1 Kronika
17 Dung tinggal Raja Daud di istana, didok raja i ma tu Panurirang* Natan,+ “Di istana na sian hau ares do au tinggal,+ hape di kemah dope poti parpadanan ni Jahowa.”+ 2 Dialusi si Natan ma, “Bahen ma na denggan di roham. Ai didongani Debata na sittong do ho.”
3 Alai di borngin i, didok Debata ma tu si Natan, 4 “Lao ma ho, jala paboa ma tu naposokku si Daud, ‘On ma na nidok ni Jahowa, “Dang ho na lao pajongjokkon jabu inganakku.+ 5 Ai mulai sian huboan kaluar bangso Israel sahat tu sadari on, dang hea Au tinggal di sada jabu. Alai pinda do Au sian sada kemah tu kemah na asing, jala sian sada tabernakel tu tabernakel na asing.*+ 6 Saleleng rap Au mardalan dohot sude halak Israel, hea huroha husukkun, ‘Boasa dang dipajongjong hamu sada jabu na sian hau ares di Au?’ Dang hea hudok songon i tu sahalak pe sian panguhum ni Israel, na hupillit gabe parmahan ni bangsokku Israel.”’
7 “Saonari, dokkon ma tu si Daud naposokku, ‘Songon on do didok Jahowa Pamimpin ni Akka Tentara,* “Najolo, marmahan biru-biru do ho. Alai hubahen do ho gabe pamimpin ni bangsokku Israel.+ 8 Alani i, donganakku do ho manang tudia pe ho lao.+ Pamateonku* do sude musum di jolom.+ Jala bahenokku do tarbarita goarmu songon halak na tarbarita goarna di tano on.+ 9 Pillitokku ma sada inganan di bangsokku Israel jala toktong ma nasida maringanan disi. Dang adong be na mambahen nasida susa disi. Jala dang siksaon ni halak na jahat be nasida songon najolo.+ 10 Ai disiksa do nasida mulai sian na hupillit akka panguhum di Israel.+ Alai, taluhonokku nama sude musum.+ Jala nungnga hudok tu ho, ‘Na lao bahenon ni Jahowa do akka pinopparmu toktong gabe raja.’*
11 “‘“Molo dung mate ho, jala dikubur rap dohot akka ompum, bahenokku ma pinopparmu* gabe raja. Jala pillitokku ma sada sian anakmu+ na lao manggattihon ho. Bahenokku do hot harajaonna.+ 12 Pajongjongonna do sada jabu lao pasangappon Au.+ Jala bahenokku do hot tahtana saleleng ni lelengna.+ 13 Au ma na gabe Bapakna jala ibana gabe anakku.+ Toktong do hupatuduhon holong ni rohakku* tu ibana.+ Jala dang bahenokku tu ibana songon na hubahen tu halak na mamaretta andorang so ho.+ 14 Bahenokku ma ibana hundul di tahtakku saleleng ni lelengna.+ Jala mamaretta ma ibana dohot pinopparna saleleng ni lelengna.”’”+
15 Dipaboa si Natan do tu si Daud sude hata dohot parnidaan i.
16 Dung i masuk ma Raja Daud tu kemah i jala hundul ma ibana di jolo ni Jahowa. Didok ibana ma, “Ai ise ma huroa au, ale Debata Jahowa? Jala ise ma huroa keluargakku, pola dibahen Ho godang na denggan tu au?+ 17 Hape godang nai na lao bahenonmu, ale Debata. Dipaboa Ho do aha na lao masa di ari na naeng ro taringot tu pinoppar ni naposomon.+ Ditatap Ho do au jala dibahen Ho do au songon halak na sangap, ale Debata Jahowa. 18 Dang adong be na boi dohonokku tu Ho taringot hasangapon na nilehonmu tu au. Ai takkas do ditanda Ho au naposomon.+ 19 Ale Jahowa, dibahen Ho do godang na denggan tu au alani hatam dohot alani lomo ni roham. Jala dipatudu Ho do hasangaponmu tu au naposomon.+ 20 Ale Jahowa, sude na hubege hami patuduhon dang adong na songon Ho,+ jala dang adong Debata asing ni Ho.+ 21 Dang adong bangso na asing di tano on na songon bangsom Israel.+ Ale Debata na sittong, ditobus Ho do nasida+ jala dibahen Ho do nasida gabe bangsom. Dibahen Ho do akka ulaon halongangan* tu nasida asa tarbarita goarmu.+ Dipalao Ho do bangso na asing sian jolo ni bangsom,+ naung ditobus Ho sian Mesir. 22 Dibahen Ho do bangso Israel gabe bangsom saleleng ni lelengna.+ Jala Ho do na gabe Debata ni nasida, ale Jahowa.+ 23 Ale Jahowa, pasaut ma janjim taringot tu naposomon dohot taringot tu pinopparhu saleleng ni lelengna. Jala anggiat ma i dipasaut Ho songon na dijanjihon Ho tu au.+ 24 Sai anggiat ma martahan jala dipasangap goarmu+ saleleng ni lelengna, asa didok halak, ‘Jahowa Pamimpin ni Akka Tentara* i do Debata ni halak Israel.’ Jala anggiat ma pinoppar ni naposomon toktong gabe raja di jolom saleleng ni lelengna.*+ 25 Ale Debatakku, pos pe rohakku mandok songon i di tangiakku, ala nungnga dipaboa Ho do tu naposomon na lao bahenonmu pinopparhu toktong gabe raja.* 26 Ale Jahowa, Ho do Debata na sittong. Dijanjihon Ho do akka na denggan tu naposomon. 27 Alani i, sai anggiat ma dipasu-pasu Ho pinoppar ni naposomon asa toktong mamaretta saleleng ni lelengna di jolom. Ai Ho do na mamasu-masu ale Jahowa, jala dipasu-pasu Ho do pinopparhu saleleng ni lelengna.”