2 Korint

1 Sian si Paulus, apostel ni Kristus Jesus hombar tu lomo ni roha ni Debata dohot sian donganta si Timoteus, mandapothon huria ni Debata na di Korint dohot angka na badia na di Akaya.

2 Anggiat ma dipatuduhon tu hamu asi ni roha na mansai balga i dohot hadameon na sian Debata Ama i dohot sian Tuanta Jesus Kristus.

3 Tapuji ma Debata, i ma Ama ni Tuanta Jesus Kristus, Ama parasi roha, na lambok, jala Debata Sipangapul na sumurung. 4 Diapuli* Ibana do hita di saluhut sitaononta.* Marhite apul-apul na tadapot sian Ibana, gabe boi ma hita mangapuli halak na asing na manaon sitaonon manang aha pe. 5 Songon godang ni hasusaan na tataon alani Kristus, songon i ma godang ni apul-apul na tadapot marhite Kristus. 6 Saonari molo marsitaonon* hami, asa boi do hamu tarapul jala malua. Jala molo tarapul hami, asa dohot do hamu mandapot apul-apul jala i ma na mangurupi hamu sabar manaon sitaonon songon sitaonon na hutaon hami. 7 Hot do pangkirimonnami taringot tu hamu. Ai diboto hami do, dohot do hamu manaon sitaononnami i. Alani i, dapotmuna do apul-apul songon na hujalo hami i.

8 Ale angka dongan, naeng do didok rohanami botoonmuna sitaonon na masa tu hami di Provinsi Asia. Mansai borat do sitaononnami i, lobi sian na tartaon. Ndang hurimpu hami be boi hami mangolu. 9 Sasintongna, nunga songon na diuhum mate huhilala hami. Alai masa pe songon i, asa mangasahon Debata do hami, ndang mangasahon dirinami. Ai Ibana do na boi pahehehon halak na mate. 10 Dipalua Ibana do hami sian parmaraan na boi parohon hamatean, jala pos do rohanami paluaonna do hami muse. 11 Boi do hamu mangurupi hami marhite tangiangmuna. Ai dialusi Debata do tangiang ni godang halak. Alani i, godang ma halak mandok mauliate alani pangurupion na hujalo hami.

12 Balga do rohanami ala ias do panggora ni rohanami. Ai badia do parngoluonnami jala ndang munafik hami di portibi on tarlumobi di tonga-tongamuna. Jala ndang mangasahon bisuk ni jolma hami, alai mangasahon asi ni roha ni Debata na mansai balga i do hami. 13 Holan na boi jahaonmuna* dohot na boi antusanmuna do na husurathon hami tu hamu. Jala hirim do rohangku asa boi denggan antusanmuna on sude,* 14 dos songon deba sian hamu naung mangantusi i. Ai adong do deba sian hamu na mangantusi na marbalga ni roha do hamu alani hami, dos songon hami na marbalga ni roha alani hamu di ari ni Tuanta Jesus i.

15 Alani pos ni roha i, ninna rohangku naeng ro hian do ahu parjolo tu hamu asa boi dua hali hamu mandapot las ni roha.* 16 Di tingki i, naeng ro do ahu mandapothon hamu andorang so laho tu Makedonia. Jala naeng ro do ahu muse tu hamu dung mulak sian Makedonia, asa boi urupanmuna ahu manorushon pardalananku tu Judea. 17 Ai na marmeam-meam ahu tingki hupaboa sangkaphi? Manang holan mangihuthon lomo ni rohangku do tingki hubahen i, umbahen na hudok “olo” alai “daong”? 18 Alai songon Debata na boi tahaporseai, boi do hamu porsea tu hatanami. Ndang dohononnami “olo” alai “daong”. 19 Asing ni i, Jesus Kristus Anak ni Debata na hubaritahon hami tu hamu rap dohot si Silwanus* dohot si Timoteus, ndang hea mandok “olo” alai “daong”. Ai molo didok ibana “olo”, tongtong do “olo”. 20 Ai sadia godang pe janji ni Debata, gabe saut* do i marhite ibana. Alani i, marhite ibana do muse tadok “Amen” tu Debata asa tapasangap Debata. 21 Ai Debata do na patoguhon molo hamu dohot hami ampuna ni Kristus, jala Ibana do na mamillit hita. 22 Dibahen Debata do muse meteraina tu hita jala dilehon do tondi parbadiana tu bagasan rohanta na patoguhon hita na dohot do hita manjalo pasu-pasu di ari na naeng ro.*

23 Dohot hosangku sandiri, marsumpa ma ahu di jolo ni Debata, asa unang marsak do hamu umbahen na sundat ahu ro tu Korint. 24 Ndang tuan na mangarajai haporseaonmuna hami, alai dongan saulaonmuna do hami na mambahen las rohamuna. Ai alani haporseaonmuna sandiri do umbahen na boi hamu togu.