Markus

16 Dung salpu ari Sabbat, dituhor si Maria Magdalena, si Maria ina ni si Jakobus dohot si Salome ma rempah-rempah laho bahenonna tu bangke ni Jesus. 2 Di manogot di ari parjolo sian minggu i, dung binsar mata ni ari, laho ma nasida tu kuburan. 3 Ninna nasida ma sama nasida, “Ise ma manggulingkon batu sian kuburan i di hita?” 4 Alai dung diida nasida kuburan i, nunga guling be batu i nang pe balga situtu. 5 Tingki masuk nasida tu kuburan i, tarsonggot ma nasida mangida sahalak doli-doli hundul di siamun mamangke jubah na bontar. 6 Didok ma tu nasida, “Unang mabiar hamu. Huboto do, Jesus halak Nasaret naung diuhum mate di hau i do na niluluanmuna. Nunga dipahehe ibana, ndang dison be. Ida ma, dison hian do dipeakkon nasida ibana. 7 Laho ma hamu, paboa ma tu angka siseanna dohot tu si Petrus, ‘Nunga laho ibana tu Galilea manjoloani hamu. Idaonmuna do ibana disi, songon na nidokna hian tu hamu.’” 8 Dung kaluar sian kuburan i, marlojongi ma nasida jala hitir-hitir alani biarna. Ndang adong dihatahon nasida manang aha tu manang ise pe, ai mabiar do nasida.*