Lukas
15 Di sada tingki, marpungu ma sude sijalo pajak* dohot angka pardosa di lambung ni Jesus laho manangihon ibana. 2 Marungut-ungut ma halak Parise dohot sibotosurat, ninna nasida ma, “Dijalo* ibana do angka pardosa jala rap mangan dohot nasida.” 3 Dung i dipaboa Jesus ma tudosan on tu nasida, ninna ma, 4 “Molo adong sian hamu nampuna 100 biru-biru jala mago sada sian i, nda tadingkononna do na 99 i di ladang jala laho mangalului na mago i sahat tu na dapot? 5 Dung dapotna i, dibahen ma i tu abarana jala marlas ni roha ma ibana. 6 Dung sahat ibana di jabu, dijou ma marpungu angka donganna dohot hombar jabuna, ninna ma tu nasida, ‘Marlas ni roha ma hamu rap dohot ahu, ai nunga dapothu biru-birungku na mago i.’ 7 Hudok ma tu hamu, dos songon i, umbalga do las ni roha di banua ginjang alani sahalak pardosa na muba sian apala 99 halak na mangulahon na sintong na so porlu paubahon rohana.
8 “Manang, molo adong sahalak borua nampuna sampulu hepeng logam drakhma* jala mago sada sian i, nda pagalakonna palitona, sapuonna jabuna, jala manat luluanna sahat tu na dapot? 9 Dung dapotna i, dijou ibana ma marpungu angka donganna* dohot hombar jabuna, ninna ma, ‘Marlas ni roha ma hamu rap dohot ahu, ai nunga dapothu hepeng logam drakhma* na mago i.’ 10 Hudok ma tu hamu, suang songon i ma las ni roha ni angka suru-suruan ni Debata tu sahalak pardosa na marhamubaon.”
11 Dung i didok Jesus ma, “Adong ma sahalak baoa nampuna dua anak. 12 Didok sianggian ma tu bapakna, ‘Bapa, lehon ma arta parbagiananku.’ Dung i, dibagi bapakna ma artana tu anakna na dua i. 13 Dung manang na piga ari, dipapungu anak sianggian i ma sude artana jala borhat ma ibana tu luat na dao. Disi, dipasuda ma sude artana marhite mangoloi hisap-hisap ni dagingna. 14 Dung dipasuda ibana sude, masa ma haraparon di saluhut luat i jala marpogos ma ibana. 15 Alani i, laho ma ibana jala gabe parkarejo ni halak na di luat i. Disuru ma ibana marmahan babi di ladang. 16 Alani malena naeng allangonna ma indahan ni babi i. Ai ndang adong na mangalehon manang aha tu ibana.
17 “Dung tiur pingkiranna, ninna ma, ‘Torop do parkarejo ni bapakku na marlobi-lobi sipanganonna, hape ahu dison naeng mate alani malena! 18 Mulak nama ahu tu bapakku jala dohononku ma tu ibana, “Bapa, nunga mardosa ahu tu Debata* dohot tu ho. 19 Ndang tama be ahu dohonon anakmu. Bahen ma ahu parkarejom.”’ 20 Dung i laho ma ibana mulak tu bapakna. Dao dope ibana, nunga diida bapakna ibana. Gabe asi ma roha ni bapakna i, marlojong ma ibana, dihaol jala diumma ma anakna i. 21 Dung i didok anakna i ma tu ibana, ‘Bapa, nunga mardosa ahu tu Debata dohot tu ho. Ndang tama be ahu dohonon anakmu.’ 22 Alai didok bapakna i ma tu angka hatobanna, ‘Pahatop! Buat jolo jubah na dumenggan jala pangkehon tu ibana. Bahen ma tintin dohot sipatuna. 23 Buat ma lombu na ummokmok, seat ma i asa taallang jala marpesta hita. 24 Ai nunga mate anakkon, alai mulak mangolu muse. Naung mago hian do ibana, alai nunga jumpang be.’ Alani i, marlas ni roha ma nasida.
25 “Tingki i di ladang do anakna siangkangan. Dung mulak ibana jala nunga jonok tu jabu, dibege ma soara ni musik dohot soara ni na manortor. 26 Dijou ibana ma sahalak sian hatoban i jala disungkun ma manang aha na masa. 27 Didok hatoban i ma, ‘Nunga mulak anggim jala diseat amanta do sada lombu na mokmok ala sehat* do ibana mulak.’ 28 Alai gabe muruk ma ibana jala ndang olo masuk. Dung i kaluar ma bapakna jala dielek ma ibana. 29 Alai didok ibana ma tu bapakna, ‘Nunga martaon-taon ahu gabe hatobanmu jala ndang hea hualo parentam, alai laos so hea do apala sahali dilehon ho anak ni hambing panganonku dohot angka donganku. 30 Alai disi mulak anakmi naung pasudahon* artam rap dohot angka boru-boru na so hasea, diseat ho do lombu na mokmok di ibana.’ 31 Dung i didok bapakna i ma tu ibana, ‘Ale anakku, tongtong do ho rap dohot ahu. Sude ampunakki, ampunam do i. 32 Alai ingkon marpesta do hita jala marlas ni roha. Ai nunga mate anggimi, alai mulak mangolu muse. Naung mago hian do ibana, alai nunga jumpang be.’”