Akapachan tukusiñapajja ajjsaraytamti, walt uñjañ munta jan ukajj janicha

Cultura maya calendariorjamajja, diciembre 21, 2012 maranwa aka oraqen walja mayjtʼäwinakajj utjani sasaw jaqenakajj sapjjäna, ¿uka toqet lupʼisajj kunjamakis jikjjatasta? Kunjamjjay suychiyäta ukarjamaw jikjjataspachäta. Akapachajj tukusiniwa sasin walja kuti pantjasipkän ¿ukhamarakt jichhajj pantjasipjje?

‘Akapachan tukusiñapat’ Bibliajj parlki uka toqet ¿kuns amuyta? (Mateo 24:3.) Aka Oraqejj ninamp nakhantayatäniw sasaw yaqhepajj wal ajjsarayasipjje. Ukat yaqhanakajj kunanakatï paskani ukanak wal uñjañ munapjjaraki. Ukampis waljaninakajj sapa kuti ukak istʼasajj qarjatäjjapjjarakiwa. Cheqas kuntï Bibliajj uka toqet siski uk jan sum amuyasaw ukham jikjjatasipjje.

Akapachan tukusiñapat Bibliajj kuntï siski uk yatjjatasajj inas wal muspharchïta. Biblianjja, kunatsa uka urun puriniñap wal munañasa uk qhanañchi; ukat uka urojj janis jankʼak purinkaspa ukham amuysna ukhajja, qarjsnawa sarakistuwa. Ukhamajja, kuna pusi jisktʼanaktï jaqenakajj jisktʼasipki ukat Bibliajj kunjamsa ukar qhanañchi uk uñjañäni.

BIBLIAJJ AKHAM SIWA: “Oraqen saphiparojj sumpun thurtʼasiytajja, uttʼayatäkän ukawjat janipun onjjtañapataki” sasa (SALMO 104:5).

Oraqejj janiw ninampis ni kunampis tukjatäkaniti; antisas aka Oraqejj jaqenakan wiñay jakasipjjañapatakiw sasaw Bibliajj yatichi. Salmo 37:29 qellqatajj akham siwa: “Aski jaqenakajj oraq katoqapjjani, wiñayarakiw ukan jakapjjarakini” sasa (Salmo 115:16; Isaías 45:18).

Diosajj Oraq lurkän ukhajja, wali “sumätapwa” uñjäna, jichhakamas amtapajj ukakïskiwa (Génesis 1:31). Jupajj janiw aka Oraq tukjañ amtkiti; antisas ‘aka oraq tʼunjirinakarojj tʼunjäwa’ sasaw arsuwayi. Mä arunjja, janipuniw aka Oraq tukjapjjañap suykaniti (Apocalipsis 11:18).

Ukampis kuntï 2 Pedro 3:7 qellqatajj siski uk inas lupʼisksta, ukanjja akham siwa: “Aka oraqempi alajjpachampisti ninampi tʼunjatarakïniwa” sasa. Ukarjamajja, ¿janit aka Orakejj ninampi tʼunjatäniw sasajj qhanañchki? Biblianjja, awisajj alajjpacha, oraqe ukat nina sasinjja, janiw cheqpach ukanakatpun parlkiti. Amuytʼañataki, Salmo 97:1 qellqatanjja, “Taqpach oraqejj kusispan” sasaw qhanañchi. “Oraqe” sasinjja, janiw cheqpach Oraqet parlkiti, jan ukasti jaqenakatwa parlaski.

Cheqas 2 Pedro 3:7 qellqatan parlki ukajj janiw cheqpach alajjpachata, oraqeta ukat ninat parlkiti ukwa nayrïr ukat qhepa tʼaqanakapan amuytʼayistu. Ukat 5 ukat 6 tʼaqanakanjja, Noen urunakapan Uma Juiciojj utjkäna ukaruw akapachan tukusiñap uñtayi, ukanjja janiw cheqpach Oraqes ni alajjpachas tʼunjatäkänti, jan ukasti jan wali jaqenakaw tʼunjatäna. Uma Juiciojj ‘oraq’ tʼunjäna sasinjja, jaqenakatwa parlaski ukat ‘alajjpacha’ sasinjja, ukapachan jakapkäna uka apnaqerinakatwa parlaskaraki (Génesis 6:11). Ukhamarakiw 2 Pedro 3:7 qellqatanjja jan wali jaqenakana ukat jan wali apnaqerinakan tʼunjäwipat parlaski.

BIBLIAJJ AKHAM SIWA: “Akapachajj tukusirikiwa jan wali luräwinakapamppacha, ukampis kawkïritejj Diosan munañap lurki ukajj wiñayatakiw jaki” sasa (1 JUAN 2:17).

Ukhamajj “akapachajj” tukusiniwa sasajja, janiw Oraqen tʼunjäwipat parlkiti, antisas Diosan munañap jan lurapki ukanakan tʼunjäwipatwa parlaski. Amuytʼañataki, mä jaqen tumorapajj canceranëjje ukhajja, doctoranakajj jankʼakiw jan jiwañapatakejj uka tumorap apsjjapjje, Diosajj ukhamarakiw jan wali jaqenakarojj aka oraqet apsjjani, ukhamat suma jaqenakajj wali kusisit jakasipjjañapataki (Salmo 37:9). Ukhamajja, ‘akapachan’ tukusiñapat parlki uka arunakajj wali sumawa.

Ukhamasti akapachajj tukusjjani ukhajja, jaqesa, Oraqes utjaskakiniwa. Ukapachaw suma jakasiñ tiempojj qalltani sasaw Bibliajj qhanañchi. ¿Janit ukajj jumatak wali askïki? Cheqansa, Bibliajj ‘jutïr pachatwa’ parli (Luc. 18:30, MT).

Uka jutïr pachanjja, ‘taqe kunas wasitatwa machaqat lurasini’ sasaw Jesusajj säna. Ukhamajj jupaw kunjamtï Diosajj qalltan jaqenakan jakasipjjañap munkäna uk phoqhasiñapatakejj yanaptʼani (Mateo 19:28). Ukat ukapachaw aka bendicionanak katoqañäni:

• Mä suma paraíso oraqen jan kun ajjsartʼas jakasiña (Isaías 35:1; Miqueas 4:4).

• Suma kusiskañ trabajo (Isaías 65:21-23).

• Janiw usunakas utj-jjarakiniti (Isaías 33:24).

• Janiw awkiptañas taykaptañas utj-jjarakiniti (Job 33:25).

• Jiwatanakas jaktanjjapjjaniwa (Juan 5:28, 29).

Jiwasatï ‘Diosan munañap’ lurañänejja, janiw akapachan tukusïwip ajjsarkañäniti, antisas uka uru puriniñap wal suyañäni.

BIBLIAJJ AKHAM SIWA: “Ukapachparakiw akanak pasïr uñjapkäta ukkhajja, yatipjjam Diosan reinopajj jakʼankatapa” sasa (LUCAS 21:31).

The Last Days Are Here Again (Los últimos días han vuelto) sat libronjja, Richard Kyle yatichirejj akham sasaw qellqe: “Akatjamat kuna mayjtʼäwinakas utji, jan ukajj kunayman jan waltʼäwinak utjipanwa akapachajj tukusjjaniwa sasajj jukʼamp parljjapjje” sasa, cheqansa kunatsa uka jan waltʼäwinakajj utji, ukar jan kuna qhanañchäw jikjjatasaw ukham amuyjjapjje.

Ukampis Biblia qellqapkäna uka profetanakajja, janiw jaqenakar mayjtʼayañ amtamp qellqapkänti. Antisas akapachan tukusiñap jakʼajj kunanakas pasani uk amuyapjjañapatakiw Diosajj profetanakapar amuytʼayasin qellqayäna. Ukhamajj akjjar qhanañchaski uka profecianakajj phoqhasiskiti janicha uk juma pachpa amuytʼam.

• Chʼajjwäwinaka, manqʼat pistʼañanaka, oraq khatatinaka ukat jan qollkay usunaka (Mateo 24:7; Lucas 21:11).

• Jan walinakajj jiljjattaniwa (Mateo 24:12).

• Oraqejj jaqen tʼunjataw uñjasini (Apocalipsis 11:18).

• Diosar munañat sipansa, kusisiñak munirinaka, jupak jaqëñ munirinaka ukat qollqe chuymanakäpjjaniwa (2 Timoteo 3:2, 4).

• Familianjja, tʼaqa tʼaqaw sarnaqapjjani (2 Timoteo 3:2, 3).

• Akapachaw tukusini siski uka arunakarojj janiw istʼapkaniti (Mateo 24:37-39).

• Diosan Reinopat suma yatiyäwinakajj oraqpachanwa yatiyasini (Mateo 24:14).

“[Taqe] ukanak uñjasajj” akapachan tukusiñapajj wali jakʼankatapwa amuyapjjäta sasaw Jesusajj säna (Mateo 24:33). Taqe uka profecianakajj phoqhasiskiwa uk Jehová Diosan Qhanañchirinakapajj amuyapjjta, ukatwa iyawsäwinakäjat 236 markanakan yatiyasipkta.

BIBLIAJJ AKHAM SIWA: “Kunapachatejj jaqejj akham siskani: ‘Taqe kunas sumakïskiwa, janiw kunas paskaniti’ sasa, ukkhawa akatjamata jupanakjjaru tʼunjäwejj jutani, kunjämtejj mä usur warmirojj parto usojj katuntki ukhama; ukatjja janiw jaltapkaniti” sasa (1 TESALONICENSES 5:3).

Biblianjja, akapachan tukusiñaparojj mä warmin parto usu sartayasitapampiw uñtayi, uka usojja mä akatjamatwa wal usuñ qalltjje. Ukhamarakiw akapachan tukusiñ urupajja, kunjamtï usur warmejj saparatutjam wawapan nasiñapajj niya jakʼankjjatap amuykejja ukhama. Ukat kunürus wawajj nasini uk doctorajj pantjasispawa, ukampis usur warmejja wawapan nasiñapajj wali jakʼankjjatap sum yati. Cheqas akapachan tukusiñapajj kunaratünis ukjja, jaqenakajj pantjasipjjewa, ukampis ‘qhepa urunakan’ jakaskatasajj qhanaw amuyasi (2 Timoteo 3:1).

“Akapachan tukusiñapajj wali jakʼankjjatapajj qhanarakis amuyasjjejja, ¿kunatsa walja jaqenakajj uk jan amuyapkpacha?” sasin inas jisktʼasta. Uka uru wali jakʼankjjatap amuyañatak chimpunak utjki ukjja, waljaniw jan yäqapkaniti sasaw Bibliajj qhanañchäna. Ukat kunanakas qhepa urunakan mayjtʼäni ukar istʼañat sipansa, akham phiskasipjjani sasaw Bibliajj qhanañcharakïna: “¿Kawkirak Criston ‘jutäw’ satapasti? Awkinakasas jiwarawayjjewa, taqe kunas pachpakïskarakisä, aka oraqes utjkis ukkhatpacha” sasa (2 Pedro 3:3, 4). Qhana arunjja, kuna chimpunakas qhepa urunakan utjani ukanakarojj walja jaqenakaw jan yäqapkaniti (Mateo 24:38, 39).

Akapachan tukusiñapajj wali jakʼankjjatapat Bibliajj parlki ukanakatjja, mä qhawqhakwa aka yatichäwin yatjjatawaytanjja.a ¿Jukʼamp yatjjatañ munasmati? Ukhamächi ukhajja, Jehová Diosan Qhanañchirinakapampiw parltʼasma, jupanakaw jan kun mayisaki Bibliat yatichapjjätam. Utamansa, telefonotsa jan ukajj kawkhantï jumajj munkta ukansa yatichapjjarakiristamwa. Ukat janiw kuna qollqsa mayipkätamti jan ukasti tiempokwa apstʼasiñama.