Galatia

4 Saonari hudok ma tu hamu, saleleng metmet dope pewaris* i, sarupa do ibana tu hatoban nang pe ibana nampuna saluhutna. 2 Ai diparorot jala disarihon dope ibana sahat tu na dapot tingki naung ditontuhon ni amangna. 3 Songon i ma nang hita, diparhatoban portibi on do hita saleleng metmet dope. 4 Alai dung dapot tingki na ditontuhon i, disuru Debata ma Anakna. Ditubuhon sahalak borua do ibana jala mangihuthon patik i do parngoluonna, 5 asa boi paluaonna angka halak na pinarhatoban ni patik i jala boi ma hita gabe angka anak ni Debata.

6 Ala nunga gabe angka anak ni Debata hita, dibahen Debata ma tondi parbadia na adong di anakna tu bagasan rohanta jala marhite i ma hita mandok, “Abba,* Amang!” 7 Alani i ndang hatoban be hamu, alai nunga gabe anak ni Debata jala bahenonna ma hamu gabe pewaris.*

8 Andorang so ditanda hamu dope Debata, diparhatoban debata na so tutu do hamu. 9 Alai saonari nunga ditanda hamu Debata jala nunga ditanda Debata hamu. Alani i, boasa mulak hamu muse mangihuthon angka na so marguna na di portibi on jala olo hamu diparhatoban angka i? 10 Dirayahon hamu do angka ari, angka bulan, angka musim, dohot angka taon. 11 Mabiar do ahu sotung marisuang halojaonki tu hamu.

12 Songon hamu do ahu najolo. Alani i, mangido ma ahu tu hamu angka dongan, tiru hamu ma ahu. Ndang adong salamuna tu ahu. 13 Alai diboto hamu do, ala na marsahit i do ahu umbahen na boi paboahon barita na uli tu hamu. 14 Nang pe songon boban na borat ahu di hamu tingki na marsahit i, alai ndang magigi hamu mangida ahu. Dijalo* hamu do ahu songon na manjalo suru-suruan ni Debata, jala songon na manjalo Kristus Jesus. 15 Las do rohamuna di tingki i, alai saonari didia do las ni rohamuna i? Pos do rohangku, molo boi, olo do hamu mamulsikkon matamuna jala mangalehon i tu ahu tingki i. 16 Molo songon i, boasa ma gabe musumuna ahu saonari ala hupaboa na sintong? 17 Adong halak na mansai burju idaon tu hamu, alai jahat do pingkiran ni nasida. Marsitutu do nasida padaohon hamu sian ahu asa diihuthon hamu nasida. 18 Ndang sala molo burju nasida tu hamu, alai asal ma tu na denggan jala ndang holan tingki rap ahu dohot hamu. 19 Hamu angka ianakonku, gabe hansit do muse huhilala alani hamu, songon pangkilalaan ni sahalak ina na laho tubu-tubuan.* Jala tongtong do i huhilala sahat tu na boi hamu patuduhon parange ni Kristus. 20 Hirim do rohangku rap ahu dohot hamu saonari, asa boi ahu umlambok mangkatai tu hamu. Ai marsak do ahu mangida hamu.

21 Hamu angka na naeng mangihuthon patik, paboa hamu ma tu ahu, na so diboto hamu do na tarsurat di patik i? 22 Umpamana, tarsurat do adong dua anak ni si Abraham. Sada sian borua hatoban, sada nai sian borua na merdeka. 23 Anak na tubu sian borua hatoban i, tubu alani giot-giot ni daging. Alai anak na tubu sian borua na merdeka, tubu alani janji ni Debata. 24 Songon sada gombaran do i sude. Dua borua i manggombarhon dua parjanjian. Sada sian parjanjian i dibahen di Dolok Sinai jala gabe hatoban do saluhut na mangihuthon parjanjian i. Si Hagar ma na manggombarhon parjanjian i. 25 Si Hagar ma na songon Dolok Sinai, i ma dolok na di tano Arab. Dos do ibana tu Jerusalem saonari. Ai gabe hatoban do ibana rap dohot ianakkonna. 26 Alai merdeka do anggo Jerusalem na di banua ginjang. Ibana ma inangta.

27 Ai tarsurat do, “Marlas ni roha ma ho borua na mandul, na so hea manubuhon anak. Marsurak jala marlas ni roha ma ho, ale borua na so hea mangkilala hansit ni manubuhon anak. Ai gumodang do ianakkon ni borua na ditadingkon tunggane dolina sian ianakkon ni borua na adong tunggane dolina.” 28 Hamu angka dongan, angka anak na tubu alani janji ni Debata do hamu dos songon si Isak. 29 Dibahen anak na tubu alani giot-giot ni daging i do na hansit tu anak na tubu marhite tondi parbadia ni Debata. Songon i do nang saonari. 30 Alai didok surat na badia i do, “Palao ma borua hatoban i rap dohot anakna. Ai ndang na laho gabe pewaris* anak ni hatoban i rap dohot anak ni borua na merdeka i.” 31 Alani i angka dongan, anak ni borua na merdeka i do hita, ndang anak ni borua hatoban i.