Mateus

26 Dung sae dihatahon Jesus sudena i, didok ibana ma tu angka siseanna, 2 “Nunga diboto hamu, dua ari nai nama Paska jala pasahatonna ma Anak ni jolma i asa diuhum mate di hau.”

3 Marpungu do angka malim kepala* dohot angka pangituai ni bangso i di alaman ni sintua ni malim, na margoar si Kayapas. 4 Marpungu ma nasida mangalului dalan marhite sangkap na jahat laho manangkup dohot mambunu Jesus. 5 Alai ninna nasida ma, “Unang ma tingki perayaan i, asa unang gaor natorop i.”

6 Tingki di Betania Jesus, di jabu ni si Simon na marsahit kusta i, 7 ro ma sahalak borua mamboan botol pualam na marisi miak na angur na arga situtu, mandapothon ibana. Diusehon borua i ma miak i tu ulu ni Jesus tingki mangan ibana. 8 Marnida i, muruk ma angka sisean i jala ninna ma, “Seang nai miak on! 9 Ai boi do gadison miak i mansai arga jala tuhorna boi lehonon tu na pogos.” 10 Ala diboto Jesus do na dihatai nasida, didok ma, “Boasa gugaanmuna borua on? Ulaon na denggan do na binahenna i tu ahu. 11 Sai na adong do halak na pogos rap dohot hamu, alai ndang sai rap hamu dohot ahu. 12 Ai diusehon borua on pe miak i tu dagingku, na laho paradehon tu ari panguburanku do i. 13 Tutu do na hudok on tu hamu, manang didia pe barita na uli dibaritahon di liat portibi on, hatahononna do nang na binahen ni borua on songon parningotan di ibana.”

14 Dung i, laho ma sahalak sian apostel na 12 i na margoar si Judas Iskariot mandapothon angka malim kepala.* 15 Ninna ma, “Aha ma lehononmuna tu ahu, molo hupasahat Jesus tu hamu?” Dijanjihon nasida ma tu ibana 30 logam perak. 16 Mulai sian i, sai dilului ibana ma tingki na denggan laho manjehehon Jesus.

17 Di ari parjolo Perayaan Roti na So Marragi, ro ma angka sisean mandapothon Jesus, ninna ma, “Didia do dipangido roham paradeonnami di ho sipanganon Paska i?” 18 Dialusi Jesus ma, “Laho ma hamu tu kota, disi jumpangmuna ma sasahalak jala dok ma tu ibana, ‘Didok Guru i, “Nunga jonok be tingki naung ditontuhon tu ahu. Naeng mangarayahon Paska ahu rap dohot angka siseanku di jabum.”’” 19 Dung i, diulahon angka sisean i ma songon na nidok ni Jesus jala diparade nasida ma na porlu tu Paska i.

20 Dung borngin, mangan ma Jesus rap dohot siseanna na 12 i. 21 Tingki na mangan i nasida, didok ibana ma, “Tutu do na hudok on tu hamu, adong do sahalak sian hamu na laho manjehehon ahu.” 22 Mansai lungun ma roha ni nasida mambege i. Ganup ma nasida manungkun, “Ahu do na nidokmu Tuan?” 23 Dialusi Jesus ma, “Na rap dohot ahu pamasukkon tanganna tu mangkuk, ibana ma na laho manjehehon ahu. 24 Tutu, laho mate do nian Anak ni jolma i songon na tarsurat taringot tu ibana. Alai, marjea ma halak na manjehehon Anak ni jolma i! Sasintongna, dumenggan do molo ndang tubu ibana.” 25 Si Judas na laho manjehehon Jesus mandok, “Ahu do na nidokmu Guru?” Dialusi Jesus ma, “Ho sandiri do na mandok songon i.”

26 Tingki na mangan i nasida, dibuat Jesus ma roti. Dung ditangiangkon, diponggoli jala dilehon ma tu angka siseanna, ninna ma, “Buat hamu ma on jala pangan hamu. On manggombarhon dagingku.” 27 Dung i, dibuat ma panginuman i jala didok ma mauliate tu Debata. Dilehon ma i tu nasida, ninna ma, “Hamu sude, inum hamu ma on, 28 on manggombarhon mudarhu, i ma ‘mudar parjanjian’ na laho diusehon manesa dosa ni torop halak. 29 Alai hudok ma tu hamu, ndang inumonku be anggur on sahat tu na inumonku anggur na baru rap dohot hamu di Harajaon ni Damang.” 30 Dung sae mangendehon ende puji-pujian,* nangkok ma nasida tu Dolok Jetun.

31 Dung i ninna Jesus ma tu nasida, “Sude do hamu manadingkon* ahu di borngin on, ai tarsurat do, ‘Antukonku ma parmahan i gabe marserak ma angka biru-biru i.’ 32 Alai dung hehe ahu, na laho ma ahu manjoloani hamu tu Galilea.” 33 Dialusi si Petrus ma, “Nang pe sude nasida manadingkon ho, alai ndang tadingkononku ho!”* 34 Didok Jesus ma tu ibana, “Tutu do na hudok on tu ho, andorang so martahuak dope manuk borngin on, nunga tolu hali ahu soadahononmu.” 35 Ninna si Petrus ma tu ibana, “Nang pe mate ahu rap dohot ho, ndang soadahononku ho.” Jala sude ma angka sisean i mandok songon i.

36 Dung i, laho ma Jesus rap dohot siseanna tu inganan na margoar Getsemane. Didok Jesus ma tu angka siseanna, “Hundul ma hamu dison, asa martangiang jolo ahu tusan.” 37 Ditogihon ibana ma si Petrus dohot anak ni si Sebedeus na dua i. Marsak jala mansai susa ma dihilala ibana. 38 Dung i, ninna Jesus ma tu nasida, “Marsak situtu do rohangku, naeng mate huhilala. Dison ma hamu jala dungo ma hamu rap dohot ahu.” 39 Dung i mardalan ma ibana tu jolo otik, marsinggang jala martangiang ma ibana, “Amang, molo boi salpuhon ma panginuman on sian ahu. Alai unang ma lomo ni rohangku, lomo ni roham ma na saut.”

40 Tingki didapothon Jesus siseanna, tarpodom do nasida diida ibana. Alani i, ninna ma tu si Petrus, “Na so boi do hamu dungo rap dohot ahu nanggo apala sajom? 41 Tongtong ma hamu dungo jala sai martangiang, asa unang tarelaela hamu mangulahon dosa. Rade* do nian roha i, alai gale do ia daging.” 42 Dung i, laho ma ibana martangiang paduahalihon, ninna ma, “Amang, molo so boi do salpu panginuman on jala ingkon huinum, lomo ni roham ma na saut.” 43 Dung didapothon muse siseanna i, tong do tarpodom nasida, ai tung mansai borat do mata ni nasida dihilala. 44 Ditadingkon ma muse nasida jala laho ma ibana martangiang patoluhalihon. Didok ma muse songon na ditangiangkonna i. 45 Dung i, didapothon ma angka siseanna i, ninna ibana ma, “Modom dope hamu jala maradi di tingki sisongon on! Nunga jonok be tingkina pasahatonna ma Anak ni jolma i tu tangan ni angka pardosa. 46 Hehe ma hamu, laho ma hita. Ida ma! Nunga ro na manjehehon ahu.” 47 Tingki mangkatai dope Jesus, ro ma si Judas sahalak sian apostel na 12 i rap dohot mansai torop halak. Diboan nasida do podang dohot antuk-antuk. Jala angka malim kepala* dohot angka pangituai ni bangso i do na manuru nasida.

48 Nunga dipaboa siparjehe i hian tanda tu nasida, ninna ma, “Manang ise na huumma, ibana ma i, tangkup hamu ma.” 49 Pintor didapothon ibana ma Jesus ninna ma, “Horas Guru!” Laos diumma ibana ma Jesus. 50 Alai ninna Jesus ma tu ibana, “Marhua ho tuson dongan?” Dung i, ditangkup nasida ma Jesus. 51 Alai disintak sahalak sisean ni Jesus ma podangna, diroro ma hatoban ni sintua ni malim jala ditallik ma pinggolna. 52 Didok Jesus ma tu ibana, “Pasarung ma podangmi, ai manang ise manintak podang, mate do bahenon ni podang. 53 Ai na dirimpu ho do ndang boi pangidoonku sian Damang asa disuru marribu* suru-suruan? 54 Molo songon i do, songon dia ma boi saut na nidok ni Surat na Badia i, na paboahon na ingkon masa i?” 55 Dung i didok Jesus ma tu natorop i, “Na dirimpu hamu do ahu pangarampok, umbahen diboan hamu podang dohot antuk-antuk laho manangkup ahu? Hape, ganup ari hundul do ahu di bagas joro mangajari, alai ndang ditangkup hamu ahu. 56 Masa pe sudena i asa saut do na sinurat ni angka panurirang i.” Dung i, lari ma angka sisean i, ditinggalhon ma ibana.

57 Diboan angka na manangkup i ma Jesus tu si Kayapas sintua ni malim i. Ai nunga marpungu disi angka siboto surat dohot angka pangituai. 58 Alai, sai diihuthon si Petrus do Jesus sian na dao sahat tu alaman ni jabu ni sintua ni malim i. Dung masuk tu bagasan, hundul ma ibana rap dohot angka hatoban na disi, mangida na laho masa.

59 Dilului angka malim kepala* dohot saluhut Sanhedrin* ma hatorangan na so sintong laho mangalo Jesus asa boi diuhum mate ibana. 60 Alai sada pe ndang adong dapot ni nasida, nang pe godang saksi na so sintong. Dung i, ro ma dua saksi 61 na mandok, “Didok ibana do, ‘Boi do hurumpakkon bagas joro ni Debata jala pajongjongonku muse di bagasan tolu ari.’” 62 Jongjong ma sintua ni malim jala ninna ma tu Jesus, “Na so dibege ho do na nidok ni nasida laho mangalo ho?” 63 Alai sai hohom do Jesus. Ninna sintua ni malim i ma tu ibana, “Marsumpa ma ho di bagasan goar ni Debata na mangolu i, paboa ma tu hami, tutu do ho Kristus anak ni Debata?” 64 Dung i, didok Jesus ma tu ibana, “Songon na nidokmi ma tutu. Alai, hupaboa ma tu hamu: Mulai sian tingki on, idaonmuna ma Anak ni jolma i hundul di siamun ni Debata na marhuaso i jala na ro do ibana di atas ni ombun di langit.” 65 Diribakkon sintua ni malim i ma pangkeanna, ninna ma, “Na mangaleai Debata do ibana! Tu aha be luluan saksi? Nunga dibege hamu ibana mangaleai. 66 Boha do didok rohamuna?” Dialusi nasida ma, “Pamateon do ibana!” 67 Ditijuri nasida ma bohina, adong muse na manumbuk ibana. Na asing mamastap bohina, 68 didok nasida ma, “E ho Kristus, molo panurirang do ho, paboa ma tu hami ise na mamungkul ho!”

69 Tingki hundul si Petrus di luar di alaman i, ro ma sahalak hatoban borua mandapothon ibana, ninna ma, “Ho pe, dohot do ho rap dohot Jesus halak Galilea i!” 70 Alai margabus do ibana di jolo ni nasida sude, ninna ma, “Ndang huantusi manang aha na nidokmi.” 71 Tingki laho ibana tu harbangan, diida borua na asing ma ibana jala ninna ma tu halak na disi, “Rap do baoa on dohot Jesus halak Nasaret i.” 72 Disoadahon si Petrus ma muse jala marsumpa ma ibana, “Ndang hutanda i!” 73 Ndang sadia leleng nai, didapothon halak na jongjong na disi ma si Petrus, ninna ma, “Toho, dohot do ho sada sian nasida, ai tarida do sian logatmi.” 74 Marsumpa ma si Petrus mandok, “Ndang hutanda i, hona bura ma ahu molo margabus.” Dung i, pintor martahuak ma manuk. 75 Gabe diingot si Petrus ma na nidok ni Jesus tu ibana, “Andorang so martahuak dope manuk, nunga tolu hali ahu soadahononmu.” Dung i laho ma ibana tu luar jala tumatangis situtu.