Parjamita

8 Ise ma na songon halak na marbisuk? Ise ma na mamboto songon dia pasaehon sada parsoalan? Tarida do na marbisuk sasahalak sian bohina. Boi do bahenonna bohina na murhing gabe mekkel.

2 Hudok ma, “Ala nungnga marsumpa ho tu Debata,+ oloi ma paretta ni raja.+ 3 Unang ma pittor hatop ho lao sian jolona,+ jala unang ma marpihak ho tu na jahat.+ Ai boi do bahenon ni raja manang aha lomo ni rohana. 4 Ai ikkon saut do hata ni raja.+ Ise ma na boi mandok tu ibana, ‘Boasa bahenonmu songon on?’”

5 Dang marjea halak na mangoloi paretta.+ Jala diboto halak na marbisuk do andigan jala songon dia mangulahon i.+ 6 Adong do tikki dohot cara na denggan pasaehon ganup parsoalan.+ Ai massai godang do parsoalan ni jolma. 7 Ala dang adong na mamboto aha na lao masa di ari na naeng ro, ise ma na boi paboahon songon dia i masa?

8 Dang adong nanggo sahalak pe jolma na boi mangatur alogo.* Suang songon i ma, dang adong nanggo sahalak pe na boi mangatur ari hamamatena.+ Dang adong nanggo sada pe tentara na diloas mulak tikki marporang. Suang songon i ma, dang adong nanggo sada pe parjahat na so mandapot balos ni hajahatonna.*

9 Nungnga huida sudena on, jala nungnga huparrohahon sude na diulahon di tano on, gabe susa* do molo jolma na mangarajai jolma.+ 10 Nungnga huida songon dia parjahat dikuburhon. Huida do muse songon dia nasida marlao ro tu inganan na badia. Alai pittor hatop do nasida dilupahon di inganan ni nasida mangulahon na jahat i.+ On pe dang marlapatan.

11 Ala dang pittor hatop dihukum akka parjahat,+ gabe lam barani ma akka halak mangulahon na jahat.+ 12 Adong do sahalak parjahat naung saratus hali mangulahon na jahat, jala ganjang do umurna. Alai nang pe songon i, huboto do, dapot ni halak na makkabiari Debata na sittong do na denggan. Ai dihabiari nasida do Ibana.+ 13 Alai, dang na lao dapot ni parjahat na denggan.+ Jala dang boi bahenonna lam ganjang umurna, ala dos do i songon bayangan.+ Ai so dihabiari ibana Debata.

14 Adong dope muse na so marlapatan* di tano on: Halak na mangulahon na sittong, dibahen do gabe songon parjahat.+ Jala parjahat dibahen do gabe songon halak na mangulahon na sittong.+ Hudok ma, on pe dang adong lapatanna.

15 Alani i ma hudok tu akka halak asa marlas ni roha nasida.+ Ai on do na dumenggan bahenon ni jolma di tano on: mangan, minum, jala marlas ni roha. Songon i ma bahenonna huhut mangulahon ulaonna saleleng mangolu ibana.+ Ai i do na dilehon Debata na sittong tu ibana di tano on.

16 Hulehon do rohakku asa dapottu bisuk, jala asa huida sude na masa di tano on,+ sappe dang modom au* arian nang borngin. 17 Dung i huparrohahon ma sude na binahen ni Debata na sittong, gabe huboto ma dang tolap jolma mangattusi sude na masa di tano on.+ Nang pe nungnga marsitutu nasida lao mamboto i, tong do dang boi diattusi. Haru halak na marbisuk pe, tong do dang diattusi i.+