Markus

8 Di tingki i, marpungu ma muse torop halak jala ndang adong sipanganon ni nasida. Dijou Jesus ma angka siseanna, ninna ma, 2 “Asi do rohangku tu natorop on, ai nunga tolu ari nasida rap dohot ahu jala ndang adong sipanganon ni nasida. 3 Molo husuru nasida mulak hape male nasida, olo ma pingsan annon nasida di dalan. Ai adong do sian nasida na ro sian na dao.” 4 Dung i dialusi angka siseanna ma ibana, “Sian dia ma dapot roti di inganan na lungun on asa butong natorop on?” 5 Disungkun Jesus ma tu nasida, “Piga do roti na adong di hamu?” Dialusi nasida ma, “Pitu.” 6 Disuru Jesus ma natorop i hundul di tano. Dibuat ibana ma roti na pitu i, didok ma mauliate tu Debata, diponggoli ma roti i jala dibagihon ma tu siseanna asa dilehon tu natorop i. 7 Adong do muse di nasida manang na piga dengke na gelleng. Didok Jesus ma mauliate tu Debata jala disuru ma muse asa dibagihon i. 8 Mangan ma nasida jala butong. Dung i, dipapungu ma lobi-lobi ni roti i, gok pitu karanjang na balga.* 9 Adong do 4.000 baoa na mangan i. Dung i, disuru Jesus ma nasida mulak.

10 Masuk ma Jesus tu parau rap dohot angka siseanna jala laho tu luat Dalmanuta. 11 Ro ma halak Parise mandapothon Jesus, mulai ma nasida marsoal dohot ibana. Dipangido nasida do tanda halongangan* sian banua ginjang laho manguji Jesus. 12 Marsak situtu ma Jesus, ninna ma tu nasida, “Boasa sai mangido tanda halongangan* sundut on? Tutu do hatangkon, ndang adong tanda halongangan* silehonon tu sundut on.” 13 Ditadingkon Jesus ma nasida, nangkok ma ibana muse tu parau jala laho ma ibana tu bariba.

14 Alai lupa do angka sisean i mamboan roti, holan sada ma roti na adong di nasida di parau i. 15 Dipasingot Jesus ma nasida, ninna ma, “Manat ma hamu tu ragi ni halak Parise dohot tu ragi ni si Herodes.” 16 Alani i, gabe marsoal ma angka sisean i ala ndang adong sian nasida na mamboan roti. 17 Tingki diboto Jesus taringot i, didok ma tu nasida, “Boasa marsoal hamu taringot tu roti? Na so diantusi hamu dope? Na maol do diantusi hamu? 18 ‘Marmata do hamu, alai boasa ndang marnida? Marpinggol do hamu, alai boasa ndang marbinege?’ Na so diingot hamu do 19 na hulehon i mangan 5.000 baoa marhite lima roti? Piga karanjang do lobi-lobina dipapungu hamu?” Dialusi nasida ma, “12 karanjang.” 20 “Tingki hulehon mangan 4.000 baoa marhite pitu roti, piga karanjang na balga* do lobi-lobina dipapungu hamu?” Dialusi nasida ma, “Pitu karanjang.” 21 Didok Jesus ma tu nasida, “Laos so mangantusi dope hamu?”

22 Sahat ma nasida di Betsaida. Diboan halak ma tu Jesus sahalak baoa na mapitung jala dielek-elek nasida ma asa dipamalum ibana. 23 Ditogu Jesus ma baoa na mapitung i tu luar ni huta i. Ditijuri Jesus ma matana, dung i diampehon ma tanganna tu ibana jala disungkun ma ibana, “Adong do na boi diida ho?” 24 Mamereng ma baoa i dompak jolo jala ninna ma, “Huida do nian angka jolma, alai songon angka hau na mardalan do nasida huida.” 25 Dijama Jesus ma muse mata ni baoa i, malum ma ibana jala torang ma diida sude. 26 Dung i disuru Jesus ma ibana mulak, ninna ma, “Unang laho be ho tu huta i.”

27 Dung i, laho ma Jesus dohot angka siseanna tu angka huta di Kaesarea Pilippi. Di tonga dalan, disungkun ibana ma tu angka siseanna, “Ise do ahu didok halak?” 28 Dialusi nasida ma, “Si Johannes Pandidi. Adong muse na mandok si Elia. Na asing muse, sahalak sian panurirang.” 29 Disungkun Jesus ma muse tu nasida, “Alai ise do ahu didok rohamuna?” Dialusi si Petrus ma, “Kristus i do ho.” 30 Dung i, tangkas ma diorai Jesus nasida asa unang dipaboa-boa manang tu ise pe taringot tu ibana. 31 Laos di tingki i, mulai ma dipatorang Jesus tu angka siseanna na ingkon taonon ni Anak ni jolma i do godang hasusaan. Ndang jaloon ni angka pangituai, malim kepala* dohot siboto surat ibana. Bunuon ni nasida ma ibana, alai dung tolu ari hehe ma ibana. 32 Tangkas situtu do dipatorang Jesus taringot i tu nasida. Ditarik si Petrus ma Jesus tu lambungna, jala dipasingot ma ibana. 33 Marbalik ma Jesus, dibereng ma dompak angka siseanna jala dipinsang ma si Petrus, ninna ma, “Laho ma ho tu pudingku Bolis! Ai ndang pingkiran ni Debata dipingkirhon ho, pingkiran ni jolma do.”

34 Dung i dijou ibana ma natorop i rap dohot angka siseanna, ninna ma, “Manang ise na naeng mangihuthon ahu, ingkon disoadahon do dirina jala dituhuk hau partinaonan* i jala tongtong ma diihuthon ahu. 35 Manang ise na naeng paluahon ngoluna, agoan ngoluna do. Alai manang ise na agoan ngoluna alani ahu dohot alani barita na uli, malua do. 36 Aha ma gunana dapot ni sasahalak sude na di portibi on anggo agoan ngolu do ibana? 37 Aha ma na boi lehonon ni sasahalak ganti ni ngoluna? 38 Ai manang ise na maila alani ahu dohot alani angka hatangku di tonga-tonga ni sundut na so marsihohot* jala pardosa on, Anak ni jolma i pe maila do alani ibana di tingki ro di bagasan hasangapon ni Amana rap dohot angka suru-suruan na badia i.”