1 Tessalonik

4 Nunga dijalo hamu tudu-tudu sian hami taringot tu marpangalaho na pasonangkon roha ni Debata, jala nunga diihuthon hamu i. Saonari, hupangido jala huelek-elek hami ma hamu di bagasan goar ni Tuan Jesus, asa lam marsitutu hamu mangulahon i. 2 Ai diboto hamu do, marhite huaso ni Tuan Jesus do hulehon hami tudu-tudu* i.

3 Ai on do lomo ni roha ni Debata, ingkon badia ma hamu jala pasiding hamu ma seks na so patut.* 4 Ingkon sude do hamu mamboto songon dia mangarajai dirina be, asa sangap hamu jala badia. 5 Unang ma ihuthon angka bangso na so mananda Debata, na so boi mangarajai hisap-hisap ni dagingna, jala na sai mangulahon i di ngoluna. 6 Unang ma adong na mambahen na so hasea tu donganna, na boi parohon jea. Ai uhumon ni Jahowa do halak na mangulahon sisongon i, songon naung hupaboa jala hupaingot hami tu hamu. 7 Ai tu na badia do hita dijou Debata, ndang tu ulaon na ramun.* 8 Alani i, manang ise na so manjalo poda on, ndang jolma na so jinalona disi, alai Debata na mangalehon tondi parbadia i do.

9 Taringot tu na mangkaholongi dongan sahaporseaon, ndang adong be na porlu husurat hami tu hamu. Ai nunga diajari Debata hamu asa masihaholongan. 10 Nunga diulahon hamu songon i tu sude dongan di Makedonia. Alai hujujui hami ma hamu angka dongan, asa lam marsitutu hamu mangulahon i. 11 Songon naung hupodahon hami tu hamu, marsitutu ma asa dame ngolumuna, unang ma antoi urusan ni na asing, jala ringgas ma hamu karejo. 12 Molo diulahon hamu songon i, ndang hurangan manang aha be hamu jala idaon ni halak ma pangalahomuna na denggan i.

13 Asing ni i angka dongan, lomo do rohanami asa diantusi hamu taringot tu halak naung mate.* Asa unang songon arsak ni halak na so marpangkirimon arsak ni rohamuna. 14 Molo porsea hita naung mate Jesus jala mulak mangolu muse, porsea ma nang hita, bahenon ni Debata do mulak mangolu angka halak naung mate na marsada dohot Jesus, asa rap dohot ibana. 15 Songon hata ni Jahowa, hupaboa hami ma tu hamu, boanonna do hita na mangolu sahat tu haroro ni Tuan i tu surgo. Alai jumolo do paheheonna halak na parjolo mate i sian hita. 16 Ai turun ma Tuan i sian surgo mardongan soara na gogo. Tarbege ma soara ni pamimpin ni suru-suruan i, dohot soara ni tarompet ni Debata. Hehe ma parjolo halak naung mate na marsada dohot Kristus. 17 Dung i boanonna ma hita angka na mangolu dope, rap dohot nasida di bagasan ombun laho pajumpang dohot Tuan i tu langit. Gabe tongtong ma hita rap dohot Tuan i. 18 Alani i, masiapulan ma hamu marhite angka hata on.