Machaq arustʼäwitjja askinakaw katoqasi

 1. ¿Jeremiasajj kuna pä luräwsa phoqäna?

JEREMIASAROJJ pä luräwi phoqañapatakiw Jehová Diosajj uttʼayatayna, nayraqatjja ‘jikʼinukuñataki, liwinukuñataki, tʼunjañataki, pampa tukuyañapatakïnwa’ ukatjja, ‘wasitatwa utachañapäna ukat saytʼayañapäna’. Uka profetajja, jan istʼasiri judionakan jan wali luratanakapat yatiyasa ukat uka judionakatakisa ukat Babilonia markatakis Diosan taripäwi arunakap yatiykasaw nayrïr luräwip phoqäna. Ukatsti, profecianakapajj suytʼäwi arunakanïnwa, kunattejj Diosajj wasitatwa saytʼayani ukat utacharakini sasaw uka profetajj profecianakapan qhanañchatayna. Amuytʼañataki, judionakajj wasitat oraqepar kuttʼapjjani sasin qhanañchkäna ukhajja, payïr luräwip phoqaskäna (Jer. 1:10; 30:17, 18).

 2. ¿Kunatsa Jehová Diosajj markapar taripäna, ukat kunjamsa?

² Judionakajj wasitatwa markapar kuttʼjjapjjani sasin Jeremiasajj yatiykäna ukampejja, Diosajj janiw cheqa kamachinakap pʼakintkaspas ukham sañ munkiti. Jan ukasti, jan istʼasir judionakarojj Jehová Diosajj taripañapänwa (Jeremías 16:17, 18 liytʼasiñapawa). Uka tiemponjja, Jerusalenan walja jaqenakatjja janiw ‘cheqapar luriri’ ukat ‘cheqa chuymaninakas’ utjkänti, uk uñjasaw Jehová Diosajj colerpachäna. Ukatwa akham säna: “Llampʼuchasiñan qari[täjjtwa]” sasa (Jer. 5:1; 15:6, 7). Ukatsti judionakajj “kuna juchanaktejj nayra awkinakapajj lurkäna uka pachpa jucha lurañanakaruw kuttapjjara[kïna]”, janiw arunakaparojj istʼapkänti ukat kʼari diosanakar yupaychasaw Diosar colerayapjjäna (Jer. 11:10; 34:18). Jehová Diosajj ‘juchapatjamwa markapar cheqañchañapäna’, ukhamat yaqhepajj amuytʼasisina Jupar kuttʼjjapjjañapataki (Jer. 30:11; 46:28).

 3. ¿Kunatsa machaq arustʼäwit parlki uka profeciat yatjjatañasäspa?

³ Diosajj machaq arustʼäwit profecía qhanañchañapatakiw Jeremiasar khitäna, uka taypiw jukʼamp bendicionanak katoqasiñapäna. Kunatsa uka machaq arustʼäwit yatjjatañasajj wakisi ukjja sumwa profetan arunakapat yatjjatkasajj amuytanjja. Egipto markat mistunipkäna uka qhepatjja, Jehová Diosajj israelitanakampi Moisés toqe mä amtar purkäna uka lantïñapänwa machaq arustʼäwejja (Jeremías 31:31, 32 liytʼasiñapawa). Jesucristojj Santa Cena uttʼaykasaw uka machaq arustʼäwit qhanañchäna uk yatiñaw askirjam uñjañatak yanaptʼistu (Luc. 22:20). Apóstol Pablojj Jeremiasan profeciapata ukat ukajj kunja askisa ukwa Hebreos libron qhanañcharaki (Heb. 8:7-9). Ukampisa, ¿kunas machaq arustʼäwejja? ¿Kunatsa wakispachäna? ¿Khitinakas uka arustʼäwinkapjje, ukat kuna askinaksa sapa maynis katoqsna? Ukanak yatjjatañäni.

 4. ¿Diosajj Israel markampi mä arustʼäwir mantkäna ukampejj kunanakas jikjjatasiwayäna?

⁴ Machaq arustʼäwejj kun sañsa muni uk yatjjatañatakejja, kuna amtampis Diosajj Israel markampi mä arustʼäwir mantäna ukwa nayraqat yatjjatañasa. Kawkïr markatï jutaniw sat Wawa suykäna ukajja, uka arustʼäwi toqew walja askinak katoqapjjañapäna ukat uka toqerakiw walja jaqenakajj bendición katoqapjjañapäna (Gén. 22:17, 18). Uka arustʼäwirjam sarnaqañ munapjjatapatjja, israelitanakajj Diosan “munat marka[paruw]” tukupjjäna. Uka arustʼäwirjamajja Leví tributwa sacerdotenakajj uttʼayasiñapäna. Kunapachatï Jehová Diosajj Sinaí qollun Israel markamp mä arustʼäwir mantkäna ukhajja, akham sänwa: “Jumanakasti nayar serviri sacerdotenakäpjjätawa, ukhamarak nayaru katuyat suma markaraki” sasa. Ukampis kuna tiemponsa ukat kunjamats uñstanini ukjja janiw qhanañchkänti (Éxo. 19:5-8). Israelitanakajj janiw taqpach Leyinak phoqerjamäpkänti, mä arunjja, juchanakapwa uka arustʼäwejj qhanstayäna. Ukhamasti, jan wali luratanakapat Diosamp perdonayasiñatakejj sacrificionakwa loqtapjjañapäna. Qʼoma ukat phoqat sacrificio loqtasiñapaw wakisïna, ukhamat jan kutin kutin loqtapjjañapataki. Ukatjja, wiñayatak juchanak perdonatäñaw wali wakiskirïnjja (Gál. 3:19-22).

 5. ¿Kunatsa Jehová Diosajj machaq arustʼäwi toqet qhanañchäna?

⁵ Diosajj Leyinak churkäna ukarjamas israelitanakajj sarnaqasipchïnjja, kunatsa Jehová Diosajj Jeremiasar machaq arustʼäwi toqet profecía arunak qhanañchañapatak khitäna ukjja amuysnawa. Diosajj munasiñapata ukat khuyapayasiñapatwa markanakar wiñayatak yanaptʼañ munäna. Khitinakatï uka arustʼäwinkapkani ukanakatjja akham sasaw Diosajj Jeremías toqejj säna: “Ñanqha luratanakapatjja perdonarakïwa, jucha luratanakapatsti janiw mayampsa amtaskjjarakïti” sasa (Jer. 31:34). Uka arunakajj nayra tiempos arsuskchïnjja, taqe jaqenakaruw mä suytʼäwi churi. ¿Kunjamsa?

6, 7. 1) ¿Kunjamsa yaqhepajj juchanakapat jikjjatasipjje? 2) ¿Kunatsa machaq arustʼäwit yatjjatañajj yanaptʼistani?

⁶ Jiwasajj juchararätanwa, uk qhan amuyastanjja. Ukjj mä jilatan arunakapatwa amuysna, jupajj akham sänwa: “Wasitat juchar purirïta ukhajja wali llakitaw jikjjatasirïta. Janis Diosatakjam sarnaqerjamäkiristjja ukhamwa amuyasirïta. Oración lurañjja wal ajjsarirïta. Akham sasaw mayisiñ qalltirïta: ‘Jehová Dios Awki, aka mayisïwejj istʼchïta janisa ukjja janiw yatkti, ukampis...’” sasa. Ukat yaqhepajj wasitat pachpa jan wali luräwiru jan ukajj juchar purtʼasisajja, mayisïwinakapajj ‘qenayamp’ jarktʼatäkaspas ukham amuyasipjje (Lam. 3:44). Yaqhepasti, jan wali luräwinakapatjja, walja maranakäkchisa, amtasipkakiwa. Ukat Diosar taqe chuyma yupaychir jilat kullakanakas inas jan amuytʼasis kuns maynir sapjjchispa ukat qhepatakwa chuym usuyasipjjaspa (Sant. 3:5-10).

⁷ Nayajj janiw jan walinak lurkäti sasin janiw khitis amuyañapäkiti (1 Cor. 10:12). Apóstol Pablojj jan wali luratanakapat amuyasïnwa (Romanos 7:21-25 liytʼasiñapawa). Jiwasajja, ukhaw machaq arustʼäwit amtañasa. Uka arustʼäwirjamajja, Diosajj janiw juchanakat amtjjañapäkänti. ¡Janipuniw kunas ukham utjkiti! Jeremiasajj wali kusisitaw jikjjataspachäna, jiwasajj machaq arustʼäwita ukat kuna askinaksa apanini uka toqenakat jukʼamp yatjjatañäni ukhajja kusisitaw jikjjatasiraksna.

8, 9. ¿Kunsa Jehová Diosajj juchanakas perdonañatak lurawayi?

⁸ Sapürutjam Diosar jukʼamp sum uñtʼkasajja, jucharar jaqenakampejj kunja khuyapayasirisa ukat munasirisa ukwa amuytanjja (Sal. 103:13, 14). Ukat Jeremiasajj machaq arustʼäwit yatiykasajja, Jehová Diosajj ‘juchanak perdonjjaniwa’ ukat janiw amtjjaniti sasaw säna (Jer. 31:34). Inas uka profetajj akham jisktʼaschïna: “¿Kunjamarak uk luraspasti?” sasa. Arustʼäwi aru istʼasajja, Diosajj mä amtarus jaqenakamp puriñapäkaspa ukhamwa Jeremiasajj amuypachäna, ukatwa kuntï Diosajj amuytʼaykäna ukat perdonatañ toqets qellqpachäna. Ukampisa, kunas amtapajja ukat Mesiasajj kunsa lurani ukanakjja qhepatwa Jehová Diosajj qhanstayaskañapäna.

⁹ Wawanakapar jan kun kamsir awk taykanakar inas uñjirïsta ukat wawajj jan wal lurki ukhajja, janiw kuns kamsapkiti. ¿Jehová Diosan ukhamäñap suyaraksnati? Janiwa. Ukjja kunjamsa machaq arustʼäwejj phoqasïna ukanwa amuytanjja. Jankʼak jucha chhaqtayañat sipansa, Jehová Diosajj cheqaparjamaw sum amuytʼäna ukat Jupatakejj wali llakkañäkchïnsa, juchanak pampachañatakejj kunatï wakiski ukwa luräna. Apóstol Pablon arunakapanwa ukjja jukʼamp sum amuysna (Hebreos 9:15, 22, 28 liytʼasiñapawa). Jupajj akham sänwa: “Jiwatap laykuw[a]” sasa. Ukat akham sarakïnwa: “Janiw juchat qʼomachasiñajj utjkaspati, janitejj wilajj wartaskaspa ukkhajja” sasa. Machaq arustʼäwirjamajja, janiw cabritonakana jan ukajj toron wilapampejj sacrificion loqtjjapjjañapäkänti kunjamtï Leyinakajj siskäna ukhama. Jan ukasti, machaq arustʼäwejja Jesusan wilapampiw uttʼayasiwayi. Uka loqtasïwirjamajja, Jehová Diosajj ‘jan wali luratanakapata ukat juchanakapatsa’ wiñayatakiw jaqer perdonañapäna (Hech. 2:38; 3:19). Ukampisa, ¿khitinakas uka machaq arustʼäwinkapjjañapäna ukat perdonatapjjañapäna? Janiw judionakäpkänti. Leyinakarjam sacrificiot animalanak loqtapkäna uka judionakarojj Diosajj janiw askirjam uñj-jjaniti, ukat yaqha markampiw arustʼäwir mantani sasaw Jesusajj säna (Mat. 21:43; Hech. 3:13-15). Uka markajj ‘Diosan Israelapänwa’, uka cristianonakajj qollan ajayump ajllitäpjjänwa. Moisesajj Ley katoqkäna ukhajja, Diosampi ukat Israel markampikiw uka arustʼäwir mantapjjäna, ukampis machaq arustʼäwinjja, Jesús toqew Jehová Diosampi ukat alajjpachar saririnakampejj mä amtar puripjje (Gál. 6:16, MT; Rom. 9:6).

10. 1) ¿Khitisa ‘Davitan wawapajja’? 2) ¿Kuna askinaksa uka wawan luräwipat katoqtanjja?

¹⁰ Jutañapäkäna uka Mesiasarojj ‘Davitan wawapa’ sasaw Jeremiasajj säna. Profetjam yupaychkäna ukhajja, David toqe jutañapäkäna ukajja janïraw uñstkänti, ukampis janiw chhaqtayatäkänti. Tiempoparuw Jesusajj Davitan familiap toqe nasiñapäna ukat juparojj Jehová “Tatituw jiwasan atipjirisajja” jan ukajj cheqapar uñjirisajja sasaw sutichapjjañapäna, ukhamat Diosajj cheqapar uñjañ munatap amuytʼayañapäna (Jeremías 23:5, 6 liytʼasiñapawa). Jehová Diosajj jilïr sapa Yoqapan tʼaqhesiñapataki ukat aka Oraqen jiwañapatakiw khitanïna, ukhamat cheqakankañaparjam ‘Davitan wawapat’ jutki ukan loqtasitapjjar juchanak pampachañataki (Jer. 33:15). Ukajja, mä qhawqhanitakejj ‘jakañatak askit uñtʼatäpjjañapatak’ (NM) mä thakjamsa jistʼarawaykaspa ukhamawa, ukat qollan ajayump ajllitapjjänwa ukhamat machaq arustʼäwinkapjjañapataki. Jan uka arustʼäwinkapki jupanakas askinakjja katoqapjjarakispawa, ukhamatwa Diosajj cheqapar uñjañ munatapjja uñachtʼayaraki, uk jichhajj yatjjataskañäni (Rom. 5:18).

11. 1) ¿Kunarus machaq arustʼäwit leyejj qellqasi? 2) ¿Kunatsa “yaqha ovejanakajja” machaq arustʼäwit yatjjatañ munapjjaraki?

¹¹ ¿Machaq arustʼäwejja kunansa mayjaraki? Uka arustʼäwimpi ukat Moisesajj katoqkäna uka Leyinakampejja kunarutï qellqaskäna ukänwa mayjäna (Jeremías 31:33 liytʼasiñapawa). Moisesajj katoqkäna uka tunka mandamientojja sillpʼa qalanakaruw qellqasïna, ukampis qhepatjja chhaqtayatänwa. Ukatsti machaq arustʼäwejj jaqenakan chuymaparuw qellqasini ukat janiw chhaqtayatäkaniti sasaw Jeremías profetajj arsüna. Khitinakatï uka machaq arustʼäwinkapki ukanakajja, wali askitwa kawkir leytï katoqapki uka leyirojj uñjapjje. Ukat khitinakatï aka Oraqen wiñay jakañ suytʼapki uka “yaqha ovejanakajja”, ¿kunjamsa uka machaq arustʼäwirojj uñjapjjaraki? (Juan 10:16.) Jehová Diosan leyinakaparjamaw jupanakajj taqe chuyma sarnaqapjjaraki. Kunjamtï yaqha markat jutasin Israel markar mantasajj Moisesan Leyinakaparjam sarnaqapkäna ukat askinak katoqapkäna ukhamäpjjarakiwa (Lev. 24:22; Núm. 15:15).

12, 13. 1) ¿Kunas machaq arustʼäwin leyipajja? 2) ‘Criston leyipankasajja’, ¿kunatsa Diosar yupaychañatak jan jariyatjam jikjjatasktanjja?

¹² ¿Ajllita cristianonakan chuymanakapan qellqatäki uka leyejj kunasa sasin maynejj jisktʼistaspa ukhajj kamsnasa? Ukajj “Criston leyip[a]” sat sutimpi uñtʼatarakiwa, alajjpachar sarir cristianonakaruw nayraqat churasi, jupanakaw machaq arustʼäwinkapjje (Gál. 6:2; Rom. 2:28, 29). Uka leyejj “munasiña” siski uka aruruw mayachtʼasi (Mat. 22:36-39). ¿Kunjamsa uka ajllitanakan chuymaparojj qellqasi? Oración toqe ukat Diosan Arup yatjjatasa. Ukhamasti, taqe cristianonakaw Diosar yupaychkasajj sapüru ukham lurapjjañapa, khitinakatï jan machaq arustʼäwinkapki ukat askinak katoqañ munapki ukanakas ukhamarakwa lurapjjañapa.

¹³ “Kawkïr leyitejj qhespiyat sarnaqasiñ churkistu” ukat “kuna leyitejj [markan, NM] qhespiyat sarnaqasiñ” churki sas sutinakampiw “Criston leyi[parojj]” uñtʼasiraki (Sant. 1:25; 2:12). Moisesan Leyirjamajj waljaniw nasipjjäna, ukampis machaq arustʼäwirjama jan ukajj Criston leyiparjamajj janiw khitis naskiti. Criston leyiparjam sarnaqerinakajj Diosarojj janiw jariyatak servipkiti, jan ukasti Diosan leyinakapajj chuymanakapar qellqantatäñap yatisajja wal kusisipjje ukat taqe jaqenakatakiw machaq arustʼäwejj wiñayatak askinak apanini sasin Jeremiasajj arskäna ukatsa kusisipjjarakiwa.

14. ¿Khitinakas machaq arustʼäwit askinak katoqapjje?

¹⁴ Niyakejjay 144.000 ajllitanakajj machaq arustʼäwinkapjjchejja, jupanakakiw askinak katoqapjje sasaw yaqhepajj sapjje. Kunattejja, Jesusan jiwäwipajj sapa mara amtaski ukhajj jupanakakiw tʼantʼsa manqʼapjje vinsa umapjje, ukatwa inas ukham amuyapjjchi, ‘wilajj machaq arustʼäwi’ sañ muni ukar uñtayataw vinojja (Mar. 14:24). Amtañäni, jupanakajja Jesusamp chikaw machaq arustʼäwir mantapjje, ukat jupanakarakiw Abrahaman ‘wawapa’ sasin uñtʼatäpjje, uka toqerakiw walja markanakajj bendición katoqapjjani (Gál. 3:8, 9, 29; Gén. 12:3). Machaq arustʼäwimp Jehová Diosajj jaqenakar bendiciñ amtkäna ukjja, kunjamats phoqapuniniwa, Abrahaman ‘wawap’ toqe jutki uka taypiw uk lurani.

15. ¿Kunsa ajllitanakajj lurapjjani?

¹⁵ Jesucristow Abrahaman wawap toqe jutirejja, jupaw Jilïr Sacerdotjamajja ukat loqtasitapjjaruw juchanakasatsa ukat pantjasitanakasatsa perdonatäsna (Hebreos 2:17, 18 liytʼasiñapawa). Jïsa, “sacerdotenakapjjatawa, ukhamarak nayaru katuyat suma markaraki” sasinjja, walja maranak nayraw Diosajj arsutayna (Éxo. 19:6). Nayra Israel markanjja, sacerdotenakajj mä tributäpjjänwa, ukat reyinakasti yaqha tributaraki. Ukhamasti, ¿kunjamarak reyinaka ukat sacerdote markas uñstaspänsti? Khitinakatï qollan ajayumpi qʼomachatapkäna ukanakaruw apóstol Pedrojj nayrïr cartap qellqatayna (1 Ped. 1:1, 2). Jupanakarojj akham sänwa: “Reyir serviri tukuyat sacerdotenakäpjjaraktawa; mä qʼoma markäpjjtawa; Diosan ajllisit markapäpjjaraktawa” sasa (1 Ped. 2:9). Machaq arustʼäwirjamasti, ajllit cristianonakajj sacerdotenakjamwa servipjjani. ¿Kunanaksa lurapjjani? Juchanïtas laykojj sapüruw jan walinakan jikjjatastanjja, ukamp apnaqatäsktanwa. Sacerdotenakjam servipkani ukanakajj jiwasjamaw jikjjatasiwayapjje, ukhamasti kunjamsa maynejj juchachasisin jikjjatasi uksa sumwa amuyapjjani (Rom. 5:21). Jesusamp chikaw kunatï jan walïki ukar jan puriñasatakejj khuyapayasiñamp yanaptʼapjjestani.

16. Apocalipsis 7:9, 14 qellqatatjja, ¿kuna chuymachtʼawsa ‘walja jaqenakajj’ jikjjatapjjaspa?

¹⁶ Apocalipsis 7:9, 14 qellqatarjamajj “walja jaqenak[aw]” ‘janqʼo isinkamaki’ sarapjje sasaw qhanañchi, ukhamat Dios nayraqatan qʼomäpjjatap uñachtʼayañataki. Ukhamat ‘jachʼa tʼaqhesïwita’ qhespiñataki, uka walja jaqenakajja wakichtʼatäjjapjjewa, ukhamasti jichhatpachaw Jehová Diosampi askirjam uñjatäpjje. Amigonakapäkaspas ukham cheqapar uñjatäpjjewa (Rom. 4:2, 3; Sant. 2:23). ¡Ukajj mä aski churäwiwa! Jiwasatï walja jaqenak taypinkstanjja, Dios nayraqatan qʼoma jikjjatasiñataki ukat jan walinakar atipjañatakis jupaw yanaptʼaskistani.

17. ¿Jehová Diosajj maynin juchap ‘janiw amtjjeti’ siski ukajj kamsañsa muni?

¹⁷ ¿Diosamp suma uñjatäjjapjje ukanakan juchapajj kunjamäjjesa? Kunjamtï yatjjataniwayktanjja, Jehová Diosajj akham sasaw Jeremías toqejj säna: “Ñanqha luratanakapatjja perdonarakïwa, jucha luratanakapatsti janiw mayampsa amtaskjjarakïti” sasa (Jer. 31:34). Jesusan loqtasitapjjaruw Jehová Diosajj ajllitanakan juchap pampachi. Ukatjja, wilap toqe ‘machaq arustʼäwir’ mantatäki uka toqerakiw walja jaqenakan juchapjja pampacharakispa. Ukat Diosajj juchanak janiw jukʼamp ‘amtjjaniti’ sasin Jeremiasajj siskäna ukajja, amuyups chhaqayaskaspa ukham janiw sañ munkiti. Jan ukasti, Diosajj wakisitarjamaw jucha luririr cheqañchi ukat jan wali lurirejj juchapat arrepentisjje ukat perdón jikjjati ukhajja, Diosajj uka juchapjja jan mayampitakiw armjje. Amuytʼañataki, Rey Davitajj Betsabé ukat Urías chacha contra jan wal lurkäna uk amtañäni. Davitajj cheqañchata ukat luratanakapat jan walinakanwa jikjjatasïna (2 Sam. 11:4, 15, 27; 12:9-14; Isa. 38:17). Ukampis Diosajj janiw jukʼamp juchañchjjänti (2 Crónicas 7:17, 18 liytʼasiñapawa). Kunjamtï machaq arustʼäwin qhanañchkejja, Jesusan loqtasitapjjar perdonki ukjja janipuniw amtjjeti (Eze. 18:21, 22).

18, 19. ¿Machaq arustʼäwitjja kunsa perdonañ toqet yateqsna?

¹⁸ Ukhamasti kunjamsa Jehová Diosajj pantjasir jaqenakar uñji ukwa machaq arustʼäwejj amuytʼayistu, arustʼäwinkapki uka ajllitanakarusa ukat aka Oraqen wiñay jakañ suyapki ukanakarusa. Ukhamajja, Diosajj juchanakas perdonkistu ukjja janipuniw amtjjeti, ukaruw atinissna.Ukat Diosajj machaq arustʼäwin arski ukjja sapa maynis yateqasiraksnawa. Akham jisktʼasiñasawa: “Maynin jan wali luratapat perdonkta ukjja, ¿Jehová Diosat yateqasis jan mayampi amtañatakit chʼamachasisktjja?” sasa (Mat. 6:14, 15). Jiskʼa juchäpasa jan ukajj jachʼäpasa uka yatichäwirjamaw sarnaqañasa. Amuytʼañataki, Diosar servir chacha warmit maynejj wachoq juch luraspa. Ukat jan juch lurki ukajj maynin arrepentisitapat perdonjjchi ukhajja, janiw ‘jan wali luratapat amtjjañapäkiti’. Maynin jan wali luratap armañajj inas chʼamächispa, ukampis ukham lurasajja Diosatwa yateqasisktanjja.a

¹⁹ Kuntï machaq arustʼäwit yatjjatktan ukjja tamasanwa uñachtʼayaraksna, sañäni: maynitï jan wali luratapat tamat jaqsuyasispa ukampis arrepentisispa ukat tamar kuttʼanjjaspa. ¿Kunjam chuymampis jan wal lurkïstäna jan ukajj chuymas ustʼaykistäna ukarojj uñjsna? Jichhajj tamas taypinkjjewa, ¿kunjamsa Jeremías 31:34 qellqatajj amuyusansa, luräwisansa yanaptʼistaspa? ¿Perdonañäniti ukat janit mayampis amtjjañäni? (2 Cor. 2:6-8.) Jïsa, machaq arustʼäwir askirjam uñjktan ukanakajj ukarjamaw sarnaqañasa.

20. ¿Jeremías tiempon jakir judionakajj kunjamsa amuyapjjäna ukat jiwasajj kunsa yattanjja?

²⁰ “¡Janiw Diosajj walsa jan walsa lurkaniti!” sasaw Jeremiasan tiempopan walja judionakajj sapjjäna (Sof. 1:12). Jehová Diosajj khitïnsa ukat kunjamänsa uk yatipkchïnsa, janiw kuns lurkaniti, janirakiw kunjamäkitï Jupajj ukham sarnaqsnati sasaw amuyapjjäna. Jupanakat sipansa, Jehová Diosajj taqe kun sum uñjatapwa jiwasajj yattanjja ukat Juparojj taqe chuymaw ajjsartanjja ukatsti janirakiw kuna jan walsa lurañ munktanti (Jer. 16:17). Ukhamarusa, Jehová Diosajj munasirïtapsa yattanwa, luratanakas janis mayninakajj uñjapkchejja, Jupajj sum uñji (2 Cró. 16:9).

21, 22. ¿Kunatsa Jehová Diosar uñtʼañatakejj jan jariyatäktanjja?

²¹ Machaq arsutʼäwejj kunatsa wali aski uka toqetjja, Bibliajj akham siwa: “Nayan leyinakajjsti chuymanakaparuw uskü, pʼeqenakaparuw qellqantarakï. Nayasti jupanakan Diosapäyäwa, [...]janirakiw wakiskjjaniti, yatichasipjjañanakapajj maynit maynikama amigonakaparusa, ukhamarak parientenakaparusa, taqenirakiwa jiskʼat jachʼakama nayarojj uñtʼapjjetani” sasa (Jer. 31:33, 34). Aka Oraqenkasipki uka ajllitanakajja, Diosan leyinakapajj chuymanakapan qellqantatäpjjatapwa uñachtʼayapjje. Jaqenakan yatichäwipar atinisiñat sipansa cheqa yatichäwiruw wali askit uñjapjje ukat Biblian yatichäwinakapjja walja jaqenak taypir mantapjjañapatakiw jaqenakarojj kusisit yatiyapjje. Ukhamatwa khitinakatï Oraqen wiñay jakaña suyapki jupanakajj Jehová Diosar uñtʼapjje ukat munasipjjaraki. Jakäwipjja Diosaruw katuyasipjje ukat arsutaparus taqe chuymaw atinisipjjaraki. Jumas jupanak taypinkarakpachätawa, Diosarojj sum uñtʼjjta ukat Jupampis sumarak apasjjtajja. ¿Janit ukajj bendicionäkaraki?

²² ¿Kunjamsa Jehová Diosamp jumajj apasiskakta? Mayisitanakamar Diosajj istʼatap inas amtsta, ukham amtasajja kunjamäkiti Diosajj ukhamarjam jukʼampiw munaspachätajja. Jan ukajj jan waltʼäwinakar atipañatakejj inas Biblian yaqhep jiskʼa tʼaqanakap amtsta, ukhamatwa Diosajj jumar yanapaskatam amuyarakpachätajja. Ukanakjja wali askirjam uñjañamawa. Jumatï Bibliat jukʼamp yatjjataskakïtajja, Diosarojj jukʼampirakiw uñtʼäta, ukajj wiñayatakiw jumatak askïni.

23. ¿Kunjamsa Diosar uñtʼañajj chuymas jan aynachtʼat sarnaqañasatak yanaptʼawayistu?

²³ Machaq arustʼäwirjamajja, jichhürunakan yaqha bendicionarakwa jikjjatsna. Machaq arustʼäwirjamaw Jehová Diosajj juchanak perdoni, uk yatisaw jiwas pachpajj jan juchañchasjjañäniti. Amuytʼañataki, inas mä warmejj Diosan kamachinakap janïr uñtʼkasajj purakapat wawa apsuyaschi ukatwa llakita jikjjatasispa, kunattejj ukham lurañajj juchawa. Ukat mä chʼajjwäwin maynir jiwayatapatwa yaqhepajj llakit jikjjatasipjjaraki. Khitinakatï juchapat arrepentisipki ukanakajja, Jesusan loqtasitapjjaruw perdonatäpjje, ukaw machaq arustʼäwin qhanaraki. Ukhamasti, ¿kuntï Jehová Diosajj perdonkistu ukjja wiñayatak armjjatap yatiñajj janit chuymachtʼkistaspa? Jïsa, Diosajj perdonkistu uka juchanakasatjja janiw amtjjañasäkiti.

24. ¿Kuna chuymachtʼäwsa Jeremías 31:20 qellqatan jikjjatsna?

²⁴ Kunjamsa Diosajj perdoni ukjja Jeremías 31:20 qellqataw uñachtʼayistu (liytʼasiñapawa). Jeremiasan nasiñapatak walja maranak faltkäna ukhajja, Israel markan alay toqenkir Efraín triburuw yaqha diosanakar loqtatapat Jehová Diosajj cheqañchatayna, uka tribusti wali uñtʼatänwa. Israelitanakajja, yaqha oraqenkapjjänwa, ukampis Diosajj jupanakamp chikaskänwa ukat munasiñs uñachtʼayarakïnwa. Wali ‘munat wawarjamaw’ munasiskakïna. Kunapachatï jupanakat amtkäna ukhajja, ‘chuymapajj chʼalljjtänwa’ sinttʼaskaspas ukhama. Machaq arustʼäwit parlkasaw uka arunak säna, jan wali luratapat arrepentisirinakatakejj kunja khuyaptʼayasiris Jehová Diosajja ukwa uka arunakampejj qhanañchi.

25. ¿Kunatsa machaq arustʼäwit Jehová Diosar yuspärañasa?

²⁵ Waranq maranak Jesusajj apnaqañ tukuyjjani ukhaw kuntï Jehová Diosajj machaq arustʼäwi toqejj perdonañ toqet arskäna ukjja sum phoqani. Diosar taqe chuyma yupaychapki ukanakarojja, kunjamtï nayrïr awk taykasajj jakasipkänjja, ukham jakasipjjañapatakiw Jesucristompi ukat 144.000 sacerdotenakjam servirinakampejj yanaptʼapjjani. Khitinakatï qhep qhepa yantʼar atipjapkani ukanakajja, Jehová Diosan familiaparuw mantapjjani (Romanos 8:19-22 liytʼasiñapawa). Walja maranakaw jaqenakajj juchamp aynachtʼata uñjasipjje, ukampis qhepatjja “Diosan wawanakapan qhespiyat jakäwipan[wa]” jakasipjjani, juchatsa jiwañatsa qhespiyatäpjjaniwa. Ukhamasti machaq arustʼäwirjamajja, jichhasa ukat jutirïnsa walja bendicionanak katoqasma, uka toqetjja janiw pächasiñamäkiti. ‘Davitan wawap’ toqejja, aka ‘oraqenjj cheqaparu’ jakañaw utjani (Jer 9:24; 33:15).