Jakobus

5 Hamu angka na mora, tangihon hamu ma, tumatangis ma hamu jala mangandungi, ai naeng ro ma hasusaan tu hamu. 2 Nunga busuk hamoraonmuna jala nunga diallang ngitngit pangkeanmuna. 3 Nunga tasikon mas dohot perakmuna. Tasik i ma na patuduhon salamuna dohot na mangallang dagingmuna. Dipapungu hamu do arta na gabe songon api di angka ari parpudi. 4 Ida ma! Mangangguhi do angka parkarejo na mamanen ladangmuna ala ndang dilehon hamu upa ni nasida. Nunga sahat angguk-angguk ni angka parkarejo i tu pinggol ni Jahowa, Pamimpin ni Angka Tentara.* 5 Holan na mangalului hamoraon dohot hasonangan do hamu di tano on. Dipasombu hamu do rohamuna songon binatang na dipamokmok tu ari pamotongan. 6 Diuhum jala dibunu hamu do halak na mangulahon na sintong. Nda alani i do sogo roha ni Debata tu hamu?

7 Hamu angka dongan, sabar ma hamu sahat tu haroro ni Tuan i. Ida ma! Sabar do pangula paima-imahon parbue na denggan* sian tano on. Sabar do ibana paimahon mulai sian ari udan na parjolo sahat tu na ro ari udan na parpudi.* 8 Ingkon sabar do nang hamu. Patogu ma rohamuna, ai nunga jonok haroro ni Tuan i.

9 Hamu angka dongan, unang ma marungut-ungut hamu sama hamu asa unang diuhumi hamu. Ida ma! Nunga jongjong Panguhum i di jolo ni pintu. 10 Hamu angka dongan, tiru hamu ma hasabaron ni angka panurirang na manaon hasusaan ala mangkatai di bagasan goar ni Jahowa. 11 Ida ma! Hudok hami do marlas ni roha halak na martahan manaon hasusaan. Nunga dibege hamu, martahan do si Job manaon hasusaan jala nunga diboto hamu songon dia Jahowa mamasu-masu ibana. Sian i ma diboto hamu na parholong do Jahowa jala parasi roha.

12 Hamu angka donganku, di ginjang ni saluhutna unang be marsumpa hamu marhite banua ginjang manang marhite tano on manang marhite manang aha pe. Alai molo olo, dok ma “Olo”. Molo ndang, dok ma “Ndang”, asa unang diuhumi hamu.

13 Adong do na marsitaonon di tonga-tongamuna? Tongtong ma ibana martangiang. Adong do na marlas ni roha di tonga-tongamuna? Diendehon ibana ma ende puji-pujian.* 14 Adong do na marsahit di tonga-tongamuna? Dijou ibana ma angka sintua di huria, asa ditangiangkon jala dibahen miak tu ibana di bagasan goar ni Jahowa. 15 Tangiang na di bagasan haporseaon ma na pamalum na marsahit i, jala pamalumon ni Jahowa ma ibana. Molo mangulahon dosa do ibana, sesaon ni Debata ma dosana.

16 Alani i, masiakkuan dosa ma hamu sama hamu jala masitangiangan, asa malum hamu. Ai margogo do tangiang ni halak na mangulahon na sintong. 17 Rap jolma do hita dohot si Elia jala dos do pangkilalaanta dohot ibana. Tingki marsitutu ibana martangiang asa unang ro udan, ndang ro udan saleleng tolu satonga taon. 18 Dung i martangiang ma ibana muse, ro ma udan jala gabe marparbue ma tano i.

19 Hamu angka donganku, molo adong di tonga-tongamuna na lilu sian hasintongan i, jala adong na mamboan ibana mulak muse, 20 boto hamu ma on, manang ise na mamboan sahalak pardosa sian dalanna na lilu i, na paluahon pardosa i do ibana sian hamatean jala nunga disesa dosana na godang i.