Mä profetajj ‘qhepa urunakanwa’ Jehová Diosar servïna

1, 2. 1) ¿Kuna uñachtʼäwis Jeremiasarojj wali chʼamampi yatiyañapatak yanaptʼäna? 2) ¿Kunatsa Jeremiasan yatiyäwipat yatjjatañajj wali askïspa?

‘¿KUNS uñjta?’ sasaw jichhak ajllit profetaparojj Diosajj jisktʼäna, ukat Jeremiasajj akham sänwa: “Wallaqeskiri mä phukhu uñjta, ukasti amsta toqet niyas wartasinirpacha” sasa. Kuntï Jeremiasajj uñjkäna ukajja, kuna yatiyäwsa yatiyañapäna uk sañ munäna (Jeremías 1:13-16 liytʼasiñapawa). Judá markajj Diosat jitheqtapjjatapatjja, kunjamtï caldojj wallaqkir phukhut phurmurki ukhamwa Judá markan jan wali luratanakapajj markpachar phoqantani sasaw Jehová Diosajj mä profecía arsüna. ¿Phukhu lakajj aynach toqer uñtatawa siski ukajj kamsañs muni? Jan waltʼayirinakajja, alay toqetwa jutañapäna, mä arunjja, Babilonia markaw Judá mark tʼunjir alay toqet jutañapäna. Jïsa, ukhamapunïskänwa. Jeremiasajj profetjam irnaqkäna ukapachajja, wallaqkir caldo phukhut walja kuti wartasirwa Jerusalén mark tʼunjasiñapkamajj uñjawayäna.

² Babiloniajj janiw markjamajj utj-jjeti, ukampis kuntï Jeremiasajj Diosan amuytʼayatäsajj arsuwaykäna ukajj jiwasatak wali askiwa. Kunattejj ‘qhepa urunakanwa jaktanjja’, ukatjja waljaniw cristianüpjjtwa sapjjaraki, ukampis Diosajj janiw jupanakarusa ni yupaychañ utanakaparus askit uñjkiti (Jer. 23:20, NM). Jehová Diosan Qhanañchirinakapajj Jeremiasjamarakiw Diosan tukjäwi urupata ukat kuna suytʼäwis utjistu uk yatiyaraktanjja.

 3. 1) ¿Jeremías librojj kunjam wakichtʼatasa? 2) ¿Kuna amtamp wakichtʼatas aka yatichäwejja?

³ Kunanakatï urut urutjam pasaskäna ukanak jupa pachpa qellqañat sipansa Jeremiasajj secretarioparuw qellqayäna, ukjja profetjam irnaqañ tukuykäna ukhaw qellqaypachäna (Jer. 25:1-3; 36:1, 4, 32). Qellqaykäna ukajj janiw urut urutjam kunanakas pasäna ukhamarjam qellqatäkiti, jan ukasti sarnaqäwirjam apthaptʼatawa. Ukhamajja, Jeremías ukat Lamentaciones uka libronakarjamajj kunanakapunis pasatayna uk yatjjatañasawa ukat kunanakas urut urutjamajj pasäna uk sum amuytʼañasarakiwa (23 janan uka toqet qhanañchki uk uñjjattʼäta). Ukapachajj khitis Judá mark apnaqäna, ukat Judá markansa, uka jakʼankir markanakansa awisajj kunas pasäna ukanak sum yatjjatañaw kuns Jeremiasajj luräna ukat kunanaks arsüna uk amuytʼañatakejj yanaptʼistani. Ukatsti, Jeremiasajj kunanaks Diosan markapar yatiyäna ukanakat wali askinak apsuñatakis wakichtʼatarakïñäniwa.

4-6. ¿Jeremiasajj profetjam janïr irnaqkäna uka walja maranak nayrajj kunanakas pasäna?

⁴ Jeremiasajj profecía arunakjja jan waltʼäwi urunakanwa yatiyäna, Asiria, Babilonia ukat Egipto markanakaw chʼajjwasipkäna. Niya 93 maranakaw Jeremiasan profetjam irnaqañapatakejj faltaskäna, ukhaw asirionakajj Israel mark tukjapjjatayna (alay toqenkir tunka tribunaka) ukat walja israelitanakaruw apapjjatayna. Ukharakiw Jehová Diosajj Jerusalén marksa ukat Jupat jan jitheqtir Ezequías reyirus asirionakamp tʼunjatäñat jarkʼaqatayna. Amtañäni, Diosajj mä angelampikiw 185.000 asirio soldadonakar jiwarayatayna (2 Rey. 19:32-36). Ezequiasan maynïr yoqapajj Manasés satänwa. Manasesajj 55 maranak Israel mark apnaqkäna ukhaw Jeremiasajj naspachäna, uka tiemponsti Judá markajj política toqetjja Asiria markamp apnaqatäjjapjjänwa (2 Cró. 33:10, 11).

⁵ Jeremías profetaw 1 Reyes ukat 2 Reyes libronak qellqatayna. 2 Reyes qellqatarjamajja, Manasés apnaqerejj Baal sat diosan altaranakapsa, alajjpachan utjki ukanaksa ukat kunanaktï awkipajj tʼunjkäna ukanakjja wasitatwa lurayatayna ukanakjja Jehová Diosan templopar kunaw uchayatayna. Ukatjja, jan juchani walja jaqeruw jiwarayatayna ukat wawapar kunaw nakhantayat ofrendjam kʼari diosar loqtatayna. Cheqas Manasés apnaqerin luratanakapajj “[Jehová] Tatitun nayraqatapansti [...] sinti jan walinakänwa”. Ukham jan wali luratanakapatjja, tʼaqhesiñanakaw Jerusalén ukat Judá markjjar jutani, kunjamtï Samaria ukat Israel markas jikjjatasipkäna ukhama sasaw Diosajj arsutayna (2 Rey. 21:1-6, 12-16). Manasés apnaqerejj jiwjjäna uka qhepatjja, Amón sat yoqapajj awkipjamarakiw kʼari diosanakar yupaychaskakïna. Ukampis ukajj niy mayjtʼañampïskänwa. Amón reyejj pä maranak apnaqjjäna uka qhepatwa 659 maran jiwayapjjäna, ukatsti Josías sat yoqapaw reyit uttʼayatäjjäna, ukhajja kimsaqallqo maranikïskänwa.

⁶ Josiasajj 31 maranak apnaqkäna ukhajja, Babilonia markajj Asiria markar atipañampïskänwa. Uk uñjasaw Josiasajj Asiria markat yaqhaqtañataki mä arunjja, Asiria markamp jan apnaqayasiñatak amtjjäna. Josiasajja, awkipat sipansa, achachilapat sipansa jan jitheqtasapuniw Jehová Diosar servïna ukat cheqa yupaychäw qʼomachasiñapatakisa wal chʼamañcharakïna (2 Rey. 21:19–22:2). Amtañäni, 12 maranak apnaqjjäna ukhajja, idolonakar yupaychañataki taqe kast altaranaksa, idolonaksa qʼal tʼunjayäna, uka qhepatsti, Jehová Diosan templopsa askichayarakïnwa (2 Crónicas 34:1-8 liytʼasiñapawa). Josiasajj 13 maranak apnaqkäna (647 marana) ukhaw profetapjam irnaqañapatak Jeremiasar Diosajj ajllitayna.

7, 8. 1) ¿Manasés ukat Amón sat apnaqerinakat sipansa kunansa Josiasan apnaqäwipajj mayjänjja? 2) ¿Kunjam jaqënsa Josiasajja? (26 janankki uka recuadro uñjjattʼäta.)

⁷ Diosan templop askichasipkäna ukat 18 maranak Josiasajj apnaqkäna ukhaw jilïr sacerdotejj Diosan ‘leyi libropa jikjjatatayna’. Josiasajj secretariopan liytʼañapatakiw mayïna, uk istʼasajja, markachirinakan Dios contra pantjasipjjatapwa amuyäna, ukatwa Hulda sat profetisa toqejj Jehová Diosan yanaptʼap thaqhäna, ukat Diosan kamachinakap istʼapjjañapatakiw markachirinakarojj ewjjtʼarakïna. Nayat jitheqtapjjatamatjja “mä jan waltʼañwa” Judá markar apayanëjja sasaw Jehová Diosajj säna uk Hulda sat profetisajj Josiasar yatiyäna, ukampis Josiasajj Diosat jan jitheqtas servitapatjja janiw uka jan waltʼäwi uñjañapäkänti (2 Rey. 22:8, 14-20).

⁸ Josías reyejja, idolonakar yupaychañatak utjki ukanakjja Judá markpachan qʼal tʼunjayäna, ukat Israel markar sarasinjja Betel sat cheqan idolonakar yupaychañataki altarajj utjkän uksa qʼal tʼunjayarakïna. Ukatjja Pascua sat jachʼa fiesta lurapjjañapatakiw amtayäna (2 Rey. 23:4-25). Ukajj Jeremiasarojj ¡walpun kusisiypachänjja! Ukampis Jehová Diosan yupaychäwipar kuttʼjjapjjañapatak jaqenakar yanaptʼañajj wali chʼamänwa. Manasés ukat Amón sat reyinakajj idolonakar yupaychapjjañapatakiw markachirinakar wiytapjjatayna, ukatwa Diosar yupaychañan qʼala aynachtʼatäpjjäna. Josiasajj cheqa yupaychäwi qʼomachañatakiw chʼamachasïna, ukampis Judá markan idolonakapajj markanakapjam waljakïskiwa sasaw Diosajj Jeremías toqejj yatiyäna. Jeremiasan markachir masinakapajja, jaqechatäkasin yaqhamp sarnaqeri warmjamäpjjänwa: kunattejj jupanakajj Jehová Diosat jitheqtasaw yaqha markankir diosanakar yupaychapjjäna. Ukatwa Jeremiasajj akham säna: “Judá markajj walja diosanakaniwa qawqhäkitejj markanakapajj ukkha, ukhamaraki Jerusalenankiri jaqenakasti walja altaranakarakwa Baal diosatakejj saytʼayapjje qawqhäkitejj Jerusalén markan callenakapajj ukkharaki” sasa (Jeremías 11:1-3, 13 liytʼasiñapawa).

 9. ¿Josiasan apnaqäwipajj tukuyañampïkäna uka maranakajja yaqha markanakampejj kunas pasäna?

⁹ Jeremiasan yatiyäwinakapajj judionakarojj janiw mayjtʼaykänti, yaqha markanakajj jachʼañchasiñatak chʼajjwasipkäna uks janirakiw jarktʼkänti. Khä 632 nayrïr pacha (n.p.) maranjja, Babilonia markajj Media sat markamp mayachtʼasisaw Asiria markan Nínive sat capitalapjja katuntapjjatayna. Kimsa maranak qhepatjja, Egipto mark apnaqeri Necao (Nekó) sat faraonajj alay toqeruw soldadonakap khitäna asirionakar yanaptʼapjjañapataki. Josiasajja, egipcionakaruw Meguidó sat lugaran jarktʼañ munäna, kunatsa uk lurpachäna ukjja janiw Bibliajj qhanañchkiti, ukampis usuchjataw jiwjjäna (2 Cró. 35:20-24). Ukhamar purtʼasitapatjja, ¿kuna mayjtʼäwinakas Judá markan política toqeta ukat yupaychäwi toqetsa utjaspäna? Ukat ¿kuna jan waltʼäwinsa Jeremiasajj uñjasispäna?

10. 1) Josiasan jiwatapatjja kunanakatï paskäna ukanakajja, ¿kunansa jichhürun niya kikparaki? 2) ¿Kunjamsa Jeremiasan jan aynachtʼatapajj yanaptʼistu?

¹⁰ Josías reyin jiwatapajj Jeremiasar walpun llakisiyäna. Ukat wali llakit uñjasisaw Jeremiasajj llakkañ arunak Josiasat amtasisajj qellqatayna (2 Cró. 35:25). Ukajja, Judá markatakejj wali llakkañänwa, ukatjja yaqha markanakajj chʼajjwasipkäna ukajj jukʼampwa jan waltʼayäna. Egipto, Asiria ukat Babilonia uka markanakajj judionakan markanakap katuntañatakiw chʼajjwasipkäna. Judá markanjja yupaychäwejj mayjtʼjjänwa. Josiasajj apnaqkäna ukhajja, Jeremiasatakejj Diosan arunakap yatiyañajj janiw chʼamäkänti, ukampis qhoru apnaqerinakajj apnaqjjapjjäna ukhajj wali chʼamäjjänwa. Jichhürunakanjja walja jilat kullakanakaw ukhamanakan jikjjatasiwayapjje: Diosan arunakap yatiyasipkipanjja akatjamat jarkʼata ukat arknaqataw uñjasiwayapjje. ¡Mä qhawqha tiempotjja, jiwasat inas mä qhawqhanejj ukhamanakan uñjasirakchiñäni! Ukhaman uñjassna ukhajj ¿kunjamakis jikjjatassna? ¿Diosat jan jitheqtañatakejj kun lurañasäspasa? Ukhamanakan jikjjatasisajja, kunjamtï Jeremiasajj jan waltʼäwinakar atipjkäna uk yatjjatañajj wal chʼamañchistani.

11. ¿Josiasan jiwatapatjja Judá markan kunas pasäna?

¹¹ Judá markankirinakajja Josiasan Joacaz ([Jehoacaz] Salum satarakiwa) sat yoqaparuw katuntapjjäna ukatsti Jerusalenan reyitwa uttʼayapjjarakïna. Ukampis jupajja kimsa phajjsikiw apnaqäna. Kunapachatï Necao sat faraonajj babilonionakamp chʼajjwasin aynach toqer kuttʼankäna ukhajja, Egipto markaruw Joacaz sat apnaqerirojj apjjäna. Janiw kuttʼanjjaniti sasaw Jeremiasajj yatiyarakïna (Jer. 22:10-12; 2 Cró. 36:1-4). Faraonajja, Joacaz lantejj Joacim (Jehoiaquim) sat Josiasan mayni yoqaparuw apnaqerit uttʼayatayna. Joacim sat reyejj janiw awkipan suma sarnaqäwipat yateqaskänti, jan ukasti, cheqa yupaychäwjja mayjtʼayänwa ukat idolonakar yupaychañsa wasitat uttʼayjjarakïna (2 Reyes 23:36, 37 liytʼasiñapawa).

12, 13. 1)¿Joacim reyejj apnaqañ qalltkäna ukhajj yupaychäwejj kunjamänsa? 2) ¿Yupaychäw pʼeqtʼir judionakajj kamachañs Jeremiasar munapjjäna?

¹² Joacim sat reyejj apnaqañ qalltkäna ukhajja, templor sarasin judionakar jan wali luratanakapat juchañchanim sasaw Jehová Diosajj Jeremiasar säna. Judionakajja, templorojj jarkʼaqayasiñataki mä illäkaspasa (amuleto) ukhamwa uñjapjjäna, jan wali luräwinakap jan apanukupkani ukhajj Jehová Diosajj jupanakarojj apanukurakispänwa, judionakajj aka jan walinakwa apanukupjjañapäna: ‘Lunthatasiña, jaqe jiwayaña, wachoq juchan sarnaqaña, kʼari juramentonak luraña, Baal diosar inciensonak loqtaña, ukatsti yaqha diosanakar yupaychaña’. Ukatjja, Diosajj templorusa ukat ukan kʼari yupaychirinakarusa, kunjamtï Elí sacerdoten urunakapan Siló uka cheqan jikjjataskäna uka tabernaculor jaytjkänjja ukhamarakwa lurañapäna. Ukhamajja, Judá markajj ‘chʼusa wasararu tukuyatarakïñapänwa’ (Jer. 7:1-15, 34; 26:1-6).a Uka arunak yatiyañatakejj Jeremiasajja, ¡jan ajjsartʼirïñapänwa! Ukjja walja jaqenak taypina ukhamarak jilïrinaka ukat irpirinak taypinwa yatiypachäna. Jichhürunakanjja, jiwasat waljaniw callenakansa jan ukajj qamiri jaqenakaru ukat wali aytat jaqenakar Diosan arunakap jan ajjsaras yatiyañatak chʼamachasiraktanjja. Ukampis kunjamtï Jehová Diosajj Jeremiasar yanaptʼkäna ukhamwa jiwasarojj yanaptʼarakistu (Heb. 10:39; 13:6).

¹³ Judá markan política ukat yupaychäwi toqen jan walinkapkäna ukhajja, ¿kunjamaksa yupaychäwi sarayirinakajj Jeremiasan arsutanakap katoqapjjpachäna? Bibliajj akham siwa “sacerdotenakas, profetanakasa, taqe jaqenakasa Jeremiasar katuntasinjja sapjjänwa ‘¡Jichhaw jumajj jiwätajja!’” sasa. Wali colerataw akham sapjjäna: “Aka jaqejj jiwayatäñataki juchañchatäñapawa” sasa (Jeremías 26:8-11 liytʼasiñapawa). Ukampisa, Jeremiasan uñisirinakapajj kuntï lurañ amtapkäna ukjja janiw jikjjatapkänti, kunattejj Jehová Diosaw Jeremiasarojj qhespiyäna. Ukat uñisirinakapajj waljänipkchïnsa jan ukajj wali ajjsarayirjamäpkchïnsa, Jeremiasajj janiw ajjsarkänti. Jiwasanakajj ukhamarakiw jan ajjsarayasiñasäkiti.

14, 15. 1)¿Joacim reyejj pusi maranak apnaqkäna ukhajja kuna luräwsa Jeremiasamp Baruc secretariopampejj qalltapjjäna? 2) ¿Joacim reyejj kunjam jaqënsa? (33 janankki uka recuadro uñjjattʼäta.)

¹⁴ Joacim reyejj pusi maranak apnaqkäna ukhajja, Jehová Diosajj Josiasan urunakapatpach kuntï siskäna taqe ukanak qellqañapatakiw Jeremiasar mayïna. Kuntï Diosajj 23 maranak nayrajj siskatayna taqe ukanakwa Jeremiasajj Baruc secretarioparojj qellqayäna, kuntï 20 reyinakaru ukat apnaqäwinakaparus taripäwinak qhanañchkäna taqe ukanaksa qellqayarakïnwa. Ukat Jeremiasajja, Baruc secretarioparojj Jehová Diosan utapan uka rollo taqenin istʼkañ liytʼañapatakiw khitäna. ¿Kunatsa? Kuna laykutejj Jehová Diosajj akham sänwa: “Inasa ukhamat Judá oraqenkir jaqenakajj kuna tʼaqhesiñanaktejj jupanakjjaru apayaniña amtkta ukanak yatisajj, jan wali luräwinakapa apanukjjapjjchini, ukatsti nayajj jupanakarojj ñanqha luratanakapatsa, jucha luratanakapatsa perdonjjarakirista” sasa (Jer. 25:1-3; 36:1-3).

¹⁵ Joacim nayraqatan mä oficialajj uka rollo sapa jananak liytʼañ tukuyatarjamajja, reyejj jiskʼa jiskʼa khuchhunoqasaw phichhantäna. Liytʼañ tukuyatarojja, reyejj Jeremiasampir ukat Baruc secretariopampir irptanipjjam sänwa. “Ukampis [Jehová] Tatituw jupanakarojj imantjjäna.” (Jeremías 36:21-26 liytʼasiñapawa.) Ukham jan amuytʼan jaqjam reyin luratapatjja, Diosajj profetap toqejj akham sänwa: “Mä asnorjamaw imantapjjani, qatatipjjarakiniwa, ukatsti Jerusalén marka anqäjjaruw liwtanipjjarakini” sasa (Jer. 22:13-19). ¿Uka profecía arunak Jeremiasajj jilamp jilampiw parläna sissnati?

16. ¿Kuna suma yatiyäwsa Jeremiasajj yatiyäna?

¹⁶ Taripäw arunak yatiyatapatjja, Jeremiasarojj jan waltʼäw arunak arsuri sasaw juchañchapjjäna, ukampis profetajj suma yatiyäwinaksa qhanañcharakïnwa. Jehová Diosajj preso apatäpkäna uka israelitanakarojj qhespiyañapänwa, ukatsti markaparuw kuttʼayañapäna ukanwa jan kun ajjsaras jakasipjjañapäna. Diosajj markapampejj “mä machaqa wiñay arustʼäwi” lurañapäna ukat chuymanakaparus leyip qellqantañaparakïna. Juchanakapsa perdonañaparakïnwa ukat armjjañaparakïnwa. Janiw ukakïkänti, Davitan familiapat jutañapäkäna ukaw “aka [Oraqen] askimpi cheqapampi utjaya[ñaparakïna]” (Jer. 31:7-9; 32:37-41; 33:15). Uka profeciajja, walja patak patak maranak qhepatwa phoqasiskañapäna ukat jichha tiemponsa uka profecía qellqatanakajj mä suma suytʼäwi churarakistu. Jeremiasan tiempopat amtañäni, judionakan enemigonakapajj markanak apnaqañjjatjja chʼajjwasipkakïnwa (Jeremías 31:31, 33, 34, Hebreos 8:7-9 ukat 10:14-18 liytʼasiñapawa).

17, 18. ¿Joacim ukat Sedequías reyinakan qhepa maranak apnaqäwipanjja kunanakas yaqha markanakan pasäna?

¹⁷ Babilonionakampi ukat egipcionakampejj 625 maran mä chʼajjwäwinkapjjänwa, Carquemis sat cheqana, uka lugarajj Éufrates sat jawir jakʼankänwa ukasti 600 kilometronak Jerusalén alay toqen jikjjatasïna. Nabucodonosor reyejj Necao sat faraonan ejercitoparuw atipjäna, ukhamatwa uka lugaran egipcionakajj jan apnaqjjänti (Jer. 46:2). Ukatsti Judá markarurakiw munañapampi apnaqjjäna, Joacim sat reyirusti munkir jan munkirwa jupar iyawsayarakïna. Ukampis kimsa mara qhepatjja, Joacim reyejj jupa contraw saytʼasjjäna (2 Rey. 24:1, 2). Ukham jan istʼasiñ munatapatjja, Nabucodonosorampi ejercitopampejj 618 maranwa Judá oraqer chʼamapamp mantanipjjäna ukat Jerusalén marksa muyuntapjjarakïnwa. Cheqasa, uka tiemponakajj wali chʼamapunïpachänwa, Jeremías profetatakis ukhamarakïpachänwa. Jerusalén mark muyuntapkäna ukhaw Joacim reyejj jiwjjpachäna,b ukat Joaquín sat yoqapajj kimsa phajjsi apnaqkäna ukhaw babilonionakar katuyasjjäna. Nabucodonosor reyejj uka markarojj qʼal lunthatsüna ukat reyiru, reyin familianakaparu, Judá markan wali respetat familianakaru, guerran nuwasiñatak wakichat chachanakaru ukat irnaqerinakaparus qʼal katuntasaw apasjjäna. Jupanak chikarakiw Daniel, Ananías, Misael ukat Azarías sat waynitunakas apatarakïna (2 Rey. 24:10-16; Dan. 1:1-7).

¹⁸ Nabucodonosor reyejj Sedequías sat Josiasan yoqaparuw reyit uttʼayäna, aka oraqenjja jupaw Davitan familiapat jutiri qhep qhepa reyëjjäna. Apnaqäwipajja, Jerusalén markajj 607 maran tʼunjatäkäna ukhaw tukusjjäna (2 Rey. 24:17). Ukat 11 maranak apnaqäwipanjja, política toqetsa ukat markansa jan waltʼäwinakakiw utjaskäna. Ukhamajja, Jeremiasajj Jehová Diosaruw taqe chuyma atinisiñapäna, kunattejj Jupaw profetjam uttʼayäna.

19. ¿Jeremiasan yatiyäwinakaparojj kunjamsa uka tiempon jakir jaqenakajj katoqapjjäna ukat uka toqet yatjjatañasajj kunats wakisi?

¹⁹ Kunjamakis Jeremiasajj jikjjataspachäna uk amuytʼañäni. Josiasajj jakkäna uka urunakatpachwa política toqet kunayman jan waltʼäwinak uñjäna, Diosan markapasa jukʼat jukʼat aynachtʼkäna uksa uñjarakïnwa ukat jan waltʼäwinakajj jukʼamp utjañapsa yatirakïnwa. Markapankir jaqenakasa “jan [Jehová] Tatitun sutipjjaru jukʼampi parlkjjamti, ukhamatsti janiw jiwayapkämati” sasaw ajjsarayapjjarakïna (Jer. 11:21). Profecía arunak phoqasir uñjkasasa judionakajj akham sasipkakïnwa: “Kuna arunaktejj jumajj [Jehová] Tatitu toqet apanipjjesta ukanakarojj janiw istʼapkäti” sasa (Jer. 44:16). Jeremiasatï jan yatiykaspänjja walja jaqenakaw jiwarapjjaspäna, jichhürunakan ukhamarakiwa. Jeremiasajj yatiykäna uka arunakajj Jehová Diosatwa jutäna, ukhamarakiw kuntï yatiyktan ukajj Jupat jutaraki. Jerusalenajj janïr tʼunjatäkäna ukhajj kunjamsa Diosajj Jeremiasar yanaptʼäna ukanak yatjjatañajja, taqe chuym yatiyir sarañatakiw yanaptʼistani.

20. ¿Sedequiasajj apnaqkäna ukhajj kunatsa Jeremiasatakejj wali chʼamänjja? (37 janankki uka recuadro uñjjattʼäta.)

²⁰ Sedequías reyejj apnaqkäna ukhajja, Jeremiasatakejj profetjam irnaqañajj inas jukʼamp chʼamächïna. Sedequías reyejja, nayra reyinakjamarakiw ‘kunatï Jehová Tatitutaki jan walïki ukanak luraskakïna’ (Jer. 52:1, 2). Ukat babilonionakan apnaqatarakïnwa, Nabucodonosor reyejj jupat jan jitheqtañapatakejj Jehová Diosan sutipjjaruw juramento lurayäna. Ukhamäkchïnsa, Sedequiasajj Nabucodonosor contraw saytʼjjäna. Ukañkamasti, Jeremiasarojj uñisirinakapaw Nabucodonosor contra saytʼasiñapataki wiytapjjäna (2 Cró. 36:13; Eze. 17:12, 13).

21-23. 1) ¿Kunatsa Sedequías reyejj apnaqkäna ukhajja judionakajj payar tʼaqjtapjjäna? 2) ¿Judionakamp chik jan saytʼasitapat Jeremiasar kamachapjjänsa ukat kunatsa uk yatjjatañasajj wakisi?

²¹ Sedequiasajj apnaqañ qalltkäna ukhajja, Edom, Moab, Amón, Tiro ukat Sidón sat markanakan apnaqerinakapan khitanakapaw Jerusalén markar purinipjjäna, inas Nabucodonosor contra saytʼasiñ amtampi purinipjjchïna. Ukampis Jeremiasajja, Babilonia mark contrajj jan saytʼasimti sasaw Sedequías reyirojj ewjjtʼäna. Ukat Jeremiasajj uka markanakan khitanakaparojj yugonak apayäna, uka yugonakajj babilonionakan nayraqatapan uka markanakajj qonqortʼasipjjañapawa sañwa munäna (Jer. 27:1-3, 14). Kuntï Jeremiasajj siskäna ukarojj janiw askit uñjapkänti, Hananías sat kʼari profetajj taqenin istʼkañaw Diosan sutipjjaru akham arsüna, babilonionakan apnaqäwipajj niyaw tʼunjatäjjani sasa, uka kʼari arunakajj jukʼampwa Jeremiasan yatiyäwinakaparojj jan waltʼayäna. Ukampisa, Hananías kʼari profetajj janïr mä mar paskipanwa jiwjjani sasaw Jehová Diosajj Jeremías toqejj arsüna. Ukajj phoqasïnwa (Jer. 28:1-3, 16, 17).

²² Judionakajj payaruw tʼaqjtapjjäna, mayninakajj babilonionakar yanaptʼapjjäna ukat mayninakasti marka contraw saytʼasipjjäna. Khä 609 maranjja, Sedequías reyejj Babilonia contraw saytʼasjjäna ukat Egipto markan ejercitopampiw yanaptʼayasïna. Jeremiasajja, Babilonia marka contra saytʼasiñatak chʼamachasipkäna uka taypinwa jan waltʼayat jikjjatasïna (Jer. 52:3; Eze. 17:15). Kutkatasiñajj jan jukʼamp utjañapatakejja, Nabucodonosor reyejj ejercitopampiw Judá markar kuttʼanipjjäna, uka jakʼankir markanak qʼal katuntasipjjäna ukat wasitatwa Jerusalén mark muyuntapjjäna. Ukham jan waltʼañ utjipanjja, Jeremiasajj Sedequías reyiru ukat markachirinakampirojj akham yatiyäna, Jerusalén markjja babilonionakaw tʼunjani ukat aka markan qheparirinakajj jiwarayatäpjjaniwa; ukampis khitinakatï aka markat mistsupkani ukat Nabucodonosor rey contra jan saytʼaskani ukanakajj janiw jiwarayatäpkaniti sasa (Jeremías 21:8-10 ukat 52:4 liytʼasiñapawa).

²³ Judá markan jilïrinakapajja, Jeremiasarojj jan wali jaqëkaspasa ukat babilonionak toqetsa saytʼaskaspa ukham uñjapjjäna. Ukat Jeremías profetajj janiw ukhamäkiti sänwa, ukampis juparojj nuwjapjjänwa ukat carcelaruw jistʼantapjjäna (Jer. 37:13-15). Ukham luratpachasa Jeremiasajj Jehová Diosan arunakap janiw mayjtʼaykänti, uk uñjasinjja Jeremiasar jiwayapjjañapatakiw jilïrinakajj Sedequías reyir mayipjjäna. Ukat ñeqʼeni mä phuchʼuruw (phujuruw) jaqontapjjäna, janitï Etiopía markankir Ébed-mélec sat serviripajj yanaptʼkasapäna ukhajj uka phuchʼunwa Jeremiasajj jiwaspäna (Jer. 38:4-13). Jichhürunakanjja, Jehová Diosan Qhanañchirinakapajj niya ukhamanwa jikjjatasipjjaraki, markan politicanakar jan mitisipjjatapatwa awisajj ukhaman uñjasipjje. Cheqasa, kunjamtï Jeremiasajj jikjjataskäna ukajja kuna jan waltʼañanakatï jutïri urunakan jutkani ukar saykatañatakiw yanaptʼistani.

24. Khä 607 maran kunanakas pasäna ukanak qhanañchtʼam.

²⁴ Khä 607 maranjja, babilonionakajj Jerusalén markan perqanakap mä cheq jistʼarasaw Jerusalén mark katuntapjjäna. Soldadonakajja, Jehová Diosan templop qʼal nakhantayapjjäna, markan perqanakapsa tʼunthapipjjäna ukat Judá markankir wali respetat familianakarus juchañchapjjänwa. Sedequías reyejj yaqha markar sarjjañwa munäna, ukampis katuntasaw Nabucodonosor reyin ukar apapjjäna. Ukat kunjamsa wawanakaparojj pʼeqe apaqapjjäna ukjja Sedequías reyejj sum uñjäna, uka qhepatjja juparojj Nabucodonosor reyiw juykhuptayas Babilonia markar apjjäna (Jer. 39:1-7). Jïsa, kuntï Jeremiasajj Judá ukat Jerusalén markanakataki arskäna ukajj phoqasïnwa. Ukampis kusisiñat sipansa, markap tʼunjat uñjasajj Jeremiasajj wali llaktʼataw jachäna, ukham jikjjatasitapajj Lamentaciones libronwa qhan amuyasi. Cheqasa, kunanakatï paskäna taqe ukanak liytʼañajj chuym chʼalljjtayistaniwa.

25, 26. 1) ¿Jerusalén markajj tʼunjatäjjäna ukhajj kunas pasäna? 2) ¿Jeremiasan yatiyäwinakaparojj kunjamsa markachir masinakapajj uñjapjjäna?

²⁵ ¿Ukäñkamajj kamachaskänsa Jeremiasajja? Jerusalenankir jilïrinakaw juparojj carcelar jistʼantapjjatayna, ukampis babilonionakajj janiw kuna jan walsa jupar lurapkänti, jan ukasti antutapjjänwa. Uka qhepatjja, judionakajj Babilonia markar apatäsipkäna ukanakamp chikäskänwa, ukampis wasitatwa antutapjjarakitayna. Qhespipkäna uka judionakar yanaptʼañatakisa ukat Jehová Diosatak irnaqañas Jeremiasatakejj waljaw utjaskäna. Nabucodonosor reyejj Gedalías sat chacharuw Judá mark apnaqañapatak uttʼayäna ukat qhespipkäna uka judionakarojja nayar istʼapjjetäta ukhajj suman jakasipjjäta sasaw Nabucodonosorajj säna. Ukampisa, Gedalías reyirojj uñisirinakapaw jiwayjjapjjäna (Jer. 39:13, 14; 40:1-7; 41:2). Qheparapkäna uka judionakarojj Jeremiasajja, babilonio reyirojj jan ajjsarapjjamti ukat aka markat jan mistsupjjamti sasaw chʼamañchtʼarakïna. Ukampis uñisirinakapajj kʼarïtaw sapjjänwa, ukatwa Egipto markar jaltjjapjjäna ukat Jeremiasampiru Baruc secretariopampir munkir jan munkirwa apapjjäna. Ukhamäkipansa, Nabucodonosor reyiw Egipto mark tʼunjani ukat judionakarus wal tʼaqhesiyarakini sasaw Jeremiasajj mä profecía arsüna (Jer. 42:9-11; 43:1-11; 44:11-13).

²⁶ Ukampis Jeremiasan markachir masinakapajj uka arunakapar janirakikiw istʼapkänti. ¿Kunatsa? Jupanakajj akham sapjjänwa: “Kunapachattejj jan uka diosanakaru incienso loqtasjjapjjta, ukhamaraki uka Alajjpach Mamaru jan vinsa chʼalltʼaskjjapjjtjja ukat aksarojj taqe kunaw pistʼjjapjjetu, jaqenakasti guerranakan, jan ukajj manqʼatjamaw jiwarjjapjjaraki” sasa (Jer. 44:16, 18). Jupanakajj Diosar yupaychañ toqet ¡qʼala aynachtʼatäpjjänwa! Maysa toqetjja, Jeremiasajj jiwasjam pantjasir jaqëkasas kunjamsa ukham jan waltʼañanakan uñjasisajj Jehová Diosat jan jitheqtkäna ukajj jiwasar wal chʼamañchistu.

27. ¿Jeremiasajj profetjam irnaqañ tukuykäna ukat kuns yattanjja?

²⁷ Khä 580 maran kunatï paskän ukwa Jeremiasajj qhep qhepa qellqatayna: Evil-merodac reyiw Joaquín sat reyirojj antutjjatayna, Evil-merodac reyejj Nabucodonosor reyi apnaqkäna uka qhepatwa apnaqjjäna (Jer. 52:31-34). Uka maranakkamajj Jeremiasajj niya 90 maranëjjpachänwa. Jeremiasan jiwatapatjja janiw sum yatiskiti, ukampis Egipto markanwa 67 maranak jan jitheqtasa Jehová Diosar yupaychawaypachäna. Markachirinakajj cheqa yatichäwinak istʼapkäna uka tiemponsa ukat yaqha diosanakar yupaychapkäna uka tiemponsa, Diosan profetapjamajj wali sum Jeremiasajj irnaqtʼawayäna. Yatiyäwinakap waljanis jan istʼañ munapkchïna ukat yaqhepajj janipunis kunsa yatiñ munapkchïnjja, Diosan arunakap istʼirinakarojj jikjjatänwa. ¿Jeremiasajj Diosan arunakap yatiyasajj aynachtʼiw sissnati? ¡Janipuniw ukham sisksnati! Qalltatpachaw Jehová Diosajj akham satayna: “Jupanakajj walpun juma toqejj saytʼasipjjani, ukampis janiw atipjapkätamti. Nayaw jumampïskäjja” sasa (Jer. 1:19). Jehová Diosan Qhanañchirinakapjamajja, Jeremiasjamarakiw Diosan arunakap yatiytanjja, jiwasajj jupjamarakiw uñisit jikjjatasna (Mateo 10:16-22 liytʼasiñapawa). Ukhamajja, ¿kuna askinaksa Jeremiasat yateqassna ukat kunjamsa Jehová Diosan arunakap yatiyaraksna? Uka jisktʼanakat yatjjatañäni.