa. Jesusatakejja suma yatiyäwinak predicañaw jakäwipan nayrankäna, suma yatiyirïpjjañapatakis discipulonakapar yanaptʼarakïnwa (Mar. 1:38; Luc. 8:1). Jesusat yateqasisajja, ancianonakajj wali ocupatäkasas predicañatakiw wal chʼamachasipjje, uk uñjañajj jilat kullakanakarojj taqe chuyma predicañatakiw chʼamañcharaki. Ukatjja ancianonakajj familiapampi ukat yaqha jilat kullakanakamp predikir mistupjje ukhajja, maynit maynikamaw chʼamañchtʼasipjje (Rom. 1:11, 12).

¹⁸ Ancianonakajj walja lurañanakampiw phoqapjjañapa. Cheqansa janiw khitis Jehová Diosan mayitanakap cheqaparjam phoqkaspati, ukampis uka mayitanak sum phoqañatakiw ancianonakajj chʼamachasipjjañapa. Yaqhep ancianonakajj wali suma chuymanïpjjewa, yaqhepasti mä kuns sum lurtʼañ yatipjjaraki. Ukhamatwa cuerpo de ancianos taypinkir jilatanakajj Jehová Diosan congregacionapar sum uñjapjje. 

¹⁹ Mä jilatar superintendentet serviñapatak recomendkasajja, ancianonakajj apóstol Pablon arunakapatwa amtasipjjañapa, jupajj akham sänwa: “Diosaw nayarojj wal khuyaptʼayasitu, ukatwa nayajj sapa maynir akham sapjjsma: jan maynis jupa pachpatjja amuypati kunatï amuyañäki ukat jukʼampjja. Antisas suma amuytʼasir jaqjam amuyapjjam, kunjamtï Diosajj jupar confiyañatak yanaptʼapktam ukarjama” sasa (Rom. 12:3). Ancianonakajja mayninakas jupanakat sipans jilankapkaspa ukhamwa amuyapjjañapa. Janipuniw mä jilatar recomendkasajj “sinti cheqap sarnaqer” jaqëpkaspas ukham amuyasipjjañapäkiti (Ecl. 7:16). Superintendentet serviñ munirinakajj kuna mayitanakampis phoqapjjañapa uk sum entiendiñajja, mä jilatajj uka mayitanak phoqaskiti janicha uk amuyañatakiw ancianonakar yanaptʼi. Ukampis ancianonakajj mä jilatar recomendapki ukhajja, Diosan cheqap mayitanakap respetapjjatapa, congregacionat llakisipjjatapa, jan yaqhachasirïpjjatapa, taqenin pantjasirïpjjatap amuyapjjatapwa uñachtʼayapjje. Ukatwa mä jilatar recomendañatakejj Jehová Diosar espíritu santo ancianonakajj mayipjjañapa. Mä jilatar ancianot recomendañajj mä jachʼa responsabilidadawa. Ukhamasti ancianonakajj Pablon arunakaparjamaw lurapjjañapa, jupajj akham sänwa: “Janipun maynirojj amparamp ratuki loqjjatamti” sasa (1 Tim. 5:21, 22).

²⁰ Ancianonakajj espíritu santomp irpayasipjje, ukatwa espíritu santon achuparjam sarnaqañatak chʼamachasipjje. Ukanakajj akanakawa: “Munasiña, kusisiña, sumankaña, paciencianïña, suma chuymanïña, khuyapayasirïña, Diosar confiyaña, llampʼu chuymanïña, munañasampi jan apnaqayasiña” (Gál. 5:22, 23). Ukham chuymani ancianonakajja, jilat kullakanakaruw chʼamañchtʼapjje, chuymachtʼapjje, Diosar mayachtʼat servipjjañapatakis yanaptʼapjjaraki. Suma chuymanïpjjatapasa, kunanaktï lurapki ukanakajj sumar saratapas espíritu santomp ajllitäpjjatapwa uñachtʼayi (Hech. 20:28).

²¹ Congregacionan mayachtʼatäñapatakiw ancianonakajj yanaptʼapjjañapa. Ancianonakajj mayj mayja chuymanïpkchisa, maynimp jan acuerdökasas respetomp istʼasisaw sumankañ utjayapjjañapa. Biblian wiñay yatichäwinakap jan pʼakintkchi ukhajja, taqe chuymaw kuns katoqtʼasipjjañapa, kuna amtaruy mayni ancianonakajj puripjjchi ukarus apoyapjjañaparakiwa. Ukham chuymani mä ancianojja, “alajjpachat jutki” uka yatiñamp irpayasitapwa uñachtʼayi (Sant. 3:17, 18). Janipuniw mä ancianojj mayninakat sipans jilankkaspas ukham amuyasiñapäkiti, ni munañaparjamas mayninakar apnaqañapäkiti. Ancianonakajj Jehová Diosamp trabajipjjatapwa mayachtʼatäsajj uñachtʼayapjjani, ukhamatwa congregacionan sumankañajj utjarakini (1 Cor., cap. 12; Col. 2:19).

²² Superintendentet serviñ munirinakajj Biblian mayitanakap phoqañatakiw chʼamachasipjjañapa. Ukham luririnakajj Jehová Diosar serviñan suma saytʼatäpjjatapwa uñachtʼayapjje (1 Tim. 3:1). Ukampis ancianot servisajj maynejj wal trabajiñapa, sacrificionaksa lurañaparakiwa. Jilat kullakanakar sum uñjañatakisa, Diosar servisipkakiñapatak yanaptʼañatakis chʼamachasipjjañaparakiwa.

²³ Walja maranak ancianot servir mä jilatajja, usutätap layku, chuymankipstatäjjatap layku, jan ukajj yaqha ukhamanak laykuw ancianot jan serviñ puedjjaspati. Ukhamäni ukhajja, respetompiw juparojj mä ancianorjam uñjaskakiñasa, janirakiw ancianot serviñ jaytañapas wakiskiti. Jilat kullakanakar sum uñjañatak chʼamachasir ukham jilatanakajja, wali respetomp uñjatäpjjañapawa.

²⁴ Mä ancianotï jakäwipan cambionak utjatapat jan ancianöñ puedjjchi ukhajja, uka asignacionap jaytaspawa (1 Ped. 5:2). Ukampis congregacionankir jilat kullakanakajj jupar respetomp uñjasipkakiñapawa, kuna laykutejj janis ancianöjjchejja congregación taypin wali valoranikïskiwa.

²⁵ Anciano jilatanakajj congregacionan walja luräwinakanïpjjewa. Sañäni: coordinador del cuerpo de ancianos, secretario, superintendente de servicio, Yatiyañataki revista sarayiri, Cristianjam Jakañataki ukat Yatiyañataki tantachäwi pʼeqtʼiri. Ukhamarus walja ancianonakaw superintendente de grupo ukan servipjje. Walja tiempow uka luräwimp phoqapjjaspa, ukampis maynitï congregacionat sarjjchi, jan ukajj usutätapata jan ukajj Biblian mayitanakamp jan phoqatapat jan ancianöjjchi ukhajja, yaqha ancianoruw luräwipamp phoqañapatak ajllisiñapa. Congregacionantï walja ancianonakajj jan utjkchi ukhajja, inas mä ancianon walja lurañanakamp phoqañapajj wakischini, ukampis walja anciano jilatanakajj utj-jjani ukhajj janiw ukhamäjjaniti. 

²⁶ Coordinador del cuerpo de ancianos jilataw ancianonakar tantachtʼi. Jupajja mayni ancianonakjamarakiw humilde chuymamp jilat kullakanakar sum uñji (Rom. 12:10; 1 Ped. 5:2, 3). Sumwa congregación organiztʼi, ancianot servisasa coordinadorat servisas sumwa luräwinakap phoqaraki (Rom. 12:8).

²⁷ Secretariojj congregacionan utjki uka archivonakwa uñji, wali wakiskir luräwinaks anciano masinakaparuw yatiyaraki. Munaschi ukhajja, mä anciano jilataru jan ukajj mä siervo ministerialaruw jupar yanaptʼañapatak mayisispa.

²⁸ Superintendente de servicio jilatajj predicación toqetwa encargasi. Sapa phajjsiw seman tukuyajj predicañatak gruponakar visittʼir sari. Mä qhawqha gruponakak utjki uka congregacionanakanjja, inas maran pay kutik visitchini. ¿Kunsa uka visitan luri? Predikir mistuñatakiw tantachäwi sarayi, publicadoranakampiw prediki, revisitanakaparusa estudionakaparus compañtʼarakiwa.

²⁹ Superintendente de grupo ukham serviñajja mä jachʼa privilegiowa. Aka lurañanakampiw phoqañapa: 1) gruponkir jilat kullakanakajj Jehová Diosar serviñ toqen kunjamäsipkisa ukwa uñjañapa; 2) predikir mistusajj kusisitäpjjañapataki, waljanir Bibliat yatichapjjañapatakiw yanaptʼañapa; 3) siervo ministerialanakarojja congregacionan jukʼamp yanaptʼañ amtapjjañapatakiw chʼamañchtʼapjjañapa. Khitis uka luräwimp phoqaspa ukjja, cuerpo de ancianos taypinkir ancianonakaw amtapjjani.

³⁰ Ancianonakaw superintendente de grupo ukan servipjjaspa. Ukampis janitï walja ancianonakajj utjkchejja, mä ancianon utjañapkamajj wal chʼamachasir mä siervo ministerialaruw siervo de grupjamajj uttʼayasispa. ¿Kunatsa siervo de grupo sasejja? Kuna laykutejj jupajj janiw congregacionan ancianot uttʼayatäkiti, jan ukasti ancianonakan pʼeqtʼataw uka luräwi phoqe.

³¹ Superintendente de grupo ukham servir jilatajja, predicacionan wali yateqaskayäñapawa. Sapa kuti predikir mistutapasa, taqe chuyma predictʼatapasa gruponkirinakarojj wal chʼamañchtʼañapa. Niyakejjay junto trabajiñajj jiwasan askisatakïchejja, kunürunakay waljanejj mistuñ puedipjjchi ukarjamaw predicañatak mä horario apsusiñasa (Luc. 10:1-16). Jilapartejj superintendentew predikir mistuñatak tantachäwi sarayi, publicadoranakarus organiztʼaraki. Ukatjja jupaw predicañataki territorionak jan faltañapatakejj uñakiptʼaraki. Grupo sarayañ jan puedkani ukhajja, yaqha ancianoru jan ukajj siervo ministerialaruw uk lurañapatak mayispa. Ukampis yaqha ancianosa jan ukajj siervo ministerialas jan utjkchi ukhajja, wakichtʼat mä jilataruw uka luräwimp phoqañapatak mayispa.

³² Superintendente de grupo ukham servir jilatajja, superintendente de servicio jilatajj grupor visitkani ukatakiw taqe kun organiztʼi. Jupajj kunürus superintendente de servicio jilatajj grupor visitani uksa, kunjamsa visitapajj taqenir chʼamañchtʼani uksa amtayarakiwa. Ukhamatwa gruponkir jilat kullakanakajj taqe chuyma uka semanajj predikir mistupjjani.

³³ Predicañatak organiztʼat gruponakajj jiskʼanakakiwa, ukhamat superintendente jilatajj gruponkirinakar sum uñtʼañapataki. Jupajj wali munasir awatiriwa, taqenitwa llakisiraki. Gruponkirinakar yanaptʼañatakisa, predikir mistupjjañapatakisa, tantachäwinakar sarapjjañapatakisa, ukan arstʼapjjañapatakisa, Diosat jan jitheqtapjjañapatakis yanaptʼarakiwa. Yaqhepanakarojj jupajj wal yanaptʼaspa, sañäni: usutanakarusa, llaki usump aynachtʼatanakarus wal yanaptʼaspa. Yaqhepanakarusti chʼamañchtʼkir arunakapasa, suma ewjjtʼanakapas congregacionan privilegionak katoqañatakiw yanaptʼaspa. Superintendente de grupo ukan servir jilatatakejj grupopankirinakajj wali wakiskiriwa, ukampis ancianjamajj congregacionankir taqpach jilat kullakanakatwa llakisi, yanaptʼa munapki ukanakar yanaptʼañatakis chʼamachasirakiwa (Hech. 20:17, 28).

³⁴ Superintendente de grupo ukham servir jilataw sapa phajjsejj informenak apthapi, ukatsti secretarioruw churjjaraki. Publicadoranakajj sapa phajjsejj qhawqsa predicapjje uka informenakap tiempopar churasaw superintendentenakar yanaptʼapjje, jupanakajj sapa phajjsi tukuyaw horasapar churapjje. Informenakapjja jilatar cheqakwa churapjjaspa, jan ukajj Salón del Reinon utjki uka cajitaruw uchapjjaspa.

³⁵ Coordinador, secretario, superintendente de servicio ukan servir jilatanakaw comité de servicio taypinkapjje. Jupanakaw maynejj Salón del Reinon casarasispati janicha, maynin jiwatapat discursojj Salonanti arstʼasini janicha uk aprobapjje, ukatjja publicadoranakajj kawkïr gruponakankapjjanisa ukwa amtapjjaraki. Precursor auxiliarat serviñataki jan ukajj precursor regularat serviñatak solicitud katoqapki uksa jupanakaw aprobapjje. Comité de servicio taypinkir jilatanakajja, kuntï cuerpo de ancianos ukankirinakajj amtapki ukarjamaw lurapjje.

³⁶ Comité de servicio ukan servir jilatanakarusa, Yatiyañataki revista sarayir jilatarusa, Cristianjam Jakañataki ukat Yatiyañataki tantachäwi pʼeqtʼir jilatarusa, mayni ancianonakarus sucursalaw instruccionanak churi.

³⁷ Congregacionankir cuerpo de ancianojj maran pusi kutiw tantachasi, ukhamat congregacionankirinakajj kunjamäsipkis uk uñakiptʼañataki. Superintendente de circuito jilatajj congregacionar visitki ukhajja, ancianonakampiw jupajj tantachasi, ukampis uka tantachäwit kimsa phajjsinak qhepatjja mayampiw ancianonakajj tantachasipjje. Cheqansa kunaratutï wakiski ukhajj tantachasipjjapuniwa.

³⁸ Kunjamtï yatjjataniwayktanjja, superintendentenakajj janiw perfecto jaqenakäpkiti. Ukampis Jehová Diosajj jupanakar istʼañaswa muni, kuna laykutejj ukhamwa organiztʼawayi. Ancianonakajj Jehová Diosan mayitaparojj istʼapjjewa, Diosaw jupanakarojj luratanakapat cuenta mayini. Hebreos 13:17 textojj akham siwa: “Jumanak taypin irpirïpki ukanakarojja istʼapjjam, humilde chuymampi istʼapjjarakim, jupanakajj jumanakaruw cuidasipktamjja, uka luräwipatjja Diosaruw cuenta churapjjarakini. Ukhamat uka luräwip llakita phoqañat sipansa, wali kusisit phoqapjjañapataki, janitejj ukhamäkaspajja jumanak pachpatakejj jan walïspawa” sasa. Espíritu santop toqew Jehová Diosajj superintendentenak uttʼayi, jupanakatï espíritu santon achuparjam jan sarnaqjjapjjani, janirak ancianjam lurañanakap phoqjjapjjani ukhajja, espíritu santop toqerakiw puestopat apaqatäjjapjjani.

³⁹ Ancianonakajj congregacionan wal trabajipjje, yateqaskayäpjjarakiwa, ukatwa jupanakar wali valoranit uñjtanjja. Lurañanakapamp phoqapjjatapatjja, congregacionan Jehová Diosar serviñajj janiw chʼamäkiti, antisas kusiskañawa. Apóstol Pablojj akham sasaw Tesalónica markankir cristianonakar säna: “Jilatanaka, khitinakatejj jumanak taypin wal trabajisipki, Tatitur serviñansa irpasipktam, ewjjtʼasipktam ukanakar respetomp uñjapjjañamatakiw nanakajj ruwtʼanipjjsma. Luratanakapatjja wali munasiñampi suma chuymampi uñjapjjam” sasa (1 Tes. 5:12, 13). Timoteor nayrïr cartap qellqkäna ukanjja, congregacionankirinakajj kunjamsa ancianonakar uñjapjjañapa ukwa Pablojj qhanañchäna, jupajj akham sänwa: “Sum pʼeqtʼasipki uka ancianonakajj wali respetomp uñjatäpjjañapawa, jukʼampis kawkïrinakatejj parlañansa yatichañansa wal chʼamachasisipki ukanakaw wali respetomp uñjatäpjjañapa” sasa (1 Tim. 5:17).

⁴⁰ Yaqhep anciano jilatanakarojja, Grupos de Visita a Pacientes ukan servipjjañapatakiw ajllisi. Yaqhanakarusti Comités de Enlace con los Hospitales ukan servipjjañapatakiw ajllisiraki. Ukankir jilatanakajj hospitalanakaruw sarapjje, ukhamat kunjams Testigonakar jan wilampik qollasispa uka toqet doctoranakamp parlañataki. Yaqhep superintendente jilatanakajja, Salones del Reino utanaka, Salones de Asambleas utanak lurasiñapataki, ukhamarak uka utanak sum cuidasiñapatakiw yanaptʼapjje, jan ukajj comités de asambleas ukanakanwa servipjje. Ukham trabajir jilatanakarojj ‘wali munasiñampiw uñjtanjja’, jupanakajj jilat kullakanak laykuw tiemp apstʼasipjje, chʼamapampis yanaptʼapjjaraki (Filip. 2:29).

⁴¹ Cuerpo Gobernante taypinkirinakaw kawkïr jilatanakas superintendente de circuitot servipjjaspa uk uttʼayi. Ukatjja sucursalaw kawkïr congregacionanaksa visitapjjani uk asigni, jupanakajj maran pay kutiw congregacionanakar visitapjje. Jaya cheqankapki uka precursoranakarojja, superintendente de circuito jilatanakajj sapa kutiw visitapjjaraki. Kawkjanakarus visitapjjani uka toqet mä programa waktʼayasajj jayäkipanwa congregacionanakar aptʼayapjje, ukhamat jilat kullakanakajj walja askinak apsupjjañapataki.

⁴² Coordinador jilataw visitatak taqe kuns sum waktʼayi. Ukhamatwa jilat kullakanakajj visitan wali chʼamañchtʼat jikjjatasipjjani (Rom. 1:11, 12). Visitajj kunjamänisa, kunanaksa superintendente de circuito jilatasa esposapas necesitapjjani uk yatisajja, coordinador jilatajj mayni jilat kullakanakaruw yatiyi, ukhamat kawkinsa alojasini kunanakas wakisini ukanak waktʼayapjjañapataki. Visitatakejj kunanakas waktʼayasiwayi uksa taqe jilat kullakanakaruw yatiyi, superintendente de circuito jilatarus yatiyarakiwa.

⁴³ Kunürunakas tantachäwinakasa predicacionatak tantachäwinakas apasini ukjja, superintendente de circuito jilatajj coordinador jilatampiw parltʼañapa. Superintendente jilatajj siskani ukarjama ukat sucursalan instruccionanakaparjamaw tantachäwinakajj programtʼasiñapa. Congregacionan tantachäwinakapasa, precursoranakatak tantachäwisa, ancianonakataki ukat siervo ministerialanakatak tantachäwisa, predicacionatak tantachäwinakas kawkinsa ukat kuna urunakas apasini ukajj janïräkipanwa congregacionar yatiyasiñapa.

⁴⁴ Registro de publicador de la congregación uksa, registro de asistencia a las reuniones uksa, territorionakan registropsa, congregacionan kunjamas qollqejj apnaqasi uka archivsa coordinador jilataw janïräkipan superintendente de circuito jilatar churjjañapa. Ukatjja martes jaypʼuw superintendente de circuito jilatajj uka documentonak uñakipi, ukhamatwa kawkïr jilatar yanaptʼañas wakisi uk amuyi. Ukhamarusa documentonak uñakipatapajj kunanakansa congregacionankir jilat kullakanakajj jukʼamp chʼamachasipjjañapa uk yatiñatakiw yanaptʼaraki.

⁴⁵ Visita semananjja superintendente de circuito jilatajj tantachäwinakana, predicacionana, manqtʼasiñ horasanakana, ukat yaqha ukham horasanakanwa jilat kullakanakamp parltʼañatakejj chʼamachasi. Ancianonakampi siervo ministerialanakamp tantachtʼaski ukhajja, jupanakarojj chʼamañchtʼiwa, Bibliarjamaw ewjjtʼaraki, ukhamat jilat kullakanakar sum uñjapjjañapataki (Prov. 27:23; Hech. 20:26-32; 1 Tim. 4:11-16). Ukatjja precursoranakampiw tantachasi, ukhamatwa jupanakarojj jan walinakan uñjasisin precursorat servisipkakiñapatak chʼamañchtʼi.

⁴⁶ Jan waltʼäwinakajj congregacionan utjani ukhajja, visitapan ukanak askichasiñapatakiw superintendente de circuito jilatajj yanaptʼani. Ukampis uka semanatï jan askichasiwaykani ukhajja, kunjamsa uka jan waltʼäwi askichapjjaspa ukwa ancianonakarusa jan waltʼayasir jilat kullakanakarus ewjjtʼawayani. Uka toqet sucursalan yatiñapatï wakischi ukhajja, superintendente de circuito jilatampi ancianonakampejj mä informe sucursalar apayapjjañapa.

⁴⁷ Superintendente de circuito jilatajja, visitki uka congregacionan tantachäwinakaparuw sari. Ukampis uka semanajj sucursalan instruccionanakaparjamaw tantachäwinakajj mayjtʼayasi. Tantachäwinakanjja wali chʼamañchtʼkir discursonakwa jilatajj arstʼi, ukhamatwa jilat kullakanakarojj Jehová Diosaru, Jesusaru, Diosan markapar jukʼamp munasipjjañapatak yanaptʼi.

⁴⁸ Jilat kullakanakarojj kusisit chuymamp predicapjjañapatakiw superintendente de circuito jilatajj yanaptʼi, kunjamsa wali sum predicapjjaspa ukatakis yanaptʼarakiwa. Ukatwa superintendente jilatarusa esposaparus revisitanakaru jan ukajj estudionakar irpañajj wali wakiskirejja. Kawkïr jilat kullakas jupanakamp predicañ mayikispawa. Maysa toqetjja, walja jilat kullakanakaw organiztʼasisajj uka semanpach predikir mistuñ amtapjjaspa jan ukajj precursor auxiliarat serviñ amtapjjaspa. Uka semänan predicacionar mistuñajj wali wakiskiriwa (Prov. 27:17).

⁴⁹ Maranjja pä asamblea de circuitow utji. Ukanakat maynirojja, sucursalajj Betelankir mä jilataruw discurso arstʼañapatak khiti. Superintendente de circuito jilataw uka asambleanak organiztʼi, jupaw superintendente de asamblea ukham serviñapatakisa, superintendente auxiliar ukham serviñapatakis jilatanakar uttʼayi. Jupanakaw asamblea organizañampejj yanaptʼapjje, ukhamat jilatajj kunjamas programajj sarayasiski uk uñjañapataki. Ukatjja circuito jilatajj yaqha departamentonakan yanaptʼapjjañapatakejj jilatanakaruw asignacionanak churi. Circuiton kunjamas qollqejj apnaqasiski uk sum uñjasiñapatakisa auditoría lurasiñapatakis jupaw encargasiraki. Awisajja mä circuitojj seccionanakaruw tʼaqanoqtayasi, kuna laykutejj janiw mä jachʼa lugarajj jikjjatañjamäkiti, jan ukajj yaqhep jilat kullakanakajj wali jayanakanwa jakasipjje. Ukampis sapa seccionanwa asambleajj apasi.

⁵⁰ Sapa phajjsejj qhawqha horanakas prediki ukjja, superintendente de circuito jilatajj sucursalaruw yatiyi. Ukat mä congregacionatï circuito jilatan pasajepatakisa, manqʼapatakisa, alojasiñapatakisa jan ukajj yaqha ukhamanakatakis jan yanaptʼawaykchi ukhajja, jupajj sucursalaruw yatiyarakispa. Superintendente de circuito jilatanakajja, ‘Jesusan arunakaparjamajj jiwasatï Diosan Reinop nayrar uchañäni ukhajja, janiw kunas faltkistaniti’ sasaw taqe chuyma confiyapjje (Luc. 12:31). Maysa toqetjja, uka jilatanakar katoqtʼañajj kunja wakiskirisa uk janiw congregacionankirinakajj armapjjañapäkiti (3 Juan 5-8).

⁵¹ Jehová Diosan Testigonakapan sucursalanakapanjja Comité de Sucursalaw utji, uka taypinjja experienciani Diosar taqe chuyma servir kimsa jan ukajj jukʼamp jilatanakaw utji. Jupanakat maynejj coordinadorawa. Uka jilatanakaw mä markan (país) territorionakapsa, jan ukajj jukʼamp markanakan territorionakapsa uñjapjje, predicacionsa pʼeqtʼapjjaraki.

⁵² Comité de Sucursalajj territoriopankir congregacionanakaruw sum uñji, sucursalankir taqe territorionakan predicasiñapatakis pʼeqtʼarakiwa. Ukatjja congregacionanakampi circuitonakampwa sum organiztʼi, ukhamat territorionakan taqe kunas sum atiendesiñapataki. Misioneronakarusa, precursor especialanakarusa, regularanakarusa, auxiliaranakarusa sum uñjaraki. Janiw ukakïkiti, asambleanaksa ukan arstʼirinaksa organiztʼarakiwa, ukhamat taqe kunas “wali suma, yäparu” lurasiñapataki (1 Cor. 14:40).

⁵³ Yaqhep markanakatjja, yaqha markankir mä sucursalaw encargasi. Awisajj uka markanakan mä Comité de País ukaw uttʼayasi. Ukaw markapan predicación sumpach sarayaspa. Ukatjja Hogar Betel utata, oficinanakata, correspondenciata, informenakatwa encargasi, predicacionatsa encargasirakiwa. Comité de País ukampi Comité de Sucursal ukampejj juntow Diosan Reinop laykojj trabajipjje.

⁵⁴ Khitinakas uka comité taypinkapjjani ukjja, Cuerpo Gobernantew uttʼayi.

⁵⁵ Sapa mä qhawqha tiempotjja, Cuerpo Gobernantejj representantes de la central mundial ukanakwa sucursalanakar khiti. Ukhamat betelitanakar chʼamañchtʼañataki, Comité de Sucursalar yanaptʼañataki, ukhamarak predicación toqen kuna jan walinakatï utjki ukanak askichañataki. Uka representante jilatajj mä qhawqha superintendente de circuito jilatanakampiw tantachasi, misioneronakampis mä qhawqha tiempot tantachasirakiwa. Jupanakamp tantachaskasajja kunanaksa necesitapjje, kuna jan walinakansa uñjasipjje uka toqenakatwa parlapjje, Reinon suma yatiyäwinakap predicasipkakiñapatakisa jaqenakar Jesusan discipulopar tukuyasipkakiñapatakis chʼamañchtʼapjjarakiwa.

⁵⁶ Central mundialat khitanit representantetakejja, sucursalan predicasitapat kuna askinakas utji, congregacionanakajj kunjamäsipkisa uk yatiñaw wali importantejja. Tiempopatï utjaskchi ukhajja, oficinas remotas de traducción uka utanakaruw visittʼir sararaki. Ukatjja sucursalar visitkasajj predikir mistuñatakiw chʼamachasiraki.

⁵⁷ Taqe uka jilatanakan wal trabajipjjatapasa munasiñamp jiwasar uñjapjjatapas wal kusisiyistu. Diosan ajllit uka superintendentenakan yanaptʼap katoqasiñajja, congregación Pʼeqtʼirïki uka Jesusamp mayachtʼatäñatakiw yanaptʼistu (1 Cor. 16:15-18; Efes. 1:22, 23). Ukhamatwa Biblian yanaptʼapampisa espíritu santon yanaptʼapampis oraqpachankir congregacionanakajj nayrar sartapjje (Sal. 119:105).