Job
32 Gabe sip ma dongan ni si Job na tolu i. Ai sai didok* si Job do na tigor ibana marroha.+ 2 Alai muruk situtu ma si Elihu anak ni si Barakel pinoppar ni si Bus+ halak Ram i. Muruk ma ibana tu si Job ala sai naeng dipatudu si Job do na ussittong ibana sian Debata.+ 3 Muruk ma muse si Elihu tu dongan ni si Job na tolu i. Ai dang denggan nasida mangalusi hata ni si Job. Gariada didok nasida do na jahat Debata.+ 4 Sai naeng dialusi si Elihu do hata ni si Job. Alai dipaima ibana do jolo sae nasida sude makkatai, ala uttua do nasida sian ibana.+ 5 Dung diida si Elihu dang adong be manang aha didok dongan ni si Job na tolu i, gabe muruk ma ibana. 6 Didok si Elihu anak ni si Barakel pinoppar ni si Bus i ma,
“Poso dope au
Alai anggo hamu, nungnga godang umurmuna.+
Alani i ma dang hudok manang aha, ala hupasangap do hamu,+
Jala dang barani au paboahon na huboto tu hamu.
7 Didok rohakku, ‘Lok ma na matua na makkatai,
Jala lok ma halak naung godang umurna na mangajari songon dia asa marbisuk.’
8 Alai tondi parbadia na dijalo jolma
Dohot hosa na sian Pargogo na So Hatudosan i do na mambahen nasida mandapot parbinotoan.+
9 Dang umur na manottuhon sasahalak marbisuk,
Jala dang holan na matua na mangattusi dia na sittong.+
10 Alani i do hudok, ‘Tangihon hamu jo au,
Asa hupaboa tu hamu aha na huboto.’
12 Denggan do huparrohahon hamu,
Alai dang adong sian hamu na boi patuduhon na sala do hata ni* si Job
Jala dang adong hamu na boi mangalusi ibana.
13 Alani i unang ma dokkon hamu, ‘Na marbisuk do hami.
Debata do na mandok ibana marsala, dang jolma.’
14 Dang tu au didok si Job hatana i,
Alani i, dang alusakku ibana songon hatamuna i.
15 Ida ma, nungnga gale be nasida. Dang tolap be nasida mangalusi.
Dang adong be dohonon ni nasida manang aha.
16 Sai hupaima do nian, alai dang makkatai be nasida.
Holan na jongjong do nasida disi, dang adong be didokkon nasida manang aha.
17 Jadi dohot ma au mangalusi.
Dohot ma au paboahon aha na huboto,
18 Ai godang do na naeng dohonokku,
Tondi parbadia do na mangonjar rohakku makkatai.
19 Songon anggur na ditutup rapat do au huhilala,
Songon inganan ni anggur na naeng mapultak.+
20 Loas hamu jo au makkatai asa lubbang huhilala!
Asa makkatai au jala hudok hatakku.