1 Raja-Raja
16 Dipaboa Jahowa ma hatana tu si Jehu+ anak ni si Hanani+ taringot tu si Baesa, didok ma, 2 “Jolma na lea do ho saleleng on, alai hubahen do ho gabe raja ni halak Israel.+ Hape diihutton ho do hajahaton ni si Jerobeam, jala dibahen ho do mardosa halak Israel na mambahen haccit rohakku.+ 3 Alani i, pamateonku ma si Baesa dohot pinopparna, songon na hubahen tu pinoppar ni si Jerobeam+ anak ni si Nebat. 4 Ganup pinoppar ni si Baesa na mate di kota, allangon ni biang ma. Jala na mate di luar ni kota, allangon ni pidong ma.”
5 Sude na niulahon ni si Baesa dohot huasona, tarsurat do i di bukku sejarah taringot tu akka raja di Israel. 6 Mate ma si Baesa jala dikubur ma ibana rap dohot akka ompuna di Tirza.+ Dung i, anakna si Elah ma na gabe raja manggattihon ibana. 7 Dipaboa Jahowa do hatana tu Panurirang* Jehu anak ni si Hanani taringot tu si Baesa dohot tu pinopparna. Ai diulahon si Baesa do sude hajahaton di jolo ni Jahowa. Diihutton ibana do hajahaton ni pinoppar ni si Jerobeam na mambahen haccit roha ni Debata. Jala dipamate ibana do si Nadab anak ni si Jerobeam.+
8 Di taon na paduapulu onomhon Raja Asa mamaretta di Juda, gabe raja ma si Elah anak ni si Baesa. Saleleng dua taon ma ibana mamaretta Israel. 9 Adong ma parkarejo ni Raja Elah na margoar si Zimri. Ibana do pamimpin ni satonga tentara ni Raja Elah na markareta hoda. Marsakkap ma ibana naeng pamatehon Raja Elah. Tikki i, di Tirza do raja i. Minum-minum do ibana sappe mabuk di jabu ni si Arza, kepala ni istana di Tirza. 10 Ro ma si Zimri tusi jala dipamate ma raja i.+ Mate ma Raja Elah di taon na paduapulu pituhon Raja Asa mamaretta di Juda. Dung i, gabe raja ma si Zimri manggattihon Raja Elah. 11 Disi gabe raja ibana jala hundul di tahtana, dipamate ibana ma sude keluarga ni si Baesa. Dipamate ibana do sude bawa* na adong di keluarga ni si Baesa,* songon i nang ale-alena. 12 Dang adong nanggo sada pe pinoppar ni si Baesa na so dipamate si Zimri. Gabe saut ma hata ni Jahowa taringot tu si Baesa na pinaboana marhite Panurirang Jehu.+ 13 Masa pe on sude, alani dosa ni si Baesa dohot dosa ni si Elah anakna i do. Jala dohot do dibahen nasida mardosa halak Israel, ala manomba akka patung na so marguna.+ On ma na mambahen haccit roha ni Jahowa Debata ni Israel. 14 Sude na niulahon ni si Elah dohot akka na binahenna, tarsurat do i di bukku sejarah taringot tu akka raja di Israel.
15 Di taon na paduapulu pituhon Raja Asa mamaretta di Juda, nungnga gabe raja si Zimri di Tirza saleleng pitu ari. Tikki i, markemah do akka tentara ni Israel di Gibeton+ kota ni halak Palistim. 16 Tikki na markemah i nasida, adong ma na mandok tu nasida, “Nungnga dialo jala dipamate si Zimri be raja.” Laos di ari i, dibahen akka tentara* i ma si Omri+ pamimpin ni tentara i gabe raja ni halak Israel. Jala di perkemahan i do si Omri dibahen nasida gabe raja. 17 Dung i borhat ma si Omri dohot sude tentarana* i sian Gibeton tu Tirza. Dihaliangi nasida ma kota i lao manaluhon kota i. 18 Dung diida si Zimri naung ditaluhon kota i, masuk ma ibana tu benteng ni istana ni raja. Ditutung ibana ma istana i, laos disi ma ibana mate tartutung.+ 19 Masa pe i, alani dosana do. Ai diulahon ibana do akka na jahat di jolo ni Jahowa. Diihutton ibana do hajahaton ni si Jerobeam, jala dohot do mardosa halak Israel dibahen ibana.+ 20 Sude na niulahon ni si Zimri, tarsurat do i di bukku sejarah taringot tu akka raja di Israel. Jala disurat do muse disi sude na binahenna lao mangalo raja.
21 Di tikki i, tarbagi do halak Israel. Adong na mamihak tu si Tibni anak ni si Ginat, jala naeng dibahen nasida do si Tibni gabe raja. Adong do muse na mamihak tu si Omri. 22 Alai talu do akka halak na mangihutton si Tibni anak ni si Ginat dibahen akka halak na mangihutton si Omri. Mate ma si Tibni, jala gabe raja ma si Omri.
23 Di taon na patolupulu sadahon Raja Asa mamaretta di Juda, gabe raja ni Israel ma si Omri, jala mamaretta ma ibana saleleng 12 taon. Onom taon ma ibana mamaretta di Tirza. 24 Dituhor si Omri ma Dolok Samaria sian halak Somer. Dua talenta* perak do arga ni dolok i. Dung i dipajongjong ibana ma sada kota disi. Dibahen ma goar ni kota i Samaria*+ mangihutton goar ni nappuna dolok i, i ma halak Semer. 25 Sai diulahon si Omri do na jahat di jolo ni Jahowa. Jala unjahat do ibana sian sude halak na mamaretta andorang so ibana.+ 26 Diihutton ibana do sude hajahaton ni si Jerobeam anak ni si Nebat. Jala dohot do dibahen ibana mardosa halak Israel, ala manomba akka patung na so marguna.+ On ma na mambahen haccit roha ni Jahowa Debata ni Israel. 27 Sude na niulahon ni si Omri tarsurat do i di bukku sejarah taringot tu akka raja di Israel. Disurat do muse disi taringot tu akka tentarana na jago. 28 Mate ma si Omri jala dikubur rap dohot akka ompuna di Samaria. Dung i anakna si Ahab+ ma na gabe raja manggattihon ibana.
29 Di taon na patolupulu ualuhon Raja Asa mamaretta di Juda, gabe raja ma si Ahab anak ni si Omri. Saleleng 22 taon ma ibana mamaretta Israel di Samaria.+ 30 Unjahat do si Ahab anak ni si Omri di jolo ni Jahowa sian sude halak na mamaretta andorang so ibana.+ 31 Dang holan hajahaton ni si Jerobeam+ anak ni si Nebat i na diihutton ibana. Dioli ibana do muse si Izebel,+ boru ni si Etbaal raja ni halak Sidon.+ Gabe dohot ma ibana manomba patung Baal.+ 32 Dipajongjong ibana do muse inganan manomba Baal+ di Samaria. Jala dipajongjong ibana do di bagasan inganan i sada langgatan ni Baal. 33 Dibahen si Ahab do muse tiang sisombaon.*+ Dibahen si Ahab do haccit roha ni Jahowa Debata ni Israel, lobi sian sude na binahen ni akka raja ni Israel na mamaretta andorang so ibana.
34 Tikki mamaretta si Ahab, dipadenggan si Hiel halak Betel i ma kota Jeriko. Ala dibahen ibana fondasi ni kota i, mate ma si Abiram anakna siakkangan. Jala ala dibahen ibana akka pintu gerbang ni kota i, mate ma si Segub anakna siappudan. Gabe saut ma hata ni Jahowa na pinaboana marhite si Josua anak ni si Nun.+