2 Korint

10 Ahu si Paulus, mangido tu hamu marhite lambok ni roha dohot haburjuon ni Kristus. Adong do sian hamu na mandok, halak na gale do ahu tingki rap dohot hamu, alai barani tingki ndang rap dohot hamu. 2 Dipangido rohangku do, molo dung rap ahu dohot hamu, unang ma nian muruk ahu tu manang ise pe sian hamu, na mandok molo hami mangihuthon pingkiran ni angka jolma na di portibi on. 3 Nang pe mangolu hami di portibi on, alai ndang mangihuthon pingkiran ni angka jolma na di portibi on parporangannami. 4 Ai ndang sian portibi on sinjatanami di parporangan i. Alai sian Debata na marhuaso i do. Asa boi hurumpakkon hami angka naung togu dipajongjong. 5 Ai hurumpakkon hami do angka pingkiran na sala dohot angka na maralo tu parbinotoan taringot tu Debata. Hurajai hami do nasa pingkiran asa mangoloi Kristus. 6 Dung dipatudu hamu na mangoloi do hamu di saluhutna, uhumonnami ma sude angka na so mangoloi.

7 Ai mangihuthon na tarida do hamu manguhumi. Molo pos roha ni sasahalak na ampuna ni Kristus ibana, ingkon ingotonna do molo hami pe ampuna ni Kristus do songon ibana. 8 Laho patoguhon hamu do umbahen dilehon Tuan i tu hami huaso, ndang na laho mambahen hamu gale. Nang pe molo tung malobihu balga ni rohangku alani huaso na nilehon ni Tuan i, alai ndang maila ahu disi. 9 Alai ndang olo ahu, gabe songon na pabiar-biarhon hamu ahu marhite angka surathu. 10 Ai adong do na mandok, “Karas jala posi do surat ni si Paulus i, hape tingki pajumpang dohot hita, gale do ibana idaon jala hatana pe ndang marlapatan.” 11 Alai porlu do botoon ni halak na mandok i, molo na hupaboa hami di angka suratnami i, ulahononnami do i tingki rap dohot hamu. 12 Ndang olo hami patudoshon dirinami manang gabe dos dohot angka siginjang roha. Ai manguhumi do nasida mangihuthon na denggan di nasida sandiri. On patuduhon ndang adong pangantusion ni nasida.

13 Anggo hami, ndang balga rohanami tu angka ulaon na so huulahon hami. Alai balga do rohanami tu ulaon na pinasahat* ni Debata tu hami jala dohot do hamu di ulaonnami i. 14 Sasintongna, ndang huulahon hami lobi sian ulaon na nilehon ni Debata tu hami tingki ro hami mandapothon hamu. Ai hami do na parjolo sahali pasahathon barita na uli taringot tu Kristus tu hamu. 15 Ndang balga rohanami tu ulaon ni halak na asing, na asing sian ulaon na dilehon tu hami. Alai hirim do rohanami asa lam togu haporseaonmuna jala asa lam tamba parbue ni na huulahon hami i di tonga-tongamuna. Alani i lam godang ma ulaon na boi huulahon hami. 16 Boi ma hubaritahon hami barita na uli i di inganan na asing na dao sian ingananmuna, asa unang marbalga ni roha hami tu ulaon ni na asing di inganan ni nasida. 17 “Manang ise na naeng marbalga ni roha,* marbalga ni roha ma ibana alani Jahowa.” 18 Ai ndang dihalomohon Debata halak na mamuji dirina sandiri, alai dihalomohon Jahowa do halak na pinujina.