Rom

9 Siihuthon Kristus do ahu, jala ditogu-togu tondi parbadia do panggora ni rohangku. Alani i, huhatahon do na sintong jala ndang margabus ahu tingki hudok, 2 marsak jala mansai lungun do rohangku. 3 Olo do ahu disirang sian Kristus i songon halak na hona bura alani haha anggingku, i ma dongan sabangsongku, 4 halak Israel. Dibahen Debata do nasida gabe anakna. Dilehon do tu nasida hasangapon, parjanjian, Patik ni si Musa, angka janji, jala boi manomba Debata di bagas joro. 5 Pinompar ni angka ompu na tarbarita i do nasida jala Kristus marharoroan sian pinompar ni nasida. Anggiat ma Debata na marhuaso di saluhut dipuji saleleng ni lelengna. Amen.

6 Alai ndang na gabe so saut hata ni Debata. Ai ndang sude sian pinompar ni Israel i, halak Israel na tutu. 7 Nang pe sude nasida pinompar ni si Abraham, alai ndang sude nasida anak ni si Abraham. Ai adong do tarsurat, “Sian si Isak do ro pinomparmu na hujanjihon i.” 8 Alani i, ndang sude anak ni si Abraham gabe anak ni Debata. Alai Debata do na mamillit nasida hombar tu janjina i, asa boi nasida didok gabe pinompar ni si Abraham. 9 On ma isi ni janji i, “Taon i, di tingki sisongon on, ro ma Ahu muse jala tubuhonon ni si Sara ma sada anak.” 10 Ndang holan i, alai marjanji do muse Debata tingki naeng ditubuhon si Rebekka anakna na kembar i, na sian si Isak, ompunta. 11 Andorang so tubu dope anakna i, manang andorang so diulahon dope na denggan manang na jahat, nunga didok Debata hian ise na laho pillitonna. Ai hombar tu lomo ni rohana do Debata mamillit, ndang mangihuthon na niulahon ni jolma. 12 Nunga didok Debata tu si Rebekka, “Na umtua ma hatoban ni na umposo.” 13 Songon na nidok ni na tarsurat i, “Holong do rohangku tu si Jakkob, alai sogo do rohangku tu si Esau.”

14 Antong aha ma sidohononta? Na so tigor do Debata? Ndang songon i! 15 Didok Debata do tu si Musa, “Holong do rohangku tu manang ise pe lomo ni rohangku. Jala asi do rohangku tu manang ise pe lomo ni rohangku.” 16 Alani i, tarpillit do sasahalak mangihuthon lomo ni roha ni Debata parasi roha i, ndang mangihuthon lomo ni roha ni jolma manang ulaon ni jolma. 17 Ai didok na tarsurat i do tu si Firaun, “Hupasombu do ho mangolu, asa hupatuduhon huasongku jala asa tarbarita goarhu di liat portibi on.” 18 Alani i, asi do roha ni Debata tu manang ise lomo ni rohana. Alai pasombuonna do jogal roha ni na asing i.

19 Saonari, dohononmuna ma tu ahu, “Ai ndang adong na boi mangalo lomo ni roha ni Debata, antong boasa dope salahonon ni Debata jolma?” 20 Ai ise ma huroa hamu, umbahen na barani hamu mangkatai mangalo Debata? Ndang boi hudon tano mandok tu na manopa i, “Boasa songon on ahu bahenonmu?” 21 Ai lomo ni sitopa hudon i do mambahen sanggomak tano liat manang na gabe aha hombar tu lomo ni rohana. Nda marhak do ibana mambahen tano liat i gabe barang na dipangke tu na sangap, jala na sada nai tu na hurang sangap? 22 Alani i, nang pe naeng patuduhonon ni Debata rimasna dohot huasona tu halak na jahat, alai sabar do Ibana tu halak sisongon i naung ditontuhon laho diripashon, na dipatudos songon hudon tano na laho diropukhon. 23 Dibahen Debata pe songon i, asa tarida do hasangaponna na balga i tu angka jolma naung ditontuhon mandapot asi ni rohana. Jala dipatudos do halak sisongon i tu barang na diparade tu na sangap. 24 Hita ma angka barang i. Ai dipillit* Debata do hita sian tonga-tonga ni halak Jahudi dohot sian bangso na asing. 25 Songon na nidok ni Debata di buku Hosea, “Dohononku ma na so bangsongku gabe ‘bangsongku’. Jala borua na so huhaholongi, dohononku ma ‘na huhaholongi’. 26 Hea do di sada inganan hudok tu nasida, ‘Ndang bangsongku hamu,’ laos disi ma nasida dijou ‘angka anak ni Debata na mangolu i’.”

27 Didok si Jesaya do taringot tu halak Israel, “Nang pe songon godang ni pasir di laut godang ni halak Israel, alai holan saotik do nasida na malua. 28 Ai diuhumi Jahowa do sude halak na di portibi on. Hatop do i bahenonna jala hatop do i sae.” 29 Disurirangkon si Jesaya do muse, “Molo Jahowa, Pamimpin ni Angka Tentara i ndang manadingkon pinompar di hita, nunga gabe songon Sodom manang songon Gumora hita.”

30 Antong aha ma na boi dohononta? Didok do angka bangso na asing mangulahon na sintong alani haporseaon ni nasida, ndang ala na marsitutu nasida asa didok mangulahon na sintong. 31 Hape halak Israel, marsitutu do nasida mangulahon Patik i asa boi nasida didok mangulahon na sintong. Alai ndang boi diulahon nasida sude na di patik i. 32 Boasa songon i? Ala marsitutu do nasida asa didok mangulahon na sintong marhite pambahenan ni nasida, ndang marhite haporseaon. Alani i, tartuktuk ma nasida dibahen “batu na mambahen halak tartuktuk”. 33 Songon na nidok ni na tarsurat i, “Hupeakhon do di Sion batu na mambahen halak tartuktuk, jala na mambahen halak madabu. Alai manang ise na porsea ndang gabe maila.”