Rom

2 Alani i, hamu ale angka dongan, manang ise pe hamu, ndang adong na boi mambahen hamu manguhumi halak na asing. Molo diuhumi hamu halak na asing, na manguhumi dirimuna sandiri do hamu. Ai hamu pe diulahon hamu do songon na niulahonna ni nasida. 2 Ai taboto do, uhumon ni Debata do halak na mangulahon sisongon i, jala hombar do panguhumanna i tu hasintongan.

3 Ale angka dongan, dirimpu hamu do boi hamu malua sian panguhuman ni Debata, molo diuhumi hamu halak na asing na mangulahon sisongon i, hape hamu pe diulahon hamu do songon i? 4 Manang, na leas do rohamuna tu haburjuon dohot hasabaron ni Debata na mansai balga i? Jala na so diboto hamu do na burju Debata mangurupi hamu mambahen hamubaon? 5 Alai, jogal do rohamuna jala ndang olo hamu muba, alani i parohon rimas ni Debata do hamu tu dirimuna. Patuduhononna ma i di ari panguhumanna na tigor i. 6 Ai baloshonon ni Debata do tu ganup halak hombar tu pambahenanna be. 7 Tu halak na marsitutu mangulahon na denggan, na mangalului hasangapon, hamuliaon, dohot hangoluan na so ra suda, lehonon ni Debata ma hangoluan na saleleng ni lelengna. 8 Alai, tu halak na lomo rohana marbada, tu na so mangoloi hasintongan jala na mangihuthon angka na jahat, paroon ni Debata ma panguhuman dohot rimasna tu nasida. 9 Masa ma sitaonon dohot hasusaan tu ganup halak na mangulahon na jahat. Na parjolo tu halak Jahudi, dung i tu halak Junani. 10 Alai lehonon ni Debata ma hamuliaon, hasangapon, dohot hadameon tu ganup halak na mangulahon na denggan. Na parjolo tu halak Jahudi, dung i tu halak Junani. 11 Ai ndang marimbar jolma di Debata.

12 Manang ise na mangulahon dosa ala ndang mananda patik, mate do ibana nang pe ndang ditanda patik. Jala manang ise na mangulahon dosa, alai ditanda do patik, diuhumi ma ibana mangihuthon patik i. 13 Ai ndang halak na mambege patik i na sintong di jolo ni Debata, alai halak na mangulahon patik i do. 14 Molo diulahon angka bangso na asing patik ni Debata, on patuduhon na adong do patik i di roha ni nasida, nang pe ndang ditanda patik i. 15 Dipatudu do naung tarsurat patik i di roha ni nasida. Panggora ni roha ni nasida mangurupi nasida mamboto na sintong manang na sala ulaon ni nasida. Jala pingkiran ni nasida ma na manontuhon na sintong manang na sala nasida. 16 Hombar tu barita na uli na hubaritahon i, di ari panguhuman, marhite Kristus Jesus uhumon ni Debata ma angka na tinabunihon ni jolma.

17 Digoari do hamu halak Jahudi, na mangasahon Patik. Jala las do rohamuna ala bangso ni Debata hamu. 18 Diboto hamu do lomo ni roha ni Debata. Jala diboto hamu do dia na ringkot, ai diajari do hamu taringot tu Patik ni si Musa. 19 Jala pos do rohamuna, hamu do panogu-nogu ni na mapitung, panondang ni halak di na holom, 20 pangajari ni halak na oto, guru ni angka dakdanak, jala diboto hamu do ajaran na rumingkot dohot na sintong sian Patik ni si Musa. 21 Diajari hamu do halak na asing, alai boasa ma ndang diajari hamu dirimuna? Diajarhon hamu do, “Unang ho manangko,” alai boasa manangko hamu? 22 Didok hamu do, “Unang ho mangalangkup,” alai boasa mangalangkup hamu? Sogo do rohamuna* tu angka gana-ganaan, alai boasa dirampok hamu bagas joro ni gana-ganaan? 23 Balga do rohamuna tu patik i, alai boasa dileai hamu Debata marhite mangalanggar Patik ni si Musa? 24 Songon na nidok ni na tarsurat i, “dileai angka bangso do goar ni Debata alani hamu”.

25 Sasintongna, marlaba do sunat i molo dioloi hamu patik i. Alai molo dilanggar hamu do patik i, dos ma hamu songon na so marsunat. 26 Molo dioloi halak na so marsunat do parenta ni Debata na adong di Patik i, nda etongon ma ibana songon halak na marsunat? 27 Nunga marsunat hamu jala adong do patik na tarsurat i di hamu. Alai dilanggar hamu do Patik i. Alani i, uhuman ni halak na so marsunat i ma hamu, ai dioloi nasida do Patik i. 28 Sasahalak didok halak Jahudi na sintong ndang holan alani na marsunat manang na mangangku halak Jahudi sambing. 29 Alai angka na adong di bagasan rohana i do na patuduhon molo ibana halak Jahudi na sintong. Disunat do rohana marhite tondi parbadia, ndang mangihuthon patik na tarsurat i. Jaloonna ma pujian sian Debata, ndang sian jolma.