Jesaya
31 Marjea ma halak na lao tu Mesir lao mangido asa diurupi nasida,+
Na marpos ni roha tu kareta porang na godang,
Dohot tu hoda na gogo na dipakke lao marporang.
Alai dang mangasahon Debata Nabadia ni Israel i nasida,
Jala dang dilului nasida Jahowa.
2 Hape marbisuk do Debata, paroonna ma jea,
Pasautonna do akka hata naung nidokna.
Aloonna do akka parjahat
Jala hukumonna do akka halak na mangurupi parjahat.+
3 Ai jolma do halak Mesir, dang Debata,
Akka hoda ni nasida pe binatang do, dang suru-suruan.+
Molo dipatudu Jahowa huasona,*
Manang ise pe na ro mangurupi tartuktuk do,
Jala manang ise pe na diurupi madabu do,
Dung i rap mate ma nasida sude.
4 Ai songon on do didok Jahowa tu au,
“Songon singa na marauang, singa na poso na gogo na manjaga mangsana,
Na so mabiar tu akka parmahan na dijou lao mangalo ibana
Jala na so olo mundur
Nang pe nungnga marpungu nasida jala gaor lao mangalele singa i,
Songon i ma Jahowa Pamimpin ni Akka Tentara* molo dung turun lao marporang,
Lao mampartahatton Dolok Sion dohot pussuna.
5 Songon pidong na hatop habang, songon i ma hatop ni Jahowa Pamimpin ni Akka Tentara ro lao mampartahatton Jerusalem.+
Dilinggomi Ibana do i jala jagaonna.
Urupanna do i jala paluaonna.”
6 “Ale bangso Israel, nungnga takkas hamu mangalo Debata. Mulak ma hamu tu Ibana.+ 7 Di ari i, dibolokkon ganup halak ma akka debata ni nasida na so marguna jala na so mararga i. Dibolokkon nasida ma akka patung na sian perak dohot na sian mas, i ma akka patung na dibahen tangan ni nasida na mambahen nasida mardosa.
8 Mate ma halak Asiria dibahen podang, alai dang podang ni jolma,
Podang na pamatehon nasida dang podang ni jolma.+
Lari ma nasida alani podang i,
Jala dipaksa ma akka doli-doli ni nasida gabe hatoban.
9 Alani biarna, lari ma parlinggoman ni nasida na songon dolok batu i
Mabiar ma akka pamimpinna alani tiang na gabe tanda i,” ninna Jahowa,
Nappunasa api* di Sion jala nappunasa inganan panutungan di Jerusalem.