Lukas

8 Ndang sadia leleng dungkon i, borhat ma Jesus sian kota tu kota jala sian huta tu huta laho mamaritahon barita na uli taringot tu Harajaon ni Debata. Rap borhat do ibana dohot apostelna na 12 i, 2 dohot do nang angka borua naung pinaluana sian suru-suruan na jahat jala naung pinamalumna sian angka sahit, i ma si Maria na ginoaran si Magdalena na pinaluana sian pitu suru-suruan na jahat, 3 si Johanna tunggane boru ni si Kusa, na mangaradoti jabu ni si Herodes, si Susana dohot torop borua na asing. Dipangke nasida do arta ni nasida laho mangkobasi Jesus dohot angka apostelna.

4 Torop ma halak marpungu rap dohot angka halak na mandongani Jesus sian kota tu kota. Dung i mangajari ma ibana marhite sada tudosan, 5 “Kaluar ma sahalak panabur laho manaburhon boni. Tingki na manabur i ibana, madabu ma deba boni i di topi dalan, gabe tardege ma i jala ro ma angka pidong na martonga-tonga langit mangallang i. 6 Na deba madabu di atas ni batu. Jala dung tubu, hatop ma i malos ala so adong aek. 7 Na deba nai madabu di tonga-tonga ni suga-suga. Dung lam balga suga-suga i, dihapit ma suan-suanan i. 8 Alai na asing, madabu ma i tu tano na denggan. Tubu ma i jala marparbue 100 hali lompit.” Dung didok Jesus angka i, didok ma, “Manang ise na marpinggol, dibege ma i.”

9 Alai, disungkun angka siseanna i ma tu Jesus lapatan ni tudosan i. 10 Didok Jesus ma, “Dilehon do tu hamu pangantusion laho mamboto rahasia* na badia taringot tu Harajaon ni Debata, alai tu angka na asing holan tudosan do dilehon. Ai nang pe marnida nasida, ndang adong gunana jala nang pe marbinege nasida, ndang mangantusi nasida. 11 On do lapatan ni tudosan i: Boni i, i ma hata ni Debata. 12 Boni na madabu di topi ni dalan, i ma halak na mambege hata i. Alai ro ma Sibolis mambuat hata i sian roha ni nasida asa unang porsea jala unang malua nasida. 13 Boni na madabu di atas ni batu, i ma halak na mambege jala na manjalo hata i di bagasan las ni roha, alai ndang marurat. Satongkin do nasida porsea, tingki ro pangunjunan madabu ma nasida. 14 Boni na madabu di suga-suga, i ma halak na mambege hata i, alai ala holso ni roha, hasonangan di parngoluon dohot hamoraon mangkapit nasida, gabe ndang marparbue nasida. 15 Alai boni na madabu di tano na denggan, i ma halak na ias rohana. Dung dibege hata i, disimpan ma i di bagasan roha ni nasida jala marparbue mardongan habengeton.

16 “Ndang adong halak na pagalakkon lampu, dung i dihungkuphon gunsi tusi manang dibahen tu toru ni podoman. Alai, dibahen do i tu inganan na timbo asa diida angka na ro sinondangna. 17 Ai ndang adong na buni na so dipapatar jala ndang adong na hungkup na so dipabotohon dohot na so dibungka. 18 Alani i, parrohahon ma songon dia hamu manangihon. Ai tu halak na adong di ibana, tambaan do. Alai tu halak na so adong di ibana, gari didok rohana i ampunana buaton do sian ibana.”

19 Ro do ina dohot angka anggi ni Jesus mandapothon ibana. Alai ndang boi nasida pajumpang alani angka natorop i. 20 Dung i dipaboa ma tu Jesus, “Jongjong do di luar ina dohot angka anggim naeng pajumpang dohot ho.” 21 Alai dialusi Jesus ma nasida, “Na manangihon dohot na mangulahon hata ni Debata do inangku dohot angka anggingku.”

22 Di sada tingki, laho ma Jesus dohot angka siseanna marparau jala didok Jesus ma tu nasida, “Laho ma hita tu bariba an.” Dung i, borhat ma nasida. 23 Tingki na marparau i nasida, modom do Jesus. Ro ma haba-haba tu tao i, gok ma aek masuk tu parau i gabe naeng lonong ma nasida. 24 Dung i ro ma siseanna mandungoi ibana, ninna ma, “Guru, Guru, nunga naeng mate hita!” Dungo ma Jesus, disonggak ma alogo dohot galumbang i, jala so ma galumbang i gabe mansai tenang ma. 25 Gabe didok ibana ma tu nasida, “Didia do haporseaonmuna?” Alai longang do nasida jala mabiar, masipandohan ma nasida, “Ai ise do ibana sasintongna? Haru alogo dohot aek boi do diparenta jala dioloi do ibana.”

26 Dung i, sahat ma nasida tu luat ni halak Gerasa na adong di bariba ni Galilea. 27 Dung sahat Jesus tu darat, ro ma sian kota i sahalak baoa na sinonggopan ni suru-suruan na jahat mandapothon ibana. Nunga leleng ndang marpangkean baoa i, jala ndang di jabu ibana tading alai di kuburan nama. 28 Dung diida ibana Jesus, marsurak ma ibana jala marsinggang di jolona, gogo ma dijouhon ibana, “Ale Jesus Anak ni Debata Natumimbul i, marhua ho ro tuson? Mangido ma ahu tu ho, unang uhum ahu.” 29 (Ai nunga diparentahon Jesus asa kaluar suru-suruan na jahat i sian baoa i. Jotjot do ibana disonggopi suru-suruan na jahat.* Mulak-ulak do ibana dirante, dipasung jala manat dijaga, alai diponggolhon do i sude jala diboan suru-suruan na jahat i do ibana tu inganan na lungun.) 30 Disungkun Jesus ma ibana, “Ise do goarmu?” Didok ibana ma, “Legion”, ai godang do suru-suruan na jahat i masuk tu ibana. 31 Sai dipangido angka suru-suruan na jahat i ma tu Jesus asa unang disuru nasida laho tu lombang na mansai bagas. 32 Di tingki i, adong do sapunguan babi na mangan di dolok. Dipangido angka suru-suruan na jahat i ma tu Jesus asa diloas nasida laho tu angka babi i jala diloas Jesus ma. 33 Kaluar ma angka suru-suruan na jahat i sian baoa i, laho ma nasida tu angka babi i jala manimbung ma angka babi i sian topi ni lombang tu tao gabe maup ma sude. 34 Alai dung diida angka na marmahan babi i na masa i, marlojongi ma nasida jala dipaboa ma i tu kota dohot tu humaliangna.

35 Dung i, marroan ma halak mangida na masa i. Didapothon nasida ma Jesus jala diida nasida ma nunga denggan marpangkean baoa na sinonggopan ni suru-suruan na jahat i jala nunga torang pingkiranna, alani i gabe mabiar ma nasida sude. 36 Dipaboa halak na marnida na masa i ma tu nasida songon dia baoa na sinonggopan ni suru-suruan na jahat i dipamalum. 37 Dung i, dipangido torop halak na di humaliang ni luat halak Gerasa i ma Jesus asa laho manadingkon nasida. Ai mansai mabiar do nasida. Nangkok ma Jesus tu parau jala laho ma ibana. 38 Alai, sai dielek-elek baoa naung malua sian suru-suruan na jahat i ma Jesus asa rap nasida, alai disuru Jesus ma baoa i mulak. Ninna ma, 39 “Mulak ma ho, jala tongtong ma baritahon naung binahen ni Debata tu ho.” Dung i laho ma ibana, dibaritahon ma di saluhut kota na binahen ni Jesus tu ibana.

40 Dung ro muse Jesus, las ma roha ni natorop i manjalo* ibana, ai sude do nasida paima-imahon ibana. 41 Dung i ro ma sahalak baoa na margoar si Jairus, pamimpin ni sinagoga.* Marsinggang ma ibana tu pat ni Jesus jala dielek-elek ma asa ro Jesus tu jabuna. 42 Ai nunga naeng mate boru sasadana na marumur hira-hira 12 taon.

Tingki mardalan Jesus, masisosahan ma natorop i di lambungna. 43 Adong ma disi sahalak borua naung 12 taon ndang hea so bulanna, jala ndang adong na boi pamalumhon ibana. 44 Didapothon ma Jesus sian pudi jala dijama ma rambu ni abit luarna, pintor so ma bulanna i. 45 Disungkun Jesus ma, “Ise na manjama ahu?” Alai ndang adong nasida na mangangku, didok si Petrus ma, “Guru, torop do halak na mangkaliangi jala na manosak ho.” 46 Alai ninna Jesus ma, “Adong do na manjama ahu. Ai huboto do adong huaso na kaluar sian ahu.” 47 Dung diida borua i na tarboto do na binahenna i, ro ma ibana hitir-hitir jala marsinggang tu jolo ni Jesus. Di jolo ni sude halak dipaboa ibana ma boasa dijama ibana Jesus jala songon dia parmalumna satongkin i. 48 Alai didok Jesus ma tu borua i, “Ale borungku, haporseaonmi do mambahen ho malum. Mulak ma ho di bagasan dame.”

49 Tingki mangkatai dope Jesus, ro ma sahalak suruan ni pamimpin ni sinagoga* i, ninna ma, “Nunga mate borumi! Unang susai be Guru i.” 50 Mambege i didok Jesus ma tu si Jairus, “Unang ho mabiar. Alai molo porsea ho, mangolu* do borumi.” 51 Dung sahat Jesus di jabu i, ndang diloas manang ise pe masuk raphon ibana asing ni si Petrus, si Johannes, si Jakobus, ama dohot ina ni dakdanak i. 52 Tangis do sude angka halak jala dipungkuli nasida do dirina ala na mate i dakdanak i. Alai ninna Jesus ma, “Unang tangis be hamu, ndang na mate dakdanak on, alai na modom do.” 53 Diparengkeli nasida ma ibana, ai diboto nasida do naung mate dakdanak i. 54 Ditiop Jesus ma tangan ni dakdanak i jala didok ma tu ibana, “Hehe ma ho boru!” 55 Mulak mangolu ma dakdanak i* jala pintor hehe ma ibana. Disuru Jesus ma asa dilehon ibana mangan. 56 Mansai las do roha ni natua-tua ni dakdanak i, alai didok Jesus ma asa unang dipaboa-boa nasida manang tu ise pe na masa i.