1 Petrus

2 Alani i bolongkon ma sian dirimuna angka ulaon na jahat, manipu, roha na munafik, mangiburu, dohot hata na paroa-roahon na asing. 2 Songon poso-poso na baru tubu ma hamu na mauas tu susu na so marcampur, i ma hata ni Debata. Asa gabe magodang hamu jala mandapot haluaon. 3 Ai nunga dihilala* hamu haburjuon ni Tuan i.

4 Ibana do batu na mangolu i na binolongkon ni angka jolma, alai arga do ibana di Debata jala ibana do na pinillitna. Molo ro hamu tu ibana, 5 gabe batu na mangolu ma hamu. Marhite tondi parbadia, pajongjongonna ma hamu gabe jabu, jala gabe hamalimon na badia. Dung i, marhite panogu-noguon ni tondi parbadia, pelehononmuna ma pelean na dihalomohon ni Debata marhite Jesus Kristus. 6 Ai didok do di Surat na Badia i, “Hupillit do sada batu parsuhi-suhi na arga jala hupeakhon ma i gabe fondasi di Sion. Jala manang ise na porsea di ibana ndang hea gabe maila.”

7 Arga do ibana di hamu ala porsea hamu tu ibana. Alai di angka na so porsea, “batu na binolongkon ni tukang nunga gabe batu parsuhi-suhi na rumingkot”* 8 jala “gabe batu partuktuhan dohot batu na mambahen madabu”. Tartuktuk do nasida ala ndang dioloi nasida hata ni Debata. Jala on ma ujung ni nasida. 9 Alai hamu do “bangso na tarpillit, angka malim na laos gabe raja, bangso na badia, bangso ni Debata, na mamaritahon hamuliaon”* ni Ibana na manjou hamu kaluar sian haholomon tu hatiuronna na mambahen longang roha. 10 Ndang bangso ni Debata hian hamu, alai nunga gabe bangsona hamu saonari. Ndang dijalo hamu hian asi ni roha ni Debata, alai nunga dijalo hamu asi ni rohana i saonari.

11 Hamu angka dongan na hinaholongan, hupangido ma tu hamu asa tongtong dipadao hamu dirimuna sian hisap-hisap ni daging na marporang mangalo hamu. Ai halak na asing jala panompang do hamu di portibi on. 12 Tongtong ma denggan pangalahomuna di tonga-tonga ni angka bangso. Asa molo didok nasida hamu mambahen na jahat, idaon ni nasida ma pambahenanmuna na denggan i. Alani i pujion ni nasida ma Debata di ari panguhumanna i.

13 Alani Tuan i, oloi hamu ma sude pamarenta. Umpamana raja, ai tumimbo do huasona sian hamu, 14 nang angka gubernur na sinuruna laho manguhum angka na mangulahon na jahat dohot mamuji angka na mangulahon na denggan. 15 Ai on do lomo ni roha ni Debata, ulahon hamu ma na denggan, asa boi pasoonmu hata-hata haotoon ni halak na so marroha. 16 Angka halak na merdeka do hamu, alani i unang ma pangke hamu i gabe sidalian laho mangulahon na sala. Alai gabe angka hatoban ni Debata ma hamu. 17 Pasangap hamu ma sude jolma, haholongi ma sude dongan sahaporseaon, habiari ma Debata, jala pasangap ma raja.

18 Ingkon unduk do angka hatoban tu tuan ni nasida mardongan biar ni roha. Ndang holan tu tuan na burju jala na denggan marroha, alai dohot do tu tuan na kejam. 19 Ai las do roha ni Debata molo martahan sasahalak tingki dibahen na hansit tu nasida jala manaon hasusaan* ala dioloi* ibana Debata. 20 Aha ma labana molo martahan hamu dipungkuli ala mangulahon dosa? Alai molo martahan hamu manaon hasusaan ala mangulahon na denggan, las do roha ni Debata.

21 Ai tusi do hamu dijou, ai Kristus pe marsitaonon do alani hamu. Ditadingkon do sitiruon tu hamu asa diihuthon hamu bogas ni patna. 22 Ndang mardosa ibana jala ndang hea ibana margabus. 23 Tingki dileai ibana, ndang dibalos ibana mangaleai. Tingki marsitaonon ibana, ndang diancam ibana halak na mambahen sitaonon i. Alai dipasahat do dirina tu Debata na tigor manguhumi. 24 Diboan ibana do angka dosanta di bagasan dagingna tingki dipakkuhon ibana tu hau i, asa mate hita alani dosa alai mangolu alani hatigoran. Jala “alani lukana i do malum hamu”. 25 Ai songon biru-biru na lilu do hamu najolo. Alai saonari, nunga mulak hamu tu parmahan i dohot siramoti ngolumuna.