Galatia

1 Sian si Paulus, na gabe apostel ndang ala dipillit jolma alai alani Jesus Kristus dohot alani Debata Ama i, na pahehehon Kristus sian na mate, 2 mandapothon angka huria na adong di Provinsi Galatia. Sahat ma tu hamu tabe ni angka dongan na rap dohot ahu.

3 Anggiat ma dijalo hamu asi ni roha na mansai balga dohot hadameon sian Debata Amangta dohot sian Tuan Jesus Kristus. 4 Dilehon Kristus i do dirina laho manesa dosanta, asa boi paluaonna hita sian portibi* na jahat on hombar tu lomo ni roha ni Debata Ama i. 5 Tu Debata ma hasangapon na saleleng ni lelengna. Amen.

6 Songgot situtu do rohangku ala tibu hamu maninggalhon Debata na manjou hamu marhite asi ni roha ni Kristus na mansai balga i, jala diihuthon hamu barita na uli na asing. 7 Sasintongna ndang adong barita na uli na asing. Alai adong halak na naeng mangaliluhon hamu marhite pabalik-balikhon barita na uli taringot tu Kristus. 8 Molo adong sian hami manang sian suru-suruan na di surgo na paboahon barita na uli na imbar sian na hupaboa hami tu hamu, sai hona uhum ma ibana. 9 Songon naung hudok hami, hudok ma muse tu hamu, manang ise na paboahon barita na uli na imbar sian naung binegemuna, sai hona uhum ma ibana.

10 Ndang lomo ni roha ni jolma na hulului, alai lomo ni roha ni Debata do. Ndang na laho mambuat roha ni jolma ahu. Molo jolma do na hupasonang, ndang naposo ni Kristus i be ahu. 11 Tangkas ma hupaboa tu hamu angka dongan, ndang sian jolma barita na uli na hupaboa tu hamu. 12 Ai ndang sian jolma hujalo i jala ndang jolma na mangajarhon i tu ahu. Alai Jesus Kristus do na patuduhon i tu ahu.

13 Tontu dibege hamu do taringot na huulahon tingki maragama Jahudi dope ahu. Jotjot do hubahen na hansit tu huria ni Debata jala hulelei do i. 14 Martimbangkon dongan satorbangku dohot dongan sabangsoku, ahu ma na dumenggan mangihuthon aturan ni agama Jahudi. Jala ringgas do ahu mangihuthon adat ni angka ompungku. 15 Alai dijou Debata do ahu marhite asi ni rohana na mansai balga i. Ibana do na mambahen asa ditubuhon dainang ahu. Lomo do rohana 16 asa hubaritahon barita na uli taringot tu Anakna tu angka bangso. Ndang hupangido poda sian jolma tingki na dijou i ahu. 17 Ndang laho ahu tu Jerusalem mandapothon angka naung parjolo gabe apostel. Alai laho do ahu tu Arab, dung i mulak ma ahu muse tu Damaskus.

18 Dung tolu taon, laho ma ahu tu Jerusalem mandapothon si Kepas.* Jala disi ma ahu 15 ari. 19 Alai ndang pajumpang ahu disi dohot angka apostel na asing, holan tu si Jakobus anggi ni Tuan i do ahu pajumpang. 20 Taringot na husurat on tu hamu, hudok ma di jolo ni Debata, ndang margabus ahu.

21 Dung i laho ma ahu tu luat Siria dohot Kilikia. 22 Alai ndang ditanda angka huria Kristen na di Judea ahu. 23 Holan on do na dibege nasida, “Nunga paboahon barita na uli be baoa na mambahen na hansit tu hita najolo jala na mangalelei angka huria.” 24 Gabe dipasangap nasida ma Debata alani ahu.