Job
2 Boi do talionmu igungna
Manang boi do tusukonmu osang-osangna mamakke hait-hait?*
3 Tung olo ma i mangelek-elek tu ho,
Manang denggan makkatai tu ho?
4 Tung olo ma i mambahen parjanjian tu ho,
Asa gabe hatobanmu i saleleng ni lelengna?
5 Olo do haroa ho marmeami dohot i songon na marmeami dohot pidong
Manang ikkatonmu i lao gabe meam-meam ni borum?
6 Olo do haroa partiga-tiga manggadis manang manuhor i?
Olo do haroa nasida mananggoi jala mambagi-bagi i?
7 Boi do haroa tusukonmu kulitna mamakke tombak*+
Manang boi do haroa tusukonmu uluna songon na binahenmu tu dekke?
8 Bahen ma jo tanganmu tu ibana,
Pasti ingotonmu do songon dia ho mangalo ibana jala dang olo be ho mambahen songon i!
9 Unang dirippu roham na boi taluhononmu i.
Holan mamereng ibana pe nungnga mabiar* ho.
10 Dang adong na barani mangganggu i.
Alani i ise ma haroa na tolap mangalo Au?+
11 Ise ma na parjolo mangalehon manang aha tu Au asa hubalos i tu ibana?+
Au do nappunasa saluhut na di toru ni langit on.+
12 Saonari paboaokku ma muse taringot dagingna,
Taringot gogona dohot dagingna na palongang roha.
13 Ise ma na hea mambukka kulitna na hapal i?
Ise ma na olo jonok tu babana?
14 Ise ma na boi patalak babana i?
Ai mabiar do manang ise na mangida ngingina.
15 Marsisik do tanggurungna*
Jala domu do sude akka sisikna i.
16 Massai rapat do akka sisikna i
Sappe so boi masuk alogo sian holang-kolangna.
17 Lokkot do sisik na sada tu sisik na sada nai,
Massai lokkot do i sappe dang boi tarsirang.
18 Tikki barsi-barsion ibana, marhillong ma aek i
Jala songon mataniari bissar do matana.
19 Kaluar do sinondang sian babana,
Jala mamiltiki do api.
20 Kaluar do timus sian igungna,
Songon tungku na digalahi api.
21 Boi do hosana pagalakkon gara,
Jala kaluar do api sian babana.
22 Massai gogo do rukkungna,
Gabe mabiar do manang ise na mangida ibana.
23 Karas do kulit na di butuhana i,
Songon logam na marlappis-lappis na so boi bukkaon.
24 Pir do jantungna songon batu,
Tutu, songon batu gilingan.*
25 Haru jolma na gogo pe, mabiar do molo hehe ibana.
Mabiar do akka na mangida i molo marlange ibana.
26 Dang adong podang na boi manaluhon i,
Songon i nang tombak, panah, manang sinjata na asing.+
27 Songon durame do bosi di ibana,
Jala songon hau na lapukon do tombaga.
28 Dang lari ibana alani anak ni panah,
Jala songon durame do di ibana batu na didanggurhon tu ibana.
29 Songon durame do di ibana attuk-attuk,
Jala diparekkeli ibana do soara ni tombak na ditullangkon.
30 Songon ponggol-ponggol ni gucci na maputtar do butuhana,
Jala songon papan pardegean+ do molo modom ibana di gambo.
31 Songon aek na gurgur di bagasan hudon do dibahen ibana aek na bagas,
Jala gussang do aek ni laut dibahen ibana songon rempah-rempah na diloppa di hudon.
32 Tikki marlange ibana, gabe margumo do aek i.
Gabe songon uban ma idaon gumo ni aek na bagas i.
33 Dang adong na songon ibana di tano i,
Ibana ma toppaan na so mamboto biar.
34 Ditatap ibana do bohi ni sude binatang na garang.
Ai ibana do raja ni sude binatang buas na gogo.”