Handunian kpeera turuku kooma? Mba n handunian kpeeru?

Mba a ra bwisiku à n nua ba nɛɛ “handunian kpeeru”? Sɔrɔkudo kaa bwisiku asarɔ gaa sɔɔ, ye ya koo wãaru kpuro kpeesia temɔ. Gaba ra n tamaa handunia ya koo asarɔ yen bweseru wa saa fiiko sɔɔ, a mam de bà n daabaruba garimɔ nge beni:

“Taa bakabu ka bombu ya koo kpĩ yu koora sɔ̃ɔ teeru. Taa bin bweseru bu koo kpĩ bu koora yèn sɔ̃ goo yen kpunaa yi, ǹ kun mɛ asarɔ gaan sɔ̃, ǹ kun maa mɛ yèn sɔ̃ daabaru gɛɛ kun bu yeeri.”—Bulletin of the Atomic Scientists.
“Wɔ̃ɔ dãaki sini sɔɔ guru woo bakasu, dãa sɔ̃ɔ bakasun dɔ̃ɔ, gbeburu, yam susu bakaru ka nim yibunu nu koora handunia gira kpuro sɔɔ.”—National Geographic.
“Twee yi tɔn wɔ̃kon tem bande wɔ̃ɔ dãaki sini sɔɔ n kere saa kpuro.”—The Associated Press.

Tem mu koo kam kowa asarɔ baka gaa sɔɔ? Mba Bibeli ya gerumɔ?

Tem mu koo kam koowa sɔ̃ɔ teeru?

Aawo. Bibeli, Gusunɔn gari ya gerua ma tem mu ko n wãawa sere ka baadommaɔ. (Waasu kowo 1:4) Ye u koo ka tem mɛ win tii u taka kua kpeerasia, Gusunɔ u koo “bu kam koosia be ba handunia kam mɔ̀.”—Kãsiru 11:18.

Handunian kpeera turuku kooma?

Nge mɛ Bibeli ya gerua, bà n nɛɛ “handunia” ya koo kpe ya tubusiawa ba koo be ba ǹ Gusunɔn woodaba mɛm nɔɔwammɛ ma ba ben tiin kĩru mɔ̀ kpeerasia. Nge mɛ u kua Nɔwɛn waati, Gusunɔ u koo “handunian tɔmbu be ba ǹ win bɛɛrɛ yɛ̃” kam koosia—2 Piɛɛ 2:5; 3:7.

Nge mɛ 1 Yohanu 2:17 ya gerua, “handunia maa doonɔwa mi, ka yen binɛ.” Bibelin naasi su sɔ̃ɔsimɔ ma, Gusunɔ kun tem kpeerasiamɔ, adama tɔn be ba tie ba gãa kɔ̃sunu mɔ̀wa u koo kpeerasia.

Domma handunian kpeera koo na?

Bibeli kun sun sɔ̃ɔwa saa ye sɔɔ handunia koo kpe. (Mateu 24:36) Adama, ya gerua ma handunian kpeera turuku kua. Bibeli ya nɔɔsia ma:

Tabu, gɔ̃ɔru, baranu ka tem yĩiri bakabu “kon wãa bera ka bera.”—Mateu 24:3, 7, 14; Luku 21:10, 11; Kãsiru 6:1-8.
Tɔn dabinu ba ko n ben tii tɔnan arufaani kasu. Nge weenasia, “gobin kĩra ko n bu nɛni,” ba “ko n sãa guturuba,” kpa “ba n sãa mɔru kankamgibu.”—2 Timɔte 3:1-5.

Saa wɔ̃ɔ 1914n di tɔn dabina sire ma, ye ya kooramɔ handunia gira kpuro sɔɔ ya mwaanɛ ka ye Bibeli raa nɔɔsia handunian kpeeru sɔɔ. À n kĩ a yɛ̃ru sosi, a kparanu “Que révèle la chronologie de la Bible sur l’année 1914?” ka “Quel est le signe des <<derniers jours>>, ou <<temps de la fin>> ?” gario.

“Kãsiru” mba ya tubusia Bibeli sɔɔ?

Bibeli sɔɔ bà n nɛɛ ka gɛrɛkim “kãsiru” ya tubusiawa “bu gãanu kamɛ” ǹ kun mɛ “asiri ye ba tuba.” Bà n nɛɛ kãsiru, ya tubusia asiri ye ya raa berua ma ba ye kamɛ. Bibeli ya kpam kãsirun gari kua sanam mɛ ya nɛɛ “Yinni Yesu Kirisi koo kurama,” kpa u tɔn kɔ̃sobu wĩya tem di kpa u be ba Gusunɔ mɛm nɔɔwammɛɛ domaru kara.—2 Tɛsalonika 1:6, 7; 1 Piɛɛ 1:7, 13.

Ba Bibelin tire dãakiru soka Kãsiru, yèn sɔ̃ ya sun sɔ̃ɔmɔ ye ya koo koora sia. (Kãsiru 1:1) Tire te, ta daabaaru gea ka yĩiyɔbu nɔɔsiamɔ. (Kãsiru 1:3) Ta sɔ̃ɔsimɔ ma Gusunɔ koo gem sariru kpeerasia kpa u tem gɔsia alusanna. Saa ye sɔɔ, wuriribu, nɔni swãaru ka mam gɔɔ kun ko n maa wãa.— Kãsiru 21:3, 4.

A kĩ a yɛ̃ru sosi Bibelin nɔɔ mwɛɛ bura nini sɔɔ? Yehofan seeda diobu ba nun kanamɔ a Bibelin keu ko kɔsiaru sari. A ku tɛ a ka ye wura.