Heber
1 Jotjot jala marragam do dalan ni Debata mangkatai tu angka ompunta najolo marhite angka panurirang. 2 Alai di tingki parpudi on, marhite Anakna do Ibana mangkatai tu hita. Dipillit do Anakna i gabe nampuna* sasude, jala marhite ibana do dibahen nasa na adong di langit dohot di tano on.* 3 Marhite Anakna i tarida do hasangapon ni Debata jala ibana do na suman situtu tu Debata. Dijaga ibana do nasa na adong marhite hata ni Debata na marhagogoon i. Jala dung ias hita dibahen sian dosanta, hundul ma ibana di surgo di siamun ni Debata na Marmulia i. 4 Asing ni i, dibahen do ibana tumimbo sian angka suru-suruan, ai dilehon do tu ibana goar na umsangap sian angka suru-suruan.
5 Ai tu suru-suruan dia ma hea didok Debata, “Anakku do ho; mulai sadari on Amangmu ma ahu”? Manang, “Gabe Amangna ma Ahu, jala gabe Anakku ma ibana”? 6 Alai tingki disuru Debata ro Anakna Siangkangan i tu portibi on, didok do, “Ingkon marsinggang do sude suru-suruan ni Debata tu ibana.”
7 Taringot tu suru-suruanna, didok Debata do, “Dibahen Ibana do angka suru-suruanna mansai gogo* jala dibahen Ibana do parhobasna songon api na marjimbur-jimbur.” 8 Alai taringot tu Anakna i didok Debata do, “Debata ma habangsam saleleng ni lelengna, jala tungkot hatigoran do tungkot ni Harajaonmu. 9 Holong do roham tu na sintong jala dihagigihon roham do hajahaton. Alani i do dipillit* Debata ho jala dilehon tu ho gumodang las ni roha sian angka donganmu.” 10 Adong do muse tarsurat, “Ale Tuhan,* ho do na mambahen* fondasi ni tano on sian mulana jala dibahen ho do langit i marhite tanganmu sandiri. 11 Langit dohot tano on na laho salpu do i sude, alai manongtong do anggo Ho; jala langit dohot tano on na laho buruk do i songon pangkean. 12 Jala lompitonmu do langit dohot tano on songon jubah jala gantionmu do i sude songon pangkean. Alai, ndang muba anggo Ho jala ndang marujung ngolum.”
13 Alai tu suru-suruan na dia ma hea didok Debata, “Hundul ma ho di siamunhon paima hubahen angka musum gabe sidege-degean ni patmu”? 14 Nda sude do nasida marhobas tu Debata, jala disuru mangurupi angka na laho manjalo haluaon i?